Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juliu de 2015

Këchömi Diosnintsikta adorantsik

Këchömi Diosnintsikta adorantsik

“Wanurpis wanurishaqmi Diosta adorayänan wayirecorqa.” (JUAN 2:17)

127 Y 118 KAQ CANTICUKUNA

1, 2. (1) Diospa unë sirweqninkunaqa, ¿mëchötaq Diosta adorayaq? (2) ¿Imanötaq Jesus rikarqan Jerusalenchö këkaq templuta? (3) ¿Imapitataq këchö yachakushun?

DIOSPA sirweqninkunapaqa, Diosta adorayänampaqqa imëpis reqishqa sitiunkunam kashqa. Itsa Abelqa Jehoväpaq animalkunata kayanampaq juk altarta utilizarqan (Genesis 4:3, 4). Noë, Abrahan, Isaac, Jacob y Moisespis altarkunatam rurayarqan (Genesis 8:20; 12:7; 26:25; 35:1; Exodu 17:15). Israelïtakunatanam Jehovä mandarqan, adorayänampaq juk carpa wayita rurayänampaq (Exodu 25:8). Tiempuwannam, templuta rurayänampaq mandarqan (1 Rëyes 8:27, 29). Israelïtakuna Babiloniapita kutirirnam, juntakäyaq ëllukäyänan wayikunachö (Marcus 6:2; Juan 18:20; Hëchus 15:21). Apostolkuna kawayanqan witsan cristiänukunanam, wayikunachö juntakäyaq (Hëchus 12:12; 1 Corintius 16:19). Y kanan witsannam, entëru Patsachö këkaq Jehoväpa Testïgunkuna Yachatsikuyänan Wayikunachö Diosta adoranapaq juntakantsik.

2 Jesusqa Jerusalenchö këkaq templutaqa alläpam respetaq y kuyaq. Tsëta rikëkurmi discïpulunkunaqa, Salmu libru kënö ninqanta yarpäriyarqan: “Wanurpis wanurïmanmi wayikirëkurqa” (Salmu 69:9; Juan 2:17). Awmi, Jehoväpa Testïgunkuna  Yachatsikuyänan Wayikunaqa manam templunötsu “Jehoväpa wayin” (2 Crönicas 5:13; 33:4). Peru respetanantsikmi, porqui tsëchömi juntakantsik Diosnintsikta adoranapaq. Kë yachatsikïchömi rikäshun Diosta adoranantsik wayichö këkarnin imanö portakunapaq, imanö cuidanapaq y masta rurayänampaq imanö yanapakunapaq kaqta Biblia ninqanta. *

REUNIONNINTSIKKUNATA RESPETASHUN

3-5. (1) ¿Imapaqtaq Jehoväpa Testïgunkuna Yachatsikuyänan Wayiqa? (2) ¿Imanötaq reunionkunata rikashwan?

3 Jehoväpa Testïgunkuna Yachatsikuyänan Wayiqa alläpam precisan Diosnintsikta adoranapaq. Y reunionkunaqa Diosnintsikpa qarëninmi, porqui tsëmi Diosnintsikwan amïgu kënintsikta mas sinchiyätsin. Jina tsëchömi Jehoväpa markan animamantsik y wananqantsik yachatsikïkunata qomantsik. Reunionkunachö wiyanqantsik yachatsikïkunaqa, cada semänapaq mikï cuentam kayan, Jehoväwan Jesusmi tsëtaqa qomantsik. Alläpa kushikïpaqmi pëkunawan juntu mikunapaq invitamanqantsikqa (1 Corintius 10:21, NM).

4 Jehovämi Palabranchö nimantsik adoranapaq y juknintsik juknintsik animanakunapaq reunionkunaman ëwanantsik alläpa precisanqanta (leyi Hebrëus 10:24, 25). Jehoväta respetar y agradecikurmi, imapis alläpa precisaqkuna mana michämashqaqa reunionman faltëta munantsiktsu y reunion höra shumaq parlakurinapaq alleq preparakuntsik (Salmu 22:22).

5 Reunion höra shumaq portakur y ëllukanqantsik wayita shumaq cuidarqa, Diosta respetanqantsiktam rikätsikïkäshun. Shumaq portakunqantsikpita, ëllukanqantsik wayichö laqarëkaq Jehoväpa jutimpaq nunakuna allita parlayänantam munantsik (igualaratsi 1 Rëyes 8:17 textuwan).

