Ima tiyashcata ricui

Ima tiyashcata ricui

 LECCIÓN 83

Jesusca achca gentecunamanmi cararca

Jesusca achca gentecunamanmi cararca

Huata 32-pi, Pascuata yuyarina punlla manaraj chayajpimi apostolcunaca Diosmanta huillashpa tigrarcacuna. Shaicushcacuna cajpimi Jesusca Betsaida llajtaman samaringapaj barcopi pusharca. Chai llajtaman chayamujpica achca gentecuna paicunata chaicama catimushcatami Jesusca ricurca. Paica paipaj apostolcunallahuan casha nishpapish llaquishcamantami gentecunata alli chasquirca. Ungushcacunatapish alliyachircami. Dios churashca Mandanamantapish tucui punllami yachachirca. Ña chishiyajpimi apostolcunaca, ‘gentecunaca yaricachicungami micunata randigrichij nishpa cachailla’ nircacuna.

Chashna nijpimi Jesusca, ‘paicunaca imapaj mana rinachu can, cancunallataj caraichijlla’ nirca. Apostolcunaca, ‘cai tucuicunaman carangapajca ¿maipitaj tandataca randishunyari?’ nircacunami. Chaimi Felipeca, ‘achca cullquita charishpapish micunata randingapajca mana tucuicunapaj pajtangachu’ nirca.

Chaimi Jesusca, ‘¿carangapajca imataj tiyan?’ nishpa tapurca. Andresca, ‘pichca tandacunalla, ishqui pescadocunallami tiyan. Chaillaca mana avanzangachu’ nircami. Chashna nijpimi Jesusca, ‘chaicunata caiman apamuichij’ nirca. Chai q⁠ˈ⁠uipaca maijancunataca 50-pura, caishujcunataca 100-pura tiyarichunmi mañarca. Jesusca chai tandata, pescadocunata japishpami huichilla ricushpa Yaya Diosta mañarca. Q⁠ˈ⁠uipaca apostolcunaman micunata cujpimi paicunaca chaupishpa tucui chaipi tiyacujcunaman cararcacuna. 5.000 c⁠ˈ⁠aricuna, huarmicuna, huahuacunapishmi mana nijta  micurcacuna. Micushca q⁠ˈ⁠uipaca ama ima desperdiciarichunmi 12 canastacunata apostolcunaca tandarcacuna. Chai milagrota ricunaca sumajmi cashcanga ¿nachu?

Chai milagrota ricushcamantami gentecunaca Jesús rey tucuchun munarcacuna. Pero chai punlla manaraj chayamushcamantami Jesús rey tucuchun Diosca manaraj munarca. Chaitaca Jesuspish allimi yacharca. Chaimi gentecunataca cayacama nishpa cacharca. Apostolcunatapish Galilea cucha ch⁠ˈ⁠imba ladoman barcopi richij nishpami mandarca. Chai q⁠ˈ⁠uipaca paipaj Yayata mañangapajmi Jesusca pailla shuj urcuman rirca. Shinami ocupado cashpapish Diosta mañangapajca tiempota surcuj carca.

“Chingarijlla micunataca ama mashcaichijchu, ashtahuanpish mana tucurij huiñai causaipaj micunata mashcaichij. Chaitaca, Runa Aichayujmi cancunamanca cunga” (Juan 6:27).