Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juniu de 2015

¿Imatataq yachakuntsik padrenuestru mañakïpita? (Ishkë kaq)

¿Imatataq yachakuntsik padrenuestru mañakïpita? (Ishkë kaq)

“Dios Yayaqa musyanna[m] imata wanayanqequitapis.” (MATEU 6:8)

1-3. ¿Imanirtaq juk paniqa següru këkan mañakïninkunata Jehovä contestanqanta?

LÄNA jutiyoq juk precursöram, 2012 watachö Alemania nacionta viajarqan. Manam qonqantsu tsë viäjinchö ishkë mañakïninta Jehovä contestanqanta. Puntataqa, aeropuertuman trenchö ëwëkarmi, Jehoväta mañakurqan pillatapis yachakï munaqta tarinampaq. Aeropuertuman chärirnam musyarirqan viajanampaq avionqa waränin junaqraq yarqunampaq kaqta. Tsëmi Jehoväta yapë mañakurirqan yanapëkunampaq, porqui qellëninmi karqannatsu y mëchö quedakïtapis manam puëdirqantsu.

2 Mañakur ushariptinllam unë estudiaq mayin, “Läna, ¿imatataq këchö rurëkanki?” nirirqan. Pëqa Sudafrica nacionta viajanampaqmi këkänaq, y mamanwan awilanmi despachaq ëwayänaq. Problëmanta Läna willariptinnam, tsë warmikunaqa wayinchö quedakunampaq invitayarqan.  Y creenciampita y llapan tiempunwan yanapakunqampitam tapupäyarqan.

3 Waränimpis Länaqa mas tapukïninkunatam Bibliawan contestarqan y nacionninta manaraq kutikurmi juk Testïgukuna watukayänampaq jutinkunata apuntarqan. Länaqa precursörallam sïguikan y segürum këkan mañakïninkunata Jehovä contestanqanta (Salmu 65:2).

Shamoq tiempuchö wananqantsikkunata imanö tarinapaq kaqmanqa ama yarpachakushuntsu

4. ¿Imatataq yachakushun kë yachatsikïchö?

4 Problëmapa pasarqa, rasmi Jehoväman mañakurintsik y pëqa kushishqam yanaparamantsik (Salmu 34:15; Proverbius 15:8). Peru padrenuestru mañakïchömi Jesus yachatsimarqantsik mas precisaq cösaskunata mañakunapaq. Tsëpita chusku masta yachakurishun y imanö yanapamänapaq kaqtapis (leyi Mateu 6:11-13).

“MIQUILLÄCUNA CADA JUNAQ QOYCALLAYÄME”

5, 6. ¿Imanirtaq këkäpamashqapis “miquilläcuna” qoycalläyämë nir mañakushwan?

5 Jesusqa manam, mikïnï cada junaq qoykamë nir mañakunapaqtsu yachatsimarqantsik, sinöqa “miquilläcuna cada junaq qoycallayäme” ninapaqmi. Africa nacionchö congregacionkunata watukaq Victor jutiyoq wawqi kë mañakï ninqanmannö ruranqanta rikärishun. Kënömi nin: “Mikïpaq y wayipaq mana yarpachakuyanqätam Jehoväta agradecikö. Tsëkunawanqa kuyashqa cristiänu mayïkunam yanapayäman. Peru qellë tarinan sasa (aja) këkaptimpis, cristiänu mayïkuna alli tsarakuyänampaqmi Jehovätam mañakö”.

6 Itsa noqantsikqa atska mikïyoq kantsik, peru mëtsikaq cristiänu mayintsikkunam waktsa kayan o imëka desgraciakunapa pasëkäyan. Pëkunapaqmi mañakushwan, y yanaparmi imallatapis qararishwan. Jina entëru Patsachö yachatsikïta yanapakunapaqmi qellënintsikta winakushwan. Porqui tsë qellëmi cristiänu mayintsikkunata wanayanqanchö yanapan (1 Juan 3:17).

7. ¿Ima igualatsikïwantaq Jesus yachatsimarquntsik wananqantsikkunaman alläpa mana yarpachakunapaq?

