Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juniu de 2015

Cristuqa nunakunatam kuyarqan

Cristuqa nunakunatam kuyarqan

“Nunakunatapis pasëpam kuyarqä y pëkunarëkurmi kushishqa karqä.” (PROVERBIUS 8:31)

1, 2. ¿Imanötaq Jesus rikätsikurqan nunakunata alläpa kuyanqanta?

PROVERBIUS librupa 8 kaq capïtulunchöqa yachëpaqmi juk nunapaqnö parlan. Tsë yachëqa Jesusmi karqan kë Patsaman manaraq shamurnin. Tsë librun willamantsik Dios imëka cösaskunata kamaptin “obra ruraq maestrunö” lädunchö Jesus këkanqanta. Y alläpam kushikurqan ciëluta y Patsata Dios ruranqanta rikarnin. Peru Dios llapan kamanqankunapitapis, nunakunatam masqa kuyarqan (Proverbius 8:22-31).

2 ¿Imanötaq Jesus rikätsikurqan Diosta y nunakunata alläpa kuyanqanta? Rikätsikurqan jutsapita y wanïpita libramänantsikrëkur Patsata shamunampaq listu karninmi (Mateu 20:28; Filipensis 2:5-8). Y Patsachö këkarninnam, Dios qonqan poderninta utilizarqan milagrukunata ruranampaq. Jina tsë milagrukunawanmi rikätsikurqan, alläpa kuyamanqantsikta y ichik tiempullachöna imëka allikunata ruranampaq kaqta.

3. ¿Imapitataq kë yachatsikïchö yachakushun?

 3 Jesus kë Patsachö këkarqa, Diospa Gobiernumpitam nunakunata yachatsirqan (Lücas 4:43). Musyarqanmi tsë gobiernu Diospa jutinta limpianampaq kaqta y problëmakunata chipyëpa altsanampaq kaqta. Y milagrukunata ruranqanwannam, rikätsikurqan nunakunata kuyanqanta. Tsëqa noqantsikpaq alläpam precisan. Porqui tsë milagrukunata ruranqanqa shamoq tiempuchö alli kawakï kanampaq kaqtam rikätsimantsik. Kë yachatsikïchöqa Jesus chusku milagrukunata ruranqampitam yachakushun.

“MUNÄMI, CACHACÄNEQUITA”

4. ¿Imataq pasakurqan lepra qeshyayoq nunawan Jesus tinkuriptin?

4 Galilëa markakunachö Jesus yachatsikïkarmi tinkurirqan lepra qeshyawan sufrikaq nunawan (Marcus 1:39, 40). Lücasqa nirqan, tsë nunaqa ‘leprawan ushashqa’ këkanqantam (Lücas 5:12, NM). Bibliaqa nin, Jesusta rikärir, qonqurikïkur rogakur, kënö ninqantam: “Tëte, munarnenqa, cachaquecatsillämë”. Jesus kachakätsita puëdinqantaqa musyarqanmi, peru manam musyarqantsu kachakätsita munanampaq kaqtaqa. ¿Imanir? Porqui pushakoq religiösukunaqa leprawan qeshyaqkunataqa despreciayaqmi. Leprawan ushashqana këkarqa kë nunaqa mantsëpaqchi karqan. Peru ¿imatataq Jesus rurarqan? ¿Pushakoq religiösukunanöllaku tratarqan? ¿Imataraq qamqa rurankiman karqan?

5. ¿Imanirtaq leprawan qeshyaq nunata Jesusqa kachakätsita munarqan?

5 Moises qellqanqan leyqa mandakoq, leprawan qeshyaq nuna wakinkunaman witeqnö karqa leprayoq kanqanta willakunampaqmi. Peru kë nunaqa itsa tsëta rurarqantsu (Levïticu 13:43-46). Peru Jesusqa manam piñakurqantsu, mas bienqa yanapëtam munarqan. Ankupäkoq karmi pipis mana ruranqanta rurar, “munämi, cachacänequita” nir leprayoq nunata yatëkurqan. Y jinan höram leprapita kachakärirqan (Lücas 5:13). Tsë milagruta ruranampaq y nunakunata alläpa kuyanqanta rikätsinampaqmi Jehoväqa Jesusta podernin qorqan (Lücas 5:17).

