Ima tiyashcata ricui

Ima tiyashcata ricui

 CAPÍTULO 3

Yaya Diosca ñucanchijpajca ¿imatataj munan?

Yaya Diosca ñucanchijpajca ¿imatataj munan?

1. ¿Diosca ima shina causachuntaj munan?

JEHOVÁ DIOSCA Adantapish Evatapish shuj sumaj huertapi causachunmi churarca. Paica, cai Allpata alajata allichichun, huahuacunata charichun, animalitocunata cuidachunmi munarca. Yaya Diosca cunancamami gentecuna chashna causachun munan (Génesis 1:28; 2:8, 9, 15; nota 6-ta ricui).

2. a) ¿Diospaj munai pajtarinataca imamantataj crinchij? b) ¿Cai Allpapica ima laya gentecunataj causangacuna? c) ¿Diosta cazujcunaca mashna tiempotataj cai Allpapica causangacuna?

2 Diosca cai Allpapi cushilla causachunmi munarca. ¿Ima horas chashna causashunchu? Ari. Yaya Diosllatajmi: “Ñuca imallatami rurasha nircani chaitaca rurashatajmi” nin (Isaías 46:9-11; 55:11). Jehová Dios nishcacuna pajtarichunca ni pi mana jarcangachu. Paica “cai pachataca mana yanga tiyachun rurarcachu” (Isaías 45:18). Ashtahuanpish gentecuna causachunmi rurarca. Pero ¿ima laya gentecuna cai Allpapi causachuntaj Diosca munan? Bibliapica, Diosta cazuj gentecunami huiñaita cai Allpapica causangacuna ninmi (Proverbios 2:21; Apocalipsis 21:3, 4).

3. ¿Llaquicunata ricushpaca ima tapuicunatataj ruranchij?

3 Cunan punllacunaca achca ungüicuna, guerracunami tiyan. Yaya Diosca chashna causachunca mana munarcachu. Pero ¿imamantashi chashna causacunchij? ¿Diospaj munaica imamantataj manaraj pajtarishca? Caitaca Bibliapimi yachai tucunchij.

 SHUJ ANGELMI DIOSPAJ CONTRA TUCURCA

4, 5. a) ¿Edén huertapica culebrataca pitaj parlachirca? b) ¿Shuj runa honrado cashpapish ima shinataj shuhua tucun?

4 Bibliapi nishca shinaca Yaya Diosca shuj enemigotami charin. Paica Diablo, Satanás shutimi can. Diabloca shuj culebrata parlachishpami Evataca pandachirca (Apocalipsis 12:9; Génesis 3:1). Chai culebraca mana paipaj munaimantachu parlacurca, Diablomi paitaca Evahuan parlachirca (nota 7-ta ricui).

5 ¿Dioschu, canmi Diablo cagringui nishpa Diablotaca rurarca? Mana. Dios cai Allpata ruracujpica jahua pachapica tauca angelcunami causacurca. Chaicunamantami shujca mana alli munaicunata charishpa Diablo tucurca (Job 38:4, 7). ¿Ima shinataj shuj alli angelca Diablo tucurca? Yuyashun. ¿Shuj runa honrado cashpapish shuhua tucui pudinchu? Ari. Pipish ajeno cosascunata japisha nishpa, chai yuyailla causashpaca mana alli munaicunatami chari callaringa. Chai munaicuna mirashpa catijpimi qˈuipaca shuhuanga. Chashnami alli runa cashca cashpapish shuhua tucun (Santiago 1:13-15-ta liyipai; nota 8-ta ricui).

6. ¿Shuj angelca ima shinataj Diospaj contra tucurca?

