Jehová Diosca Jacobmanca, ‘ima shinami Abrahamta, Isaacta cuidarcani chashnallatajmi cantapish cuidasha’ nircami. Jacobca Harán llajtapimi causai callarirca. Chaipimi cazararca, achca huahuacunata charirca. Chashnallataj charij runami tucurca.

Achca huatacuna qꞌuipami Diosca Jacobtaca, ‘cambaj yaya mamapaj llajtaman tigrailla’ nircami. Chaimi paipaj familiandij rigrircacuna. Ñanpica paita sirvijcunaca, ‘cambaj huauquipish canta tupanamanmi 400 runacunahuan shamucun’ nircacuna. Jacobca paita, paipaj familiatapish Esaú llaquichinata manchashpami Diostaca, ‘Esaupaj maquimanta quishpichihuai’ nishpa mañarca. Cayandij punllaca Jacobca ovejacunata, chivocunata, vacacunata, camellocunata, burrocunatami Esauman cuchun cacharca.

Chai tutaca Jacob pailla cashpami shuj angelta ricurca. Chai angelca paihuanmi macanacui callarirca. Cayandij punllacamami Jacobca chugririshca cashpapish macanacucurcalla. Chai ángel cachari nijpipish Jacobca, ‘ñucata mana bendiciajpica manataj cacharishachu’ nircami.

 Chai angelca Jacobta bendiciarcami. Chaimantami Jacobca paita Esaú llaquichichunca Dios mana saquina cashcata yacharca.

Chai tutamantaca Esaú 400 runacunahuan shamucujtami Jacobca ricurca. Paica paipaj familiapaj puntapi rishpami Esaupaj ñaupajpi 7 cutin cumurirca. Esauca callpashpami Jacobta ugllarishpa ishquindij huacarcacuna. Chashnami alli tucurcacuna. Jacob chashna rurashcamantaca Diosca cushicushcangami ¿nachu?

Chai qꞌuipaca Esauca paipaj huasiman tigrajpimi Jacobca pai ricushca llajtaman rirca. Jacobpaj 12 churicunaca: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjamín shuticunami carca. Achca huatacuna qꞌuipaca Diosca Josemantami paipaj llajtata quishpichina carca. ¿Ima shinataj chaitaca rurana carca? Catij leccionpimi yachashun.