Ima tiyashcata ricui

Ima tiyashcata ricui

 LECCIÓN 17

Moisesca Diosta sirvinatami agllarca

Moisesca Diosta sirvinatami agllarca

Jacobpaj familiacunataca israelitacuna nishpami Egiptopica rijsijcuna carca. Jacob, José huañushca q⁠ˈ⁠uipaca shujtaj faraonmi mandai callarirca. Chai faraonca israelitacuna egipciocunata yalli sinchi tucucujta ricushpami mancharca. Chaimantami israelitacunataca esclavocunata rurarca. Paicunataca ladrillocunata rurachun, allpapi sinchita trabajachunmi obligarca. Egipciocuna yallitaj llaquichijpipish israelitacunaca ashtahuanmi mirashpa catircacuna. Chaimantami faraonca israelitacunapaj tucui llullu c⁠ˈ⁠ari huahuacunata huañuchichun mandarca. Israelitacunaca mancharishcacunami canga ¿nachu?

Jocabed (Jokébed) shuti israelita huarmimi sumaj huahuata charirca. Huahuata cuidangapajmi shuj canasta ucupi churashpa Nilo yacupi tiyaj carrizo chaupipi churarca. Chai huahuapaj pani Mariaca (Míriam) ima tucujta ricungapajmi chai c⁠ˈ⁠uchullapi saquirirca.

Q⁠ˈ⁠uipaca faraonpaj ushushimi yacupi armangapaj uriyamurca. Chaipimi shuj canastata ricurca. Chai canasta ucupica shuj llullu huahua huacacujta ricushpami llaquirirca. Chaimi María  c⁠ˈ⁠uchuyashpaca, ‘¿cai huahuata chuchuchishpa huiñachichunca shuj huarmita cayana allichu canman?’ nirca. Paica ari, mashcamugri nircami. Mariaca huahuapaj mamallatatajmi pushamugrirca. Jocabed chayajpimi faraonpaj ushushica, ‘cai huahuata apashpa huiñachishpa cui, pagashallami’ nirca.

Huahua ña huiñajpica Jocabedca faraonpaj ushushimanmi cugrirca. Paica Moisés shutitami churarca. Paipaj huahuata shinami huiñachirca. Moisesca faraonpaj churi shina cashcamantami tucui pai munashcata charirca. Pero Diostaca nunca mana cungarircachu. Moisesca israelita cashcatami alli yacharca. Paica Jehová Diosta sirvinatami agllarca.

40 huatacunata charishpami Moisesca paipaj llajtata ayudasha nirca. Shuj punllaca egipcio runa shuj israelitata macacujtami ricurca. Chaita ricushpami Moisesca chai runataca tucui fuerzahuan huajtarca. Chai runa huañujpimi t⁠ˈ⁠iyu allpa ucupi pacarca. Chaita yachaj chayashpami faraonca Moisesta huañuchisha nirca. Pero paica miticushpami Madián llajtaman rirca. Chaipica Diosmi paitaca cuidarca.

‘Crishcamantami Moisesca ña jatunyashpaca, faraonpaj ushushipaj churi nishca canataca mana munarca. Dios agllashcacunahuan llaquita apanatami agllarca’ (Hebreos 11:24, 25).