Ima tiyashcata ricui

Ima tiyashcata ricui

 LECCIÓN 69

Ángel Gabrielca Mariatami visitarca

Ángel Gabrielca Mariatami visitarca

Galileapi caj Nazaret pueblopimi Elisabetpaj familia María soltera causarca. Mariaca José shuti carpintero runahuanmi cazaragrirca. Elisabet ña 6 quillacunata chichu cajpimi ángel Gabriel ricurishpa Mariataca, ‘¿allillachu cangui? Jatun Dios canhuan cashcamanta tucui huarmicunata yalli alli nishcami cangui’ nirca. Chashna nishcata mana intindijpimi angelca, ‘chichu tucushpa shuj c⁠ˈ⁠ari huahuatami huachangui. Jesús shutita shutichingui. Paica Reymi canga. Huiñaitami mandanga’ nirca.

Mariaca, ‘c⁠ˈ⁠arihuan manaraj chayarishcanichu. ¿Ima shinataj huahuata charishari?’ nijpimi angelca, ‘Diosca imatapish rurai tucunllami. Jucha illaj espíritu cambaj jahuaman shamujpimi shuj huahuata charingui. Cambaj familia Elisabetpish 6 quillacunatami chichu’ nircami. Chaimi Mariaca, ‘can nishca shina rurachunlla. Diospajta rurajmi cani’ nirca.

 Urcucunapi caj pueblopimi Mariaca Elisabetta visitanaman rirca. Ña chayashpa saludajpica Elisabetpaj huijsa ucupi caj huahuami jaitarirca. Espíritu santota chasquishpami Elisabetca, ‘María Jehovami cantaca bendiciashca. Mesiaspaj mama shamushcamantami achcata cushicuni’ nirca. Mariaca, ‘Jatun Diostami jatunyachini’ nircami. Quimsa quillacunatami Mariaca Elisabethuan saquirirca. Q⁠ˈ⁠uipaca Nazaretmanmi tigrarca.

María chichu cashcata yachashpami Joseca paihuan ña mana cazarasha nirca. Pero shuj ángel muscuipi ricurishpami paitaca, ‘Mariahuan cazarailla. Paica ima mana allitaca mana rurashcachu’ nircami. Chaimi Joseca Mariahuan cazarashpa paipaj huasiman pusharca.

‘Jehová Diosca jahua pachapipish, cai pachapipish, pai rurasha nishcatami ruran’ (Salmo 135:6).