Ima tiyashcata ricui

Ima tiyashcata ricui

 LECCIÓN 57

Diosca Jeremiastami huillanaman cacharca

Diosca Jeremiastami huillanaman cacharca

Jehová Diosca Judá llajtapi profeta cachunmi Jeremiasta agllarca. Chaimantami judiocuna mana alli ruraicunata saquichun huillanaman cacharca. Jeremiasca, ‘gentecunapaj ñaupajpi alli rimanallatapish manaraj yachaj huambrami cani’ nishpami cutichirca. Diosca, ‘ama manchaichu. Ñucami canhuan casha. Imata nichunpish ñucami yachachisha’ nircami.

Diosca Jeremiastaca cunaj yuyajcunata tandachishpa paicunapaj ñaupajpi allpa mangata p⁠ˈ⁠aquishpa, ‘Jerusalenpish chashnallatajmi tucunga’ ningui nircami. Jeremías chaita rurajpica paicunaca achcatami p⁠ˈ⁠iñarircacuna. Shuj sacerdote Pasur (Pasjur) shuti runaca Jeremiasta macashpami tablacunapi maquicunata chaquicunata canichishpa churarca. Jeremiasca tucui tutami mana cuyuri tucurca. Cayandij punllami Pasurca cacharirca. Jeremiasca, ‘mana ashtahuan ahuantanichu, ña mana huillasha ninichu’ nircami. Pero, ¿chaitachu rurashca canga? Mana. Alli yuyarishca q⁠ˈ⁠uipami Jeremiasca, ‘cambaj Shimica ñuca shungupica nina rupachij shinami tucurca. Manataj upalla saquiri tucunichu’ nircami. Chaimantami huillashpa catirca.

Achca huatacuna q⁠ˈ⁠uipaca shuj mushuj mandajmi Judá llajtapi mandai callarirca. Panda huillajcuna, sacerdotecunapish Jeremías huillashcata uyashpami paita p⁠ˈ⁠iñashcamanta mandajcunamanca, ‘cai runaca huañunami can’ nircacuna. Jeremiasca, ‘Jehová ima nishcallatami huillacuni. Ñuca yuyaimantaca mana huillacunichu. Ñucataca yangami huañuchisha ninguichij’ nircami. Mandajcuna chaita uyashpami, ‘cai runaca mana huañunachu can’ nircacuna.

 Jeremías huillashpa catijpica mandajcunaca yallitajmi p⁠ˈ⁠iñarircacuna. Chaimi jatun mandajtaca huañuchipai nishpa mañarcacuna. Jatun mandajca, ‘imatapish paihuan ruraichijlla’ nircami. Chashna mandajpimi lodo junda jatun jutcupi huañuchun Jeremiasta shitarcacuna. Jeremiasca asha ashami lodopi pambarishpa catirca.

Mandana huasipi sirvij Ebed-melecca (Ébed-Melec) jatun mandajtaca, ‘mandajcunaca Jeremiasta shuj jutcupimi shitashcacuna. Chaipi saquijpica huañungami’ nirca. Chaimi jatun mandajca, ‘30 c⁠ˈ⁠aricunata pushashpa llujshichinaman ri’ nirca. Jeremiasca huillanataca manataj saquircachu. ¿Pai shina huillanata munanguimanchu?

“Ñuca shutimantaca tucuicuna p⁠ˈ⁠iñashcami canguichij. Ashtahuanpish tucuringacama catirajllami quishpiringa” (Mateo 10:22).