Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Abril de 2015

Jehoväman imëpis markäkï

Jehoväman imëpis markäkï

“Aw marka, pëmanqa imëpis markäkï.” (SALMU 62:8)

1-3. ¿Imanirtaq Pabluqa shonqupita patsë Diosman markäkurqan? (Rikäri kë yachatsikïpa qallananchö këkaq dibüjuta)

APOSTOLKUNA kawayanqan witsan Römachö täraq cristiänukunaqa, alläpa chikishqam kayarqan. Nunakunatam chikiyan y Röma markatam kayayashqa nirmi tumpayarqan. Wakintam prësuyarqan, wakintanam mikukoq animalkunaman jitayarqan, wakintanam qeruman clavayarqan y markata aktsinampaq kawëkaqta kayayarqan. Tsëmi wakin cristiänukunaqa musyayaq imë höra karpis tsëkunapa pasayänampaq kaqta.

2 Tsë witsankunam apostol Pabluta romänukuna prësuyarqan. Pabluqa itsa pensarqan cristiänu mayinkuna mana yanapayänampaq kaqman. Porqui juk kutim tsënö problëmapa pasëkaptin ni mëqan cristiänupis yanaparqantsu. Peru Jehovä yanapashqa kanqantam nirqan. Hasta nirqanmi, “leonpa shimimpita” librashqa kanqantapis (2 Timoteu 4:16, 17, NM). *

 3 Puntakunatapis Jehovä yanapashqa kanqanman yarparmi, Pabluqa shonqupita patsë Jehoväman markäkurqan. Segürum këkarqan tsë problëmäpita libranampaq y maskunatapis aguantanampaq yanapanampaq kaqta (2 Timoteu 4:18). Cristiänu mayinkuna yanapëta mana puëdiyaptimpis, Jehoväwan Jesus yanapayänampaq kaqtam markäkurqan.

JEHOVÄMAN MAS MARKÄKUNËKIPAQ YANAPASHOQNIKITANÖ PROBLËMAKUNATA RIKË

4, 5. (1) ¿Pitaq imëpis yanapamënintsikta puëdin? (2) ¿Imataq yanapashunki Jehoväman mas markäkunëkipaq?

4 ¿Imëllaqa alläpa problëmakunapa pasarqunkiku y japallëki sientikurqunkiku? Itsa trabäjuchö o escuëlachö problëmakunapa pasarqunki. O itsa alläpa qeshyarqunki o juk problëmakunapa pasarqunki. Tsëqa itsa pipis mana yanapashuptiki llakikurqunki. Rasunmi, wakin problëmakunataqa nunaqa manam altsëta puëdintsiktsu. Tsënö kaptinqa, ¿imatataq rurankiman? Bibliam nimantsik Jehoväman markäkunapaq (Proverbius 3:5, 6). ¿Rasumpatsuraq Jehovä yanapakun? ¡Awmi! Bibliachöqa, sirweqninkunata Jehovä yanapanqampita willakïkunatam tarintsik.

Jehoväman mas markäkunëkipaq yanapashoqnikitanö problëmataqa rikë

5 Juk problëmapa pasëkaptiki pipis mana yanapashuptikiqa, ama yarpachakïtsu. Pablunö rurë, Jehoväman mas markäkunëkipaq y imanö cuidashunqëkita mas cläru rikänëkipaq yanapashoqnikitanö tsë problëmata rikë. Tsëmi yanapashunki Jehoväman mas markäkunëkipaq y kuyë amïgun kanëkipaq.

MAÑAKÏNINTSIKTA JEHOVÄ MANA RASLLA CONTESTAMUPTIN

6. ¿Imanirtaq problëmakunapa pasanqantsik höra Jehoväman markäkïqa fäciltsu?

6 Alläpa problëmapa pasarnin yarpachakïyoq këkarninqa, itsa imëkatana rurarqunki altsanëkipaq y Jehovätapis mañakurqunkina. Tsënö karqa, tranquïlunam sientikunëki y markäkunëkim Jehovä yanapashunëkipaq kaqman (leyi Salmu 62:8 * y 1 Pëdru 5:7). Jehoväpa rasumpa amïgun këta munarqa pëman markäkïtam yachakunëki. Rasunmi, tsë rurananqa manam fäciltsu, porqui Jehoväqa mañakïnintsikta höraqa manam rasllatsu contestamun (Salmu 13:1, 2; 74:10; 89:46; 90:13; Habacuc 1:2).

