Ima tiyashcata ricui

Ima tiyashcata ricui

 CAPÍTULO 4

Jesusmanta yachashunchij

Jesusmanta yachashunchij

1, 2. a) ¿Shuj runapaj shutita yachashpallachu paitaca allimi rijsini ni tucunchij? b) ¿Huaquincunaca Jesusmantaca imatataj yuyancuna?

CAI mundopica achca famoso gentecunami tiyan. Pero, ¿paicunapaj shutita yachashpallachu ‘allimi rijsini’ ni tucunchij? Mana. Paicuna ima shina cajta, ima laya causajtaca mana yachai tucunchijchu. Chaimantami ‘paicunataca allimi rijsini’ mana ni tucunchij.

2 2.000 huatacuna huashaman Jesús cai Allpapi causashca cajpipish casi tucuicunami paimanta uyashcanchij. Pero Jesús ima laya causashcataca mana tucuicuna yachancunachu. Huaquincunaca, Jesusca alli runami carca, shuj profetami carca o paillatajmi Dios can nincunami. ¿Jesusmantaca canca imatataj yuyangui? ( Nota 12-ta ricui).

3. ¿Imamantataj Jehovamanta, Jesusmantaca yachana cangui?

3 Bibliapica, “huiñai causaita charinaca cashnami: Diostajca canlla cashcata rijsinami, Jesucristopish can cachashca cashcata crinami” ninmi (Juan 17:3, QC, 1989). Caipi nishca shinaca Jehovamanta, Jesusmanta yachashpaca cai Allpapimi huiñai causaita charingui (Juan 14:6). Shinallataj cunan tiempopipish sumajtami causangui. Shujtajcunahuanpish allimi apanacungui (Juan 13:34, 35). Capítulo 1-pica Yayitu Diosmantami yacharcanchij. Cunanca Jesusmanta yachashun.

 MESÍAS RICURINAMANTA

4. ¿Mesías, Cristo shimicunaca imatataj nisha nin?

4 Jesús manaraj huacharijpimi, Yayitu Diosca Mesiastami cachasha nirca. Mesiastaca Cristo nishpapishmi rijsinchij. Mesías shimica hebreo rimaipimi can. Cutin, Cristo shimica griego rimaipimi can. ¿Mesías, Cristo shimicunaca imatataj nisha nin? Dios paipaj munaita rurangapaj shuj runata agllana cashcatami nisha nin. Diospaj munai pajtarichunca Mesiasmi ayudanga.

5. ¿Jesusta catijcunaca Jesús Mesías cashcataca crircachu?

5 Jesusta catijcunaca pai Mesías cashcataca allimi yacharcacuna (Juan 1:41). Chaimi apóstol Pedroca: “Canca Cristomari cangui” nirca (Mateo 16:16). ¿Ñucanchijpish imamantataj Jesús Mesías cashcataca crinchij? Caimanta yachashpa callarishun.

6. ¿Mesías pi cashcata yachachunca Jehová Diosca imatataj rurarca?

6 Caipi yuyashun. Cantachari cambaj amigoca terminalpi paipaj amigota tupanaman richun nin. Pero chai runataca canca mana rijsinguichu. Cambaj amigo chai runa ima laya cajta huillajpi, ima ropata churarishcata huillajpimi, canca paihuan tupai pudinguiman ¿nachu? Chashnallatajmi Mesías manaraj huacharijpica Diospaj profetacunaca pai ima shina canata, imata ruranata huillarcacuna. Profetacuna chashna huillajpimi ñucanchijpish Jesús Mesías cashcata yachashcanchij.

7. ¿Miqueaspish Danielpish Mesiasmantaca imatataj nircacuna?

7 Dios nishca shimicunaca siempremi pajtarin. Por ejemplo, 700 huatacuna Jesús manaraj huacharijpimi profeta Miqueasca, Mesiasca Belén uchilla llajtapimi  huacharinga nirca (Miqueas 5:2). Miqueas nishca shinami Jesusca Belenpi huacharirca (Mateo 2:1, 3-9). Shinallataj Danielpish Mesiasca huata 29-pimi ricuringa nircami (Daniel 9:25). ¿Daniel nishcacunaca pajtarircachu? Ari, pajtarircami. * Cai profeciacuna, shujtaj profeciacunapish Jesús Mesías cashcatami ricuchin.

