Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Septiembri de 2015

Jesucristunö poqu cristiänu kanapaq kallpachakushun

Jesucristunö poqu cristiänu kanapaq kallpachakushun

“Cristunö kanqantsikyaq poqur sïguikäshun.” (EFESIUS 4:13, NM)

CANTICUKUNA: 69 Y 70

1, 2. ¿Imanö këtataq munantsik Jehoväpa llapan sirweqninkuna? Juk igualatsikïwan willakaramï.

MERCÄDUTA früta ranteq ëwarqa, ¿imanö kanantataq munantsik? Puntata chanintaraq tapukurnimpis, tsëllaraq pallashqa kaqta, shumaq kaqta y poqu kaqtam ashintsik. Porqui musyantsikmi mikunapaqqa, poqushqa kaqkuna mas alli kanqanta.

Bibliata estudiarqa, alli kaqta y mana alli kaqta entienditsikoq consëjukunatam ashinantsik

2 Jina tsënöllam, Jehoväpita yachakurir y bautizakurirpis poqushqa cristiänu këta munantsik, tsë ninanqa, Jehovä munanqannö kawëta y kuyë amïgun tikrëta. Ëfesu markachö cristiänukunatam apostol Pablu nirqan, llapankuna juknölla këta procurarqa y Jesuspita yachakïta sïguirqa, Cristunö poqushqa cristiänu këman chäyänampaq kaqta (Efesius 4:13, NM).

3. ¿Imachötaq igualan Ëfesu congregacion kanan witsan congregacionkunawan?

3 Pablu cartakunqan Ëfesu congregacionchöqa, atska  watapana Jehoväta sirweq poqushqa cristiänukunam kayaq. Jina Jehoväwan amïgu këninkunata sinchiyätsita wanaq cristiänukunapis kayaqmi. Jina tsënöllam kanan witsan congregacionkunachöpis pasakun. Mëtsikaqmi atska watapana Jehoväta sirwikäyan. Peru wakin kaqkunaqa manam poqushqa cristiänu këman chäyanraqtsu. Tsënö kaqkunachömi këkäyan cada wata mëtsikaq bautizakoqkuna. Pëkunaqa alleqran kallpachakuyänan poqushqa cristiänu këman chäyänampaq. Y qamqa, ¿poqushqa cristiänunaku kanki? (Colosensis 2:6, 7.)

¿IMANÖTAQ RIKÄTSIKUNTSIK POQUSHQA CRISTIÄNU KANQANTSIKTA?

4, 5. (1) ¿Llapan poqushqa cristiänukunaku igual-lla kayan? (2) ¿Imakunataq rikätsikun poqushqa cristiänu kayanqanta? (Rikäri kë yachatsikïpa qallananchö këkaq dibüjuta.)

4 Frütakunaqa poqushqa karpis, manam llapantsu igual kayan. Wakinmi taksha o jatun kayan o imanö kënimpis jukläyam. Peru poqushqa këninqa clärum rikakun. Tsënöllam poqushqa cristiänukunapis igualtsu kayan, wakinmi jövin o edäna kayan, costumbrinkuna y gustunkunapis jukläyam. Peru poqu cristiänu kayanqanqa clärum rikakun. ¿Imakunachö?

“¿Imakunachö alliyänätaq pishin Jesusnö kanäpaq?”

5 Poqushqa cristiänukunaqa, Jesus ruranqantam alleq tantiyëkur qatiyan (1 Pëdru 2:21, NM). Jesusmi nirqan, llapan shonquntsikwan, kawënintsikwan y yarpënintsikwan Jehoväta kuyanapaq. Jina nirqanmi, nuna mayintsikta kikintsiktanö kuyanapaqpis (Mateu 22:37-39). Tsë mandakïtam poqushqa cristiänukunaqa wiyakïta procurayan. Imanöpis kawakuyanqanwanmi rikätsikuyan pëkunapaqqa, Jehoväpa amïgun kë y nuna mayinkunata kuyë alläpa precisanqanta.

Mayor wawqikunaqa Jesusnö humildi kayanqantaqa rikätsikïta puëdiyan ima carguchöpis këkaq jövinkunata yanaparninmi (Rikäri 6 kaq pärrafuta)

6, 7. (1) ¿Ima mastaq rikätsikun poqushqa cristiänu kayanqanta? (2) ¿Ima tapukïtataq rurakunantsik?

6 ¿Ima mastaq rikätsikun poqushqa cristiänu kayanqanta? (Gälatas 5:22, 23.) Yachanëllapaq, tranquïlu y pacienciakoq kayanqanmi. Ima problëmapapis pasar y shuyaräyanqannö imapis mana yarquptinqa, altsakänampaq kaqman pensarmi alleq tsarakuyan. Y Bibliata estudiarqa, alli kaqta y mana alli kaqta entienditsikoq consëjukunatam ashiyan. Tsëpitanam, imatapis akrarqa tsë consëju ninqanmannö rurayan. Humildim kayan  y Jehoväpa consëjunkuna ninqanmannö imatapis rurë mas alli kanqantam cuentachö katsiyan. * Jinamampis kushi kushillam Diospita yachatsikuyan y congregacion juknölla kanampaqmi tukïnöpa yanapakuyan.