6. (1) ¿Imatataq Jesusqa wanaqtsu nunakunata kachakätsinampaq? (2) ¿Imatataq yachatsimantsik Jesuspa milagrunkuna?

6 Diospa poderninwanmi Jesusqa mana creipaqtanö milagrukunata rurarqan. Leprayoq nunakunata kachakätsinqannöllam juk qeshyayoq nunakunatapis kachakätsirqan. Bibliaqa willakun, ‘muducuna parlaqta wiyar, weqrucuna pureqta ricar y wiscucuna ricayaqta ricar’ nunakuna espantakuyanqantam (Mateu 15:31). Doctorkunaqa qeshyëkaqkunata jampiyänampaqqa, höraqa juk nunapa cuerpumpitaran imanta karpis jorqayan. Peru Jesusqa manam tsëtaraqtsu wanarqan, antis rasmi ima qeshyapitapis kachakäratseq. Jina karullapitapis kachakäratsita puëdeqmi (Juan 4:46-54). Këkunam rikätsimantsik Jesucristuqa, imëka qeshyakunata chipyëpa ushakätsita munanqanta y puëdinqanta. Nunakunata Jesus imanö tratanqanmi rikätsimantsik mushoq Patsachöpis ‘waktsa y humildi nunakunata’ llakipänampaq kaqta (Salmu 72:13). Alleqmi musyantsik  llapan sufreqkunata Jesus kachakätsita munanqanta.

“CANAN SHARCUR, QOPIQUITA APARCUR EUQUÏ”

7, 8. ¿Imatataq Jesus rurarqan reqishqa kitaman manaraq ëwarnin?

7 Leprayoq nunata kachakäratsinqampita killakuna pasariptinnam Jesusqa, Galilëapita Judëaman ëwarqan yachatsikur sïguinampaq. Mëtsika waranqa nunakunam wiyayarqan y cuentata qokuyarqan pëkunata Jesus kuyanqanta. Sufreqkunatam shoqarqan y shumaq tiempuchö allina kawakuyänampaqmi änirqan (Isaïas 61:1, 2; Lücas 4:18-21).

8 Nisan killam, Pascua fiestata celebranampaq Jesus Jerusalenta ëwarqan. Waranqëpayan nunakunam ëwayaq tsë fiestata celebraq. Jerusalenchö templupa norti kaq lädunchö juk reqishqa kitamanmi Jesusqa ëwarqan. Tsëchömi taririrqan purita mana puëdeq nuna qopinchö o kirmanchö jitarëkaqta.

9, 10. (1) ¿Imanirtaq Jerusalenchö këkaq kitaman nunakuna ëwayaq? (2) ¿Imatataq Jesus tsëchö rurarqan? (Rikäri kë yachatsikïpa qallananchö këkaq dibüjuta.) (3) ¿Imatataq tsë milagrupita yachakuntsik?

9 Tsë kitachö yakuwan bañakurqa kachakäyänampaq kaqta pensarmi mëtsikaq nunakuna ëwayaq. Pensari, mëtsikaq nunakunaraq tsë kitachöqa këkäyarqan kachakëta munar. Jesusqa manam qeshyartsu ëwarqan, porqui pëqa jutsannaqmi karqan. Sinöqa, ëwarqan nunakunata kuyarninmi. Tsëchömi tarirqan purita mana puëdeq nunata. Tsë nunaqa Jesus manaraq yurikunqampita patsëmi qeshyëkarqan (leyi Juan 5:5-9).

