Ima tiyashcata ricui

Ima tiyashcata ricui

 LECCIÓN 73

Mesías shamunatami Juanca huillarca

Mesías shamunatami Juanca huillarca

Juanca Zacariaspaj Elisabetpaj churimi carca. Jehová Diosmi profeta cachun agllarca. Chaimi Mesías ñalla shamunata gentecunaman huillarca. Paica sinagogacunapi o pueblocunapi huillanapaj randica shitashca pambacunapimi huillaj carca. Juanta uyanamanca Jerusalenmanta Judeamantami achcacuna shamuj carca. Paica, ‘Yaya Dios cushilla cachunca mana alli ruraicunata saquinami canguichij’ nircami. Achca gentecuna juchacunamanta arrepintirijpimi Juanca Jordán yacupi paicunata bautizaj carca.

Juanca pai minishtishcallahuanmi causarca. Camello millma churanatami churarij carca. Langostacunata, mieltami micuj carca. Gentecunaca paitami ashtahuan rijsishun nircacuna. Jatun tucushca fariseocuna, saduceocunapish paitami ricunaman rircacuna. Juanca paicunataca, ‘mana allita ruranata saquishpa arrepintirichij. Abrahampaj huahuacunami canchij nishpapish mana Diospaj huahuacunachu canguichij’ nircami.

Achcacunami Juantaca, ‘Diosta cushichingapajca ¿imatataj rurana canchij?’ nircacuna. Paica, ‘pipish ishqui churanata charijca, mana charijman shujta cuchun’ nircami. ¿Imamantashi chashna nirca? Juanca Diosta cushichingapajca gentecunata c⁠ˈ⁠uyana cashcatami paihuan purijcunaman yachachisha nirca.

Impuestota japijcunatapish, ‘impuestota japina cashcallata japichij. Ama umaichijchu’ nircami. Soldadocunatapish, ‘ama yanga juchachichijchu. Imatapish japinaraiculla ama imata ruraichijchu’ nircami.

Sacerdotecuna, levitacunapish Juanta ricunaman rishpami cashna nircacuna, ‘tucui gentecunami canta rijsisha nincuna’. Chaimi Juanca  profeta Isaías nishca shinaca, ‘shitashca pambapi Diospajman c⁠ˈ⁠uchuyaichij nishpa caparicuj runami cani’ nirca.

Juan yachachishcataca gentecunaca achcatami uyanata munarcacuna. Achcacunami paichu Mesías nishpa tapurircacuna. Chaimantami Juanca, ‘ñucapaj q⁠ˈ⁠uipa shamucujca ñucata yalli imatapish rurai tucujmi. Ñucaca paipaj pargate huatashcallatapish cumurishpa mana pascaipajmi cani. Ñucaca cancunataca yacupi bautizajllami cani. Ñucapaj q⁠ˈ⁠uipa shamujca jucha illaj espirituhuanmi bautizanga’ nirca.

“Pai huillajpica tucuicuna crichunmi, chai luzmanta huillangapaj paica shamurca” (Juan 1:7).