Ima tiyashcata ricui

Ima tiyashcata ricui

 CAPÍTULO 17

Jehová Diosta cˈuyashpa catishunchij

Jehová Diosta cˈuyashpa catishunchij

“Crishcapi sinchita catichij. Taita Diospaj cˈuyaipi catiraichij” (JUDAS 20, 21).

1, 2. ¿Yaya Diosta cˈuyashpa catingapajca imatataj rurana canchij?

TUCUICUNAMI alli saludta, fuerzata charisha ninchij. Chaimantami sano micunata micunchij, ejerciciocunatapish ruranchij. Ñucanchij cuerpo alli cachunca achcatami esforzarinchij. Chashnallatajmi Diosta cˈuyashpa catingapajca achcata esforzarina canchij.

2 Diosmanta yachai callarishca jahuapish paihuan alli apanacungapajmi esforzarina canchij. Judas libropi nishca shinaca Taita Diosta cˈuyashpa catingapajca crishcapi sinchiyashpami catina canchij (Judas 20, 21). ¿Crishcapi sinchiyashpa catingapajca imatataj rurana canchij?

CRISHCAPI SINCHIYASHUNCHIJ

3-5. a) ¿Diabloca Diospaj mandashcacunamantaca imatataj yuyachun munan? b) ¿Diospaj mandashcacunamanta, consejocunamantaca imatataj yuyangui?

3 Jehová Diosllata cazuna cashcataca tucui shunguhuanmi crina canchij. Diabloca, ‘gentecunaca Diospaj mandashcacunata cazushpaca llaquimi causangacuna, paicunallataj allitapish mana allitapish agllashpami cushilla causangacuna’ nishpami llullan. Ñucanchijpish  chai llullacunata crichunmi Diabloca munan. Paica Adán Eva causashca punllacunamantami llullacunata nishpa gentecunata umashca (Génesis 3:1-6).

4 ¿Ñucanchijllataj imata ruranata agllashpaca cushillachu causashun? Mana. Yuyashun, can shuj parquepi puricushpa shujtaj ladoman ama pasangapaj alambrashcatami ricungui. Chaita ricushpaca, “¿imamantashi alambrarcacuna?” nishpami tapuringui. Pero ñapish shuj leonmi alambrashca huashata ricurin. Leonta ricushpaca ¿manachu chai alambrashca tiyashcamantaca tranquilo sintiringuiman? Diabloca león shinami ñucanchijta llaquichisha nin. Dios yachachishcacunaca chai alambrashca shinallatajmi Diablo ama llaquichichun ñucanchijta huaquichin. Bibliapica: ‘Cancunata pˈiñaj Diabloca, león huacaricuj shinami, maijanta millpungapaj muyundijta mashcashpa puricun. Chaimanta yachajcuna caichij, chaparacuichij’ ninmi (1 Pedro 5:8).

5 Diosca ñucanchijcuna contento causachunmi munan. Chaimantami Diablo ñucanchijta ama llaquichichunca Bibliapi mandashcacunata, consejocunata cushca (Efesios 6:11). Santiagoca: “Cashcata ruraj mandashcaca, huatashcamanta cacharijmi. Chaita ricurashpa, uyarashpa, mana cungarishpa chaitataj rurashpa catirajca, pai imata ruracunpi cushichishcami canga” nircami (Santiago 1:25).

6. ¿Imamantataj Diosta cazuna alli can?

6 Yayitu Diosta tucuipi cazushpami alli causashun. Por ejemplo, paita tucui shunguhuan mañashpami paipajman cˈuchuyashcanchij (Mateo 6:5-8; 1 Tesalonicenses 5:17). Shinallataj tandanacuipi paita  adorashpa, huauqui panicunahuan animanacushpa, Bibliamanta yachachishpaca cushillami sintirinchij (Mateo 28:19, 20; Gálatas 6:2; Hebreos 10:24, 25). Caicunata ruranata mana saquishcamantami Diosmanta mana caruyashcanchij. Diosta cazunami tucuimanta ashtahuan alli can.

7, 8. ¿Llaquicunamanta ama yallitaj preocuparingapajca imatataj rurana canchij?

7 “Llaquicuna ricurijpica Diosta cazunaca sinchimi canga” nishpachari preocuparinchij. Pero mana sustarinachu canchij. Diosca: “Ñucami cancunata Mandaj Dios cani. Ñucamari cancunapajllataj alli canata yachachini. Cancunapaj alli cana ñantamari pushani. Ñuca imallata mandashcata cancuna cazushca cajpica, jatun yacu shinami sumaj causaica mana tucurinman  carca. Cashcata ruranapish, mama cucha yacu caiman chaiman cuyuricujlla shinami canman carca” ninmi (Isaías 48:17, 18, QC, 1989).