Jesusca bautizarishpami Mesías tucurca.

8, 9. ¿Jesús bautizaricun ratoca imataj tucurca?

8 Jehová Diosca pi Mesías cashcatami Juan Bautistamanca huaquin señalcunapi ricuchirca. Chai señalcunata ricushpami Juanca Jesús Mesías cashcata crirca. Huata 29-pimi Juan Bautistaca Jesustaca Jordán yacupi bautizarca. Chaipimi Juanca: ‘Jahua pachamanta Taita Diospaj espíritu paloma shina uriyamushpa paipaj jahuapi saquirijtami ricurcani. Ñucapish paitaca pi cashcata manaraj rijsircanichu. Ashtahuanpish yacupi bautizachun ñucata cachaj Taita Diosmi: Maijanpaj jahuamanmi espíritu uriyamushpa paipaj jahuapi saquirin. Chaimi jucha illaj espirituhuan bautizajca canga nirca. Chashna tucujtaca ñucataj ricushca cashpami, caimari Taita Diospaj Churi nishpa huillacuni’ nircami (Juan 1:32-34; Mateo 3:16, 17). Yaya Dios Jesusta espíritu santohuan agllajpimi Jesusca Mesías tucurca. Shinami Diosca Jesustaca mandaj cachun agllarca (Salmo 2:6; Isaías 55:4).

 9 Bibliapi nishcacuna pajtarijta ricushpa, Jesús bautizari punlla ima pasashcata yachashpami pai Mesías cashcata yachanchij. Pero ¿Jesusca maimantataj shamurca? ¿Ima shina runataj carca? Chaitaca Bibliapi ricushun.

¿JESUSCA MAIMANTATAJ SHAMURCA?

10. ¿Jesús cai Allpaman manaraj shamushpaca maipitaj causarca?

10 Bibliapica Jesús cai Allpaman manaraj shamushpaca jahua pachapimi causarca ninmi. Por ejemplo,  profeta Miqueasca, “Mesiasca ñaupa tiempomantami ña tiyashca carca” nircami (Miqueas 5:2, NM). Jesusllatajmi, cai Allpaman manaraj shamushpaca jahua pachapimi causarcani nirca (Juan 3:13; 6:38, 62; 17:4, 5-ta liyipai). Jesusca jahua pachapica Yayitu Dioshuanmi alli apanacuj carca.

11. ¿Yaya Diosca imamantataj Jesustaca achcata cˈuyan?

11 Jehová Diosca Jesustaca achcatami cˈuyan. Paica imata manaraj rurashpami Jesustaraj rurarca. Chaimantami Bibliapica, ‘tucui imalla tiyajcunata Dios manaraj rurajpimi Jesusca ña tiyarca’ nin (Colosenses 1:15, QC, 1989). * Shinallataj Diosca Jesustaca paillami rurarca. Chaimantami Juan 3:16-pica, Jesusca Diospaj “shujlla” Churimi can nin. Ashtahuancarin Diostaca Jesusllami jahua pachapi, cai Allpapi tucui imalla tiyajcunata rurashpa ayudarca (Colosenses 1:16). Diosca angelcunaman, gentecunaman paipaj mandashcacunata huillachunmi Jesustaca agllarca. Chaimantami Jesusca ‘Taita Diospaj Rimaimi can’ ninchij (Juan 1:14).

12. ¿Jehová Diospish Jesuspish imamantataj mana igual can?

12 Huaquincunaca Jesusca Diosllatajmi can nishpami crincuna. Pero chaica mana ciertochu can (nota 14-ta ricui). Jehová Diosca ‘Allpatapish, cai pachatapish manaraj rurashpami huiñaimanta huiñaicama ña tiyarca’ (Salmo 90:2). Pero Jesusca huiñaimanta huiñaicamaca mana tiyarcachu, Jehová  Diosmi Jesustaca rurarca. Chaimantami Bibliapica Yaya Diosmi Jesusta yalli can nin. Jesuspish Dioshuan igual canataca mana munarcachu (Juan 14:28-ta liyipai; 1 Corintios 11:3). Yaya Diosllami tucuita rurai tucuj Dios can (Génesis 17:1). Pai layaca pi mana tiyanchu.

