Mateu 14:1-36
14 Tsë witsanmi Galilëa provinciata gobernaq* Herödisqa,* Jesus ruranqankunata musyarirqan,+
2 y sirweqninkunatam nirqan: “Pëqa bautizakoq Juanmi. Wanunqampita kawarimushqa karmi tsë milagrukunata* rurëkan”.+
3 Herödisqa wawqin Filïpupa warmin Herodïaspa culpanmi Juanta cadenarkatsir carcelatsishqa karqan.+
4 Juanqa kutin kutinmi, “manam allitatsu rurëkanki warmikitanö katsirnin” nishqa karqan.+
5 Tsënö kaptimpis, Juanta Teyta Diospa willakoqnintanö rikäyaptinmi, Herödisqa wanutsita munarpis nunakunata mantsaq.+
6 Peru cumpleäñunman ëwaqkunapa puntanchö Herodïaspa warmi wamran tushunqanmi,+ Herödistaqa alläpa gustarqan,+
7 tsëmi jurarnin änirqan imatapis mañanqanta entreganampaq.
8 Tsënam tsë shipashqa maman exigiptin kënö nirqan: “Jatun plätuchö Bautizakoq Juanpa peqanta o umanta entreguëkamë”.+
9 Tsëta niptinnam gobernaqqa alläpa llakikurqan, peru invitädunkuna wiyëkäyaptin jurar änikushqa karmi, mañakunqanta entregayänampaq mandakurqan.
10 Tsëmi carcelarëkaq Juanpa peqanta o umanta mutuskiyänampaq mandakurqan.
11 Tsënam jatun plätuchö Juanpa peqanta o umanta apamur tsë shipashta entregayarqan, y pënam mamanman aparqan.
12 Tsëpitanam Juanpa qateqninkuna shamur, ayanta apar pampayarqan; tsëpitanam Jesusta willaq ëwayarqan.
13 Tsëta willaskiyaptinnam Jesusqa japallan këta munar tsunyaq sitiuta barcuwan ëwakurqan. Tsëta musyëkurnam mëtsë markapita nunakunaqa pëpa qepanta chakipa ëwayarqan.+
14 Qocha kuchunman chëkurnam, mëtsika nunakunata rikëkur alläpa llakiparqan,*+ y llapan qeshyëkaqkunatam alliyätsirqan.+
15 Inti o rupay jeqëkaptinnam qateqninkuna witïkur kënö niyarqan: “Kë sitiuqa karuchömi këkan, y alläpa tardinam, caserïukunaman ëwar mikuyninkuna rantiyänampaq kë nunakunata despachëkuyna”.+
16 Tsënam Jesusqa, “manam pëkunaqa ëwakuyänantsu, qamkuna imallatapis qarayë” nirqan.
17 Qateqninkunanam kënö niyarqan: “Këchöqa pitsqa tanta y ishkë pescädullam kayäpaman”.
18 Tsënam pëqa, “këman apayämuy” nirqan.
19 Tsëpitanam qewa jananman jamakuyänampaq nunakunata mandarqan. Y pitsqa tantata y ishkë pescäduta aptarkurmi ciëluman rikëkur bendicionta mañakurqan,+ tsëpitanam tsë tantakunata pakir qateqninkunata entregarqan, y pëkunanam nunakunata qarayarqan.
20 Llapankunam pacha junta mikuyarqan, y döci canasta juntam sobrarqan.+
21 Cincu milnö ollqukunam mikuyarqan, y warmikuna y wamrakunapis kayarqanmi.+
22 Tsë höram qateqninkunata nirqan nunakunata despachanqanyaq, qochapa juknin lädunman barcuwan tsimparëkäyänampaq.+
23 Nunakunata despacharirnam, Teyta Diosman mañakunampaq jirkaman japallan witsarqan.+ Y paqasyäriptimpis, japallanmi tsëchö këkarqan.
24 Tsë höraqa, barcuqa qocha kuchumpita* karuchönam këkarqan, peru contrankunaman vientuptinmi avancëta puëdirqantsu.
25 Jesusqa madrugäda* höram yaku janampa purir pëkunaman ëwarqan.
26 Yaku janampa ëwëkaqta rikëkurnam, qateqninkunaqa mantsakar, “¡achachï! ¡Imachi shamuykan!” niyarqan, y mantsakarninmi qaparir qayarëkuyarqan.
27 Tsë höram Jesusqa kënö nirqan: “¡Ama mantsakäyëtsu! Noqam kä”.+
28 Tsëmi Pëdruqa nirqan: “Teytë, qam karqa yaku janampa qamman shamunäpaq mandëkamë”.
29 Pënam, “¡shamuy ari!” nirqan. Tsënam Pëdruqa barcupita yarquskir yaku janampa purir Jesus kaqman ëwarqan.
30 Peru feyupa vientoqta rikëkurmi alläpa mantsakarqan. Y hundikar qallëkurnam, “¡Teytë, salvëkallämë!” nir qayarëkurqan.
31 Jinan höram Jesusqa makipita aptarkur kënö nirqan: “Markäkuynin o yärakuynin pisheq nuna, ¿imanirtan dudarqunki?”.+
32 Barcuman yëkuriyaptinnam, vientuqa pärarirqan.
33 Tsënam barcuchö këkaqkunaqa puntanman qonqurikur kënö niyarqan: “Qamqa rasumpataq Diospa Tsurin kanki”.
34 Y qochata tsimparmi Genesaret markaman chäyarqan.+
35 Tsë sitiupita nunakuna Jesusta reqirirmi, amänun markakunachö tsëta willakuyarqan, tsënam nunakunaqa llapan qeshyëkaqkunata pëman apayämurqan.
36 Janan kaq röpampa kuchunta yatayänampaqmi rogakuyarqan,+ y llapan yataqkunam alliyäyarqan.
Nötakuna
^ Griëgu idiömachöqa “tetrarca” ninmi.
^ Tsënö nirqa, Herödis Antïpaspaqmi parlëkan. Rikäri “Bibliachö palabrakunata entiendinapaq” neqta.
^ O “espantakuypaq rurëkunata”.
^ Kënöpis niyanmi: ankuparqan; kuyaparqan.
^ Griëgu idiömachöqa “atska estadiukuna” ninmi. Juk estadiuqa, 185 metrusmi karqan.
^ Griëgu idiömachöqa “4 kaq vigilia” ninmi. Jesus kawanqan witsan nunakunapaqqa, las 3 de la mañänapitanö patsa waranqanyaqmi karqan.
