Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Noviembri de 2015

¿Imanötaq yachatsikurquntsik pachak watapa mandakïninchö?

¿Imanötaq yachatsikurquntsik pachak watapa mandakïninchö?

“Yamë këta qokoq Dios [...] imëka allikunata qoykuyäshï munëninta rurayänëkipaq.” (HEBRËUS 13:20, 21, NM)

CANTICUKUNA: 136 Y 14

1. ¿Imanirtaq musyantsik Diospa gobiernumpita parlë Jesuspaq mas precisaq kanqanta?

JESUSTAQA alläpam gustaq Diospa gobiernumpita nunakunata parlapë. Diospa Gobiernumpita parlëmi yachatsikïninchöqa mas precisaq karqan. Tsëmi yachatsikunqanchöqa pachak kutipitapis mas tsë Gobiernumpita parlarqan (leyi Mateu 12:34).

2. ¿Ëkaqtaq wiyayarqan Mateu 28:19, 20 textuchö Jesus ninqanta?

2 Kawarimunqampita ichik tiempullatam, Jesusqa pitsqa pachakpitapis mas nunakunata yuripurqan (1 Corintius 15:6). Itsa kë nunakunata Jesus mandarqan, “jinantin nasioncunapa ewar” nunakunata yachatsiyänampaq. * Peru entëru Patsapa yachatsikïqa manam rasllatsu ushakärinan karqan, sinöqa kë mana alli nunakunapa ushëninyaqmi kanan karqan. Tsëmi  kanan witsan yachatsikurninqa, Jesus ninqan cumplikänampaq yanapakïkantsik (Mateu 28:19, 20).

3. ¿Ima kima yanapakïkunataq yanapamarquntsik yachatsikunapaq?

3 Discïpulunkunata yachatsikuyänampaq mandanqanchömi Jesus kënö nirqan: “Noqaqa qamcunawanmi quecashaq” (Mateu 28:20). Kënö nirmi Jesus änikurqan, entëru patsachö yachatsikuyaptin yanapanampaq kaqta. Jina Jehoväpis kanan witsan yanapëkämantsikllam. Hebrëus 13:20, 21 (NM) textum nimantsik, “imëka allikunata” yachatsikunapaq qoykämanqantsikta. Kë yachatsikïchömi rikäshun kë pasaq pachak watakunachö yachatsikunapa, imakuna yanapamanqantsikta, tukïnöpa yachatsikunqantsikta y alli yachatsikoq kanapaq yanapakïta chaskinqantsikta. Rikärishun.

IMAKUNATAQ YANAPAMASHQANTSIK DIOSPITA YACHATSIKUNAPAQ

4. ¿Imapaqtaq yanapamashqantsik tukï herramientakuna?

4 Jesusqa nirqan, Diospa gobiernunqa, muru cuenta kanqantam (Mateu 13:18, 19). Juk murukoqqa muruta murunampaqqa chakrataran alistan, y tsëpaqqa tukï herramientakunatam utilizan. Tsënöllam, Diospa willakïninta nunakuna chaskikuyänampaqpis, utilizantsik reynintsik Jesucristu qomanqantsik herramientakunata. Wakinkunataqa wallka tiempullapam utilizarquntsik, peru wakintaqa kananyaqmi utilicëkantsik. Peru llapan herramientakunam yanapamarquntsik alli yachatsikunapaq.

Tarjëta de testimoniu nishqanmi tsëraq yachatsikur qallaqkunata mëtsikaqta yanaparqan

5. (1) ¿Imataq karqan tarjëta de testimoniu nishqan? (2) ¿Imanötaq kë tarjëtakunata utilizäyaq?

5 1933 watachömi, tarjëta de testimoniu nishqanwan Diospita yachatsikur qallëkurqantsik. Takshalla tarjëtam karqan y ichik yachatsikïllam qellqaraq. Höra hörallam juk yachatsikïyoq yarqamoq. Tsë tarjëtam tsëraq yachatsikur qallaqkunata mëtsikaqta yanaparqan. ¿Imanötaq utilizäyaq? Juk wawqim, chunka watayoqllaraq këkar tsë tarjëtawan yachatsikur qallanqampita willakun; wayiyoqtash puntata leyiratsiyaq y tsëpitanash publicacionta munaratsir ëwakuyaq.