Juk teytanömi Jehoväpis kuyamarnintsik musyan imata wananqantsikta

7. ¿Imanirtaq Jehoväqa mañakïnintsikta höraqa rasllatsu contestamun?

7 ¿Imanirtaq Jehovä mañakïnintsikta höraqa raslla contestamuntsu? Tsëta entiendinapaqqa, yarpänantsikmi Jehoväqa teytantsik kanqanta y noqantsikna wamran kanqantsikta  (Salmu 103:13). Höraqa, teytakuna manam wamrankuna llapan mañakuyanqantatsu imëpis qoyan. Porqui imata mañakuyanqanta qoriyaptimpis, tsëpitaqa mananam munayannatsu. Y musyayanmi, höraqa wamrankuna mañakuyanqanqa mana allipaqpis kanqanta. Llapan mañakuyanqanta qorqa, itsa teytakunaqa wamrankunapa munënin ruraq tikrariyanman. Peru teytakunaqa musyayanmi, wamrankuna imata wanayanqanta y imë qoyänampaq kaqtapis. Tsënöllam, Jehoväpis kuyamarnintsik musyan imata wananqantsikta y imë qomänapaq kaqta. Tsëmi mañakïnintsikta Jehovä imanö contestamunanta shuyarëta yachakunantsik (igualaratsi Isaïas 29:16 y 45:9 textukunatawan).

8. ¿Jehoväqa imatataq änimantsik?

8 Jina yarpanëkim mëyaq aguantanëkipaq kaqta Jehovä musyanqanta (Salmu 103:14). Pëqa wananqantsik kallpatam imëpis qomantsik. Höraqa itsa pensashwan aguantëta manana puëdinqantsikta. Peru Jehoväqa änimantsikmi juk problëma noqantsikpaq alläpa sasa kaptinqa, aguantanapaq yanapamänantsikpaq (leyi 1 Corintius 10:13). Mëyaq aguantanapaq kaqta Jehovä musyanqantam markäkuntsik, y tsëqa alläpam yanapamantsik.

9. Mañakïnikita Jehovä raslla mana contestamuptinqa, ¿imataraq rurankiman?

9 Mañakunqëkita Jehovä raslla mana contestamuptinqa, pacienciawan shuyarë. Yarpë, pëqa yanapamënintsiktam munan. Bibliaqa nimantsik mas wananqantsik hörachö yanapamänapaq shuyarëkanqantam, porqui pëqa imëpis alli kaqllatam ruran. Jina ninmi pëman markäkoq kaqkunaqa kushishqa kayanqanta (Isaïas 30:18).

ALLÄPA PROBLËMAKUNAPA PASARNIN

10-12. (1) ¿Imanirtaq qeshyaq familiantsikta cuidëqa fäciltsu? (2) ¿Imanötaq Jehoväwan amïgu kënintsik tikran pëman mas markäkushqa? Juk igualatsikïwan willakaramï.

10 Ishkë kaq pärrafuchömi nirqantsik Pabluqa “leonpa shimimpita” librashqa kanqanta (2 Timoteu 4:17, NM). Pënö alläpa problëmakunapa pasarqa, ¿imatataq rurankiman? Jehovämanmi markäkunëki. Tantiyarinapaq, itsa alläpa qeshyaq familiëkita cuidëkanki. Tsënö kaptinqa itsa Jehoväman mañakurqunki yanapashunëkipaq y imatapis alli kaqta akranëkipaq. * Tsëqa tranquïluna sientikï, musyankinam imapa pasëkanqëkita Jehovä musyanqanta, y aguantanëkipaq y mana jaqinëkipaq yanapashunëkipaq kaqtapis (Salmu 32:8).