7 Mëtsika watapana Jehoväta sirwirpis kënömi tapukunantsik: “¿Imakunachö alliyänätaq pishin Jesusnö kanäpaq?”. Cristunö poqu cristiänu kanapaq kima yanapakïkunata rikärishun.

BIBLIAPITA ALLEQ YACHAKOQKUNA KASHUN

8. ¿Imanirtaq musyantsik Diospa Palabran ninqanta Jesus alleq entiendinqanta?

8 Jesusqa Diospa Palabran ninqanta alleqmi entiendeq. Tantiyarinapaq, 12 watayoq këkarmi Diospa Palabranpita alli yachaq nunakunawan parlarnin templuchö quedakurqan. Llapan wiyaqninkunam espantakuyaq yachanqampita (Lücas 2:46, 47). Tiempu pasariptinnam Diospa Palabranta alleq utilizaptin, chikeqninkunapis contestëta puëdiyarqannatsu (Mateu 22:41-46).

9. (1) ¿Imatataq ruranantsik poqu cristiänu këta munarqa? (2) ¿Imatataq ruranantsik Bibliata estudiarninqa?

 9 Poqu cristiänu këta munarqa, Jesus ruranqantam ruranantsik. Manam Bibliapa fäcil yachatsikïninkunallawanqa conformakunantsiktsu. “Chucru miquicunata micoq auquis wamra cuentam” Biblia llapan ninqanta entiendita procuranantsik (Hebrëus 5:14). Rasumpa kaq yachatsikïkunatam alleq entiendita wanantsik (Efesius 4:13, NM). Y tsëpaqqa, alleq estudianapaqmi tiempuntsikta shumaq patsätsinantsik; llapan junaqkuna Bibliata leyinapaq y kikintsiklla o familiantsikwan cada semäna yachakunapaq. Bibliata estudiarninqa, Jehovä imanö pensanqanta y imanö sientikunqantam entiendita procuranantsik, y tsëpitanam yachakunqantsikmannö imatapis ruranantsik. Tsënö rurashqaqa, Jehoväwan amïgu kënintsikmi mas sinchiyanqa.

10. ¿Imanötaq poqushqa cristiänukuna rikätsikuyan Dios mandakunqankunata y consëjunkunata kuyayanqanta?

10 Jina poqushqa cristiänukunaqa Dios mandakunqankunata y consëjunkunatam kuyayan. Y kuyayanqantaqa rikätsikuyan kawëninkunachö, pensëninkunachö y rurëninkunachö cambiukunata Dios munanqannö rurarmi. Jesus ruranqantam qatiyan, tsëmi allikunallatana rurayänanrëkur y Diosllatana sirwiyänanrëkur unë imanö këninkunata jaqiriyan (leyi Efesius 4:22-24). Musyanqantsiknöpis Diosqa santu espïrituntam utilizarqan nunakunawan Bibliata qellqatsinampaq. Tsëmi juk cristiänu Bibliata estudiaptinqa, santu espïritu yanapan mas entiendinampaq, mas kuyakoq kanampaq y Jehoväpa kuyë amïgun tikranampaq.

CONGREGACION JUKNÖLLA KANAMPAQ YANAPAKUSHUN

11. Jesus kë Patsachö karnin, ¿imanö nunakunawantaq kawarqan?

11 Jesusqa jutsannaqmi karqan. Peru teytankuna, wawqinkuna y wakin nunakunaqa jutsasapam kayarqan. Hasta qateqninkunam höraqa orgullösu kayaq y kikinkunallapaq imatapis munayaq. Tantiyarinapaq, Jesus wanunan paqasmi mas precisaq këta munar plëtuyarqan (Lücas 22:24). Tsënö këkäyaptimpis, poqushqa cristiänu tikrayänampaq kaqman pensar y congregacion juknölla kanampaq yanapakuyänampaq kaqman pensarmi, pëkunaman markäkurqan. Tsëmi tsë paqaslla Jehoväman mañakurqan qateqninkuna juk shonqulla kayänampaq. Kënömi nirqan: “Gamwan noga juc shongulla cawangantsicnö paycunapis cuyanacur juc shongulla cawayänanpämi willacuyniquita yachatsirgö” (Juan 17:21, 22, MTCS).

12, 13. (1) ¿Imanö trabajëtataq sinchikunantsik? (2) ¿Imanötaq juk wawqi yachakurqan congregacion juknölla kanampaq yanapakïta?

12 Poqushqa cristiänukunaqa congregacion juknölla kanampaqmi yanapakuyan (leyi Efesius 4:1-6, 15, 16). Llapantsikmi sinchikunantsik cristiänu mayintsikwan juknölla trabajëta.  Y tsëta logranapaqqa humildim kanantsik. Këllam pensarishun, ¿imanötaq sientikuntsik juk cristiänu mayintsik imallachöpis pantariptin o ofendiramashqa? ¿Parlapëtaku jaqirintsik o perdonëkuntsikku? Poqu cristiänu karqa tsë problëmata miratsinampa rantinmi altsëta procurashun.