6. ¿Ima niyashqataq wakin nunakuna Diosta adoranqantsik wayita shumaqta rikarnin? (Rikäri kë yachatsikïpa qallananchö këkaq dibüjuta.)

6 Ëllukanqantsik wayita respetanqantsiktaqa nunakuna cuentata qokuyanmi. Turquïa nacionpita juk nunam willakurqan ëllukanqantsik wayita limpiuta y shumaq churapakushqata rikarnin espantakunqanta. Jina nirqanmi alli vistishqa kayanqampita y kushishqa saludanakuyanqampita espantakunqantapis. Reunionkunamanmi ëwar qallëkurqan y ichik tiempullatam bautizakurirqan. Indonesiapa juk markanchönam, Testïgunkuna Diosta adorayänan wayita rurayarqan. Y vecïnunkunata, alcaldita y wakin autoridäkunatam invitayarqan rikaq ëwayänampaq. Y alcaldiqa espantakurqanmi alläpa alli rurashqa kanqanta rikar y jardintapis shumaqta rikar. Y nirqanmi limpiu kanqanqa yachatsikunqantsiknö ruranqantsikta rikätsikunqanta.

Diosta adoranantsik wayichö shumaq portakushun, porqui Diosta mana respetanqantsiktam rikätsikunqa (Rikäri 7 y 8 kaq pärrafukunata)

7, 8. ¿Imanötaq Diosta adoranqantsik wayichö Diosta respetanqantsikta rikätsikuntsik?

7 Kikin Jehovämi reunionkunamanqa invitamantsik. Tsëmi alli vistishqa ëwanata y shumaq portakunantsikta munan. Tsëmi alleq rikäkunantsik imanö vistikunqantsikta y imanö portakunqantsikta. Tsënö kaptimpis, manam kikintsik pensanqantsiknöqa imanö vistikuna kanqanta ninantsiktsu, ni manam wayintsikchö kanqantsiknö portakunantsiktsu. Jehoväqa munan adoranqantsik wayichö watukamaqnintsikkuna y noqantsik alli sientikunatam. Tsëmi mana respetakoq kanqantsikta vistikïnintsikwan  rikätsikïta munantsiktsu. Jina manam reunion höraqa mensäjikunata mandar, jukkunawan parlar, mikur ni upur këkänantsiktsu. Jina teytakunaqa wamrankunatam yachatsiyänan Diosta adoranqantsik wayichöqa mana cörrikachäyänampaq y mana pukllayänampaq (Eclesiastes 3:1).

8 Reunionmanqa ëwantsik Diosta adoranapaq y pëpita yachakunapaqmi. Tsëmi negociu asuntukunapitaqa parlashwantsu (igualaratsi Nehemïas 13:7, 8 textuwan). Yarpashqaqa templuchö negociuta rurëkäyaqta rikarninmi, Jesusqa alläpa piñakurnin tsëpita qarqurirqan (Juan 2:13-17).

MASTA RURAYÄNAMPAQ YANAPAKUSHUN

9, 10. (1) ¿Imatataq Jehoväpa testïgunkuna rurayan Diosta adoranantsik wayikuna mas rurakänampaq? (2) ¿Imatataq lograyashqa tsënö yanapakuyanqampita? (3) ¿Imanötaq Jehoväpa markan yanapashqa congregacionkuna kikinkunalla rurëta mana puëdiyanqan markakunachö Diosta adorana wayinkuna rurayänampaq?

9 Mëtsikaq Jehoväpa testïgunkunam allipa trabajayan, entëru Patsachö Diosta adoranantsik wayikunapaq plänukunata rurarnin, shäritsirnin y altsëpaq kaqtana altsarnin. Tsëmi pasaq 15 watakunachö cada junaq pitsqatanö rurayashqa. Kananyaqqa rurakashqa 28 milpitapis mastanam.

10 Bibliam nin kapoqyoq kaqkuna, mana kapoqyoq kaqkunata yanapayänampaq (leyi 2 Corintius 8:13-15). Tsëmi Jehoväpa markanqa, voluntäninkunapita qoyanqan qellëta utilizan mas wanayanqan markakunachö Diosta adoranantsik wayikunata ruratsinampaq. Kë yanapakïkunarëkurmi congregacionkuna kikinkunalla rurëta mana puëdiyanqan markakunachö, mëtsika Diosta adoranapaq wayikuna rurakashqa.