Mandakunqanta wiyakunëkipaqmi kallpata Jehovä qoshunki

11 Peru höraqa itsa Jehovä mana  yanapëkäshunqëkita sientinkiman. Itsa qeshyaq familiëkita doctorkuna shumaqllaqa atiendiyantsu. O itsa familiëkikuna shoqayäshunëkipa rantin, mas llakitsiyäshunki. Tsënö kaptinqa, alläpam precisan Jehoväman mañakunëki y pëman mas witinëki (leyi 1 Samuel 30:3, 6 *). Y Jehovä imanö yanapashunqëkita rikarnam mas kuyë amïgun tikranki.

12 Linda jutiyoq pani pasanqanta rikärishun. * Pëqa atska tiempupam qeshyëkaq teytankunata cuidarqan. Y willakunmi qowan, turin y pëpis höraqa ima rurëtapis mana puëdiyanqanta. Höraqa atiendita manana puëdiyanqantam sientiyaq. Peru kananqa clärum rikan Jehovä imanö yanapashqa kanqanta y mas sasakunapa pasanqan höra kallpata qoshqa kanqanta.

13. ¿Imanötaq Rösa jutiyoq panita yanaparqan Jehoväman markäkunqan?

13 Jehoväman shonqupita patsë markäkushqaqa, desgraciakunapa pasanqantsik höram kallpata qomäshun aguantanapaq. Tsënömi yanaparqan Rösa jutiyoq panita. Mana Testïgu qowanmi pëpita divorciakïkarqan, tsëllamannam musyarirqan, turin alläpa grävi qeshyayoq kanqanta y juk ishkë killakunallatanam, turimpa warminna wanurirqan. Y alli sientikurir precursöra këkaptinnam, mamanna wanukïkurqan. ¡Rösapaqqa alläpa llakikïpaqmi karqan! ¿Imataq yanaparqan tsë llapanta aguantanampaq? Llapan junaqkuna Jehoväman mañakunqanmi. Rasumpa amïgun Jehovä tikrarinqantam Rösaqa willakun. Jina willakunmi, kikinman o juk nunakunaman markäkunampa rantin, Jehoväman mas markäkïta yachakunqanta. Jehovä yanapëkanqantam Rösaqa cuentata qokurqan, porqui wananqankunaqa manam pishipurqantsu. ¡Jehoväwan juntu trabajaqnömi sientikoq!

Familiantsikchö problëmakuna pasanqanqa, höraqa Jehoväta kuyanqantsiktam pruëbaman churanman (Rikäri 14-16 kaq pärrafukunata)

14. ¿Imanötaq Jehovä yanapashunkiman familiëkita congregacionpita qarquriyaptin?

14 Juk problëma maspaq parlarishun. Itsa juk familiëkita congregacionpita qarquriyashqa. Y qamqa musyankim tsënö qarqushqakunawan mana parlanëkipaq Biblia mandakunqanta (1 Corintius 5:11; 2 Juan 10). Peru familiëkita alläpa kuyarninqa, itsa pensankiman tsë mandakïta cumplinanqa sasa kanqanta. ¿Imanötaq Jehovä yanapashunkiman? Mandakunqanta wiyakunëkipaqmi kallpata qoshunki. Jehoväman markäkur, kë problëmata rikë Jehoväman mas witinëkipaq yanapashoqnikitanö.

15. ¿Imanirtaq Adanqa Jehoväta cäsurqantsu?

 15 Këta tantiyanapaq Adan ruranqanta yarpärishun. ¿Imanirtaq Ëva qonqan frütata mikurirqan? Manam engañashqa kartsu. Porqui Bibliaqa clärum nin: “Manam Adantatsu diablu engañarqan” (1 Timoteu 2:14). Tsëqa, ¿imanirtaq Jehoväta cäsunampa rantin Ëvata cäsurqan? Porqui Jehoväpitapis masmi Ëvata kuyarqan (Genesis 3:6, 17). ¿Imatataq këpita yachakuntsik?

16. (1) Nunata kuyanantsikpaq rantinqa, ¿pitataq mas kuyashwan? (2) ¿Imanirtaq tsëta nintsik?

