Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Agostu de 2015

¿Listunaku këkantsik Paraïsuchö kawanapaq?

¿Listunaku këkantsik Paraïsuchö kawanapaq?

‘Allicunallata rurar nuna mayiquicunata imecachopis yanapayë [...] wiñe caweta tariyanekipaq.’ (1 TIMOTEU 6:18, 19)

CANTICUKUNA: 125 Y 40

1, 2. (1) ¿Imakunatataq rurëta munankiman Paraïsuchö? (Rikäri kë yachatsikïpa qallananchö këkaq dibüjuta.) (2) ¿Imakunataq Paraïsuchö masqa kushitsimäshun?

APOSTOL Pablum nirqan mana wanushpa kawëta tarinapaqqa, llapan puëdinqantsikmannö kallpachakunantsik precisanqanta (leyi 1 Timoteu 6:12, 19). Diospa mëtsikaq sirweqninkunapaqqa mana wanushpa kawakïqa kë Patsachömi kanqa. Qampis tsëchö kawëta shuyararqa alläpa kushishqachi shuyëkanki. Pensari, ¡imanö shumaqraq kanqa cada qoya shärikamurnin kushishqa, alli saludyoq y tranquïlu këqa! (Isaïas 35:5, 6.) Jina pensë, familiëkikunawan y amïguïkikunawan y kawarimoq kaqkunawan juntu këqa imanö shumaqraq kanqa (Juan 5:28, 29; Hëchus 24:15). Jina tiempu kanqam imëkata rurëta yachakunëkipaq: ciencia asuntupita, imëka müsicata toquëta y wayiki ruranëkipaqpis.

2 Peru maskunapis kushikunapaqqa kanqaraqmi. Këllaman pensarishun, llapan nunakunam Jehoväpa jutinta  respetayanqa y pëllatana cäsukuyanqa (Mateu 6:9, 10). Jehovä imëpis munanqannömi, Patsachöqa jutsannaq nunakunallana kawayanqa. Jina ichikllapa ichikllapam jutsannaq këman chäshun y Dioswan amïgu kënintsikqa cada junaqmi mas sinchiyanqa (Salmu 73:28; Santiägu 4:8).

3. ¿Imapaqtaq kanampita patsë alistakunantsik?

3 Këkunata Jehovä cumplimunampaq kaqtaqa segürum këkantsik. Porqui Bibliam kënö willakun: “Diospaqqa manam imapis sasatsu” (Mateu 19:25, 26). Pablum nirqan, mana wanushpa kawëta munarqa llapan puëdinqantsikmannö kallpachakunantsik precisanqanta. Tsëmi kawënintsikwan rikätsikunantsik ushakë junaqqa imë höra karpis chämunampaqna këkanqanta. Paraïsuchö kawëta munarqa, kanampita patsëmi alistakur qallanantsik. Imanö alistakunapaq kaqta rikärishun.

¿IMANÖTAQ ALISTAKUSHWAN?

4. Juk willakïwan rikätsikaramï Paraïsuchö kawanapaq imanö alistakunapaq kaqta.

4 ¿Imanötaq kanampita patsë Paraïsuchö kawanapaq alistakushwan? Këman pensarishun. Pipis juk nacionta täraq ëwëta munarqa, ¿imanötaq alistakun? Imëkatam rurar qallëkun: tsë nacionpa idiömanta yachakur, costumbrinkunata reqir y hasta mikïninkunatam probar. ¡Tsë nacionchö këkaqnönam kawan! Tsënöllam Paraïsuchö kawanapaqpis alistakushwan, kananllapitanam tsëchö kawëkaqnöna kawanantsik. Imakunachö alistakunapaq kaqta rikärishun.

5, 6. ¿Imanirtaq Jehoväpa markan ninqanta cäsukïta yachakunantsik?

5 Satanaspa pensëninta ruraq nunakunawanmi kawëkantsik. Tantiyarinapaq, mëtsikaq nunakunam pensayan Diosta cäsukï mana precisanqanta, kikinkuna munayanqannö kawakï mas alli kanqanta. Tsërëkurmi nunakuna alläpa sufriyan y kushishqallaqa kawakuyantsu (Jeremïas 10:23). Peru noqantsikqa musyantsikmi, Jehoväqa kuyakoq gobernanti kanqanta, tsëmi nimanqantsikta cäsukuntsik. Y Paraïsuchöqa alläpa shumaq kawakïmi kanqa, porqui Diosllatanam llapan nunakuna cäsukuyanqa.