13 Uwe jutiyoq cristiänum alläpa piñakoq juk cristiänu mayin imallachöpis pantariptin. Peru rey Davidpa kawënimpita Bibliachö Perspicacia librupa yanapakïninwan yachakunampaqmi churakärirqan. ¿Imanirtaq pëpita yachakurqan? Porqui Davidqa Diospa wakin sirweqninkunawanmi problëmachö karqan; Saulmi wanutsita munarqan, juk kutichönam wakin israelïtakunapis rumiwan tsampir wanutsita munayarqan y warmimpis burlakurqanmi (1 Samuel 19:9-11; 30:1-6; 2 Samuel 6:14-22). Tsëkunapa pasëkarpis Davidqa Jehoväta kuyëkarqanllam y markäkïkarqanllam. Jina llakipäkoq nunam karqan. Davidpa kawënimpita yachakurmi, Uwe wawqiqa cuentata qokurirqan David ruranqanta qati y jukkuna pantayaptin allipana rikë precisanqantapis. Jina yachakurqanmi perdonakoq këta y congregacion juknölla kanampaq yanapakïta. ¿Manatsuraq noqantsikpis pë ruranqanta qatishwan?

JEHOVÄTA RASUMPA KUYAQKUNALLAPA AMÏGUN KASHUN

14. ¿Pikunatataq Jesusqa amïgunkunapaq akraq?

14 Jesusqa llapan nunakunatam kuyaq. Pëwanqa ollqupis o warmipis, wamrapis o mayorpis kushishqam sientikuyaq. Tsënö karpis, manam llapan nunapatsu amïgun karqan. Juk kutim apostolninkunata kënö nirqan: “Noqa mandacushqäcunata rurarnenqa, amigücunam cayanqui” (Juan 15:14). Jesusqa pëta mana jaqeqkunata y Jehoväta kuyaqkunata y sirweqkunallatam amïgumpaq akrarqan. Tsënöllam noqantsikpis, Jehoväta rasumpa kuyaqkunallata amïguntsikpaqqa akranantsik. ¿Imanirtaq precisan?

Jehoväta rasumpa kuyaqkunallata amïguntsikpaqqa akrashun

15. ¿Imanirtaq jövinkuna poqu cristiänukunapa amïgun kayanman?

15 Intipa achachënin rataptinmi frütaqa mas shumaq poqurin. Tsë achachënömi cristiänu mayintsikkunapa kuyakïnimpis, poqu cristiänu kanapaq yanapamantsik. Jövin, ¿musyankinaku kawënikichö imata ruranëkipaq kaqta? Alli kaqta akrëta munarqa, Jehoväta atska watapana sirweqkunapa y congregacion juknölla kanampaq yanapakoq cristiänukunapa amïgun kë. Pëkunaqa imëka problëmakunapam pasayashqa, tsëmi kawënikichö alli kaqta akranëkipaq  yanapayäshïnikita puëdiyan. Pëkunawan tiemputa pasarqa, poqu cristiänum tikranki (leyi Hebrëus 5:14).

16. ¿Imanötaq mayor cristiänukuna juk shipash panita yanapayarqan?

16 Helga jutiyoq panim willakun estudiunta ushëkaptin, alli profesionyoq kayänampaq universidächö estudiëta munayanqampita mëtsikaq yanaqinkuna parlayanqanta. Peru Helga paniqa congregacionchö poqushqa cristiänukunatam consëjuta mañakurqan. Atskaqmi mayornin kayarqan. Alläpa yanapayanqanta y llapan tiempunwan Diosta sirwinampaq animayanqantam nin. Consejayanqanta wiyakurmi pitsqa watapa precursöra karqan. Tsëpitaqa mëtsika watanam pasashqa, peru jövin këninchö Jehoväta sirwinqampitam alläpa kushikun.

17, 18. Jehoväpa kaqchö mas yanapakïta munarqa, ¿imatataq ruranantsik?

17 Jesus ruranqanta qatirqa poqu cristiänu këmanmi chäshun. Jinamampis, kuyë amïgunmi kashun y masmi sirwita munashun. Tsënöpam Jehoväpa kaqchö mas yanapakushun. Jesusmi qateqninkunata kënö nirqan: “Lamparin actsicoq cuenta qamcunapis allicunata rurar cawacuyë. Tseno alli ruraq cayanqequita ricarmi, nunacuna sielucho quecaq Dios Yayantsicta alabecuyanqa” (Mateu 5:16).

18 Rikanqantsiknömi, poqu cristiänukunaqa congregacionta alläpa yanapayan. Jina alli concienciayoqmi kayan. ¿Imanötaq alli conciencia yanapakun alli kaqta akranapaq? ¿Imanötaq rikätsikuntsik wakinkunapa concienciankunata respetanqantsikta? Tsëpitam qateqninchö yachakurishun.

^ par. 6 Tantiyarinallapaq, itsa mayorna wawqita niyanman, juk jövin cristiänu cargunchö trukanampaq. Jövin cristiänukunata mayor kaqkuna yanapayänantam shuyarantsik.