11. (1) ¿Ima niyantaq wakin cristiänukuna Diosta adorayänampaq juk mushoq wayinkuna kariptin? (2) ¿Imanötaq sientikunki kë cristiänu mayintsikkunaman pensarnin?

11 Costa Rïca nacionchömi puwaq junaqllachö Diosta adoranantsik wayita rurariyarqan. Tsëchö cristiänukunaqa tsë qarëta Jehoväpita chaskiyanqampitam alläpa kushikuyarqan y cristiänu mayinkunatapis alläpam agradecikuyan. Llapantsikmi kushikuntsik, Diosta adorayänampaq wayinkuna kanqampita entëru Patsachö cristiänu mayintsikkuna Jehoväta agradecikuyaptin. Adoranantsikpaq wayikuna rurëta Jehovä bendicinqanqa clärum rikakun, porqui rurar ushariyaptinmi mas nunakuna ëwar qallëkuyan Jehoväpita yachakuyänampaq (Salmu 127:1).

12. ¿Imanötaq yanapakushwan Diosta adoranantsik wayikunata masta rurayänampaq?

12 ¿Imanötaq masta rurayänampaq yanapakushwan? Wakintsikqa itsa trabajanapaq  änikushwan. Y llapantsikmi qellënintsikwan gastukunapaq yanapakïta puëdintsik. Imëkanöpa yanapakurninqa kushishqam kashun, y masqa Jehoväta respetanqantsiktam rikätsikushun. Diospa unë sirweqninkunaqa, adorayänan wayita rurayänampaqmi qellëwan yanapakuyarqan y tsënöllam noqantsikpis kushishqa ruranantsik (Exodu 25:2; 2 Corintius 9:7).

DIOSTA ADORANANTSIK WAYITA LIMPIUTA KATSISHUN

13, 14. Biblia ninqannö, ¿imanirtaq Diosta adoranantsik wayita limpiuta y shumaq churapakushqata katsishwan?

13 Jehoväqa alläpa limpium, y ordenädu këtam gustan. Tsëmi adoranantsik wayita limpiuta y shumaq churapakushqata katsinantsik (leyi 1 Corintius 14:33, 40). Jehovänö limpiu kanapaqqa, pensënintsikta, rurënintsikta, adoranqantsikta y cuerpuntsiktapis limpiutam katsinantsik (Apocalipsis 19:8).

14 Diosnintsikta adoranantsik wayita limpiuta katsirninqa, kushishqam reunionnintsikman invitakushun. Y shamoq nunakunaqa rikäyanqa, limpiu Patsachö rasumpa kawëta munanqantsikta y juk limpiu Diosta adoranqantsiktam (Isaïas 6:1-3; Apocalipsis 11:18).

15, 16. (1) ¿Imanirtaq Diosnintsikta adoranantsik wayita limpiuta katsi höraqa fäciltsu? (2) ¿Imanirtaq Diosnintsikta adoranantsik wayita limpiuta katsishwan? (3) ¿Imanö patsätsishqataq këkan limpiapakunapaq? (4) ¿Imachötaq llapantsik yanapakïta puëdintsik?

15 Diosnintsikta adoranantsik wayita limpiuta katsiqa, höraqa manam fäciltsu. Porqui manam llapan nunakunatsu limpiu këta precisaqpaq churayan. Tsënöqa itsa rikäyan, yaku alläpa mana kanqan y polvu o mitu kanan sitiukunachö tärarnin. O itsa wakinqa, limpiu këta mana precisaqpaq churaq familiachö winayashqa. Peru mëchö tärarnin o nunakuna limpiu këta mana precisaqpaq churayaptimpis, Jehoväta adoranantsik wayitaqa limpiuta y shumaq churapakushqatam katsinantsik (Deuteronomiu 23:14).

