Ima tiyashcata ricui

Ima tiyashcata ricui

 LECCIÓN 99

Carcelta cuidajmi Diosmanta yacharca

Carcelta cuidajmi Diosmanta yacharca

Filipos pueblopica shuj demonio japishca huarmi huambrami causarca. Paica shamuj punllapi ima tucunatami adivinaj carca. Chaita ruraj cashcamantami paipaj amocunaca achca cullquita japijcuna carca. Pablopish Silaspish chai llajtaman chayajpica huambraca, ‘cai runacunaca jahua pachapi caj Diospajta rurajcunamari’ nishpami caparirca. Achca punllacunata chashna caparishpa catirajpimi Pabloca chai huambrapi caj demoniotaca, ‘Jesuspaj shutipi, cai huambramanta llujshi nini’ nirca. Chashna nijpimi chai huambramantaca llujshirca.

Chai huambrapaj amocunaca cullquita ña mana japina cashcata yachashpami p⁠ˈ⁠iñarircacuna. Chaimi Pablota, Silastapish japishpa mandajcunapajman juezcunapajman aparcacuna. Paicunapaj ñaupajpica amocunaca, ‘cai runacunaca bullata rurashpami puricuncuna, leycunatapish mana cazusha nincunachu’ nircacunami. Chashna nijpimi juezcunaca, ‘cunanca Pablota, Silastapish macashpa carcelpi churaichij’ nircacuna. Carcelta cuidajca paicunataca ashtahuan ucu c⁠ˈ⁠uchumanmi aparca. Chaquicunatapish jutcushca tablacunapimi canichishpa churarca.

Ashtahuanpish chaupi tutataca Pablopish Silaspish Diosta alabashpami cantacurcacuna. Chaipi caj shujtaj prezushcacunapish uyacurcacunami. Chashna cantacujpimi ñapish allpa chujchui callarirca. Sinchita chujchujpimi carcelpaj pungucunaca pascarirca. Prezushcacunata huatashca cadenacunapish cacharirircami. Chaimi carcelta cuidajca ucu c⁠ˈ⁠uchucama rishpa pungucuna pascarishca cashcata ricurca. Tucui prezushcacuna llujshishcata yuyashpami paipaj espadallahuantaj huañusha nirca.

Chaimi Pabloca, ‘¡ama chaita ruraichu! Tucuicunami caipi canchij’ nishpa sinchita caparirca. Chaita uyashpami carcelta cuidajca Pablopaj Silaspaj ñaupajpi cungurirca. Q⁠ˈ⁠uipaca, ‘¿imatataj rurana cani?’ nijpimi paicunaca, ‘canpish cambaj familiapish Jesusta crishpaca quishpiringuichijmi’ nircacuna. Pablo, Silaspish paiman, paipaj familiamanpish Diospaj Shimimanta yachachishpami catircacuna. Q⁠ˈ⁠uipaca paicunaca bautizarircacunami.

‘Cancunataca prezu apangacunami. Catirashpa llaquichingacunami. Sinagogacunaman, carcelcunamanpishmi apangacuna. Ñucata caticushcamantaca jatun mandajcunapajman, llajtata mandajcunapajmanpishmi apangacuna. Chaipimi paicunaman ñucamanta huillai tucunguichij’ (Lucas 21:12, 13).