Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Noviembri de 2015

Jehovächömi kuyakïqa yurin

Jehovächömi kuyakïqa yurin

“Dioschömi kuyakïqa yurin.” (1 JUAN 4:8, 16, NM)

CANTICUKUNA: 18 Y 91

1. (1) ¿Dios imanö kanqampita mëqantaq mas precisaq kaq? (2) ¿Imanötaq sientikuntsik Dioschö kuyakï yurinqanta musyar?

BIBLIAQA “Dioschömi kuyakïqa yurin” ninmi (1 Juan 4:8, NM). Tsë ninanqa, Jehovä imanö kënimpitaqa kuyakïninmi mas precisaq. Pëqa manam kuyakoqllatsu, sinöqa pëpitam kuyakïqa yurin. Imata rurarpis, kuyakoq karmi ruran. Alläpam agradecikuntsik ciëluta, Patsata y llapan kawaqkunata kamanampaq kuyakoq kënin yanapanqampita.

2. Jehovä kuyamanqantsikrëkur, ¿imapitataq següru këkantsik? (Rikäri kë yachatsikïpa qallananchö këkaq dibüjuta.)

2 Musyantsikmi llapan kamanqankunata Jehovä kuyanqanta. Tsëmi següru këkantsik, änimanqantsikta cumplimunampaq kaqta. Tantiyarinapaq, kuyamarnintsikmi “sitashqa juc junaqta, enteru munducho nunacunata rurayanqanmanno” Tsurin Jesuswan juzgatsinampaq (Hëchus 17:31). Musyantsikmi, llapan nunakunata igualpa Jesus juzgamänapaq kaqta. Tsëpitanam llapan cäsukoqkuna shumaq kawakïta y mana ushakaq kushikïta chaskiyanqa.

 ¿IMATATAQ RIKÄTSIKUSHQA NUNAKUNAPA MANDAKÏNIN?

3. Jehovä mana kuyamashqaqa, ¿imanöraq shamoq tiempuchö kawakïnintsik kanman?

3 Jehovä mana kuyamashqaqa, ¿imanöraq shamoq tiempuchö kawakïnintsik kanman? Satanaspa makinchö këkaq nunakunachi gobernar sïguiyanman (2 Corintius 4:4; 1 Juan 5:19; leyi Apocalipsis 12:9, 12). ¡Alläpa llakikïpaq kawakïchi shuyarämashwan!

4. ¿Imanirtaq Jehovä permitirqan Satanas contran churakänanta?

4 Manam Satanasllatsu Diospa contran churakärirqan, sinöqa Adantawan Ëvatapis contranmi churarirqan. Y nirqanmi, entëru Patsata gobernanampaq Dios mana derëchuyoq kanqanta. Jina nirqanmi, kikin mas alli mandakoq kanqanta (Genesis 3:1-5). Yachaq karninmi Jehoväqa Satanasta tiemputa qoshqa ninqan rasumpa o mana rasumpa kanqanta rikätsikunampaq. Peru clärum rikakashqa, Satanaswan nunakuna mana alli mandakoq kayanqanqa.

Jehoväpa yanapakïninwanran nunaqa gobernanakïta puëdin

5. ¿Imatataq rikätsikushqa kananyaq nunakunapa mandakïnin?

5 Kanan witsan nunakunaqa mas mana allim tikrakïkäyan. Pasaq pachak watakunachömi 100 millonpitapis mas nunakuna guërrachö wanuyashqa. Y Bibliaqa willakun, “ushanan junaqkunachö” nunakuna mas mana alli tikrayänampaq kaqtam (2 Timoteu 3:1, 13, NM). Jina willakunmi, “nunapa nänin kikimpa mana kanqanta. Manam pureq nunapa makinchötsu këkan kikinllapita purinan” (Jeremïas 10:23). Kënö willakunqanqa rasun kaqllam. Kananyaq nunapura gobernanakuyanqanmi rikätsikushqa, gobernanakunapaq Jehovä mana kamamashqantsikta; pëpa yanapakïninwanran nunaqa gobernëta puëdin.

6. ¿Imanirtaq Jehoväqa permitishqa mana alli nunakuna kawar sïguiyänanta?

