Ima tiyashcata ricui

Ima tiyashcata ricui

 LECCIÓN 7

Diosca ¿ima shinataj ñucanchijta mandanga?

Diosca ¿ima shinataj ñucanchijta mandanga?

1. Diosca ¿ima shinataj ñucanchijta mandanga?

¿Imamantataj Jesusca alli reymi can ninchij? (MARCOS 1:40-42)

Jehová Diosca paipaj Churi Jesustami, jahua pachamanta Rey shina mandachun agllashca. Apocalipsis 11:​15-ta rezapai.

Diosca tucui mandajcunata tucuchishpami cai Allpata Jesús mandachun churanga. Jesús mandashpaca jahua pachapipish cai Allpapipish Diospaj munaitami pajtachinga. Dios agllashca Reyca gentecuna minishtishcata cushpami, tucuicuna shuj shinalla cai Allpapi causachun ayudanga. ¿Manachu caicunaca alli huillaicuna can? Daniel 2:​44; Mateo 6:​9, 10; 24:​14-ta rezapai.

Cai videota ricui: ¿Diospaj Mandanaca imataj can?

2. Jesusca ¿imamantataj alli mandaj can?

Diospaj Churi Jesusca cˈuyaj, tucuita alli ruraj cashcamantami alli mandaj can (Juan 1:​14). Huañuimanta causarishca qˈuipaca Jesusca jahua pachamanmi rirca. Chaipimi mandana poderta chasquingacama Diospaj alli ladopi shuyarca (Hebreos 10:​12, 13). Mandana podertaca Diosca curcami. Chaimantami jahua pachamanta mandacushpaca gentecunata ayudangapaj Jesusca achca poderta charin. Daniel 7:​13, 14-ta rezapai.

3. ¿Jesusca paillachu mandanga?

Jahua pachamanta Jesushuan mandachunca, Diosca ashalla gentecunatami agllashca (Apocalipsis 5:10). Cai Allpapi cashpaca Jesusca huaquin gentecunatami paita catichun  agllarca. Paicunaca apostolcunami carca. Puntapica apostolcunatami Jehová Diosca Jesushuan mandachun agllarca. Diosca cunan punllacunacamami cˈaricunata, huarmicunatapish jahua pachamanta mandachun agllacushca. Paicuna huañushpaca Jesús shinami espíritu cuerpohuan jahua pachaman rin. Juan 14:​1-3; 1 Corintios 15:​42-​44-ta rezapai.

¿Mashnacunataj jahua pachaman ringa? Bibliapica ashalla gentecunami ringa ninmi. Paicunataca Jesusca ‘ashalla ovejacuna’ nircami (Lucas 12:32). 144.000 gentecunami Jesushuan Allpata mandangacuna. Apocalipsis 14:1-ta rezapai.

4. Mandana poderta cujpica ¿imatataj Jesusca rurarca?

Jesusca 1914 huatapimi mandana poderta chasquirca. Puntapica Diablota, shujtaj supaicunatapishmi jahua pachamanta cai Allpaman shitarca. * Diabloca manchanaita pˈiñarishpami tucui Allpapi achcata llaquichicun (Apocalipsis 12:​7-​10, 12). Chai punllamantami gentecunaca ashtahuan llaquicunata, ungüicunata charishca. Allpa chujchuicunapish, macanacuicunapish, yaricaipish miracushcami. Chai llaquicunata ricushpami cai Allpatapish Jesús ñalla mandana cashcata yachanchij. Lucas 21:​7, 10, 11, 31-ta rezapai.

5. Jesús Rey cashcamantaca ¿imatataj cunan punllacunapi ruracun? ¿imatataj shamuj punllacunapi ruranga?

Muyundij Allpapi alli huillaicunata yachachishpami, tucui llajtacunamanta achca gentecunata Jesusca tandachicun. Huaranga huaranga alli shungu gentecunami Jesusta ña cazucuncuna. Mana allicunata Jesús tucuchicujpica, alli shungu gentecunaca quishpiringami. Shina cajpica, Jesús mandacujpi bendicioncunata chasquingapajca Jesustami cazuna canchij. Apocalipsis 7:​9, 14, 16, 17-ta rezapai.

Jesús huaranga huatacunata mandacushpaca, gentecuna cushilla causachunmi Diospaj munaita pajtachishpa cai Allpataca shuj sumaj paraisota ruranga. Chai qˈuipaca Jesusca paipaj Yayamanmi mandanataca tigrachinga (1 Corintios 15:​24-​26). ¿Cai bendicioncunamanta shujtajcunaman parlasha ninguichu? Proverbios 2:​21, 22-ta rezapai.

 

^ par. 6 Bibliapaj profeciacuna 1914 huatapi pajtarishcata ashtahuan yachasha nishpaca, Bibliamanta yachashunchij libropi 216-220 paginacunata ricungui.