Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq  |  No. 1 2017

 QARANCHÖ YACHATSIKÏPITA | ¿GUSTASHUNKIKU BIBLIATA LEYI?

Bibliaqa puëdinmi yanapashïnikita

Bibliaqa puëdinmi yanapashïnikita

Bibliaqa manam lluta librutsu. Tsëchöqa Kamakoq Teytantsikpa consëjunkunatam tarintsik (2 Timoteu 3:16). Willakïninkunaqa alläpam yanapashïnikita puëdin. Kikin Bibliachömi kënö nin: “Diospa palabranqa kawaqmi, y alläpa poderyoqmi” (Hebrëus 4:12). Awmi, Bibliaqa ishkënöpam mas alli kawakunëkipaq yanapashïnikita puëdin: kawënikichö imëka asuntupaq consejashurniki y Diosta alleq reqinëkipaq y änikunqankunata musyanëkipaq yanapashurniki (1 Timoteu 4:8; Santiägu 4:8).

Alli kawakunëkipaqmi yanapashunki. Bibliachöqa kikikipa kawënikipaq y tukï asuntukunapaq consëjukunam kan.

Asia nishqan continentipa juk nacionninchö täraq Vicentwan warmin Annaloumi, cuentata qokuyarqan Bibliachö këkaq consëjukunaqa alläpa yanapakunqanta. Pëkunaqa jövinllaraqmi kayan, y tsëllaraq casakushqa kayaptinmi, pëkunapaqpis alli entiendinakuyänan y shumaq parlapänakuyänanqa sasaraq (ajaraq) karqan. Peru Bibliachö këkaq consëjukunatam cäsukur qallëkuyarqan. ¿Imachötaq yanaparqan? Ollqu kaqmi kënö willakun: “Bibliachö leyinqämi yanapamashqa ima problëma kaptimpis shumaqlla altsayänäpaq. Bibliachö këkaq consëjukunata cäsukurmi kushishqa kawakuyä”. Y warminnam kënö willakun: “Bibliachö këkaq willakïkunam alläpa yanapayämashqa. Kananqa kushishqanam kawakü, y imata logrëta munayanqächö igual pensarmi alli sientikü”.

Diosta mas reqinëkipaqmi yanapashunki. Jina Vicentqa kënömi nin: “Bibliata leyinqämi yanapamashqa Jehovä Diosman imëpitapis mas confiakunäpaq”. Tsënö ninqanmi rikätsikun Bibliaqa Diosta mas reqinëkipaq yanapashïnikita puëdinqanta. Bibliaqa manam consëjunkunallawantsu yanapashunki, sinöqa Diospa amïgun kanëkipaqpis yanapashunkim. Jinamampis, shamoq tiempuchö imëyaqpis alli y shumaq kawakunapaq kaqtam yachakunki (1 Timoteu 6:19). Tsëkunataqa manam ni ima librupis yachatsikuntsu.

Bibliata leyir qallëkur y imëpis leyirqa, qampis mas allim kawakunki y Diostam mas alleq reqinki. Peru itsa wakin wakintaqa entiendinkitsu. Tsënö pasashuptikiqa, unë witsan Etiopïa nacionchö gobiernupaq trabajaq nunapita yachakï. Pëpis manam Diospa Palabranta alleqllaqa entiendirqantsu. Tsëmi juk kuti Jesusman creikoq Felïpi, “¿käyinkiku llapan leyikanqëkita?” nir tapuriptin, kënö nirqan: “Rasumpa kaqchöqa, ¿imanöraq käyïman pipis mana käyitsimaptinqa?”. * Tsënam, alli yachatsikoq Felïpi yanapananta jaqirqan (Hëchus 8:30, 31, 34). Qampis Bibliata mas alleq entiendita munarqa, Internetchö jw.org päginachö këkaq formulariuman qellqar o kë revistachö këkaq direccionman cartakur watukayäshunëkipaq mañakuri. Jina markëkichö Jehoväpa testïgunkunawan parlari o Yachatsikuyänan Wayiman ëwari. Tsëqa ¿imataq yanapashunki mas alli kawakunëkipaq? Bibliam, tsëmi leyita procuranëki.

Biblia yachatsikunqanman mana confiakurqa, ¿Imanirtaq Biblia rasumpa kaqta ninqanman markäkushwan? neq vidëuta rikäri. Tsëta tarinëkipaqqa, kë cödiguwan yëkuri, o jw.org nishqan päginachö PUBLICACIONKUNA > VIDEUKUNA > BIBLIA neqman yëkuri.

^ par. 8 Bibliachö këkaq consëjukuna alläpa yanapakoq kanqanta rikänëkipaqqa, jw.org nishqan Internet päginaman yëkuri, PUBLICACIONKUNA neqman.

^ par. 11 Jina rikäri kë revistachö këkaq “¿Precisanku Bibliata alleq entiendinantsik?” neq yachatsikïta.