6. ¿Imanirtaq tarjëtakunaqa alläpa yanapakushqa?

6 Tsë tarjëtakunaqa alläpam yanapakuyashqa yachatsikunapaq. Manaraq yarqamuptinmi, wakin wawqikuna y panikuna yachatsikoq yarqïta alläpa munayaq, peru alläpam mantsakuyaq y ima nitapis yachayaqtsu. Wakinkunaqa manam mantsapakuyaqtsu, y llapan musyayanqampitam nunakunata parlapäriyaq. Peru höraqa mana tantiyakïpam imatapis niriyaq. Tsëmi kë tarjëtakunaqa, cläru y fäcil-lla yachatsikuyänampaq yanapakoq.

7. ¿Imanirtaq tarjëtawan yachatsikïqa höraqa fäciltsu kaq?

7 Peru höraqa manam fäciltsu kaq tarjëtakunawan yachatsikï. Juk panim kënö willakun: “Höraqa kënömi niyämaq: ‘¿Y ima nintaq tsë tarjëtaqa? ¿Manaku kikiki parlapämankiman?’”. Wakin nunakunaqa manam leyita puëdiyaqtsu o tsarikurkurmi  punkuta wichqarayämoq. Wakinkunanam, yachatsikunqantsikta mana interesarnin rachikacharkuyaq. Tsënö kaptimpis, tarjëtakunaqa alläpam yanapakurqan yachatsikunapaq y Diospa Gobiernumpita yachatsikoq kanqantsikta reqimänapaq.

8. ¿Imanötaq puritsinalla kaq tocadiscuta utilizarqantsik? (Rikäri kë yachatsikïpa qallananchö këkaq dibüjuta.)

8 1930 watapita patsënam puritsinalla kaq tocadiscuwanna yachatsikur qallëkurqantsik. Tsëwanmi grabashqa discursuta wayiyoqta wiyaratsiyaq. Wakinkunaqa tsë tocadiscuta Aaron nishpam qayayaq, porqui Moisespa rantin Aaron parlanqannömi pëkunapa rantin tocadiscullana parlaq (leyi Exodu 4:14-16 *). Wayiyoq munaptinqa, yachatsikïkaq wawqim grabacionta wiyaratseq y tsëpitanam publicacionta munaratseq. Höraqa llapan familiam wiyakuriyaq. 1934 watachönam, tocadiscukunata kikintsikna rurar qallëkurqantsik. Tiempuwannam wawqikunaqa 92 discursukunata grabayarqan.

9. ¿Imatataq lograrqantsik puritsinalla kaq tocadiscuwan yachatsikurnin?

9 Juk kutim juk nuna grabashqa discursuta wiyarirqan y alläpam gustarirqan. Tsëmi vecïnunkunata wiyatsinampaq tocadiscuta juk semänapa mañëkuyänampaq mañakurqan. Tsënöpam atskaq nunakuna Bibliata estudiayarqan y bautizakuyarqan. Kë nunapis bautizakurirqanmi, y tiempuwanqa ishkë warmi wamrankunam misionëra këman chäyarqan. Kë tocadiscuqa, tarjëta de testimoniu nishqannömi tsëraq yachatsikur qallaqkunata mëtsikaqta yanapashqa yachatsikuyänampaq. Peru tiempuwannam rey Jesucristu patsäratsirqan, Yachatsikunapaq Diospa Escuëlanta yachatsikïchö yanapamänapaq.

TUKÏNÖPA YACHATSIKUNQANTSIKMI YANAPAMARQUNTSIK

10, 11. ¿Imanötaq periödicuwan radiu yanapamarquntsik Diospita yachatsikunapaq?