6 Paraïsuchö kawanapaq alistakïta munarqa, kananmi Jehoväpa markan ninqanta cäsukïta yachakunantsik. Porqui Paraïsuchöqa shumaq huertaman Patsata tikratsinapaqmi yachatsikïkunata chaskishun y kawarimoqkunatam Jehoväpita yachatsishun. Imëka rurëyoqmi kashun. Tsëmi kënö tapukunantsik: “Jehoväpa markan mana gustamanqanta mañamaptinqa, ¿cäsukushaqtsuraq y kushishqatsuraq rurashaq?”.

7, 8. (1) ¿Imanirtaq Diospa markan nimanqantsikta kushishqa rurëta yachakunantsik? (2) ¿Imakunachö yanapakuyänampaqtaq wakin wawqikunata niyashqa? (3) ¿Imanötaq Paraïsuchö sientikushun?

7 Peru Paraïsuchö kawanapaq alistakurqa, ruranantsikpaq kaqkunatam kushishqa ruranantsik y yanapakoq këtam yachakunantsik. Tantiyarinapaq, Diospa markan juk markachö trabäjuta ruranapaq nimashqaqa, kushishqam cäsukunantsik. Y mandamanqantsikta kanampita patsë rurashqaqa, mas fäcilmi  Paraïsuchö ruranapaqpis kanqa (leyi Hebrëus 13:17). Yarpärishun, Jehovä äninqan Patsaman israelïtakuna chäriyaptin ima pasakunqanman. Manam mëchö täräyänampaq kaqtaqa akrëta puëdiyarqantsu. Sinöqa cada ünutam mëchö täräyänampaq kaqta niyarqan (Nümerus 26:52-56; Josuë 14:1, 2). Tsënö kaqlla itsa Paraïsuchö mëchö täränapaq kaqta akrëta puëdishuntsu. Peru Diospa markan ninqannö kawëta yachakushqa karqa, kushishqam Jehoväta sirwishun mëchö tärarpis.

8 Gobiernun mandakïkaptin Paraïsuchö Diosta sirwiqa alläpa kushikïpaqmi kanqa. Tsëmi kanampita patsë Diospa markan ninqannö kawëkänantsik. Itsa juk sitiukunachö sirwinantsikpaq nimäshun. Tantiyarinapaq, Estädus Unïdus Betelchö trabajaq wakin wawqikunatam niyarqan juk sitiukunachöna sirwiyänampaq. Y congregacionkunata watukaqkunatanam wakin kaqtaqa niyashqa edäna kayaptin o juk asunturëkur precursor especialnö yanapakuyänampaq. Kë llapan wawqikunam kushishqa yanapakïkäyan y Jehoväqa alläpam bendicikan. Noqantsikpis kushishqa këta y Jehovä bendicimänata munarqa, ¿imatataq ruranantsik? Jehovätam mañakunantsik, llapan puëdinqantsikmannömi sirwinantsik y ima trabäjutapis qomanqantsikwanmi kushishqa këkänantsik (leyi Proverbius 10:22 *). ¿Y Paraïsuchö juk sitiuchö tärëta munëkashqa, juk sitiuchö täränapaq Diospa markan nimashqaqa? Manachi precisaqpaqtsu churashun mëchö täränantsikpaq kaqta y ima trabäjuyoq kanqantsiktapis. Tsëpa rantinqan, Jehovätachi agradecikushun Paraïsuchö täränapaq permitimanqantsikpita (Nehemïas 8:10).

9, 10. (1) ¿Imanirtaq Paraïsuchöpis höraqa pacienciayoq këta wanashun? (2) ¿Imanötaq rikätsikushwan pacienciayoq kanqantsikta?

9 Paraïsuchöqa höraqa itsa pacienciayoq këta wanashun. Tantiyarinapaq, itsa rikäshun familiankuna y amïgunkuna kawarimoqta rikar wakinkuna alläpa kushikoqta. Peru noqantsikqa itsa kawariyämunanta shuyaräshunraq. Tsë pasakuptinqa, ¿wakinkunawantsuraq kushikushun y pacienciawantsuraq shuyaräshun? (Romänus 12:15.) Jehovä änikunqankunata cumplimunanta kanan pacienciawan shuyararqa, shamoq tiempuchöpis tsënömi kashun (Eclesiastes 7:8).