6 ¿Imanirtaq Jehoväqa permitishqa mana alli nunakuna kawar sïguiyänanta? Porqui tsënöpam rikätsikushqa Diospa Gobiernunlla mas alli kaq kanqanta. Ichikllachönam Diosqa mana alli nunakunata ushakätsinqa. Y tsëpita patsëqa contran churakaqtaqa pita karpis rasllam ushakäratsinqa. Nunapura gobernanakuyanqan mana alli kanqantam utilizanqa, contran churakaqkunata wanïta mereciyanqanta rikätsikunampaq, y mananam permitinqanatsu mana alli nunakuna yapë kananta.

¿IMANÖTAQ KUYAMANQANTSIKTA DIOS RIKÄTSIMANTSIK?

7, 8. ¿Imanötaq kuyamanqantsikta Jehovä rikätsimantsik?

7 Jehoväqa kuyamanqantsikta tukïnöpam rikätsimantsik. Ciëluchö y Patsachö imëka cösaskunata kamanqankunallaman pensari. Ciëluchöqa mëtsika waranqa planëtakuna y qoyllurkunam kan. Juk kaq qoyllurqa Intim. Inti mana kaptinqa manam kë Patsachö kawë kanmantsu. Romänus 1:20 textum rikätsikun, Jehoväqa Kamakoq, kallpayoq, yachëyoq y kuyakoq kanqanta.

Jehoväqa Patsata rurashqa nunakuna kushishqa kawakuyänampaqmi

8 Jehoväqa Patsata rurashqa nunakuna kushishqa kawakuyänampaqmi y shumaq jardinmanmi churarqan. Jina allilla  yarpëyoqta y mana wanushpa kawakïta puëdeqtam rurarqan (leyi Apocalipsis 4:11). Jina Salmu 136:25 textum willakun kuyakïnin mana ushakaq kanqanrëkur, llapan kawaqkunata Jehovä mikïnin qonqanta.

9. Kuyakoq Dios karnimpis, ¿imatataq Jehovä chikin?

9 Jehoväqa kuyakoq Dios karnimpis, mana alli rurëkunataqa chikinmi. Salmu 5:4-6 textum willakun mana alli rurëkunaqa Jehoväta mana gustanqanta y maqakoq y ulikoq (llullakoq) nunakunata chikinqanta.

ICHIKLLACHÖNAM IMËKA MANA ALLIKUNAQA USHAKÄRINQA

10, 11. (1) ¿Imataq ichikllachöna pasanqa mana alli nunakunata? (2) ¿Ima bendicionkunatataq cäsukoq kaqkunata Jehovä qonqa?

10 Yachakurinqantsiknömi, Jehoväqa kuyakoq Dios, y imëka mana allikunataqa chikinmi. Tsëmi patsätsinqan junaqchö, llapan mana allikunata ushakäratsinqa. Bibliaqa änikun mana alli ruraq nunakuna ushakäyänampaq kaqta, ‘peru Jehoväman markäkoqkunaqa patsachö täräyänampaq’ kaqtam. Jina änikunmi, ichikllachöna Jehoväpa contran churakashqa kaqkunata ushakätsinampaq kaqta (Salmu 37:9, 10, 20).

11 ¿Ima bendiciontaraq Jehovä qonqa kuyakïnimpita agradecikur cäsukoqkunata? Bibliam kënö nin: “Patsachöqa alli nunakunallam täräyanqa, y tsëchömi imëkamayaqpis kawayanqa” (Salmu 37:29). Jehoväta mana jaqipa sirweqkunaqa kushishqam y imapitapis mana mantsapakushpam kawakuyanqa (Salmu 37:11). Porqui Diosnintsikqa kuyakoq karmi mana jaqipa sirweqninkunapaqqa, imëpis allillata ruran. Bibliaqa kënömi nin: “Mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam” (Apocalipsis 21:4).