10 Reynintsik yanapamashqam, Diospa sirweqninkunaqa tukïnöpa mëtsikaq nunakunata yachatsirquntsik. Tsënö tukïnöpa yachatsikunqantsikmi yanapakushqa wallkaqlla karpis mëtsikaq nunakunaman yachatsikïta chätsinapaq (leyi Mateu 9:37). Juknöpaqa yachatsikurqantsik, periödicukunapa Diospa yachatsikïninkunata jorqatsirninmi. Llapan semänakunam wawqi Russell discursuta apatseq noticiakunata jorqayanqan principal oficïnaman. Y tsëpitanam aparatsiyaq Canadächö, Estädus Unïduschö y Euröpachö yarqoq periödicukunachö yarqunampaq. 1913 watapaqqa, wawqi Russellpa discursunkunaqa 2.000 periödicukunachömi yarqoq y cäsi 15 millon nunakunam leyiyaq.

Periödicuwan radiuqa alläpam yanapakushqa wallkaq Testïgukunalla kayanqan sitiukunachö Diospita yachatsikunapaq

 11 Jina radiupa yachatsikunqantsikpis allim yarqurqan. 1922 wata 16 de abrilmi wawqi Rutherford radiupa punta discursunta rurarirqan. Y 50 mil nunakunam wiyariyarqan tsë discursuta. Tsëpita ichik tiempullatanam, kikintsikpana radiuntsik karirqan. Tsë radiuchö punta kaq yachatsikïqa qallarirqan 1924 wata 24 de febrëru killam. Y tsë wata ushanampaqqa kë revistantsik kënömi nirqan: “Diospa yachatsikïninta më tsëman chätsinapaq y alläpa chaniyoq mana kanampaqqa kananyaqqa radiu alläpa yanapakunqantam creiyä”. Periödicuwan radiuqa alläpam yanapakushqa wallkaq Testïgukunalla kayanqan sitiukunachö Diospita yachatsikunapaq.

Mëtsikaq wawqikuna y panikunam nunakuna kayanqan mas sitiuchö yachatsikïta Internetchö päginantsikpita nunakunata parlapëta gustayan (Rikäri 12 y 13 kaq pärrafukunata)

12. (1) ¿Nunakuna kayanqan sitiukunachö imanö yachatsikunqantsiktaq mas gustashunki? (2) ¿Imatataq rurashwan tsënö sitiukunachö yachatsikïta mantsarqa?

12 Jina nunakuna mas puriyanqan sitiukunachö kanan yachatsikunqantsikpis allim yarqïkan. Jatusaq cärrukuna y trenkuna chäkunan sitiukunachö, pläzakunachö y mercädukunachö yachatsikïtam procurantsik. ¿Imatataq rurankiman tsënö sitiukunachö yachatsikïta mantsarqa? Jehoväman mañakï y congregacionkunata watukaq juk wawqi ninqanman pensë. Pëmi nirqan juknöpa rurarna yachatsikïqa Jehoväta juknöpana sirwikanqantsikta y pëman markäkunqantsikta y pëllapaq kanqantsikta rikätsikïkanqantsikta.  Jina ninmi, tukïnöpa yachatsikunampaq listu këkanqanqa Jehoväta pruëbaman churaq cuenta kanqanta. Mantsakïnintsikta vencir y tukïnöpa yachatsikurqa Jehoväpa mas alli sirweqninmi tikrantsik y pëman mas markäkïtam yachakuntsik (leyi 2 Corintius 12:9, 10).

13. (1) ¿Imanirtaq precisan yachatsikurnin Internetchö päginantsikpita nunakunata parlapänantsik? (2) ¿Imanötaq qamqa kë päginata utilizarqunki yachatsikurnin?

13 Mëtsikaq cristiänu mayintsikkunam nunakunata kushishqa parlapäyan Internetchö päginantsikpita. Llapan junaqkunam jw.org päginantsikman 1.600.000 nunakuna yëkuyan. Y 700 idiömapitapis maschö këkaq publicacionkunata leyita y jorqëta puëdiyan. Unëqa karu markakunaman Diospa yachatsikïninta chätsinapaqqa radiutam utilizarqantsik. Y kananqa Internetmi tsëpaq yanapakïkan.

