Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Abril de 2015

¿Imanötaq wawqikunata yachatsishwan?

¿Imanötaq wawqikunata yachatsishwan?

“Yachatsenqaqta, qampis marcäconqequi yachatsicoqcunata ninqui pecunapis waquincunata yachatsiyänanpaq.” (2 TIMOTEU 2:2)

1. (1) Jehoväpa sirweqninkunaqa, ¿ima precisanqantataq imëpis alleq musyayashqa? (2) ¿Imanirtaq tsëqa kanan witsan alläpa precisan? (3) ¿Imapitataq kë yachatsikïchö yachakushun?

JEHOVÄPA sirweqninkunaqa imëpis musyayashqam, imatapis alli yachakïkur rurayaptinqa alli yarqunqanta. Tantiyarinapaq, Abrahanmi yachatsishqa nunankunawan pelyaq ëwarqan, tsënöpam chikeqninkunata vencirir Lotta kutitsimurqan (Genesis 14:14-16). Davidpa tiempunchöpis, Jehoväpaq cantayänampaqmi alli yachatsishqa nunakuna kayaq (1 Crönicas 25:7). ¿Imanirtaq kanampis alli yachatsishqa kanantsik alläpa precisan? Porqui Satanaswan y mundunwanmi pelyanantsik (Efesius 6:11-13). Jina nunakunata yachatsirninmi Jehoväta alabanantsik (Hebrëus 13:15, 16). Jehoväpa unë sirweqninkunanöllam, ruranqantsik alli yarqunampaqqa alli yachatsishqa kanantsik. Tsëmi Jehoväqa anciänukunata churashqa wakin wawqikunata yachatsiyänampaq (2 Timoteu 2:2). Tsëmi kë yachatsikïchöqa rikäshun, wakin anciänukuna wawqikunata imanö yachatsiyanqampita.

 JEHOVÄTA MAS KUYANAMPAQ YANAPË

2. Juk anciänu juk wawqita yachatsinampaqqa, ¿imatataq ruranan, y imanir?

2 Juk anciänuqa juk murukoq nunanömi. Juk murukoqqa manaraq mururninmi chakraman wanuta jichan, tsënöpa murunqan alli winamunampaq. Jina tsënöllam anciänukunapis, juk wawqita yachatsinampaqqa Bibliapa mëqan versïculunkunallapitapis shumaq parlapäriyanman. Tsënöpam, yachatsir qallaptinqa imanö ruranampaq kaqta musyanqana (1 Timoteu 4:6).

3. (1) Juk anciänu juk wawqiwan parlaptin, ¿imanötaq Marcus 12:29, 30 textu yanapanman? (2) Juk anciänuta pëpaq mañakoqta wiyarqa, ¿ima rurëtataq juk wawqi munanqa?

3 Anciänu karqa, wawqikunapa shonqunman rasumpa kaq imanö chëkanqantam musyanëki. Tsëpaqqa Marcus 12:29, 30 (leyi) textutam leyipärinkiman. Tsëpitana tapuri, Jehovällatana sirwinampaq äninqan imatapis akranqanchö imanö yanapanqanta. Tsënö tapunqëkim yanapashunki Jehoväta shonqupita patsë imanö sirwinampaq parlapärinëkipaq. Jina pëwan juntum Jehoväpa espïritunta mañakunkiman llapan rurëninchö yanapanampaq. Itsa pëpaq mañakunqëkita wiyarqa, congregacionchö mas yanapakïta munanqa.

4. (1) Wawqikunata yanapanampaqnö Bibliapa willakïninkunapita parlakaramï. (2) ¿Imatataq anciänukuna logrëta munayanman wawqikunata yachatsirnin?

4 Juk wawqita yachatsir qallarqa, Bibliapa willakïninkunawan rikätsi wakinkunata yanapëqa, cumplïdu këqa y humildi këqa alläpa precisanqanta. Wakin willakïkunataqa tarinki 1 Rëyes 19:19-21, Nehemïas 7:2, Nehemïas 13:13 y Hëchus 18:24-26 textukunachömi. Kë willakïkunachö yachatsikïkunaqa, wanu cuentam kayan. Wawqitam yanapan Diospa kaqchö mas winanampaq. Franciapita juk anciänum nin, wakin wawqikunata yachatsirqa, Biblia ninqanmannö imatapis akrayänampaq yanapanqanta. Jina ninmi, Diospa ‘shumaq rurëninkunata’ Bibliachö ashirir imë höra karpis parlapärinampaq listu këkanqanta (Salmu 119:18). ¿Imanö mastaq anciänukuna wawqikunata yanapayanman  Jehoväta mas kuyayänampaq?