Jesusqa kitaman ëwarqan nunakunata yanapëta munarmi

10 Kë nunatam Jesusqa kachakëta munanqanta o mana munanqanta tapurirqan. Pënam llakishqa nirqan yakuman yëkunampaq pipis yanapaqnin mana kanqanta. Tsënam Jesusqa, purita mana puëdikaptimpis, sharkur qopinta tsarirkur ëwakunampaq nirirqan. ¡Y ninqannömi sharkur ëwakurqan! Kë milagruqa pensatsimantsik ichik tiempullachöna paraïsuchö milagrukunata ruramunampaq kaqtam. Jina rikätsimantsikmi, nunakunata Jesus alläpa kuyanqantapis. Pëqa kitaman ëwarqan nunakunata yanapëta munarmi. Tsënöllam noqantsikpis ruranantsik; imëka problëmakunawan llakishqa këkaq nunakunatam ashinantsik.

“IJA, NOQAMAN MARCÄCURMI CACHACÄRERQONQUI”

11. ¿Imanötaq musyantsik qeshyaq nunakunata Jesus kuyanqanta?

11 (Leyi Marcus 5:25-34.) Chunka ishkë watapanam juk warmi alläpa qeshyarqan. Llapan qellënintam usharqan doctorkunaman ëwar, peru manam kachakarqantsu. Tsënö qeshyarmi alläpa llakishqa kaq y Diostapis shumaqllaqa sirweqtsu. Tsëmi juk kutiqa imanö këtapis mana puëdirnin,  nunakuna rurimpa ëwëkurnin Jesuspa aqshunanta yatëkurqan (Levïticu 15:19, 25). ¡Y kachakärirqanmi! Jesusqa pëpita poder yarqurishqa kanqanta cuentata qokurirmi tumëkur pï yatanqanta tapukurqan. Warmiqa mantsakashqam qonqurikïkur imanir yatanqanta willarirqan. Jesusqa musyarqanmi kë warmita Jehovä kachakätsinqanta. Tsëmi kënö nirqan: “Ija, noqaman marcäcurmi cachacärerqonqui. Canan cushishqana euquï”. ¡Clärum këkan nunakunata Jesus kuyanqanqa!

Jesus milagrukunata ruranqanqa, clärum rikätsimantsik noqantsikman y problëmantsikkunaman interesäkunqanta (Rikäri 11 y 12 kaq pärrafukunata)

12. (1) Jesus ruranqanta yachakurir, ¿imatataq pëpita pensanki? (2) ¿Imatataq Jesus yachatsimantsik?

12 ¡Imapaqpis mana sirwinqantsikta y pipis mana kuyamanqantsikta creinatam Satanasqa munan! Peru nunakunata y masqa qeshyëkaqkunata Jesus kuyanqanta musyëqa alläpam kushitsimantsik. Milagrukunata ruranqanqa, clärum rikätsimantsik noqantsikman y problëmantsikkunaman interesäkunqanta. Tsënö kuyakoq reyyoq y sacerdötiyoq kanqantsiktaqa imëpis agradecikunantsikmi (Hebrëus 4:15). Mana qeshyarninqa, itsa entiendishwantsu atska tiempupa qeshyaqkuna imanö sientikuyanqanta. Peru Jesusqa mana qeshyëkarpis, qeshyëkaqkuna imanö sientikuyanqanta entiendirqanmi y llakiparqanmi (1 Pëdru 3:8). ¡Tsënöllam noqantsikpis ruranantsik!

“¡LAZARU, YARQAMÏ!”

13. ¿Imatataq Jesuspita yachatsimantsik Läzaru kawarimunqan?

13 Wakinkuna sufreqta rikarqa, Jesusqa alläpam llakikoq. Yarpärishun, Läzaru wanuriptin, familiankunata y amïgunkunata alläpa llakishqata rikarmi Jesuspis llakikurqan (leyi Juan 11:33-36). Kawaritsimunampaq kaqta musyëkarpis, manam penqakurqantsu nunakuna rikëkäyaptin waqëta. Läzaruta y familianta alläpa kuyarninmi Dios qonqan poderta utilizarqan amïgunta kawaritsimunampaq (Juan 11:43, 44).