7 Padrenuestru mañakïta Jesus yachatsikurirnam, juk igualatsikïwan yachatsimarquntsik wananqantsikkunapaq alläpa mana yarpachakunapaq. Jehovä cuidaptin, wëtakunaqa imapaqpis mana yarpachakuyanqantam nirqan. Jina tsënöllam, shamoq tiempuchö imata wananapaq kaqkunamanqa yarpachakushwantsu (Mateu 6:30-34). Cada junaq tarinqantsikllawanmi kushishqa kawakushwan. Tantiyarinapaq, Jehovätam mañakushwan mëchö täränapaq, trabäjuta tarinapaq y qeshyarnin imatapis allita decidinapaq. Peru tsëpitapis juk mas precisaqran kan mañakunapaq. ¿Imataq?

8. ¿Imatataq yarpätsimantsik “miquilläcuna cada junaq qoycallayäme” ninqanqa?

 8 “Miquilläcuna cada junaq qoycallayäme” neq mañakïqa yarpätsimantsik, yachatsimarnintsik sïguinampaq y amïgun këta mana jaqinapaq yanapamänapaq Jehoväta mañakunapaqmi. Porqui Jesuspis kënömi nirqan: “Manam tantata micurllatsu nunacuna cawayanqa; sinoqa Dios llapan nenqanta cäsucurninmi” (Mateu 4:4).

“JUTSALLÄCUNAPITA PERDONECALLÄYÄMË”

9. ¿Imanirtaq jutsata rurëqa pipapis jaqan cuenta kanqanta nintsik?

9 Padrenuestruchöqa, “jutsalläcunapita perdonecalläyämë” nirmi Jesus yachatsikurqan (Mateu 6:12; Lücas 11:4). Jutsata rurëqa imëka pipapis jaqan kënömi. Tsëmi kë revistaqa 1952 watachö yachatsikurqan Diosta kuyanantsik y cäsunantsik precisanqanta. Jutsata rurarqa, manam jaqan kanqantsikta Jehoväta paguëkantsiktsu, tsëmi pëpa jaqan tikrarintsik. Tsë revistam nirqan, munarninqa amïguntsik këta jaqirita puëdinqanta. Jina nirqanmi, ‘Diosta mana kuyëqa jutsa rurë’ kanqanta (1 Juan 5:3).

Jesus noqantsikrëkur wanunqampitam Jehoväta agradecikunantsik

10. (1) ¿Imarëkurtaq jutsantsikkunapita Jehovä perdonamantsik? (2) ¿Imanötaq sientikuntsik noqantsikpaq Jehovä ruranqampita?

10 Llapan junaqkunam jutsantsikpita  Jehovä perdonamänata wanantsik. Pëqa perdonamantsik Jesus wanunqanrëkurmi. Pë mana wanushqa kaptinqa, manachi jutsapita y wanïpita librakashwantsu karqan. Tsë alläpa väleq qarëpitaqa Jehovätam agradecikunantsik (leyi Salmu 49:7-9 * y 1 Pëdru 1:18, 19). Jina “jutsalläcunapita perdonecalläyämë” neq palabrakunaqa yarpätsimantsik, cristiänu mayintsikkunapis jutsankunapita perdonashqa këta wanayanqantam. Tsëmi Jehoväqa shuyaran pëkunapaq y pëwan amïgu këninkunaman pensanantsikta. Ofendimashqaqa perdonëkunantsikmi, porqui höraqa mana precisaq cösaskunallapitam piñaratsimantsik. Perdonarninqa, cristiänu mayintsikkunata kuyanqantsikta y Jehovä perdonamanqantsikpita agradecikunqantsiktam rikätsikuntsik (Colosensis 3:13).

11. ¿Imanirtaq wakinkunata perdonashwan?

11 Jutsasapa kashqam, juk cristiänu mayintsikta perdonëqa fäciltsu (Levïticu 19:18). Y ruramanqantsikta wakinkunata willarishqaqa, itsa contran tikrariyanqa y favornintsik churakäriyanqa. Tsëqa congregacionchö juknölla kawakïtam ushakäratsinman. Tsëta mana altsarqa, noqantsikrëkur Jesus wanunqampita mana agradecikunqantsiktam rikätsikïkantsik (Mateu 18:35). Wakinkunata mana perdonashqaqa, Jehoväpis manam perdonamäshuntsu (leyi Mateu 6:14, 15). Jina Jehovä perdonamänata munarqa, imëka jutsakunapitam cuidakunantsik (1 Juan 3:4, 6).