13. ¿Imamantataj “Jesusca mana ricuipaj Dios ima shina cashcata ricuchijmi can” ninchij?

13 Manaraj jahua pachata, cai Allpata rurashpaca Yaya Diosca Jesushuanmi achca huaranga huatacunata trabajarca. Chaimantami Yaya Diosca Jesustaca achcata cˈuyan (Juan 3:35; 14:31). Jesusca paipaj Yaya shina cˈuyaj, llaquij, mana pˈiñarijmi can. Chaimantami Bibliapica, “Cristoca mana ricuipaj Dios ima shina cashcata ricuchijmi” nin (Colosenses 1:15).

14. ¿Jesusca ima shinataj cai Allpapica huacharirca?

14 Jesusca Diosta cazushpami cai Allpaman shamurca. Pero, ¿ima shinataj cai Allpapica huacharirca? Diosca paipaj Churita charichunmi María huarmita agllarca. Paica cˈarihuan manaraj chayarishca huarmimi carca. Diosca shuj milagrota rurashpami Jesuspaj causaita Mariapaj huijsapi churarca. Chaimantami Jesuspaj yayaca mana shuj runa carca. Diospaj Churi cashcamantami Jesusca jucha illaj huacharirca (Lucas 1:30-35).

¿JESUSCA IMA LAYATAJ CARCA?

15. ¿Diosta ashtahuan rijsingapajca imatataj rurana cangui?

15 Jesusca: “Pipish ñucata rijsijca, ñuca Yayatapish ñami rijsin” nircami (Juan 14:9). Jesusca paipaj Yaya shinallatajmi cˈuyaj, llaquij, mana utca pˈiñarij carca. Jesusmanta yachashpaca Jehová Diostapish  allimi rijsingui. Jesusmanta ashtahuan yachangapajca Mateo, Marcos, Lucas, Juan librocunata liyipangui.

16. a) ¿Jesusca imatataj yachachirca? b) ¿Pitaj Jesusmanca tucuita yachachirca?

16 Achcacunami Jesustaca “Yachachij” nijcuna carca (Juan 1:38; 13:13). Jesusca Diospaj gobiernomantami yachachirca. ¿Cai gobiernoca imataj can? Diospaj shuj gobiernomi can. Cai gobiernoca jahua pachamantami cai Allpata mandanga. Sumaj bendicioncunatapishmi Diosta cazuj gentecunaman cunga (Mateo 4:23). Diosmi Jesusmanca tucuita yachachirca. Chaimantami Jesusca, “ñucaca mana ñuca yuyaimantachu yachachini. Ashtahuanpish ñucata cachaj Yaya, yachachi nishcallatami yachachini” nirca (Juan 7:16). Diospaj gobiernomanta gentecuna uyachunmi Diosca munarca. Chaitaca Jesuspish allimi yacharca.

17. a) ¿Jesusca maipitaj yachachij carca? b) ¿Imamantataj Jesusca Diosmanta yachachinata munarca?

17 Jesusca llajtacunaman, mercadocunaman, huasicunaman rishpami yachachij carca. Paica Diosmanta yachachingapajca gentecuna paipajman cˈuchuyachunca mana shuyajchu carca. Ashtahuanpish paimi gentecunata mashcaj carca (Marcos 6:56; Lucas 19:5, 6). Jesusca Yaya Diospaj munaita rurasha nishpami yachachingapaj achcata esforzarij carca. Shinami Diosta cazushcata ricuchirca (Juan 8:28, 29). Gentecunata llaquishcamantami Jesusca yachachij carca (Mateo 9:35, 36-ta liyipai). Chai punllacunaca religionta pushajcunaca Diosmantaca pandatami yachachijcuna carca. Chaimantami Jesusca mana llullashpa Diosmantaca tucui gentecunaman yachachirca.

18. ¿Jesusca ima laya runataj carca?

