Ima tiyashcata ricui

Ima tiyashcata ricui

 LECCIÓN 22

Puca cuchapimi shuj jatun milagro tiyarca

Puca cuchapimi shuj jatun milagro tiyarca

Faraonca israelitacuna Egiptomanta llujshishcata uyashpaca richijlla nishcatami arrepintirirca. Chaimi paipaj soldadocunataca, ‘paicuna richunca mana saquinachu carcanchij. Macanacuna carrocunata allichichij, paicunata catishpa ringapaj’ nirca. Q⁠ˈ⁠uipaca paipish paipaj soldadocunadijmi israelitacunata catishpa rircacuna.

Jehovami paipaj llajtataca punllaca p⁠ˈ⁠uyuhuan, tutaca lunyacuj ninahuan achijyachishpa pushacurca. Chaimi puca cuchaman pushashpa, caipi carpacunata shayachichij nirca.

Q⁠ˈ⁠uipaca faraonpish paipaj soldadocunapish catishpa shamucujtami israelitacunaca ricurcacuna. Shinallataj paicunapaj ñaupajpica puca cuchami tiyarca. Chaupipi cashcamantami Moisestaca, ‘huañugrinchijmari, imapajtaj Egiptomantaca llujshichimurcangui’ nishpa caparircacuna. Chaimi Moisesca, ‘ama manchaichijchu. Cunanmi ricushun ima shinami Jehová ñucanchijta quishpichijta’ nirca. Moisesca tucui shunguhuanmi Jehovapi crirca ¿nachu?

Diosca Israelitacunataca, ‘carpa huasicunata pascaichij’ nircami. Chai tutaca Diosca p⁠ˈ⁠uyutaca egipciocunapaj israelitacunapaj chaupipimi  churarca. Egipciocunapaj ladopica amsami carca. Israelitacunapaj ladopica achijllami carca.

Q⁠ˈ⁠uipaca Diosca Moisestaca, ‘cambaj maquita yacu jahuata chutai’ nircami. Chaita rurajpica tucui tuta jatun huaira shamushpami chai cuchataca ishquipi chaupirca. Chashnami shuj ñan tucurca. Achca millón israelitacunaca chaquishca ñanta purishpami caishuj ladoman pasarcacuna.

Faraonpaj soldadocunapish chai ñanllatataj rishpami israelitacunata catircacuna. Pero Diosca soldadocunata muspachijpimi carrocunapaj ruedacunaca llujshircacuna. Chai soldadocunaca, ‘¡caimanta jacuchij! Jehová Diosmari paipaj llajtamanta macanacucun’ nishpami caparircacuna.

Diosca Moisestaca, ‘cucha jahuata cambaj maquita chutai’ nircami. Chaimi pata laya yacuca ñapish soldadocuna jahuapi urmashpa taparca. Faraonpish soldadocunapish tucuimi huañurcacuna. Shujllapish mana quishpirircachu.

Caishuj lado yacu c⁠ˈ⁠uchupica israelitacunaca Diosta alabashpami, ‘Jehová Diostaca jatun cashcamantami alabashun. Paica caballocunata, soldadocunatapish cuchapimi shitashca’ nishpami cantarcacuna. Tucuicuna cantacujpica huarmicunapish panderetacunata tocashpami bailarcacuna. Achcata cushicushpami cunantajca quishpirishcanchijmari nircacuna.

“Chashna cajpimi, imata mana manchashpa: ‘Jatun Diosca ñucata ayudajmi. Pipish ñucata imata ruranataca, mana manchanichu’ ninchij” (Hebreos 13:6).