8 Diosta cazujpica sumaj causaica jatun yacu shinami mana tucuringa. Ima layami mama cuchapi yacucunaca cuyurinata mana saquin, chashnallataj Diosta cazushpaca cashcata ruranataca mana saquishunchu. Ima llaquicuna ricurijpipish Diostaca cazui tucunchijmi. Salmo 55:22-pica: “Cambaj llaquitaca, Mandaj Diosman apachi. Paica canta charirangami. Cashcata rurajtaca, llaquita apacuchunllaca mana saquingachu” ninmi.

SINCHI CRIJCUNA CASHUNCHIJ

9, 10. ¿Sinchi crijcunaca ima shinataj can?

9 Jehová Diospajman ashtahuan cˈuchuyangapajca ‘sinchiyashpami ñaupajman catina canchij’ (Hebreos 6:1). ¿Sinchi crijcunaca ima shinataj can?

10 Sinchi crijcuna cangapajca huatacuna pasangacama mana maqui cruzashca saquirinachu canchij. Chaipaj randica Diosta alli rijsingapaj, pai yuyashca shina yuyangapajmi esforzarina canchij (Juan 4:23). Pabloca: ‘Quiquin aicha munashcallata rurashpa causajcunaca, quiquin aichata cushichinallatami yuyancuna. Ashtahuanpish Diospaj espíritu yachachishca shina causajcunaca, Diospaj espiritupajta ruranallatami yuyancuna’ nircami (Romanos 8:5, QC, 1989). Sinchi crijcunaca aicha munaillata ruranapaj randica Diosta sirvingapajmi alli decisioncunata japincuna (Proverbios 27:11; Santiago 1:2, 3-ta leyipai). Shinallataj pi pandachisha nijpipish sinchi crijcunaca allita rurashpami catincuna.

11, 12. a) ¿Hebreos 5:14-pica Pabloca imatataj nirca? b) ¿Sinchi crijcuna cangapajca imatataj rurana canchij? Shuj ejemplota churashpa parlai.

 11 Sinchi crijcuna cangapajmi esforzarina canchij. Apóstol Pablo nishca shinaca sinchi micuica sinchiyashcacunapajllami. “Paicunami ima alli cashcatapish, ima mana alli cashcatapish yachashcamanta, ima shina cana cashcata yachancuna” (Hebreos 5:14, QC, 1989). Cai versota alli intindingapajca pelotata pugllaj runapi yuyashun.

12 Pelotahuan alli pugllanata yachangapajca achca tiempo, esfuerzomi minishtirin. Shuj huahuaca llulluraj cashpaca purinatapish mana valinchu. Asha asha huiñashpami purinata, pelotahuan ima shina pugllanatapish yachashpa catin. Pelotahuan alli pugllaj tucungapajcarin achcatami esforzarina can. Chashnallatajmi sinchi crijcuna tucungapajca tiempo, esfuerzo minishtirin.

13. ¿Jehová Dios shina yuyangapajca imatataj rurana canchij?

13 Cai libropica Dios shina yuyanata, pai mandashcacunata valoranata, pai shina imatapish runatami yachashcanchij. Ima decisionta japigricushpaca, “¿alli decidingapajca ima versocunapitaj yuyai tucuni? ¿Ima shinataj chai verso nishca shina rurai tucuni? ¿Chaita rurashpaca Diospaj ñaupajpi ima shinataj ricurisha?” nishpami tapurina canchij (Proverbios 3:5, 6; Santiago 1:5-ta leyipai).

14. ¿Diospi tucui shunguhuan cringapajca imatataj rurana canchij?

14 Ama ungungapaj, fuerzata charingapajca allimi micuna canchij. Chashnallatajmi Jehová Diospi tucui shunguhuan cringapajca paimanta alli yachana canchij. Bibliata estudiai callarishpaca Diospaj shutita,  imalla ruragrishcatami yacharcanchij. Pero Diospi tucui shunguhuan cringapajca paimanta yachanataca manataj saquinachu canchij. Chaimantami Pabloca: “Sinchi micuica sinchiyashcacunapajllami” nirca. Diospaj Shimipi nishca shinaca ‘tucui imata rurangapajpish alli yachaitarajmi mashcana canchij’. Caita rurashpaca alli yachajcunami tucushun (Proverbios 4:5-7; 1 Pedro 2:2).

15. ¿Imamantataj Diostapish, huauqui panicunatapish cˈuyana canchij?

15 Shuj runa alli saludta charishpa catingapajca cuidarishpami catina can. Chashnallatajmi sinchi crij cashpa catingapajca achcata esforzarishpa catina canchij. Pabloca: “Crijtaj cashcataca cancunallataj alli ricurichigari” nircami (2 Corintios 13:5). Sinchi crijcuna cashpapish Jehová Diosta, huauqui panicunata ashtahuan cˈuyashpami catina canchij. Pabloca: “Tucuita yachaj cashpapish, urcucunata shujtajman churangapaj tucui shunguhuan crij cashpapish, cˈuyaita mana charishpaca, imapish mana canichu” nircami (1 Corintios 13:1-3).