14, 15. (1) ¿Imataq rikätsimantsik imëka sufrimientuta Jehovä ushakätsita munanqanta? (2) ¿Imapaqtaq Jesus parlëkarqan “Diospa yarpëninchö” nirqa?

 14 Bibliaqa willakun Jesusqa Jehovänö kanqantam (Hebrëus 1:3). Tsëmi Jesus ruranqan milagrukunaqa rikätsikun, qeshyakunata, nanëta, wanïta y mas sufrimientukunata Diosnintsik ushakätsita munanqanta. Ichik tiempullachönam Jehoväwan Jesusqa, mëtsikaq wanushqakunata kawaritsiyämunqa. Jesusqa nirqan, ‘Diospa yarpëninchö këkaq llapan wanushqakuna’ kawariyämunampaq kaqtam (Juan 5:28, 29, NM).

15 ¿Imapaqtaq Jesus parlëkarqan “Diospa yarpëninchö” nirqa? Tsëta nirqa parlëkarqan, llapan wanushqa nunakuna imanö kayanqanta Jehovä yarpëta puëdinqantam (Isaïas 40:26). Manam yarpëllatatsu puëdin, sinöqa munanmi yarparëta. Wanushqakuna kawariyämunqampaq Biblia parlanqanqa, clärum rikätsimantsik paraïsuchöpis kawariyämunampaq kaqta.

¿IMATATAQ YACHATSIMANTSIK JESUS RURANQAN MILAGRUKUNA?

16. ¿Ima milagrutaraq Diospa mëtsikaq sirweqninkuna rikäyanqa?

16 Jehoväta imëpis wiyakurqa, kawëkarmi Armagedonta pasëta puëdishun. Këqa imëpis mana pasakunqannö milagrum kanqa. Tsëpitanam mas milagrukunata rikar qallashun. Llapan nunakunam ichikllapa ichiklla jutsannaq këman chäyanqa (Isaïas 33:24; 35:5, 6; Apocalipsis 21:4). Mananam wanashunnatsu lentista, tukruta, ruëdayoq sïllata ni wiyanapaq audifonukunata. Armagedonta kawëkar pasaqkunaqa sänu y sinchim tikrayanqa. Pëkunam kë Patsata shumaq huertaman tikratsiyanqa (Salmu 115:16).

17, 18. (1) ¿Imanirtaq Jesus milagrukunata rurarqan? (2) ¿Imanirtaq imëkachöpis Diosta wiyakïta munantsik?

17 Milagrukunata Jesus ruranqampita leyirqa, kë Patsachö kawaqpaq kaqkunaqa, ichik tiempullachöna sänu kawakï kanampaq kaqmanmi mas markäkuyan (Apocalipsis 7:9). Tsë milagrukunaqa rikätsimantsik Jesus alläpa kuyamanqantsiktam (Juan 10:11; 15:12, 13). Jina llakipäkoq kanqanmi rikätsimantsik, sirweqninkunata Jehovä alläpa kuyanqanta.

18 Kanan witsanqa wanï, nanatsikïkuna y imëka sufrimientukunam kan (Romänus 8:22). Tsëmi këkuna ushakärinantana wanantsik. Malaquïas 4:2 textum nimantsik alli saloryoq kar kushishqa kawakunapaq kaqta. Këkunapitam Jehoväta agradecikuntsik y cumplimunampaq kaqman markäkuntsik. Tsëmi, imëkachöpis Diosta wiyakïta munantsik. Alläpam kushikuntsik Jesus ruranqan milagrukunaqa, ichik tiempullachöna mandakamuptin allikunata chaskinantsikpaq kaqta rikätsimanqantsikta.

Llapan wanushqa nunakuna imanö kayanqantam Jehoväqa yarpëta puëdin