16 Diosnintsikta adoranantsik wayita limpiuta katsinapaqqa, imanö limpiapakunapaq anciänukuna patsätsiyanqantam  shumaq cumplinantsik. Anciänukunam rikäyan limpiapakunapaq imapis mana pishinanta, cada reunion ushariptin imakunata limpianapaq kaqta y wakin kaqkunata juk kutikunachöraq limpianapaq kaqta. Llapantsikmi yanapakunantsik, Diosnintsikta adoranantsik wayi limpiu kanampaq.

DIOSNINTSIKTA ADORANANTSIK WAYITA ALLITA KATSISHUN

17, 18. (1) ¿Imatataq yachakuntsik Jehoväpa unë sirweqninkunapita? (2) ¿Imanirtaq Diosnintsikta adoranantsik wayita imëpis allita katsishwan?

17 Jehoväpa unë sirweqninkunaqa, shumaq altsaparmi templuta allita katsiyaq. Tantiyarinapaq, rey Jehoasmi sacerdötikunata mandarqan nunakuna qoyanqan qellëwan templuta altsayänampaq (2 Rëyes 12:4, 5). Y 200 watapitapis mas pasariptinnam, rey Josïaspis, nunakuna qoyanqan qellëta utilizarqan templuta altsatsinampaq (leyi 2 Crönicas 34:9-11 *). Këpitaqa yachakuntsik, Diosnintsikta adoranantsik wayita altsaparnin imëpis allita këkätsinapaqmi.

18 Wakin sucursalkunam cuentata qokuyashqa, nacionninkunachö këkaq Diosnintsikta adoranantsik wayikunata ni tsëchö cösaskunata shumaq mana cuidëkäyanqanta. Tsënöqa cuidayantsu, wallkaqlla tsë rurëta yachayaptin o gastukunapaq qellë mana kaptinmi. Peru tiempunchö mana altsashqaqa, ichikllapa ichikllapam mas malograkärinqa y nunakunam mana alli parlamäshun. Tsëmi Diosnintsikta adoranantsik wayitaqa, allita imëpis këkätsinantsik. Tsënöpam rikätsikushun Jehoväta respetanqantsikta y cristiänu mayintsikkuna churayämunqan qellëta mana perditsinqantsikta.

Diosnintsikta adoranantsik wayita imëpis allita y limpiuta katsishun (Rikäri 16 y 18 kaq pärrafukunata)

19. ¿Imataraq ruranki Diosnintsikta adoranqantsik wayita respetanqëkita rikätsikunëkipaq?

19 Kë yachatsikïchö rikanqantsik textukunaqa yanapamantsik, Diosnintsikta adoranantsik wayita respetanapaqmi. Yarpäshun, Diosta adoranantsik wayikunaqa Jehoväpam, manam juk nunapatsu ni juk congregacionpatsu. Jehoväta respetarqa, respetashunmi reunionkunata y adoranantsik wayitapis. Jina kushishqam qellënintsikwan yanapakushun masta rurayänampaq y kallpachakushunmi limpiuta y allita imëpis këkätsinapaq. ¡Jesusnö rikätsikushun, Jehoväta adoranantsik wayita respetanqantsikta! (Juan 2:17.)

^ par. 2 Kë yachatsikïqa parlan Jehoväpa Testïgunkuna Yachatsikuyänan Wayikunapaqmi. Peru consëjunkunaqa yanapamantsikmi, Asamblëakunata Rurayänan Localkunata y Jehoväta adoranantsikrëkur utilizanqantsik juk wayikunata imanö rikänapaqpis.

^ par. 17 2 Crönicas 34:9-11: “Y pëkunanam sacerdötikunapa mandaqnin Hilquïas kaqta ëwar qellëta entregayarqan, tsë qellëqa karqan Manases, Efrain, llapan Israel, llapan Judä, llapan Benjamin y Jerusalenchö llapan täraqkuna Diospa wayinman apayämunqan qellëta punkuchö täpakoq levïtakuna ëlluyanqanmi. Y pëkunanam, Jehoväpa wayinchö trabäjuta rurayänampaq kaq churashqa nunakunapa makinman churayarqan. Y Jehoväpa wayinchö trabäjuta rurëkaqkunanam utilizäyarqan wayita altsayänampaq. Tsënam pëkunaqa qoyarqan imëkata rurëta yachaq nunakunata, llaqllashqa rumita y tsarätsiyänampaq qeruta rantiyänampaq y Judäpa reyninkuna malograyanqan wayita vïgakunawan altsayänampaq”.