12. Jehoväpa rikëninchö alli nuna këta munarqa, ¿imatataq ruranantsik?

12 Salmu 37:37, 38 textum willakun, llapan alli nunakunata Jehovä shumaq kawakïta qonampaq kaqta. Jina willakunmi, mana alli y mana cäsukoq nunakunata chipyëpa ushakätsinampaq kaqta. Jehoväpa rikëninchö alli nuna këta munarqa, Tsurinta y Pëtam alleq reqinantsik y llapan mandamanqantsikkunatam cäsukunantsik (leyi Juan 17:3). Chipyëpam markäkunantsik mana alli nunakuna ushakäyänampaq kaqta, “peru Diospa muneninta ruraq nunaqa” imëyaqpis kawanampaq kaqta (1 Juan 2:17). Ushakë junaq këllachöna këkaptinqa, alläpam precisan kë consëjuta wiyakunantsik: “Jehoväman shuyäki y mandashunqëkita cumpli” (Salmu 37:34).

DIOSPA MAS JATUN KAQ KUYAKÏNIN

13. ¿Mëqantaq Diospa mas jatun kaq kuyakïnin?

13 Jutsasapa këkarpis Diosta cäsukïtaqa puëdintsikmi. Jina Jesus wanunqanrëkurmi amïgun këta puëdintsik. Tsëmi Diospa mas jatun kaq kuyakïninqa. Wiyakoq nunakuna jutsapita y wanïpita librashqa kayänampaqmi Tsurinta kachamurqan  (leyi Romänus 5:12; 6:23 *). Jehoväqa segürum karqan Jesus kë Patsachö këkarnin llapanchö cäsunampaq kaqta, porqui mëtsika watakunapanam ciëluchö rikätsikushqana karqan cäsukoq kanqanta. Jehoväqa alläpam llakikurqan nunakuna kuyashqa Wamranta alläpa sufritsir wanutsiyaptin. Tsënö kaptimpis, Jesusqa Dioslla mandakoq kanqantam imëpis rikätsikurqan y defendirqan. Jina rikätsikurqanmi jutsannaq nunaqa imëka mana allikunapa pasëkarpis Jehovä Diosllapaq këta puëdinqanta.

Kuyamarnintsikmi Diosqa Tsurinta kachamurqan (Rikäri 13 kaq pärrafuta)

14, 15. ¿Imanötaq Jesuspa wanïnin llapantsikta yanapamantsik?

14 Jesusqa alläpam sufrirqan, peru wanunqanyaqmi Diosta cäsukurqan y gobernamänapaq Teytanlla derëchuyoq kanqanta defendirqan. ¿Imanötaq Jesuspa wanïnin llapantsikta yanapamantsik? Shumaq Huertaman tikrashqa Patsachö mana wanushpa kawakïta chaskinapaqmi yanapamantsik. Apostol Pablum willakun Jesuspa wanïninqa, Jehoväwan Jesus alläpa kuyamanqantsikta rikätsikunqanta. Y nirqanmi: “Alli kaqta ruraq nunapaqqa, manam pipis wanurinmantsu; peru alli nunapaqqa, itsa pillapis wanurinman”. Y nirqanmi, “jutsa rurëllachö kakïkashqa” alläpa kuyamarnintsik Tsurinta noqantsikrëkur wanunampaq kachamunqanta (Romänus 5:6-8, NM). Apostol Juannam kënö nirqan: “Quenomi allapa cuyamashqantsicta musyatsimarqantsic: jucllella Tsurin Jesustam que patsaman cachamorqan, Jesusrecur noqantsic alli cawanantsicpaq. Quenopam musyantsic Dios allapa cuyamanqantsicta: manam noqantsic cuyanqantsicrecurtsu, sinoqa pe cuyamarnintsicmi. Tsurin Jesusta[m] cachamorqan, [...] wanur llapan jutsa rurashqantsicpita Dios perdonamänantsicpaq” (1 Juan 4:9, 10).

15 Jina Jesuspis nirqanmi nunakunata Dios alläpa kuyarnin pëta cachamunqanta, tsënöpa “peman marcäcoqcuna mana condenashqa cayänanpaq sinoqa wiñepa  cawayänanpaq” (Juan 3:16). Alläpa llakikïpaq kaptimpis, Jehoväqa listum këkarqan noqantsikrëkur wanunampaq Tsurinta kachamunampaq. Tsëmi rikätsimantsik alläpa kuyamanqantsikta. Tsë kuyakïninqa manam imëpis cambianqatsu. Tsëmi apostol Pablu kënö qellqarqan: “Tsemi noqaqa allipa musyä Diosnintsicpa cuyaquininpita imapis mana raquimenintsicta puedenqanta. Manam raquimäshuntsu ni wanï, ni cawe, ni anjelcuna, ni mana alli espiritucuna, ni ima puedeq caqcuna, ni canan ni ware warätin ima eca pasaquicunapis. ¡Tsenollam raquimashuntsu ni raracho caqcuna, ni patsa rurincho caqcuna, Diosnintsic ima camashqancunapis, Teytantsic Jesucristurecur Diosnintsicpa cuyaquininpita manam raquimenintsicta puedenqatsu!” (Romänus 8:38, 39).