Dios perdonashunëkita munarqa, wakinkunatam perdonanëki (Rikäri 11 kaq pärrafuta)

“YANAPECALLÄYÄMË JUTSAMAN MANA ISHQUILLÄYÄNÄPAQ”

12, 13. (1) ¿Imataq Jesusta pasarqan bautizakuriptin? (2) ¿Imanirtaq wakinkunata culpatsashwantsu tentacionkunaman ishkirirqa? (3) ¿Imatataq Jesus rikätsikurqan Jehoväta imëpis cäsukurnin?

12 Padrenuestruchöqa, “yanapecalläyämë jutsaman mana ishquilläyänäpaq” nirmi Jesus yachatsikurqan. Tsëqa yarpätsimantsik Jesus bautizakuriptin Diablu tentananta Jehovä permitinqantam (Mateu 4:1; 6:13). ¿Imanirtaq permitirqan? Porqui Adanwan Ëvam Diospa gobiernumpa contran churakäriyarqan, tsëmi kë tapukïkuna contestakänan precisarqan: ¿Jehoväqa imata karpis pantarqanku nunakunata kamanqanchö? ¿Jutsannaq nuna tentacionpa pasarnin tsarakunmantsuraq? ¿Satanas ninqannötsuraq mas alli kanman karqan kikin nunakunalla gobernanakuyaptin? (Genesis 3:4, 5.) Kë tapukïkunata contestanampaqmi Jehoväqa Jesusta kë Patsaman kachamurqan. Peru ichik tiempullachönam kë tapukïkunaqa llapan contestakärinqa. Tsënam, ciëluchö y Patsachö kawaqkuna musyariyanqa Jehovälla alli kaq gobernanti kanqanta.

Imëka problëmakunapa pasëkarpis, Jehovällapaq këtaqa puëdintsikmi

13 Jehoväqa limpium, tsëmi pëqa ni  pitapis tentantsu. Satanasmi tentakoqqa (Mateu 4:3). Peru tentacionkunaman ishkita o mana ishkitaqa kikintsikmi decidinantsik (leyi Santiägu 1:13-15 *). Jesusman pensarishun, ¿imatataq rurarqan Satanas tentaptin? Manam cäsurqantsu y rasmi Diospa Palabran ima ninqantam nirirqan. Jehovällapaq këtam decidirqan. Peru Satanasqa manam tsëllachötsu jaqirirqan, sinöqa juk tiemputam shuyararqan yapë tentanampaq (Lücas 4:13). Peru Jesusqa Diostam cäsukurqan. Tsënöpam rikätsikurqan imëka problëmakunapa pasëkarpis, juk jutsannaq nunaqa Jehovällapaq këta puëdinqanta. Kanampis Satanasqa, Jehoväta mana cäsunapaqmi tentëkämantsik.

Jehoväqa noqantsikman markäkunmi y yanapamantsikmi

14. ¿Imatataq ruranantsik tentacionkunapa pasar tsarakïta munarqa?

14 Adanwan Ëva Diospa gobiernumpa contran churakäriyaptin yureq tapukïkunaqa, manaran chipyëpaqa contestakanraqtsu. Tsëmi Jehoväqa permitikanllaraq tentamänata. Peru Diosqa manam tentacionkunata churamuntsu. Antis noqantsikman markäkurmi yanapamantsik. Tsënö kaptimpis, manam obligamantsiktsu pëta cäsunapaq, tsëtaqa kikintsikmi  decidinantsik. Tsëmi, tentacionkunapa pasar tsarakïta munarqa, Jehoväpa alli amïgun kanantsik y yanapamänapaq imëpis mañakunantsik. Rikärishun imanö yanapamänapaq kaqta.

Jehoväwan amïgu këniki sinchilla këkätsun y kushishqa yachatsikï (Rikäri 15 kaq pärrafuta)

15, 16. (1) ¿Ima tentacionkunapitataq cuidakunantsik? (2) Jutsaman ishkinqantsikqa, ¿pipa culpantaq kanman?

