Ima tiyashcata ricui

¿Ungüicunata ahuantangapajca Bibliapi tiyaj consejocunaca ima shinataj ayudan?

Bibliaca caitami yachachin

Diosca paita sirvijcuna ungushca cajpica sustarinmi. Chaimantami Bibliapica: “Camapi nanaihuan cajpipish, Mandaj Diosmi fuerzata cunga” nin (Salmo 41:3). Sinchi ungüicunata chˈimbapurangapajca quimsa consejocunata ricushun.

  1. Ungüicunata ahuantangapajca Diosta mañai. Diosta mañajpi paica ministirishca fuerzata cushpa, ama yalli sustarichunmi ayudanga (Filipenses 4:6, 7).

  2. Cushilla cangapaj esforzari. Bibliapica: “Cushijlla shunguhuan causanaca, aichapajpish alli jambimi. Ashtahuanpish llaqui shungullahuan causajpica, fuerzatapish quichunmi” ninmi (Proverbios 17:22). Cushilla cashpaca saludpipish allimi sintiringui.

  3. Diospaj bendicioncunapi yuyai. Dios cusha nishcacunapi shuyashpami ungüicunata ahuantashpa cushilla sintiringui (Romanos 12:12). Bibliapica shamuj punllacunapi pipish ungushcami cani mana ningacunachu ninmi (Isaías 33:24). Doctorcunapish, cienciapish ungüicunataca mana tucuchi pudishcachu. Pero Diosca ñallami tucuchinga. Shinallataj gentecunaca ña mana yuyajyangacunachu. Bibliapica: “Chaimanta paipaj aichaca, llullu huahuapaj aichatapish yalli llullujlla tucushpami, chairaj cashca punllacunaman tigranman” ninmi (Job 33:25).

Nota: Testigo de Jehovacunaca siempremi Diospaj ayudata mashcancuna. Pero sinchi ungüicunata charishpaca doctorcunapajmanmi rincuna (Marcos 2:17). Shinallataj ungüicunapajca cai jambi, chai jambimi alli can nishpaca mana nincunachu. Ashtahuanpish cada unomi ima tratamientota catinataca agllana can.