Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Octubri de 2015

“Noqapaqqa alläpa allim Diosman witï”

“Noqapaqqa alläpa allim Diosman witï”

ISQUN watayoqllaraq këkarmi winëta jaqirirqä. Kananqa 43 watayoqnam kä, peru juk mëtrullam kä. Alläpa ichikllan kanqäman mana yarparänäpaqmi teytäkunaqa trabajanäpaq niyämarqan. Tsëmi wayïpa frentinllachö frütata rantikur qallëkurqä. Tiendä limpiu kaptinmi allipa rantikoq kä.

Peru alläpa trabajëqa manam problëmakunata altsarqantsu. Këllata willariyashqëki, rantipakoq ëwarmi tiendakunapa mostradorninman ëpaqllatsu kä. Noqapita mas jatun nunakullapaqmi imapis rurashqa kaq. Tsëmi alläpa llakitsimaq. Peru 14 watayoq këkarmi juknöpana imëkatapis rikar qallëkurqä.

Juk junaqmi ishkaq Testïgunkuna früta ranteq chäyämurqan. Y Bibliapita yachatsiyämänampaq niyämaptinmi änirirqä. Pëkunam niyämarqan alläpa ichikllan kanqäman pensanqäpitaqa Jehoväpita yachakï mas precisaq kanqanta. Tsëmi alläpa yanapamarqan. Tsëpita patsëmi Salmu 73:28 textu alläpa gustëkamarqan. Qallananqa kënömi nin: “Noqapaqqa alläpa allim Diosman witï”.

Tsë witsankunam Costa de Marfil nacionchö familiäkunawan kawarqä. Tsëchöqa reqiyämarnïmi nunakunaqa manana rikaräyämaqnatsu. Peru Burkina nacionman täraq ëwayanqächömi, kawënï alläpa cambiarirqan. Tsëchö nunakunaqa alläpam rikaräyämaq, tsëmi wayïpita yarqoqtsu kä. Semänakuna pasariptinmi Jehoväpita yachakï alläpa gustamanqanta yarpärirqä. Peru tsë markachöqa manam pipis Bibliapita yachatsimaqtsu. Tsëmi Jehoväpa testïgunkunapa sucursalninman qellqarirqä, y pëkunam Nani jutiyoq misionërata mandayämurqan. Pëqa juk motociclëtachö këkaptïmi tariramarqan.

Täranqä sitiuchö cällikunaqa allpallapitam kaq, tsëmi purinanqa fäciltsu kaq. Y tamyaptinqa alläpa leqitam tikrareq. Misionëraqa wayïman yachatsimaq shumurmi motociclëtampita atska kuti ishkirqan, peru watukamëtaqa manam qelanäkurirqantsu. Juk junaqmi Jehoväpa Testïgunkuna Yachatsikuyänan Wayiman ëwayänäpaq invitamarqan. Manam imanö këta puëdirqätsu, porqui wayïpita yarqïtam mantsakoq kä y nunakuna rikaräyämaptinmi penqakoq kä. Jina mötumpa qepanchö ëwaptïqa manam manejanampaq fäciltsu kanman karqan. Tsënö kaptimpis ëwayänäpaqmi änirqä, porqui gustamanqan textu kënö ninqanmanmi yarparqä: “Ciëluchö y Patsachö Autoridäyoq Teyta Jehovächömi tsapäkïnï ashirqö”.

 Misionërapa motociclëtanchö ëwarqa atska kutim leqitaman ishkiyaq kayä. Peru reunionkunaman ëwë alläpa gustayämaptinmi ishkitaqa mantsayaqtsu kayä. Cällikunachö nunakunaqa alläpam rikaräyämaq, peru reunionchöqa kushishqam chaskiyämaq. Tsëmi isqun killakuna pasariptinlla bautizakurirqä.

Alläpa gustanqä textuqa kënömi usharin: “Llapan ruranqëkita willakunäpaq”. Kë textum yarpätsimaq Diospita yachatsikunä precisanqanta, peru wayin wayin ëwanä sasaraq kanantaqa musyarqämi. Tsëraq yachatsikoq yarqunqächömi wamrakuna y mayor nunakuna alläpa rikaräyämaq y imanö purinqäpitam asikuyaq. Tsëqa alläpam llakitsimarqan. Peru tsë nunakuna noqanöpis Paraïsuchö kawëta wanayanqanta musyanqämi yanapamarqan yachatsikur sïguinäpaq.

Yachatsikoq ëwanäpaqmi makiwan manijana tricicluta rantirqä. Subïda kaptinqa yanaqïmi triciclüta kumamoq. Y bajayämunäpaqqa pëpis triciclümanmi lloqamoq. Rasunmi, qallananllachöqa wayin wayin yachatsikunä manam fäciltsu kashqa, peru rasllam yachakärirqä. Yachatsikoq ëwëqa alläpam gustamarqan, tsëmi 1998 watachö precursöra regular tikrarirqä.

Atska nunakunatam Bibliapita yachatsirqä, pëkunapitam chuskoq Jehoväpa testïgun këman chäyarqan. Jina juk nanäpis Testïgum tikrarqan. Kë nunakuna Diosman mas witiyanqanta musyanqämi, mas wananqä hörakunachö kallpata qomashqa. Këllata willariyashqëki, universidächö estudiaq juk jövintam wayimpa punkunchö yachatseq kä. Tsëpitanam yachatsir sïguinampaq juk turita nirqä. Tiempuwannam kë jövin Costa de Marfil nacionman täraq ëwakurqan. Juk junaqmi paludismu qeshyawan qeshyëkarnin juk cartata chaskirirqä. Tsë cartachöqa nirqan tsë jövinqa publicadorna kanqantam. ¡Tsëqa alläpam kushitsimarqan!

Juk progrämam jirëta yachatsimarqan kikïlla mantenikunäpaq. Juk yachatsiyamaqnïmi cuentataq qokurirqan alläpa trabajadöra kanqäta. Tsëmi jabonta rurëta yachatsiyämänampaq nimarqan. Y rasumpam yachatsiyämarqan. Kananqa röpata taqshanapaq y bañakunapaq kaq jabonkunatam wayïchö rurä. Jabonnïkunata ranteq nunakunaqa alläpa kushishqam kayan y jukkunatapis rantiyänampaqmi niyan. Y kikïmi motociclëtäwan entregä.

Peru llakikïpaqqa, cada junaqmi waqtä mas nanan. Tsëmi 2004 watachö precursöra këta jaqirirqä. Peru llapan puëdinqämannömi yachatsikoqqa yarqikä.

Imëpis asi asilla kanqätam nunakunaqa niyan. Tsëqa kushishqa kaptïmi. ¿Imanir tsënö kushishqa kanqäta musyankiku? Porqui noqapaqqa alläpa allim Diosman witiqa kashqa. (Sarah Maiga willakunqan.)