Ima tiyashcata ricui

Ima tiyashcata ricui

 LECCIÓN 31

Josuepish Gabaonitacunapish

Josuepish Gabaonitacunapish

Canaanpi tiyaj shujtaj llajtacunaca Jericopi ima tucushcatami yachaj chayarcacuna. Chaimi chai llajtacunata mandajcunaca israelitacunahuan macanacungapaj tandanacurcacuna. Pero Gabaonpi causajcunaca mauca churanata churarishpami Josuepajman rishpa, ‘caru llajtamantami shamurcanchij. Jehová cancunamanta Egipto llajtapi, Moab llajtapi imalla rurashcatami uyashcanchij. Ñucanchijta mana llaquichijpica cancunatami sirvishun’ nircacunami.

Josueca paicuna nishcata crishpami mana llaquichishunchu nirca. Quimsa punllacuna q⁠ˈ⁠uipaca gabaonitacuna mana carumanta cashcata ashtahuanpish Canaanmanta cashcatami yachaj chayarca. Chaimi Josueca, ‘¿ima nishpataj llullarcanguichij?’ nirca. Gabaonitacunaca, ‘manchaimantami chashna nircanchij. Jehová Dios cancunamanta macanacujtami yachanchij. Ama huañuchihuaichijchu’ nircacunami. Josueca pai nishcata pajtachishpami mana imata rurarca.

Asha tiempo q⁠ˈ⁠uipaca Canaanmanta 5 mandajcunami gabaonitacunata llaquichingapaj rircacuna. Josueca paipaj soldadocunandijmi gabaonitacunata ayudanaman tucui tuta rircacuna.  Macanacuica cayandij tutamantami utca callarirca. Cananeocunaca tucui ladocunatami miticushpa rircacuna. Pero Diosca jatun rumi vali rundutami paicunapaj jahuapi urmachirca. Chaipimi Josueca inti ama huashicuchun Diosta mañarca. ¿Josueca imamantataj chaita mañarca? Paica Jehovapimi tucui shunguhuan crirca. Chaimi intica mana huashicurca. Chai punllaca israelitacuna Canaanpi mandajcunata, soldadocunatapish mishangacamami intica mana huashicurca.

“Imatapish ari nina cajpica, ari ninguichij. Mana nina cajpica, mana ninguichij. Imatapish yallihuan mirachishpa rimana yuyaitaca Diablomi cun” (Mateo 5:37, QC, 1989).