 18 Jesusca dimastij cˈuyaj cashpami gentecunamanta sustarij carca. Pai alli genio cajpimi yuyajcunapish huahuacunapish paihuanca parlanata munaj carca (Marcos 10:13-16). Jesusca mana alli ruraicunataca pˈiñajmi carca (Mateo 21:12, 13). Chai tiempocunapica huarmicunataca mana respetohuan tratajcunachu carca. Pero Jesusca huarmicunataca achcatami valoraj carca (Juan 4:9, 27). Shuj punllaca apostolcunapaj chaquicunata maillashpami Jesusca humilde cashcata ricuchirca. Chai tiempopica sirvientecunallami chaquicunataca maillajcuna carca (Juan 13:2-5, 12-17).

Jesusca tucui ladocunapimi huillarca.

19. ¿Shuj runataca Jesusca ima shinataj ayudarca?

19 Gentecuna ima minishtishcata ricushpami Jesusca ayudarca. Chaimantami Yayitu Dios poderta cujpica achca gentecunata sanoyachirca (Mateo 14:14). Shuj punllaca sisu shina ungüita charij runa Jesuspajman cˈuchuyashpaca: “Ñucata alliyachisha ninguipishchari” nircami. Chaita uyashpami Jesusca shungu ucupi llaquirishpa, maquita chutashpa tuparishpaca: “Ari, alliyachisha ninimi” nirca. Chashna tuparijpimi chai ungushcaca sanoyarca (Marcos 1:40-42). ¿Chai ungushca runa alliyashpaca ima shinashi sintirishcanga?

JESUSCA YAYA DIOSTACA TUCUIPIMI CAZURCA

20. ¿Jesusca ima shinataj Diosta cazushcata ricuchirca?

20 Jesusca Jehová Diosta cazunatami yachachirca. Diablopaj trampacunapipish mana urmarcachu (Mateo 4:1-11). Pai Mesías cashcata mana crishpami huaquin familiacunaca ‘paica locomi can’ nijcuna carca.  Chashna nicujpipish Jesusca Diosta sirvinataca manataj saquircachu (Marcos 3:21). Paita pˈiñajcuna llaquichijpipish mana chashnallataj tigrachircachu. Ashtahuanpish Diosmanta mana caruyashpami tucuipi cazurca (1 Pedro 2:21-23).

21. ¿Huañuna horasca Jesusca ima shinataj Diosta cazushcata ricuchirca?

21 Jesusca llaquinaita huañunata yachashpapish Diosta sirvinataca manataj saquircachu (Hebreos 5:8-ta liyipai). Pai huañui punllaca shuhuata shinami carcelman aparcacuna. Shinallataj ‘Diosmantaca pandatami yachachicungui’ nishpami juchachircacuna. Gentecunapish paimantaca burlarircacunami. Ashtahuanpish Jesusta huañuchingapajca shuj caspipimi  huarcurcacuna. Ñalla huañugrishpaca, ‘tucuimi pajtarishca’ nircami (Juan 19:30, NVI, 1999). Quimsa punlla huashami Diosca espirituta shina Jesustaca causachirca (1 Pedro 3:18). Causarishcamantaca 40 punllacuna qˈuipami Jesusca jahua pachaman tigrarca. Chaipimi Jehová Dios mandaj cachun nombrangacama paipaj alli ladopi tiyarirca (Hebreos 10:12, 13).

22. ¿Jesús tucui shunguhuan Yaya Diosta sirvishcamantaca imatataj charishun?

22 Jesús tucui vida Jehová Diosta sirvishcamantami paraíso Allpapica causai pudishun. Callarimantami Diosca gentecuna cushilla causachun munashca. Catij yachaipimi Jesús huañushcamanta sumaj bendicioncunata ima shina charinata yachashun.

^ par. 7 Cai profecía ima shina pajtarishcata ricungapajca nota 13-ta ricui.

^ par. 11 Tucuita rurashcamantami Jehová Diostaca Yayitu ninchij (Isaías 64:8). Diosmi Jesustaca rurarca. Chaimantami Jesustaca Diospaj Churi ninchij. Bibliapica Adanpish, angelcunapish Diospaj churicunami can ninmi (Job 1:6; Lucas 3:38).