Ima tiyashcata ricui

¿Jahua pachamanca mashnacunallataj rincuna?

Bibliaca caitami yachachin

Diosca paita sirvijcunamantaca ashacunallatami jahua pachapi causagrichun agllashca (1 Pedro 1:3, 4). Paicunaca agllashca qˈuipapish Diosta alli sirvishpa sinchi feta charishpami catina can. Pero mana chashna catishpaca jahua pachapi causana herenciatami chingachi pudincuna (Efesios 5:5; Filipenses 3:12-14).

¿Jahua pachapica imatataj rurangacuna?

Cai agllashcacunaca reycuna, sacerdotecuna shinami jahua pachamanta Jesushuan mil huatacunata mandangacuna (Apocalipsis 5:9, 10; 20:6). Paicunami jahua pachapi Dios churashca gobiernopi mandangacuna. Cai gobiernotami Bibliapica mushuj jahua pacha nin. Dios churashca gobiernoca cai Allpapi saquirij alli gentecunatami mandanga. Cai Allpapi saquirij alli gentecunatami Bibliapica mushuj cai pacha nin. Jahua pachapi mandajcunami Dios munashca shina tucuicuna tandalla, allita rurashpa causachun ayudanga (Isaías 65:17; 2 Pedro 3:13).

¿Jahua pachaman rijcunaca mashnacunataj can?

Bibliapica jahua pachaman ringapajca 144 mil gentecunallami causaringacuna ninmi (Apocalipsis 7:4). Apóstol Juanca: ‘Sión urcu jahuapi Oveja o Jesús shayacujtami ricurcani. Paihuanca 144 milmi carca’ nircami (Apocalipsis 14:1-3; Juan 1:29; 1 Pedro 1:19). Sión urcuca Diospaj gobiernotami ricuchin. Jehová Diosca Jesustapish, 144 mil agllashca gentecunatapishmi jahua pachapi mandachun churashca (Salmo 2:6; Hebreos 12:22).

Bibliapica Cristohuan mandachun agllashcacunataca ashalla ovejacuna nishpami shutichin (Apocalipsis 17:14; Lucas 12:32). Chaimantami jahua pachapi mandachun agllashcacuna ashalla gentecuna cashcata intindinchij. Cutin Bibliapica shujtaj ovejacuna nishpaca Diosta sirvijcuna yallitaj achcacunamantami parlan (Juan 10:16).

Jahua pachaman rinamanta panda yuyaicuna

Gentecunapaj yuyai: Tucui allita rurajcunami jahua pachaman rin nincunami.

Verdad: Diosca allita ruraj gentecunaca cai Allpapimi causangacuna ninmi (Salmo 37:11, 29, 34).

  • Jesusca: “Jahua pachamanca pi mana huichiyarcachu” nircami (Juan 3:13). Jesusca cai shimicunata nishpami Abraham, Moisés, Job, Davidpish paipaj punta huañushpapish mana jahua pachaman rishcata intindichirca (Hechos 2:29, 34). Paicunaca Dios tigra causachijpi cai Allpapi causanatami munajcuna carca (Job 14:13-15).

  • Bibliapica jahua pachapi causangapaj causarishca gentecunataca punta causarinapi causarijcuna ninmi (Apocalipsis 20:6). Punta causarinapi causarijcuna nishpaca shujtajcunapish causarina cashcatami ricuchin. Paicunaca cai Allpapi causangapajmi causaringa.

  • Bibliapica Diospaj gobierno mandacujpica huañuipish ña mana tiyangachu ninmi (Apocalipsis 21:3, 4). Cai shimicunata nishpaca mana jahua pachamanta nicunchu, cai Allpamantami nicun. Jahua pachapica huañuica mana nunca tiyashcachu.

Gentecunapaj yuyai: Jahua pachapi causanata o cai Allpapi causanataca cada unomi agllai tucunchij nincunami.

Verdad: Bibliapica jahua pachapi causanata japichunmi, Diosca cayarca ninmi. Shinaca Diosllami picunalla jahua pachapi causana cashcataca agllai pudin (Filipenses 3:14). Jahua pachaman rinataca mana ñucanchijllataj agllai tucunchijchu (Mateo 20:20-23).

Gentecunapaj yuyai: Diosta mana tucuipi alli sirvishcamantami mana jahua pachaman ri tucushpa cai Allpapi huiñaita causagrin nincunami.

Verdad: Picunalla cai Allpapi causagrijcunataca Jehová Diosca “ñuca alli nishcacuna”, “ñuca pueblo”, “ñuca agllashcacuna” ninmi (Isaías 65:21-23). Shinaca paicunami jucha illaj tucushpa cai Allpapi huiñaita causangacuna. Chashnami Diospaj munaita pajtachinga (Génesis 1:28; Salmo 115:16; Isaías 45:18).

Gentecunapaj yuyai: Huaquincunaca Apocalipsis libropi nishca 144 mil agllashcacunamanta parlashpaca: ‘Cai numeroca shuj chˈimbapuraillami can. Achca huarangacunamantami parlacun’ nincunami.

Verdad: Apocalipsis libropi tiyaj huaquin numerocunaca chˈican chˈican yuyaicunata ricuchingapajllami can. Cutin shujtaj numerocunaca chaipi nishcallatatajmi ricuchin. Por ejemplo, Apocalipsis 21:14-pi doce apostolcunamantami parlan. Cai número 12-ca mana shuj chˈimbapuraillachu can. Ashtahuanpish 12 apostolcunallatami ricuchin. Shinallataj Apocalipsis 7:4-pi parlashca 144 milcunapish mana shuj chˈimbapurailla cashcatami yachashun.

Apocalipsis 7:4-pica apóstol Juanca 144 mil sellashcacunatami ricurca. Paicunami jahua pachaman ringapaj agllashcacuna can. Chai qˈuipaca Apocalipsis 7:9, 10-pica pi mana yupaipaj yallitaj achcacunatami ricurca. Paicunatapish Yayitu Diosmi quishpichinga. Shinaca Apocalipsis 7:4, 9, 10-pica ishqui grupocunamantami parlan. 144 mil agllashcacunallataj achca gentecunata ricuchicujpica mana ishqui grupo tiyanmanchu. *

Ashtahuancarin 144 milcunaca cai Allpapi causajcunapaj chaupimanta punta pˈucushca granocunata agllashca shinami can (Apocalipsis 14:4). Punta pˈucushca granocuna nishpaca jahua pachapi Jesushuan mandagrijcuna shuj uchilla grupo cashcatami ricuchin. Cutin cai Allpapi causagrijcunaca pi mana yupai tucuipaj yallitaj achcacunami canga (Apocalipsis 5:10).

^ par. 21 Robert L. Thomas shuti profesorca: “Apocalipsis 7:4 pi tiyaj 144 mil numeroca mana shuj chˈimbapuraillachu can. 144 mil agllashcacunatami ricuchin. Cutin Apocalipsis 7:9 pica yallitaj achcacunamantami parlan. Número 144 mil shuj chˈimbapurailla cajpica Apocalipsis libropi tiyaj tucui numerocunaca chˈimbapurashcacunallatami ricuchinman” nircami (Comentario esegético de Apocalipsis 1-7, página 474).