IMATA RURANAMPAQ Y IMANIR RURANAMPAQ KAQTA ANIMË

5. (1) ¿Imanirtaq precisan imatapis rurayänampaq kaqpita wawqikunawan parlëqa? (2) ¿Imanirtaq precisan jövin kayanqampita patsë anciänukuna yachatsiyänan? (Päginapa ura kuchunchö willakïtapis rikäri)

5 Wawqita tapï imakunata rurëta munanqanta. Ima rurëmampis mana pensashqa kaptinqa, yanapari rurëta puëdinampaq kaqta akranampaq. Qam akranqëkikunapita willë, y lograrirnin kushikunqëkipitapis. Kënö yanapëqa fäcil-llam y allim yarqun. Africapita juk anciänum willakun, imata rurëta munanqampita juk anciänu tapurinqanta. Y ninmi tsënö tapurinqan Diospa kaqta mas precisaqpaq churanampaq yanapanqanta. Jina wakin yachaq anciänukunanam niyan, jövinllaraq këkäyaptin yachatsi alläpa precisanqanta. Edäninkunamannömi ima rurëllamampis congregacionchö churayänan. ¿Imanirtaq alläpa precisan jövin kayanqampita patsë wawqikunata anciänukuna yachatsiyänan? Porqui tsëmi yanapanqa, jatunyärirnin rurëta munayanqanta lograyänampaq y juk cösaskunaman mana  yarparäyänampaq (leyi Salmu 71:5, 17 *). *

Wawqita entienditsi imata y imanir ruranampaq kaqta y ruranqampita felicitë (Rikäri 5-8 kaq pärrafukunata)

6. ¿Imanötaq wakinkunata Jesus yachatsirqan?

6 Juk wawqita masta ruranampaq yanaparqa, manam imata ruranampaq kaqllatatsu ninëki. Sinöqa yachatsinëkim imanir tsënö ruranan precisanqanta. Tsënöllam Jesuspis rurarqan. Apostolninkunata yachatsikuyänampaq mandarmi, imanir cäsukuyänampaq kaqta, puntata kënö nirqan: “Diosmi churamashqa, sieluchopis y que patsachopis mandacunäpaq. Tsemi qamcunata cachayaq jinantin nasioncunapa ewar, noqaman creyicuyänanpaq nunacunata willapäyänequipaq” (Mateu 28:18, 19). ¿Imanöraq Jesus ruranqanta qatinkiman?

7, 8. (1) ¿Imanötaq Jesus ruranqanta anciänukuna qatiyanman? (2) ¿Imanirtaq wawqita felicitëqa alläpa precisan? (3) ¿Ima yanapakïkunataq anciänukunata yanapanqa wakinkunata yachatsiyänampaq? (Rikäri “ Wawqikunata yachatsinapaq yanapakïkuna” neq recuadruta)

7 Imatapis ruranampaq juk wawqita nirqa, Bibliawan yachatsi imanir tsënö ruranan precisanqanta. Tsënömi yachatsinki Biblia ninqannö imatapis ruranampaq y manam ruranan kaptinllatsu ruranqa. Tantiyarinapaq, reunionta ruranqantsik wayipa yëkunanta limpiuta y tsakita katsinampaq juk wawqita nirqa, leyipurinkimanmi Tïtu 2:10 textuta. Entienditsi tsënö limpiuta katsirqa Diospa willakïninta mas shumaqyätsinqanta y edäyashqana kaqkunata imanö yanapanampaq kaqman pensanampaqpis. Tsënö parlapanqëkiqa wakinkunaman yarpachakunampaqmi yanapanqa. Ruranqankuna wakinkunata yanapanqanta rikarqa, kushikunqam y mastam rurëta munanqa.

8 Jinamampis, ninqëkinö ruraptinqa felicitë. ¿Imanirtaq tsënö ruranëkiqa precisan? Porqui tsëmi yanapanqa Diospa kaqchö mas poqunampaq. Planta winanampaq yakuta winaq cuentam, wawqikunata felicitëqa (igualaratsi Mateu 3:17 textutawan).