6 Cai runa layallatajmi shuj alli angelca millai tucurca. Diosca Adanta Evataca huahuacunata charishpa cai Allpapi jundarichij nircami (Génesis 1:27, 28). Chashna mandajta uyashpami chai angelca, ‘gentecunaca Diosta adoranapaj randica ñucatami adorana can’ nishpa yuyashcanga. Paica chai solopi yuyacushcamantami llullacunata nishpa Evataca pandachirca (Génesis 3:1-5-ta liyipai). Chashnami paica Diablo, Satanás tucurca. Ashtahuancarin Diospaj contrami tucurca.

7. a) ¿Adán Evaca imamantataj huañurcacuna? b) ¿Ñucanchijpish imamantataj yuyajyashpa huañunchij?

 7 Yaya Diosca, Adanta Evataca huertapi tiyaj shuj yuramantaca amataj micunguichij, chai yuramanta micushpaca huañunguichijmi nircami. Pero paicunaca Diosta mana cazushpami chai yuramanta micurcacuna (Génesis 2:17; 3:6). Jehová Dios nishca shinami Adanpish Evapish Diosta mana cazushcamantaca huañurcacuna (Génesis 3:17-19). Adán Eva huahuacunata charijpica paicunaca juchayujcunami huacharircacuna. Chaimantami paicunapish yuyajyashpa huañurcacuna (Romanos 5:12-ta liyipai). Diosta mana cazushpami Adanca juchayuj tucurca. Adanpaj huahuacuna cashcamantami ñucanchijpish juchayujcuna canchij. Chaimantami tucuicuna yuyajyashpa huañunchij (Romanos 3:23; nota 9-ta ricui).

8, 9. a) ¿Adanta Evataca Diabloca imata nishpataj crichirca? b) ¿Yaya Diosca imamantataj Diablota, Adanta, Evataca mana chai rato huañuchirca?

8 Diabloca Adanta Evataca, ‘Diosca llullami, mana alli mandajchu can’ nishpami crichirca. Diabloca, gentecuna alli causangapajca Diosta mana minishtinchu, paicunallatajmi ima allitapish ima mana allitapish agllana can nicuj shinami carca. Diablota uyashcamantami Adanpish Evapish juchapi urmarcacuna. Chashnami paicunaca Diablohuan shujlla tucushpa Diospaj contra tucurcacuna. Chaita ricushpaca ¿Jehová Diosca imatashi rurashca canga? Quimsandijtami chai rato huañuchi pudirca. Pero chashna rurashpaca Diablo llullacushcataca mana ricuchinmanchu carca.

9 Jehová Diosca pailla alli mandaj cashcata, Diablo llulla cashcatami ricuchisha nirca. Chaimantami Adanta, Evata, Diablotapish chai ratoca mana  huañuchirca. Ashtahuanpish gentecunapura asha tiempota mandanacushpa causachunmi saquirca. ¿Diosta mana cazushpa Diablota uyashpaca Adán Evaca allitachu rurarcacuna? Yuyashun. Yayitu Diosca animalcunata cuidashpa causachunmi, Adán Evataca Edén huertapi churarca. Paica huiñaita causachunmi  munarca. Pero Diabloca paicunamanca imata mana cushcachu carca.

10. ¿Imatataj cada quien agllana canchij?

10 Adán Eva shinallatajmi cada quien Yaya Diosta cazunata o Diablota cazunata agllana canchij. Yaya Diosta tucuipi cazushpaca Diablo llulla cashcatami ricuchishun. Pero Diablota cazushpaca huañushunmi (Salmo 73:28; Proverbios 27:11-ta liyipai). Cai pachapica asha gentecunallami Diosta cazuncuna. Ashtahuanpish cai pachataca Diosca mana mandacunchu. Shinaca, ¿pishi cai pachataca mandacun?

¿PITAJ CAI PACHATACA MANDACUN?

Cai pacha gobiernocuna Diablopaj mana cajpica Jesusmanca mana cusha ninmanchu carca.

11, 12. a) ¿Shuj cutinca Diabloca Jesustaca imatataj nirca? b) ¿Diablo chaita nishcamantaca imatataj yachanchij? c) ¿Jesuspish Pablopish Juanpish Diablomantaca imatataj nircacuna?