ALLI YACHATSIKOQ KANAPAQ YANAPAKÏKUNA

14. (1) ¿Ima yanapakïtataq cristiänu mayintsikkuna wanayarqan? (2) ¿Ima escuëlataq yanapamarquntsik Bibliapita alli yachatsikoq kanapaq?

14 Këyaqmi rikarquntsik Jehoväqa tukï herramientakunata qomanqantsikta y tukïnöpa yachatsikunapaq yanapamanqantsikta. Peru manam tsëllatatsu rurashqa, sinöqa, alli yachatsikoq kanapaqpis yanapamarquntsikmi. ¿Imanirtaq këta ruranan precisashqa? Këllaman pensarishun. Tocadiscuwan yachatsikuyaptinmi wakin nunakunaqa wiyayanqampita acuerdutsu kayaq, peru wakinqa chaskikuyaqmi y mastam Bibliapita musyëta munayaq. Tsëmi wawqikuna y panikuna wanayaq alli yachatsikoq këta; masta musyëta munayaptin imanö yachatsiyänampaq y mana acuerdu kayaptin imanö contestayänampaq. Jehoväpa Santu espïritunmi wawqi Knorrta yanaparqan, wawqikuna alli yachatsikoq këta wanayanqanta cuentata qokunampaq. Tsëmi 1943 watachö Yachatsikunapaq Diospa Escuëlanta patsäratsirqan.

15. (1) ¿Imanötaq wakinkuna kayashqa Yachatsikunapaq Diospa Escuëlanchö yachatsikurnin? (2) ¿Imanötaq Jehovä cumplishqa Salmu 32:8 textuchö änikunqanta?

15 Jina mëtsikaq wawqikunam atskaq nunachöqa parlakïta puëdiyaqtsu. Juk wawqim willakun 1944 watachö punta kaq discursunta ruraptin ima pasakunqanta. Doeg jutiyoq nunapaq Biblia parlanqampitam yachatsikï tocarqan. Kë wawqim willakun discursanqan höra chipyëpa karkaryanqanta y imëkanö discursunta ushanqanta. Tsë escuëlachöqa wamrakunapis discursëta puëdiyaqmi. 12 kaq pärrafuchö parlanqantsik congregacionkunata watukaq wawqim yarpan, juk wamrata ima pasanqanta. Punta discursunta rurarninshi alläpa mantsapakurnin cäsi waqanaq, peru imëkanöshi discursar ushanaq. Wakin wawqikunaqa mantsallïshu karmi makita pallarita y plataformaman ëwëtapis alläpam mantsapakuyaq. ¿Qampis pëkunanöku mantsapakunki? Tsënö kaptinqa Jehoväta mañakï yanapashunëkipaq. Pëmi yanapashunki, Yachatsikunapaq Diospa Escuëlan qallanqan witsan  discursaq wawqikunatanö (leyi Salmu 32:8 *).

1943 watapita patsëmi 8.500 estudiantikuna Galaad Escuëlapita yarqayämushqa y 170 nacionkunachö yanapakuyashqa

16. ¿Imapaqtaq Galaad Escuëla yanapakun?

16 Jina Jehoväqa alli yachatsikoq kayänampaqmi sirweqninkunata yanapashqa Galaad escuëlawan. Kë escuëlaqa estudiantikunata yanapan Diospita yachatsikïta mas munayänampaqmi. Punta kaq escuëlaqa qallarqan 1943 watachömi. Y kananyaqqa 8.500 estudiantikunanam tsë escuëlapita yarqayämushqa y 170 nacionkunachömi yanapakuyashqa. Y 2011 watapita patsënam, precursor especialkunata, congregacionta watukaqkunata, betelïtakunata o tsë escuëlaman mana ëwashqa misionërukunata invitëkäyan.