DIOSPA GOBIERNUNQA MANDAKÏKANNAM

16. (1) ¿Imataq Diospa gobiernunqa? (2) ¿Pitataq Gobiernunchö mandakamunampaq churashqa?

16 Diospa Gobiernumpis, Jehovä kuyamanqantsiktam rikätsimantsik. Kë Gobiernutaqa Jehovämi Patsätsishqa y tsëchö mandakunampaqqa nunakunata kuyaqta y gobernë yachaqtam churashqa (Proverbius 8:31). Kë mandakoqqa Jesucristum. Jina Diosqa 144.000 nunakunatam akrashqa ciëlupita patsë Jesuswan mandakayämunampaq. Pëkunaqa Patsachö kawashqa karmi musyayan nunapa kawënin imanö kanqanta (Apocalipsis 14:1). Patsachö kawanqan witsanqa Jesuspa mas precisaq yachatsikïninqa Diospa Gobiernumpitam karqan. Tsëmi discïpulunkunatapis kënö mañakuyänampaq yachatsirqan: “Ciëluchö këkaq Teytalläkuna jutillëki santificashqa këkutsun. Gobiernïki shamutsun. Ciëluchö rurakanqannölla patsachöpis munëniki rurakëkutsun” (Mateu 6:9, 10, NM). Alläpam shuyarëkuntsik kë mañakï cumplikänanta y Diospa Gobiernun llapan nunankunapaq bendicionta apamunanta.

17. ¿Imachötaq Jesuspa mandakïninwan nunakunapa mandakïnin jukläya kayan?

17 Jesuspa mandakïninwan, nunakunapa mandakïninqa alläpa jukläyam kayan. Nunapa mandakïninqa guërrakunatam rurashqa, tsërëkurmi mëtsikaq nunakuna wanuyashqa. Peru Jesusqa, Jehovä kuyamanqantsiknöllam kuyamantsik (Apocalipsis 7:10, 16, 17). Jesusqa kënömi änimantsik: “Llapequipis utishqa y llaquishqa carnenqa, noqaman shayämï. Shayämuptiqueqa, noqam jamaratsiyashqequi. Imeca yugucho noqalla arsuta apaq cuentam qamcunawan purishun. Noqam qollmi shonqu car y umildi car, llapan nacaquiniquicunapita jamaratsiyashqequi. Noqapa yugoqa manam lasantsu. Yanapayäpteq ancashllam canqa” (Mateu 11:28-30). ¡Imanömi Jesusqa kuyëkamantsik!

18. (1) ¿Imataq pasakïkan 1914 watapita patsë? (2) ¿Imapitataq qateq kaq yachatsikïchö yachakushun?

18 Bibliaqa yachatsikun Diospa Gobiernun 1914 watachö ciëluchö mandakur qallanqantam. Tsë watapita patsëmi 144.000 nunakunata ciëluchö Jesuswan mandakuyänampaq juntëkashqa. Jina juntëkashqam mana alli nunakuna ushakäyaptin, quedaqpaq kaq nunakunatapis. Pëkunapaqmi Bibliaqa willakun ‘mana yupetapis puedipaq nunacuna’ kayanqanta y shumaq Patsachö kawayänampaq kaqta (Apocalipsis 7:9, 13, 14). ¿Ëkaqtaq kë nunakuna kayan? ¿Imata rurayänantataq Dios shuyaran? Qateqnin kaq yachatsikïchömi tsëpita yachakurishun.

^ par. 13 Romänus 6:23 (NM): “Porqui jutsa rurëpa pägunqa wanïmi, Diospa qarëninqa mana wanushpa kawëmi Señornintsik Jesucristurëkur”.