Ima tiyashcata ricui

Ima tiyashcata ricui

 LECCIÓN 3

¿Alli huillaicunaca Diosmantachu shamun?

¿Alli huillaicunaca Diosmantachu shamun?

1. ¿Pipaj yuyaicunataj Bibliapica tiyan?

Bibliapica Jehová Diospaj yuyaicunami tiyacun. Jehovami paita alli servij 40 cˈaricunata agllashpa quillcachirca. Bibliaca 66 uchilla librocunatami charin. Callari pichca librocunataca, Jesús manaraj shamujpi 1513 huatapimi Moisés quillcai callarirca. Bibliapaj tucuri librotaca Jesús shamushca qˈuipami 98 huatapi apóstol Juan quillcarca. Cai Allpapi huiñaita causana alli huillaitaca Bibliami yachachin (Proverbios 2:21). Bibliata quillcajcunataca Diosmi paipaj espirituhuan ayudarca (2 Samuel 23:2). Chai cˈaricunaca mana paicunapaj yuyaicunatachu quillcarca, Diospaj yuyaicunatami quillcarca. 2 Timoteo 3:​16; 2 Pedro 1:​20, 21-ta rezapai.

Cai videota ricui: ¿Bibliataca pitaj rurarca?

2. Biblia mana llullacushcataca ¿imamantataj crinchij?

Bibliataca Diosmi quillcachirca. Chaimantami shamuj punllacunapi ima tucunataca mana pandarishpa huillan. Gentecunaca mana chaita huillai tucunchu (Josué 23:14). Tucuita Rurai Tucuj Diosllami chaitaca huillan. Isaías 42:​9; 46:​10-ta rezapai.

Dios quillcachishcamantami Bibliaca shujtaj librocunatapish yalli alli can. Achca huaranga huaranga Bibliacunami 450 yalli shimicunapi llujshishca. Ñaupa punllacunapi quillcashca cashpapish cienciamanta parlashpaca mana pandarinchu. Bibliata 40 cˈaricuna quillcajpipish shujlla yuyaitami charin. * Shinallataj, Bibliaca Diospaj cˈuyaimantami parlan. Cunan punllacunapipish gentecunata ayudangapajmi achca poderta charin. Chaimantami achca gentecunaca Biblia Diospaj Shimi cashcata crin. 1 Tesalonicenses 2:13-ta rezapai.

Cai videota ricui: Biblia mana llullacushcataca ¿imamantataj crinchij?

 3. ¿Bibliaca imatataj huillan?

Allpapi sumaj bendicioncunata gentecunaman Dios cusha nishcatami Bibliaca huillan. Shinallataj, punta cˈari huertapi causana bendicionta chingachishcatami parlan. Ashtahuanpish, sumaj causai cutin tiyana cashcatami yachachin. Apocalipsis 21:​4, 5-ta rezapai.

Bibliaca mandashcacunata, alli yuyaicunata, consejocunatami charin. Shinallataj allita rurajcunata, mana allita rurajcunata Dios imata rurashcatami huillan. Bibliapimi Dios ima shina cashcata yachachin. Paipaj amigo tucunalla cashcatapishmi huillan. Salmo 19:​7, 11; Santiago 2:​23; 4:8-ta rezapai.

4. Bibliata entendingapajca ¿imataj ayudanga?

Diospaj Shimimanta yachachingapajca, Jesusca huaquin versocunata yuyachishpami chai versocuna imata nisha nishcata entendichirca. Cai folletopish Jesús yachachishca shinami Bibliata alli entendingapaj ayudan. Lucas 24:​27, 45-ta rezapai.

¿Dios cushca alli huillaicunata ashtahuan yachasha ninguichu? Huaquincunaca mana yachasha ninchu. Shujtajcunacarin Bibliamanta parlasha nijpica pˈiñarincunami. Chai gentecuna jarcachunca mana saquinachu cangui. Diosmanta yachacujcunallami huiñai causaita charinga. Juan 17:3-ta rezapai.

 

^ par. 3 La Biblia... ¿la Palabra de Dios, o palabra del hombre? librota ricungui.