Ima tiyashcata ricui

Ima tiyashcata ricui

 LECCIÓN 21

Tucuri jatun llaqui

Tucuri jatun llaqui

Moisesca faraontaca cutin ricungapajca mana shamushachu nircami. Pero manaraj rishpami paica faraontaca, ‘cunan chaupi tutatami Egiptopi causajcunapaj punta churicunaca huañunga. Faraonpaj churimanta callarishpaca paipaj esclavopaj churicamami huañunga’ nirca.

Jehová Diosca israelitacunataca, ‘yuyarina micuita ruraichij. Shuj huatata charij ovejata cashpa, chivota cashpa huañuchichij. Chai yahuarta japishpa huasi pungu caspicunapi llihuichij. Cusashca aichata levadura illaj tandahuan micunguichij. Ringapajca listo canguichij. Cunan tutami cancunataca quishpichigrini’ nircami. Israelitacunaca achcatami cushicushcacuna canga ¿nachu?

Chaupi tutami Diospaj angelca Egiptopi caj tucui huasicunaman rirca. Huasi pungu caspipi yahuarhuan mana llihuishca cajpica charijcunapaj, huajchacunapaj punta churicunaca huañurcami. Pero pungupi yahuarhuan llihuishca cajpica israelitacunapaj punta churicunataca angelca mana huañuchircachu.

Faraonpaj punta churipishmi huañurca. Faraonca yallitaj llaquilla sintirishpami ña mana ashtahuan jarcai tucushpa Moisesta, Aarontaca, ‘caimanta llujshishpa richij. Cancuna nishca shinallataj cancunata Mandaj Diospajta ruranaman richij. Cancunapaj animalcunatapish apashpa utca richij’ nirca.

 Chai tutaca luna jundami carca. Israelitacunaca familiapura, aillupurami tandalla Egiptomanta llujshircacuna. 600.000 c⁠ˈ⁠aricunami llujshircacuna. Achca huarmicunapish huahuacunapishmi llujshircacuna. Achca egipciocunapishmi paicunahuan Diosta adorangapaj rircacuna. Israelitacunaca ña mana esclavocunachu carca.

Jehová paicunata quishpichishcata yuyaringapajmi cada huata chai micunata rurana carcacuna. Chai micuitami Pascua nishpa shutichircacuna.

“Ñuca poderta canpi ricuchingapaj, ñuca shutipish tucui cai pachapi huillashca cachunmi, cantaca jatun mandajta churarcani” (Romanos 9:17).