Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Mäyu de 2015

Leyeqkuna tapukuyanqan

Leyeqkuna tapukuyanqan

¿Pitaq Ezequiel libru willakunqan “Magogpita Gog” nishqanqa?

Mëtsika watakunapam, publicacionnintsikkunaqa yachatsikamushqa Magogpita Gogpaq Biblia parlarqa, ciëlupita qarpakämushqana Satanaspaq parlëkanqanta. ¿Imanirtaq tsënö yachatsikamurqan? Porqui Apocalipsis librun nin, entëru Patsachö Jehoväpa markan këkaqta mana alli nunakuna ushakätsiyänampaq Satanas diriginqanta (Apocalipsis 12:1-17). Tsëmi entiendirqantsik Gogqa Satanaspa juk kaq jutin kanqanta.

Peru kananqa jukläyanam entiendintsik. ¿Imanir? Rikärishun. Juk kaq, Gog ushakänampaq Biblia parlarqa, Gogpa ëtsanta ëtsa mikoq pishqukunata y mikukoq animalkunata Jehovä qaranampaq kaqtam nin (Ezequiel 39:4). Jina Israelchö pampakänampaq kaqtapis ninmi (Ezequiel 39:11). Peru Satanas juk espïritu këkaptinqa, ¿imanöraq animalkuna mikuyanman y pampakanman? Tsëqa manam puëdikantsu. Jinamampis Bibliaqa clärum willakun, Satanasqa waranqa watapa wanwanyarëkaq uchkuchö wichqaränampaq kaqta. Tsëmi pëqa pampakanqatsu, ni animalkunapis mikuyanqatsu (Apocalipsis 20:1, 2).

Ishkë kaq, waranqa wata ushariptin llawiranqampita Satanas yarqaramur ruranampaq kaqtam Biblia kënö nin: “Ewanqa [. . .] jinantin munducho nunacunata engañaq[mi]. Tsenollam Gog y Magog marcacho soldaducunatapis elliconqa [. . .], Diospa wamrancunawan pelyayänanpaq” (Apocalipsis 20:8). Satanas Gog karqa, manam kikinllaqa engañakïta puëdinmantsu. Clärum rikëkantsik, Ezequielwan Apocalipsis libru Gogpaq parlarqa, Satanaspaq mana parlëkäyanqanta.

Tsëqa, ¿pitaq Magogpita Gogqa? Tsëpaqqa Bibliatam estudianantsik Diospa markanta ushakätsita pï munanqanta musyanapaq. Bibliaqa parlan Magogpita Gog, “norti kaq rey” y “Patsachö llapan reykuna” Diospa markanta ushakätsita munayänampaq kaqtam (Ezequiel 38:2, 10-13; Daniel 11:40, 44, 45; Apocalipsis 17:14; 19:19). Këkunaqa manachi juk juktsu kayan, sinöqa jukllëllachi peru atska jutiyoq. Porqui Bibliaqa nin, Patsachö llapan nacionkuna Diospa markanta tsë kutillana ushakätsita tïrayänampaq kaqta y tsënöpa Armagedon qallarinampaq kaqtam (Apocalipsis 16:14, 16).

 Diospa markanta ushakätsir qallayänampaq kaqta parlaq textukunata igualatsishqaqa, Magogpita Gogqa manam Satanastsu. Sinöqa, Magogpita Gogqa juk grüpu nacionkunam kayan. ¿Norti kaq reytsuraq kë grüputa diriginqa? Manam alleqllaqa musyantsiktsu. O itsapis, porqui Gogtam Jehovä kënö nin: “Mas karu kaq norti läduchö këkanqëkipitam shamunki, qamwan atska markakunam llapankuna cabällunkunata montashqa shayämunqa, mëtsikaq nunakuna, y mëtsika tröpakunapis” (Ezequiel 38:6, 15).

Norti kaq reypaqqa profëta Danielpis tsënöllam nirqan: “Inti yarqamunan lädupitawan norti kaq lädupitam mana alli noticiata wiyarinqa. Tsëmi alläpa yarpachakurnin piñakur ëwanqa mëtsika nunakunata ushakätsinampaq. Y carpa wayintam patsätsinqa jatun lamarwan Kuyëllapaq respetashqa jirka tinkoqman. Y tsëllachönam ushakënin kanqa, pëpaqqa manam pipis yanapaqnin kanqatsu” (Daniel 11:44, 45). Tsënö Daniel ninqanqa igualanmi Gogpaq Ezequiel ninqanwan (Ezequiel 38:8-12, 16).

¿Imataq pasakunqa Jehoväpa markanta ushakätsir qallëkuyaptin? Daniel 12:1 textum kënö nin: “Tsë witsanmi markëkipa favornin këkaq puëdeq principi Miguel contran churakärinqa”. Jina ninmi: “Y alläpa llakikïpaqmi kanqa, tsënöqa manaran kashqaraqtsu nacionkuna qallanqampita hasta kanan kamayaq”. Këchöqa jatun sufrimientupaqmi parlëkan. Daniel 12:1 textuqa kënö nirmi usharin: “Tsë witsanmi libruchö jutinkuna qellqarëkaq kaqkunaqa salvakuyanqa”. ¿Imapaqtaq kë versïculuqa parlëkan? 1914 watapitana ‘favornintsik këkaq’ rey Jesucristu Armagedon guërrachö defendimarnintsik pelyanampaq kaqtam. Jina tsënöllam Apocalipsis 19:11-21 textupis nin Jehoväpa markanta ushakätsir qallëkuyaptin, Jesus imata ruranampaq kaqta.

Peru ¿pitaq Apocalipsis 20:8 textu parlanqan Gog y Magog markaqa? Pëkunaqa kayan, waranqa wata ushariptin Jehoväpa contran churakar, ultimu kaq pruëbachö Diospa sirweqninkunata ushakätsita tïraq llapan nunakunam. Kë nunakunaqa, Magogpita Gog ruranqannömi Diospa markanta chikiyanqa. Peru Magogpita Gogta Armagedonchö ushakätsinqannöllam, pëkunatapis Dios ushakäratsinqa (Apocalipsis 19:20, 21; 20:9). Tsëchi, waranqa wata ushariptin Diospa contran churakaq llapan nunakunataqa Bibliaqa qayan Gog y Magog marka nishpa.

Jehoväpa testïgunkunaqa Biblia estudiëtaqa alläpa precisaqpaqmi churantsik. Tsëmi entiendita munantsik, ichik tiempullachöna norti kaq rey pï kanampaq kaqta. Peru contrantsik pelyayänampaq nacionkunata pï diriginampaq kaqta mana musyarpis, kë ishkampitaqa segürum këkantsik: 1) Gogpita Magog y tröpampis ushakäyänampaq kaqta y 2) reynintsik Jesucristu salvamarnintsik yamë kawakï kanqan mushoq Patsachö kawatsimänantsikpaq kaqta (Apocalipsis 7:14-17).