QUISHPIRINA YUYAILLA CAUSASHUNCHIJ

16. ¿Diabloca ima shinataj sintirichun munan?

16 Diabloca Diospaj ñaupajpi imapaj mana valishca laya sintirichun, llaquicunamanta desanimarichunmi munan. Shinallataj huauqui panicunapipish ama confiachun, llaquilla causachunmi munan (Efesios 2:2). Diabloca ñucanchijcunata desanimachishpa Diosmanta caruyachi tucushcataca allimi yachan. Pero Jehová Diosca ama desanimaringapaj ayudasha ninmi.

17. ¿Imamantataj quishpirina yuyaihuan causana canchij?

 17 Bibliapica: ‘Umapi cascota churashca shina quishpirina yuyaihuanmi causana canchij’ ninmi (1 Tesalonicenses 5:8, QC, 1989). Soldadocunaca guerrapi umata ama chugrichichunmi fierro cascota churarijcuna carca. Mana alli yuyaicuna ama pandachichunca ñucanchijpish cascota churarishca shinallatajmi quishpirina yuyailla causana canchij.

18, 19. ¿Jesusca imamantataj llaquicunata ahuantai tucurca?

18 Jesús huañugricushpaca huashan huashanmi llaquicunata charirca. Puntapica Judas Iscariotemi paitaca soldadocunaman entregarca. Qˈuipaca Pedromi “Jesustaca mana rijsinichu” nirca. Caishuj discipulocunapish pacatucushpami rircacuna. Paipaj llajta gentecunallatajmi Jesusta huañuchichun nircacuna. ¿Jesusca imamantataj cai tucui llaquicunata ahuantai  tucurca? Hebreos 12: 2-pica: ‘Paica huañushca qˈuipaca, cushicuna cashcata yachashpami paita asicujpipish mana pingarishpa caspipi huañurca. Chaimantaca Dios mandashpa tiyana alli ladopimi tiyarirca’ ninmi.

19 Jesusca llaquicunata ahuantashpaca Diosta jatunyachinata, Diablo llulla cashcata ricuchinatami yuyaipi charirca. Shinallataj jahua pachaman tigrashpa paipaj Yayahuan cana cashcatami yacharca. Chaita mana cungarishpami llaquicunata cushicushpa ahuantarca. Ñucanchijpish quishpirina yuyaihuanmi causana canchij. Chashnami ima llaquicuna shamujpipish cushicushpa ahuantashun.

20. ¿Quishpirina yuyaita ama cungaringapajca imatataj rurana canchij?

20 Ñucanchijcuna tucui shunguhuan crishcata, achca llaquicunata ahuantacushcatapish Diosca allimi  yachan (Isaías 30:18; Malaquías 3:10-ta leyipai). Paica ñucanchij shungupi yuyashcataca ñallami cunga (Salmo 37:4). Diabloca quishpirina cashcata cungarichun, Diospaj nishcacuna mana pajtarina cashcata yuyachunmi munan. Pero quishpirina yuyaita ama cungaringapajca Jehová Dios ayudachun mañashunchij. Filipenses 4:6, 7-pi nishcata yuyari. Chaipica: “Imamantapish ama llaquilla canguichij. Ashtahuanpish Diosta mañacushpaca paiman tucuita huillaichij. Tucui imamantapish Diosta mañashpaca pagui nichij. Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga” ninmi.

21, 22. a) ¿Diosca cai Allpapica imatataj cugrin? b) ¿Yaya Diosta cˈuyashpa catingapajca imatataj rurana cangui?

21 Dios cusha nishca bendicioncunapi yuyangapajca tiempotami llujchina canchij. Ñallami tucuicuna tandalla Jehová Diosta sirvishun (Apocalipsis 7:9, 14). Paraisopi causanaca maravillami canga. Tucuicunami cushilla causashun. Diablopish demoniocunapish, tucui ima llaquipish mana tiyangachu. Ña mana ungushpa huañushunchu. Shinallataj tucuicunami cai Allpa shuj paraíso tucuchun trabajashun. Maipi causanapish, micunapish mana illangachu. Caishuj chaishujmi ayudanacushun. Millai gentecunapish mana tiyangachu. Diospaj huahuacunaca cacharichishcami cangacuna (Romanos 8:21).

22 Jehová Diosca ñucanchijhuan alli amigomi casha nin. Chaimanta pai mandashcacunata cazungapaj esforzarishunchij. ¡Yayitu Diosta cˈuyashpa catishunchij! (Judas 21).