Ima tiyashcata ricui

Ima tiyashcata ricui

 LECCIÓN 74

Jesusca Mesiasmi can

Jesusca Mesiasmi can

Juanca, ‘ñucapaj q⁠ˈ⁠uipa shamucujca ñucata yalli imatapish rurai tucujmi’ nishpami huillacurca. Jesusca casi 30 huatacunata charishpami Galileamanta Jordán yacuman rirca. Chaipi gentecunata Juan bautizacujpimi Jesusca ñucatapish bautizai nirca. Pero Juanca, ‘ñucamari can bautizashca cana cani. ¿Maitataj canca ñucataca bautizai ninguiyari?’ nircami. Chashna nijpimi Jesusca, ‘Diosca canmi ñucata bautizachun munan’ nirca. Chaimi Juanca Jesusta yacupi tucui pambarca.

Yacumanta llujshishca q⁠ˈ⁠uipaca Jesusca Jehovatami mañarca. Chai ratomi jahua pacha pascarijpi Diospaj espíritu paloma shina shamushpa Jesuspaj jahuapi tiyarirca. Jahua pachamantaca Jehová Diosca, ‘caimi ñuca c⁠ˈ⁠uyashca Churi. Paipimi cushicuni’ nircami.

Chashnami Diospaj espirituta Jesusca chasquirca. Chai punllamantami Cristo o Mesías tucurca. Cunanca Jehová Dios imata mingashcatami cai allpapi pajtachi callarirca.

Bautizarishca q⁠ˈ⁠uipallaca shitashca pambamanmi Jesusca rirca. 40 punllacunatami chaipi carca. Chai huashaca Juanta ricunamanmi rirca. Paipajman c⁠ˈ⁠uchuyamucujpimi Juanca, ‘¡caimari cai pachapi causajcunapaj juchata anchuchij Taita Diospaj malta Ovejaca!’ nirca. Jesús Mesías cashcata gentecuna yachachunmi Juanca chashna nirca. ¿Shitashca pambapi Jesushuan ima tucushcata yachasha ninguichu? Ricushun.

“Jahua pachamantaca: ‘Canmi ñuca c⁠ˈ⁠uyashca Churi cangui. Canpimi cushicuni’ nishpa rimashcami uyarirca” (Marcos 1:11).