Ima tiyashcata ricui

Ima tiyashcata ricui

 LECCIÓN 81

Jesusca shuj urcupimi yachachirca

Jesusca shuj urcupimi yachachirca

Doce apostolcunata agllashca q⁠ˈ⁠uipaca Jesusca urcumanta uriyamushpami achca tandanacushca gentecunapajman chayarca. Chai gentecunaca Galilea, Judea, Tiro, Sidón, Siria, Jordán yacu ladomantapishmi shamurcacuna. Paicunaca ungushcacunata, demonio japishcacunata apamujpimi Jesusca tucuicunata jambirca. Q⁠ˈ⁠uipaca Jesusca tiyarishpami Diospaj amigo cangapaj imata rurana cashcata yachachi callarirca. Diospaj amigo cangapajca ñucanchij causaita pushachunmi saquina canchij. Shinallataj paita c⁠ˈ⁠uyangapajca paimantami yachana canchij. Diosta mana c⁠ˈ⁠uyashpaca shujtajcunatapish mana c⁠ˈ⁠uyai tucushunchu. Chaimantami tucuicunapaj allita rurana canchij. Ñucanchij enemigocuna cajpipish allimi tratana canchij nishpami yachachirca.

Jesusca, ‘amigocunallataca mana c⁠ˈ⁠uyanachu cangui. Enemigocunatapish c⁠ˈ⁠uyanami cangui. Shungumantami perdonana cangui. Chashnallataj pi, canhuan p⁠ˈ⁠iñarijpica chai ratomi paihuan  alli tucuna cangui. Canta ima shina tratachun munashca shinami shujtajcunatapish tratana cangui’ nircami.

Shinallataj Jesusca, ‘cullquita c⁠ˈ⁠uyanapaj randica Diostami c⁠ˈ⁠uyana cangui. Cullquitaca maijanpish shuhuai tucunmi. Pero Diosmantaca pi mana caruyachi tucungachu. Chaimanta micunamanta, churanamanta mana sustarinachu cangui. Pajaritocunata ricui. Diosca paicunataca siempremi cuidaracun. Micuna ama illachunpish mana saquinchu. Yalli sustarishpaca mana ashtahuan huatacunata causanguichu. Diosca imalla minishtishcacunataca allimi yachan’ nircami.

Jesús ima shina yachachishcata uyashpami gentecunaca mancharircacuna. Religionta pushajcunaca mana chashna yachachijcunachu carca. ¿Imamantataj Jesusca alli yachachij carca? Tucui yachachishcacunaca Diosmantami shamurca.

“Yugota apaj shina ñuca yachachishcata catichij. Ñucaca mana p⁠ˈ⁠iñarij, alli shungumi cani. Ñucamantami cancunapaj almaca samaringa” (Mateo 11:29, QC, 1989).