Ima tiyashcata ricui

Ima tiyashcata ricui

 LECCIÓN 9

Diosmi paicunamanca shuj huahuata curca

Diosmi paicunamanca shuj huahuata curca

Abrahampish Sarapish achca huatacunatami cazadocuna carca. Ur llajtapi charishca alli huasita saquishpami carpa huasipi causanaman rircacuna. Pero Saraca Jehová Diospi confiashcamantami cushilla causarca.

Saraca shuj huahuata charinata achcata munashcamantami Abrahamtaca, ‘ñucapajta ruraj Agar huarmihuan shuj huahuata chari. Chai huahuaca ñuca huahua shinami canga’ nircami. Agar ña huahuata charijpica Ismaeltami shutichircacuna.

Achca huatacuna q⁠ˈ⁠uipaca Abrahamca 99, Saraca 89 huatacunata charijpimi paicunata visitanaman quimsa runacuna chayarca. Paicunataca yura ucupi samarichun, micuchunmi Abrahamca invitarca. ¿Picunashi carca? Angelcunami carca. Paicunami Abrahamtaca, ‘shamuj huatapajca cancunaca shuj c⁠ˈ⁠ari huahuatami charinguichij’ nirca. Chashna nijta carpa huasi ucumanta Sara uyashpami shungu ucupi asishpa, ‘¿ciertochu ñucaca yuyaj cashpapish shuj huahuata charisha?’ nirirca.

 Shuj huata huashaca Diospaj ángel nishca shinami Saraca shuj huahuata charirca. Abrahamca chai huahuataca Isaac shutitami churarca. Isacca “asina” nisha ninmi.

Isaac ña 5 huatacunata charijpimi Ismaelca paita chanzata rurashpa purirca. Saraca chaita ricushpami Isaacta cuidasha nishpa Abrahamtaca, ‘Agartapish Ismaeltapish llujshichishpa cachai’ nirca. Abrahamca mana chaita rurasha nircachu. Pero Jehovapish Isaacta cuidanatami munarca. Chaimantami Abrahamtaca, ‘Sara ima nishcata uyai. Ismaeltaca ñucami cuidasha. Ñuca canman imalla nishcacunaca Isaacmantami pajtaringa’ nirca.

‘Diosca pai cusha nishcataca pajtachij cashcata Sara crishcamantami, shuj c⁠ˈ⁠ari huahuata huacharca’ (Hebreos 11:11).