16 Nunata kuyanantsikpa rantinqa, Jehovätam mas kuyanantsik (leyi Mateu 22:37, 38). Porqui tsëmi familiantsikpaq mas alli kanqa, Jehoväta sirwiyaptin o mana sirwiyaptimpis. Tsënö këkaptinqa, Jehoväta cada junaq mas kuyanëkipaq y pëman mas markäkunëkipaq sinchikï. Familiëki congregacionpita qarqushqa kaptin alläpa llakikurqa, Jehoväta willë (Romänus 12:12; Filipensis 4:6, 7). * Alläpa llakishqa sientikurpis, tsë problëmata rikë Jehoväman mas witinëkipaq yanapashoqnikitanö. Tsënöpam pëman mas markäkunki y ninqanta wiyakuptikiqa llapampis allilla yarqunampaq kaqtam següru kanki.

 ¿IMATATAQ RURANKIMAN MAÑAKÏNIKITA JEHOVÄ CONTESTAMUNQANYAQ?

Yachatsikïchö ocupädu karninqa, Jehoväman markäkunqantsiktam rikätsikushun (Rikäri 17 kaq pärrafuta)

17. Yachatsikïchö ocupädu karqa, ¿imapitataq següru kashun?

17 ¿Imanirtaq Jehoväqa “leonpa shimimpita” Pabluta librarqan? Yachatsikur sïguinampaq y llapan mandanqanta cumplinampaqmi (2 Timoteu 4:17, NM). Noqantsiktapis yachatsikunapaq cargutam Jehovä qomarquntsik y minkankunatanömi rikämantsik (1 Tesalonicensis 2:4; 1 Corintius 3:9). Yachatsikïchö imëpis ocupädu këkarqa, segürum këkäshun llapan wananqantsikchö Jehovä yanapamänapaq kaqta (Mateu 6:33). Y mañakïnintsikta Jehovä contestamänata shuyararpis manam utishuntsu.

18. ¿Imatataq rurashwan Jehoväpa amïgun kanapaq y pëman mas markäkunapaq?

18 Cada junaq kallpachakï Jehoväwan amïgu këniki mas sinchiyänampaq. Problëmapa pasarqa, Jehoväman mas witinëkipaq yanapashoqnikitanö rikë. Bibliata alleq estudië y yachakunqëkiman yarpachakï. Ama Jehoväman mañakïta jaqitsu y ocupädu kë pëta sirwirnin. Tsëta rurarqa, segürum kanki kanan y shamoq problëmakunachöpis Jehovä yanapashunëkipaq kaqta.

^ par. 2 Leon nirqa itsa Pabluqa parlëkarqan rasumpa leonpaq, o alläpa peligrukunata pasanqampaq.

^ par. 6 Salmu 62:8: “Aw marka, pëmanqa imëpis markäkï. Llapan shonqikïkunawan pëta parlapäyë. Diosqa tsapämaqnintsikmi”.

^ par. 10 Revistantsikkunachöqa yarqamushqam qeshyëkaqkunata y cuidaqkunata yanapanampaq yachatsikïkuna. Tsëtaqa tarinki Despertad revistakunachömi, 1994 wata 8 de febrëruchö; 1997 wata 8 de febrëruchö; 2001 wata 22 de enëruchö y 2014 wata 15 de marzu Tapakoq revistapa 25-29 kaq päginankunachö.

^ par. 11 1 Samuel 30:3, 6: “Nunankunawan markaman David chärirqa kayarishqatam taririrqan, y warminkunata, ollqu wamrankunata y warmi wamrankunataqa prësum apakushqa kayänaq. [...] Këqa Davidpaq alläpa llakikïpaqmi karqan, porqui nunankunam wanutsita munayarqan; alläpam piñakurkuyarqan ollqu wamrankuna y warmi wamrankunarëkur. Tsënam Davidqa Jehovä Dioschö yanapakïta ashirqan”.

^ par. 12 Rasumpëpa jutinkunaqa jukmi.

^ par. 16 La Atalaya revistachömi congregacionpita qarqushqakunapa familiankunata yanapaq yachatsikïkuna yarqamushqa. Wakinkunaqa këkäyan, 2006 wata 1 de septiembri revistapa 17-21 kaq päginankunachö y 2007 wata 15 de enëru revistapa 17-20 kaq päginankunachömi.