10 Jina Paraïsuchö kawanapaqqa alistakuntsik Bibliapa yachatsikïninkunata juknöpana entienditsikayämuptin pacienciakoq karmi. ¿Alkäbullaku tsë yachatsikïkunata yachakuntsik? ¿Pacienciayoqku kantsik llapanta mana entiendirpis? Kanan pacienciayoq karninqa, mas fäcilmi kanqa Paraïsuchö Jehovä mushoq yachatsikïkunata qomashqa  wiyakunapaq (Proverbius 4:18; Juan 16:12).

11. ¿Imanirtaq kanampita patsë perdonakoq këta yachakunantsik?

11 Jina wakinkunata perdonarmi alistakïkantsik Paraïsuchö kawanapaq. Cristu waranqa watapa gobernamunqanchömi ichikllapa ichikllapa jutsannaq këman chäshun, hasta cada kawarimoq kaqkunapis (Hëchus 24:15). Wakinkuna jutsata rurayaptin, ¿yachashuntsuraq perdonëta y kuyëpa tratëta? Kanampita patsë perdonakïta yacharqa, Paraïsuchöpis llapankunawanmi shumaq kawakushun (leyi Colosensis 3:12-14).

Imanö kanantsikpaq Jehovä kanan yachatsimanqantsiktam, Paraïsuchöqa rikätsikïta wanashun

12. Jehovä imanö kanantsikpaq yachatsimanqantsikta, ¿imanirtaq kanan rikätsikunantsik?

12 Imanö kanantsikpaq Jehovä kanan yachatsimanqantsiktam, Paraïsuchöqa rikätsikïta wanashun. Porqui Paraïsuchöqa itsa llapan munanqantsiktaqa katsita puëdishuntsu, o itsa katsinapaqqa shuyaräshunraq. Tsënö kaptimpis, kushishqa y agradecïdum këkäshun. Tsënö kanan karqa, Paraïsuchö kawanantsikpaq alistakïkanqantsikta y Jehovällata cäsukoq nunakunawan juntu kawëta munanqantsiktam rikatsikïkantsik (Hebrëus 2:5; 11:1).

JEHOVÄTA SIRWIR OCUPÄDU KËKÄSHUN

Kushishqa yachatsikï

13. ¿Imataq noqantsikpaq masqa precisanqa Paraïsuchö?

13 Paraïsuchöqa llapan wananqantsikmi kanqa kushishqa kawanapaq. Peru masqa kushitsimäshun Jehoväwan amïgu kënintsikmi (Mateu 5:3). Jehoväta sirwimi noqantsikpaqqa mas precisanqa y tsëtaqa alläpa kushishqam rurashun (Salmu 37:4). Tsëmi Paraïsuchö kawanapaq alistakïta munarqa, Jehoväta sirwita mas precisaqpaq churanantsik (leyi Mateu 6:19-21).

14. ¿Diospa kaqchö imakunata rurayänampaqtaq jövinkuna churakäyanman?

 14 ¿Imatataq rurashwan Jehoväta sirwir mas kushikunapaq? Pëta mas sirwinapaqmi churakänantsik. Jövin karninqa, pensë Diosta sirwinëkipaq kawënikita imanö utilizänëkipaq kaqman. Itsa llapan tiempïkiwan Diosta sirwinëkipaq churakankiman. Publicacionnintsikkunachömi tukïnöpa ruranëkipaq yanapakïkunata tarinki. * Jina atska watakunapa llapan tiempunkunawan sirwishqa wawqikunawan y panikunawanmi parlëta puëdinki. Jehoväta sirwinëkipaq kawënikita utilizarqa, imëkatam yachakunki Paraïsuchö kawanëkipaq.

Diospa kaqchö masta ruranëkipaq churakë

15. ¿Imakunata ruranapaqtaq churakashwan?