15 Tentacionkunaman mana ishkinapaqqa Jehovämi santu espïritunwan yanapamantsik. Jina Bibliawan y congregacionwanmi consejarëkämantsik qellënintsikta, tiempuntsikta y kallpantsikta mana wananqantsik cösaskunachö mana utilizänapaq. Tantiyarinapaq, Espen y Janne jutiyoq casädu Testïgukunam Euröpapa mas kapoqyoq nacionninchö täräyan. Mëtsika watapam yachatsikoqkunata wanayanqan sitiukunachö precursornö yanapakuyashqa. Peru kananqa manam precursornatsu kayan ishkë wamrayoq karnin. Ollqu kaqmi kënö nin: “Imëpis Jehovämanmi mañakuyä unënö mana yanapakuyanqärëkur tentacionkunaman mana ishkiyänäpaq. Jina mañakuyämi pëwan amïgu kënïkuna sinchilla sïguinampaq y kushishqa yachatsikur sïguiyänäpaq”.

16 Jina pornografïapitapis cuidakunantsikmi. Wakinkunaqa pornografïata rikaräyan mana alli pensëninkunata mana dominayänanrëkurmi. Tsëman ishkirqa, manam Satanastawan nunankunata culpashwantsu. Porqui mana munashqaqa, manam obligamënintsikta puëdiyantsu. Peru atskaq wawqikuna y panikunam tsë tentacionpita alli tsarakuyashqa. ¡Noqantsikpis tsarakïta puëdintsikmi! (1 Corintius 10:12, 13.)

“DIABLU ISHQUITSIYÄMETA MUNAPTIN AMA JAQIRALLÄYAMËTSU”

17. (1) ¿Imanötaq rikätsikuntsik Satanaspita Jehovä tsapämänata munanqantsikta? (2) ¿Imatataq ichikllachöna Jehovä ruranqa?

17 “Diablu ishquitsiyämeta munaptin ama jaqiralläyamëtsu” nirqa, Satanaspita tsapämänapaqmi Jehoväta mañakïkantsik. Tsapämänata munanqantsiktaqa rikätsikuntsik Diosta mana sirweq nunakunapa rurëninkunata mana qatirnin y cösasninkunata mana kuyarninmi (Juan 15:19; 1 Juan 2:15-17). Ichikllachönam Satanastaqa Jehovä llawirinqa y mana alli nunakunataqa ushakäratsinqa. Tsëyaqqa, yarpänantsikmi ichik tiempullana karinanta musyar Satanas alläpa piñashqa këkanqanta. Jehoväta jaqirinata munarmi imëkata ruranqa. Tsëmi tsapämänapaq Jehoväta mañakur sïguinantsik (Apocalipsis 12:12, 17).

18. ¿Imatataq rurashwan Satanas manana kanqan Patsachö kawëta munarqa?

18 Satanas manana kanqan Patsachö kawëta munarqa, padrenuestru mañakï ninqanmannömi kawanantsik: Gobiernun shamunampaq, jutin santificashqa kanampaq y kë patsachö munënin rurakänampaqmi mañakur sïguinantsik. Y llapan junaqkuna wananqantsikchö y mana jaqipa sirwinapaq Jehovä yanapamänapaq kaqmanmi markäkunantsik.

^ par. 10 Salmu 49:7-9: “Manam pillapis imanöpa wawqinta salvëta puëdintsu, y manam përëkur juk salvakoqta Diosta qoyta puëdintsu (y pëkunapa almanta salvanampaq kaqpa chaninqa alläpa valoryoqmi y tsëqa manam kantsu imëyaqpis); imëyaqpis kawanampaq y pantiun uchkuta mana rikänampaq”.

^ par. 13 Santiägu 1:13-15 (NM): “Pruëbakunapa pasarqa, ama ni pipis, ‘Diosmi probëkäman’ nitsuntsu. Porqui mana allikunawanqa Diosta manam probayanmantsu, ni manam kikimpis mana allikunawanqa pitapis probantsu. Sinöqa kikin nunam mana alli munënin venciptin tsëllaman yarparäkïkan. Tsënam munënin chipyëpa venciriptinqa jutsaman ishkirin, y jutsata rurarirqa wanïmanmi condenakärin”.