Ima tiyashcata ricui

Ima tiyashcata ricui

 Lección 6

¿Huahua shamujpica causaica ima shinataj can?

¿Huahua shamujpica causaica ima shinataj can?

‘Huahuacunaca Mandaj Diosmanta herenciami.’ (Salmo 127:3)

Yaya mamacunapaj punta huahua shamujpica achca cushicuimi tiyan. Shinallataj huahuata cuidanapish sinchimi ricurin. Huahuata cuidangapaj achca tiempo minishtirishcata ricushpaca yaya mamacunaca achcatachari mancharin. Samaringapaj tiempota mana charishcamanta, llaquilla cashcamantami cusa huarmicunaca achcata llaquirin. Shinaca cusa huarmicunaca ishquindij ayudarishpami huahuata cuidana, paicunapurapish alli causana can. ¿Bibliapaj consejocunaca ima shinataj caita chˈimbapurachun ayudai tucun?

 1 CˈUYAIHUAN AYUDARICHIJ

BIBLIACA CAITAMI YACHACHIN: ‘Cˈuyaita charijca llaquita apajmi, alli shunguyujmi, mana paipajlla mashcanchu, mana yallitaj pˈiñarijchu’ (1 Corintios 13:4, 5). Punta huahua cashcamantami mamaca huahuata cuidanallapi yuyan. Chaimantami cusaca paita cungashcata yuyai tucun. Shinapish huarmica mana cungarinachu can, cusapish paita yuyarichunmi munan. Chaimantami huarmica mana pˈiñarishpa cˈuyaihuan paita minishtishcata, huahuata cuidashpa ayudachun minishtishcatapish ricuchina can.

“Cusacunapish cancunapaj huarmicunahuanca alli yuyarishpa causaichij” (1 Pedro 3:7). Cunanlla yaya cashpaca, cambaj huarmica huahuata cuidangapaj achca tiempota minishtishcatami entendina cangui. Chaimantami huaquinpica shaicushca, llaquillapish sintiringa, achca ruraicunata charishcamanta canhuanpish pˈiñaringachari. Shinapish mana pˈiñarinachu cangui. Bibliaca: “Mana utca pˈiñarij runaca, pitapish jahualla mishajta yalli allimari” ninmi (Proverbios 16:32). Chaimantami alli yuyashpa huarmi imata minishtishcata cuna cangui (Proverbios 14:29).

CAITA RURAI:

  • Yaya: Tutacunapish huahuata cuidashpa huarmita ayudai. Cambaj huarmihuan, huahuahuan cangapaj shujtaj ruraicunamanta tiempota surcui

  • Mama: Cambaj cusa, huahuata cuidasha nijpica saquinallami cangui. Mana can shina alli cuidajpica mana pˈiñarishpami huahuata ima shina cuidanata yachachina cangui

 2 CUSANDIJ HUARMINDIJ ALLI APANACUICHIJ

BIBLIACA CAITAMI YACHACHIN: “Ishquindijmanta shuj aichallami tucunga” (Génesis 2:24). Familiapi shuj huahua tiyajpipish cusandij huarmindij ‘shuj aichalla’ cashcataca mana cungarinachu canguichij. Cusandij huarmindij alli causangapajca ayudarishpami catina canguichij.

Huarmi, cambaj cusa ayudashcamanta pagui ni. Alli shimicunahuan parlana, pagui ninaca ‘jambicuna’ shinami can (Proverbios 12:18). Cusa, cambaj huarmita cˈuyashcata, valishca cashcatapish ricuchi. Shinallataj familiata ayudangapaj imallata rurashcamanta pagui ni (Proverbios 31:10, 28).

“Pipish quiquinpaj allipajllaca ama mashcachun, ashtahuanpish shujtajpaj allipaj mashcachun.” (1 Corintios 10:24.) Cambaj huarmipaj o cusapajmi imatapish alli rurana cangui. Pai ayudashcamantapish pagui ninami cangui. Cancunapura parlanacungapajmi tiempota surcuna canguichij. Cusahuan huarmihuan chayarinatapish mana mitsarinachu canguichij. Cambaj huarmi o cusa imata minishtishcatami ricuna cangui. Bibliaca: ‘Caishujpish chaishujpish ama mitsarinacuichijchu. Ishquindij shuj yuyailla tucushpa ashacama jarcarichij’ ninmi (1 Corintios 7:3-5). Chaimantami cusandij huarmindij chayarinamantaca mana pingai tucushpa parlanacuna canguichij. Mana pˈiñarina, entendinapish cusandij huarmindij alli causachunmi ayudan.

CAITA RURAI:

  • Cambaj huarmihuan o cusahuan cangapaj tiempota surcui

  • Cambaj huarmiman o cusamanca uchilla regalocunata cushpa, sumaj shimicunata quillcashpami cˈuyashcata ricuchina cangui

 3 HUAHUAMAN YACHACHI

BIBLIACA CAITAMI YACHACHIN: ‘Canca huahuamanta pachami, Diospaj Quillcacunataca yachangui. Chaicunami cantaca yachajta rurai tucun’ (2 Timoteo 3:15). Huahuaman ima shina yachachinata yuyai. Huahuacunaca manaraj huacharishpallatajmi achcata ña yachai tucun. Mamapaj huijsapi cashpallatajmi can parlashcata rijsin, cushicun, llaquirinpish. Mana tucuita entendijpipish uchillamantami huahuamanca rezanata yachachina cangui. Chashnami huahua huiñashpa rezana munaita charichun ayudangui.

Diosmanta yachachingapajca huahuaca uchillami can nishpaca mana yuyanachu cangui. Huahuapaj ñaupajpimi Jehová Diosta mañana cangui (Deuteronomio 11:19). Huahuahuan pugllacushpaca imallata Dios rurashcatami parlana cangui (Salmo 78:3, 4). Huahua huiñashpaca Jehová Diosta can cˈuyashcata ricushpami paipish Diosta cˈuyanga.

CAITA RURAI:

  • Huahuaman alli yachachingapaj Diosta mañai

  • Huahua utca yachachunca minishtirishca yuyaicunata, shimicunatapish cutin cutin parlai