11 Jesusca cai Allpata pi mandacushcataca allimi yacharca. Shuj cutinca, Diabloca tucui cai pacha gobiernocunata ricuchishpami: “Ñucata cungurishpa adorajpica, tucui caicunatami cusha” nirca (Mateo 4:8, 9; Lucas 4:5, 6). Tucui cai pacha gobiernocunaca Diablopaj maquipimi can. ¿Imamantataj shina ninchij? Cai pacha gobiernocuna Diablopaj mana cajpica Jesusmanca mana cusha ninmanchu carca.

12 “Tucui poderta charij Jehová Diosmi cai Allpata, cielota rurarca, ¿maitataj Diabloca cai mundota mandacungari?” nishpachari yuyangui (Apocalipsis 4:11). Pero yuyashun, Jesusllatajmi Diablomanta parlashpaca: ‘Paica cai pachata mandajmi’ nirca (Juan 12:31; 14:30; 16:11). Apóstol Pablopish Diabloca ‘cai pachapaj diosmi’ nircami (2 Corintios 4:3, 4). Shinallataj apóstol Juanca, ‘cai pachataca Diablomi mandacun’ nircami (1 Juan 5:19, NM).

 DIABLOCA CAI ALLPATACA ÑA MANA MANDANGACHU

13. ¿Cunan punllacunapica ima shinataj causacunchij?

13 Llaquicunaca mirashpami caticun. Chaimantami macanacuicuna, mana alli politicocuna, millai gentecunapish tiyan. Llaquicunata runacuna tucuchisha nishpapish mana valishcacunachu. Pero Jehová Diosca Armagedón nishca jatun macanacuipimi tucui llaquicunata tucuchinga. Chashnami Yayitu Diosca cai Allpataca allichinga (Apocalipsis 16:14-16; nota 10-ta ricui).

14. a) ¿Diosca paipaj gobiernopi mandachunca pitataj agllashca? b) ¿Isaías 9:6, 7-pica imatataj yachachin? c) ¿Daniel 2:44-pipish imatataj yachachin?

14 Alli causaita cungapajca Diosca shuj gobiernotami agllashca. Cai gobiernotaca Diospaj gobierno nishpami rijsinchij (nota 11-ta ricui). Chaipi mandachunca Diosca Jesustami agllarca. Isaías 9:6, 7-pi nishca shinaca, Jesusca sumaj causaita cushpami para siempre mandanga. Chai gobiernomanta Jesús paipaj catijcunaman yachachishpaca: ‘Can mandana punlla shamuchun. Jahua pachapi can munashcata rurachun, shinallataj cai pachapipish can munashcata rurachun’ nishpa Diosta mañana canguichij nircami (Mateo 6:10, NTQC, 1973). Diospaj gobierno mana alli gobiernocunata ima shina tucuchinataca capítulo 8-pimi yachashun (Daniel 2:44-ta liyipai). Mana alli gobiernocunata tucuchishca huashami Diospaj gobiernoca cai Allpapica sumaj causaita cunga.

ÑALLAMI CUSHILLA CAUSASHUN

15. ¿2 Pedro 3:13-pi “mushuj cai pacha” nishpaca picunamantataj parlacun?

15 Bibliapica “pacha” nishpaca mana polvo allpallamantachu parlan. Huaquinpica cai Allpapi causaj gentecunamantami  parlan (Génesis 11:1, QC, 1989). Por ejemplo, Bibliapica: “Mushuj jahua pachacunata, mushuj cai pachatami shuyacunchij. Chaipica tucuicunami cashcata rurajcunalla canga” ninmi (2 Pedro 3:13; Isaías 65:17). Caipi “mushuj cai pacha” nishpaca Diosta cazuj gentecunamantami parlacun. Paicunami paraíso Allpapi causangacuna.

