Ima tiyashcata ricui

Ima tiyashcata ricui

 LECCIÓN 89

Pedroca Jesusta mana rijsinichu nircami

Pedroca Jesusta mana rijsinichu nircami

Jesuspish paipaj apostolcunapish huasi jahua pisopimi tandanacushcacuna carca. Chaipimi Jesusca pai huañunata yuyarichun nishca q⁠ˈ⁠uipaca, ‘cunan tutallataj ñucataca tucuicuna shitashpami ringuichij’ nirca. Pedroca, ‘tucuicuna shitashpa rijpipish ñucaca manataj saquishachu’ nircami. Chaimi Jesusca, ‘gallo manaraj cantajpimi ñucataca quimsa cutin mana rijsinichu ningui’ nirca.

Soldadocuna Jesusta Caifaspaj huasiman pushangacamami casi tucui apostolcuna miticushpa rishcacuna carca. Pero ishqui apostolcunaca huashallami catishpa rircacuna. Por ejemplo, Pedroca Caifaspaj huasi canllacamami rirca. Chaipimi ninapi cununaman c⁠ˈ⁠uchuyarca. Nina achiyachijpimi shuj huarmica, ‘cantaca rijsinimi Jesushuan purijmi cangui’ nirca.

Pedroca, ‘imatachari nicungui’ nishpami huasi pungucama rirca. Paita ricushpami shujtaj sirvij huarmica, ‘cai runaca Jesushuanmi purij carca’ nirca. Chaimi Pedroca cutinllataj, ‘Jesús pi cashcata mana yachanichu’ nirca. Q⁠ˈ⁠uipaca shujtaj runapish, ‘canpish galileopurallatajmi cangui. Jesús shinami rimangui’ nijpimi Pedroca, ‘Taita amito, chai runataca manataj rijsinichu’ nirca.

Chai ratomi shuj gallo cantarca. Jesús ricucujpimi Pedropish paita ricurca. Chaimi Jesús ima nishcata yuyarishpa canllaman llujshishpa, achcata llaquirishpa huacarca.

Chai tiempopica sacerdotecunami tandanacushpa juiciota rurajcuna carca. Chaimantami sacerdotecunaca Caifaspaj huasipi Jesusta juzgangapaj ña tandanacushcacuna carca. Paicunaca Jesusta huañuchingapajmi shuj yuyailla tucurcacuna. Pero chaita rurangapajca imata mana juchachi tucurcacunachu. Ultimopica Caifasca, ‘¿Yaya Diospaj Churichu cangui?’ nishpa tapujpimi Jesusca, ‘ari, ñucaca Diospaj Churimi cani’ nirca. Chaipimi Caifasca, ‘¡chashna nishpaca Diostamari c⁠ˈ⁠amicun!’ nirca. Sacerdotecunapish chashna nishcamantaca huañunami can nircacunami. Q⁠ˈ⁠uipaca Jesustaca  ch⁠ˈ⁠ucashpa, ñahuita tapashpa huajtashpami, ‘¡profeta cashpaca maijantaj huajtanchijyari!’ nircacuna.

Punllayajpica Jesustaca sacerdotecuna tandanacuna huasimanmi aparcacuna. Chaipimi, ‘¿Yaya Diospaj Churichu cangui?’ nishpa cutin tapurcacuna. Jesusca, ‘cancuna nishca shinallataj chaimi cani’ nircami. Chashna nijpimi paicunaca, ‘Diostamari c⁠ˈ⁠amicun’ nircacuna. Q⁠ˈ⁠uipaca mandaj Poncio Pilatopaj huasimanmi aparcacuna. ¿Chaipica paitaca imatataj rurarcacuna? Ricushun.

‘Ñucallata saquishpa, cancuna maita ri tucushcata, caita chaita rinami chayamucun. Chashna rurajpipish mana ñucallachu cani, Yayaca ñucahuanmari’ (Juan 16:32).