17. ¿Imanötaq yanapakïkan Galaad Escuëla?

17 ¿Imanötaq yanapakïkan Galaad Escuëla? Alläpa allim. Japonllaman pensarishun. 1949 wata agostu killapaqqa, chunka Testïgullam Japonchö kayarqan. Peru misionërukunam ëwar qallëkuyarqan, y tsë wata ushëpaqqa 13 misionërukunanam yanapakïkäyarqan. Kananqa 216 mil Testïgukunanam Japonchö kayan. ¡Y cäsi pullan kaqmi precursor regular o auxiliar kayan!

18. ¿Ima escuëlakuna mastaq Jehoväpa testïgunkunapa kapamantsik?

18 ¿Ima escuëlakuna mastaq Jehoväpa testïgunkunapa kapamantsik? Anciänukunapaq y Siervu Ministerialkunapaq Escuëla, Precursorkunapa escuëla, Diospa Gobiernumpita Yachatsikoqkunapaq Escuëla, Congregacionkunata Watukaqkunapaqwan Warminkunapaq Escuëla y Sucursalta Rikaqkunapaqwan Warminkunapaq Escuëlam. Kë escuëlakunam atskaq wawqikunata y panikunata alli yachatsikoq kayänampaq yanapashqa y markäkïninkunachö sinchi kayänampaqpis yanapashqa. ¡Clärum këkan sirweqninkunata Jesus alleq yachëkätsinqanqa!

19. (1) ¿Ima nirqantaq wawqi Russell yachatsikïpaq? (2) ¿Rasun kaqtaku nirqan?

19 Pachak watanam pasarishqa Diospa Gobiernun mandakur qallanqampita. Tsëpita patsëmi Jesusqa yachatsikunqantsikchö yanapëkamarquntsik. 1916 watam wawqi Russell Kënö nirqan: “Yachatsikïqa alläpa rasmi mirëkan, y entëru patsapa ‘evangeliupita’ yachatsikunapaqmi carguta chaskirquntsik” (La fe en marcha, de A. H. Macmillan, 69 kaq pägina). Rikanqantsiknömi, wawqi Russellqa següru këkarqan entëru Patsaman yachatsikï chänampaq kaqta. Y ¿tsënöku kashqa? Awmi, porqui entëru Patsapanam yachatsikïkantsik. Alläpam agradecikuntsik yachatsikunapaq llapan wananqantsikkunata Jehovä qomanqantsikpita.

^ par. 2 Tsë pitsqa pachak nunakunapitaqa itsa cristiänu këman mëtsikaq chäyarqan. Tsëtaqa musyantsik, “wauqicuna y panicuna” nir apostol Pablu qayashqa kaptinmi. Jina nirqanmi tsë witsampaqqa wakinkuna wanushqana kayanqanta, peru mëtsikaqraq kawëkäyanqanta. Tsëmi rikätsikun, Jesus yuripunqan kë pitsqa pachak nunakunataqa Pablu y wakin cristiänukunapis reqishqa kayanqanta.

^ par. 8 Exodu 4:14-16: “Tsënam Jehoväqa Moiseswan piñakurkurqan y kënö nirqan: ‘¿Manaku kan levïta kastapita wawqiki Aaron? Alleqmi musyä pëqa parlakïta puëdinqanta. Jinamampis taripäshoqnikim yarqamushqa y rikëkushurnikiqa shonqunchömi alläpa kushikunqa. Y imata parlanampaq kaqtam willanëki. Y noqam pë parlanqanchö y qam parlanqëkichö yanapayashqëki y imata rurayänëkipaq kaqtam yachatsiyashqëki. Y qampa jutikichömi pë parlakamunqa; rantikichö parlakoqmi kanqa y qamnam Diosnin kanki[’]”.

^ par. 15 Salmu 32:8: “Tantiyaq kënikim qoshqëki, y alli nänipa purinëkipaqmi yachatsishqëki. Rasumpam, rikëkurniki consejashqëki”.