16. a) ¿Diosca alli gentecunamanca cai Allpapica imatataj cunga? b) ¿Huiñai causaita chasquingapajca imatataj rurana canchij?

16 Jesusca, alli gentecunamanmi Diosca cai Allpapica huiñai causaita cunga nircami (Marcos 10:30). Pero, ¿huiñai causaita chasquingapajca imatashi rurana canchij? Bibliapi, Juan 3:16, Juan 17:3-ta mashcashpa ricui. Cunanca, cai Allpapi ima laya causanata Bibliapi ricushun.

17, 18. ¿Paraíso Allpapica imamantataj tranquilo causashun?

17 Macanacuicunapish millai gentecunapish mana tiyangachu. Yayitu Diosmi tucui caicunataca tucuchinga (Salmo 46:9; Isaías 2:4). Chai huashaca allita rurajcunallami huiñaita cai Allpapi causangacuna (Salmo 37:10, 11). Paicunaca Yaya Diosta cˈuyashpa, tucuipi cazushpami maravillata causangacuna (Salmo 72:7).

18 Imata mana manchashpami tranquilo causashun. Israelitacuna Diosta cazujpica paica cuidarcami (Levítico 25:18, 19). Chashnallatajmi paraíso Allpapica Diosca ñucanchijta cuidanga. Chaimantami sumajta causashun (Isaías 32:18; Miqueas 4:4-ta liyipai).

19. ¿Paraíso Allpapica tucuicunapajchu micunaca tiyanga?

19 Tucuicunapajmi micunaca tiyanga. Salmo 72:16-pica: ‘Allpapica lutsai muyullatami tarpunga. Chaica tucui urcu puntacunacamami pˈucushpa huajiacunga’ ninmi. Yaya Dios bendiciajpimi cai Allpapica chashna granunga (Salmo 67:6).

20. ¿Bibliapi nishca shinaca cai Allpaca imataj tucunga?

 20 Cai Allpaca sumaj paraisomi tucunga. Chaipica alaja huasicunata, sumaj huerta patiocunatami charishun (Isaías 65:21-24; Apocalipsis 11:18-ta liyipai). Edén huerta shinami cai Allpaca sumaj canga. Diosmanta parlashpaca Bibliapica: “Tucui causaita charijcunamanmi, quiquinca maquita cacharishpa carangui” ninmi (Salmo 145:16).

21. ¿Paraisopica pˈiña animalcunaca imataj tucunga?

21 Libre animalcunami manso tucungacuna. Cunanca achca pˈiña animalcunami tiyan. Pero paraisopica chai animalcunaca ña mana llaquichingacunachu. Huahuacunapish chai animalitocunahuanmi pugllangacuna (Isaías 11:6-9; 65:25-ta liyipai).

22. ¿Jesusca ungushcacunahuanca imatataj ruranga?

22 Ungüicunaca ña mana tiyangachu. Jesús cai Allpapi cashpaca achca ungushcacunatami jambirca (Mateo 9:35; Marcos 1:40-42; Juan 5:5-9). Shamuj punllacunapipish tucui ungushcacunatami Jesusca jambinga. Chaimanta, ‘ungushcami cani’ nishpaca pi mana ningachu (Isaías 33:24; 35:5, 6).

23. ¿Diosca huañushcacunahuanca imatataj ruranga?

23 Huañushcacunaca causaringacunami. Diosca achca gentecunatami causachinga. Bibliapica: ‘Cashcata rurajcunatapish, mana cashcata rurajcunatapish Taita Diosmi causachinga’ ninmi (Juan 5:25-ta liyipai; Hechos 24:15).

24. ¿Paraíso Allpapica ima shinataj causasha ningui?

24 Diosmanta yachashpami cada uno paita cazunata o mana cazunataca agllai tucushun. Jehová Dios mandashcacunata cazushpaca shamuj punllacunapica maravillatami causashun. Jesusmantami shamuj punllacunapica achca bendicioncunata chasquishun. Chaitaca catij temapimi yachashun.