15 Llapantsikmi Diosta sirwinqantsikchö masta ruranapaq churakashwan: tukïnöpa yachatsikïta, Bibliapa consëjunkunata kawënintsikchö imanö mas alleq rurëta, mas alleq leyita y comentëta y reunionchö rurënintsikkunata mas alleq rurëta. Yarpänantsikmi Diospa kaqchö masta ruranapaq churakanqantsikqa, Diosta kushishqa sirwinantsikpaq y Paraïsuchö kawanapaq yanapamanqantsikta.

MAS ALLI KAQ KAWAKÏ

Llapan qomanqantsikpita Jehoväta agradecikï

16. ¿Imanirtaq musyantsik Jehoväta sirwi mas alli kaq kawë kanqanta?

16 Paraïsuchö kawanantsikpaq alistakurnin tiempuntsikta utilizarqa, ¿mas alli kaq kawakïtaku perdikïkantsik? Manam. Jehoväta sirwirmi mas alliqa kawakuntsik. Manam pipis obligamashqatsu sirwintsik o ushakë junaqta kawëkar pasëta munarllatsu. Diosta sirwi y amïgun këmi kawënintsikta mas alliyätsin y mas kushishqam kantsik. Tsënö kanapaqmi Jehoväqa kamamarquntsik. Kuyakïnin y yachatsikïninqa imapitapis  mas alli kaqmi (leyi Salmu 63:1-3 *). Llapan shonquntsikwan Jehoväta adorarqa kushishqam kashun. Atska watapana Jehoväta sirweqkunaqa alleqmi musyayan, mas alli kawakïqa Jehoväta sirwi kanqanta (Salmu 1:1-3; Isaïas 58:13, 14).

Bibliapa yanapakïninta ashi

17. ¿Paraïsuchöqa kanqatsuraq tiempu kushikunapaq rurëkunata ruranapaq y trabäjupita jamanapaq? Willakaramï.

17 ¿Paraïsuchöqa kanqatsuraq tiempu kushikunapaq rurëkunata ruranapaq y trabäjupita jamanapaq? Awmi. Jehoväqa kushishqa kawakïta munëyoqtam kamamarquntsik. Pëqa änimantsik munanqantsikkunata qomänapaqmi (Salmu 145:16; Eclesiastes 2:24). Peru yarpänantsikmi, Jehoväwan amïgu kënintsikta precisaqpaq churarlla ruranqantsikkunachö kushikunapaq kaqta. Awmi, Paraïsuchöqa trabäjupita jamanapaq y kushikunapaq rurëkunata ruranapaq tiempu kanqam, peru mas precisaqqa Jehoväta sirwïmi kanqan. Tsëmi kanampitana tsënö kawakunantsik y Diosta sirwinqantsikrëkur imëka allikunata chaskinqantsikman yarpänantsik (Mateu 6:33).

Dioswan amïgu këmi kawënintsikta mas alliyätsin y mas kushishqam kantsik

18. ¿Imanötaq rikätsikuntsik Paraïsuchö kawanapaq alistakïkanqantsikta?

18 Paraïsuchöqa pensanqantsikpitapis mas alli kawakïmi kanqa. Kanampita patsë alistakurqa Paraïsuchö kawëta munanqantsiktam rikätsikushun. ¿Imanö? Tsëtaqa rikätsikushun imanö kanantsikpaq Jehovä yachatsimanqantsikta wiyakur y kushishqa yachatsikurmi. ¡Llapan kallpantsikwan Jehoväta kushishqa sirwikäshun! Segürum këkantsik Jehovä llapan änikunqanta Paraïsuchö cumplimunampaq kaqta. Tsëmi kanampita patsëna Paraïsuchö kawëkaqnöna kawanantsik.

^ par. 8 Proverbius 10:22: “Jehoväpa bendicionninmi ricuyätsikunqa, y pëpa bendicionninqa manam sufritsikuntsu”.

^ par. 14 Leyiri Los jóvenes preguntan (volumen 2) nishqan librupa 311 y 318 kaq päginankunata.

^ par. 16 Salmu 63:1-3: “Diosllä, qammi Diosnï kanki, ashirniki sïguïkällam. Qamtam kawënï yakunëpanöraq alläpa wanashunki. Qamta wanarnikim yaku mana kanqan tsaki jirkachö cäsillapa wanurqö. Tsënöpam rikarqö kallpëkita y gloriëkita santu markachö. Porqui rasumpa kuyakïnikiqa kawëpitapis mas allim, tsëmi shimï alabashunki”.