Ima tiyashcata ricui

Diospaj gobiernoca ¿imataj can?

Bibliaca caitami yachachin

Diospaj gobiernoca, Jehová Dios churashca shuj gobiernomi can. Cai gobiernoca jahua pachamantami mandanga. Chaimanta Bibliapica: “Diospaj gobiernomanta” parlashpaca “jahua pachamanta mandanata” ninmi (Marcos 1:14, 15; Mateo 4:17). Diospaj gobiernoca runacunapaj gobiernotapish yalli jatunmi can.

  • Diospaj gobiernopica ¿picunataj mandanga? Diosca Jesustami agllashca paipaj gobiernopi mandachun. Paiman tucui mandajcunata yalli podertami cushca (Mateo 28:18). Jesusca paipaj poderhuanca alli cosascunallatami ruran. Ñucanchij llaquicunata alli intindij, llaquij cashcata ricuchishca (Mateo 4:23; Marcos 1:40, 41; 6:31-34; Lucas 7:11-17). Jehová Dios ayudajpimi Jesusca jahua pachapi paihuan mandachun tucui llajtacunamanta huaquin gentecunata agllashca (Apocalipsis 5:9, 10).

  • Diospaj gobiernoca ¿mashna tiempotataj mandanga? Cunan punllacunapica runacunapaj gobiernocunaca ashallatami mandan. Pero Diospaj gobiernoca tucui vidami mandanga, mana nunca tucuringachu (Daniel 2:44).

  • Diospaj gobiernoca ¿picunatataj mandanga? Tucui llajtacunamanta caj Diosta cazujcunatami bendiciashpa mandanga (Hechos 10:34, 35).

  • Diospaj gobiernoca ¿imata rurachuntaj mandan? Diospaj gobiernoca mana millai cosascunallata rurachunchu mandan. Ashtahuanpish alli cosascunata rurachunmi mandan. Por ejemplo Bibliapica: “Cambaj Mandaj Taita Diosta tucui shunguhuan, tucui almahuan, tucui yuyaihuan cˈuyangui” ninmi. Cai mandashcami tucuimanta ashtahuan yalli allica. Qˈuipa mandashcapipish: “Can quiquinta shinallataj shujtajcunatapish cˈuyangui” ninmi (Mateo 22:37-39). Diostapish, gentecunatapish cˈuyashcamantami Diospaj gobiernota cazujcunaca tucuicunata alli tratan.

  • Diospaj gobiernoca ¿imatataj yachachin? Diospaj gobiernoca mana caita chaita rurachunllachu yachachin. Ashtahuanpish Dios mandashcacunata ima shina pajtachinatami yachachin (Isaías 48:17, 18).

  • Diospaj gobiernoca ¿imatataj ruranga? Diospaj gobiernoca mana mandajcunallamanchu bendicioncunata cunga. Ashtahuanpish Dios nishcacunatami pajtachinga. Paipaj munaita rurajcunallamanmi Dios cusha nishca paraíso Allpata cunga (Isaías 35:1, 5, 6; Mateo 6:10; Apocalipsis 21:1-4).