JUK PROBLËMA MAS

9. (1) ¿Imataq pasakun wakin kapoqyoq nacionkunachöqa? (2) Wakin jövin wawqikunapaqqa, ¿imanirtaq Jehoväta mas sirwiqa precisantsu?

9 Wakin kapoqyoq nacionkunachöqa, wakin wawqikunata mas yanapakuyänampaq yachatsiqa manam fäciltsu. Tsëmi 20 nacionkunapita atska watapana kaq anciänukunata tapuyarqan imanir tsë pasakunqanta. Cäsi llapanmi niyarqan tsë wawqikunata jövinllaraq këkäyaptin papäninkuna Jehoväta mas sirwiyänampaq mana yanapayanqanta. Y masta rurëta munayaptimpis, qellëta ganayänanrëkur mas estudiayänampaqmi niyänaq. Tsëmi pëkunapaqqa Jehoväta mas sirwiqa alläpaqa precisarqantsu (Mateu 10:24).

10, 11. (1) ¿Imanötaq juk anciänu ichikllapa ichikllapa juk wawqita yanapanman pensëninta cambianampaq? (2) ¿Ima versïculukunataraq juk anciänu juk wawqita leyipärinman y imanir? (Päginapa ura kuchunchö willakïtapis rikäri.)

10 Yanapakïta mana munaq wawqikunata  yanapëqa manam fäciltsu; atska pacienciapaqmi. Murukoq nunaman pensarishun. Juk planta derëchu winanampaqqa ichikllapa ichikllapam derichanan. Jina tsënöllam qampis ichikllapa ichikllapa yanapanëki pensëninta cambianampaq y tsënöpa cargukunata chaskikunampaq. ¿Imanötaq tsëta rurankiman?

11 Amïgun këta procurë. Yanapakïninta congregacion alläpa wananqanta rikätsi. Jehoväta sirwinampaq äninqanta yarpätseq versïculukunata leyipë (Eclesiastes 5:4; Isaïas 6:8; Mateu 6:24, 33; Lücas 9:57-62; 1 Corintius 15:58; 2 Corintius 5:15; 13:5). Shonqunman chëta procurë kënö tapukïkunawan: “¿Jehovällatana sirwinëkipaq nirqa imatataq änirqëki? ¿Imanöraq sientikurqan bautisakuriptiki?” (Proverbius 27:11). “¿Imanöraq Satanas sientikurqan?” (1 Pëdru 5:8.) Kënö textukunata leyipärinqëkiqa wawqipa shonqunmanmi chärinqa (leyi Hebrëus 4:12). *

JÖVIN, MARKÄKÏPAQ KË

12, 13. (1) ¿Elïas mandanqanta Elisëu cumplirqanku? (2) ¿Imatataq Jehovä permitirqan Elisëu tsënö kanqampita?

12 Jövin, congregacionqa alläpam wanashunki. ¿Imataq yanapashunki Jehoväta kushishqa sirwinëkipaq? Elisëu ruranqanta rikärishun.

13 Profëta Elïasmi Elisëuta inkitarqan yanapaqnin kanampaq. Elisëuqa kushishqam yanapaqnin tikrarirqan, y llapan mandanqantam, mana precisaqlla kaptimpis cumplirqan (2 Rëyes 3:11). Elïasqa joqta watapam Elisëuta yachatsirqan. Y Israelchö rurëninta ushanampaq ichikllana pishikaptinmi, yanapaqnin manana kanampaq nirqan. Peru Elisëuqa kima kutim, “manam jaqishqëkitsu” nirqan. Elïaswan quedakïllatam munarqan. Tsënö kanqampitam Jehoväqa, Elïasta apakunqan höra rikänanta permitirqan (2 Rëyes 2:1-12).

14. (1) ¿Imanötaq jövinkuna Elisëu ruranqanta qatiyanman? (2) ¿Imanirtaq precisan jövinkuna rurëninkunata alleq cumpliyänan?

14 ¿Imanötaq Elisëu ruranqanta qatinkiman? Ima rurëllatapis anciänukuna niyäshuptikiqa kushishqa chaskikï. Yarpë, yachëkätsishoqniki anciänuqa amïguïki (amiguyki) kanqanta. Yachëkätsishunqëkipita agradecikï, y masta yachatsishunëkita munanqëkita willë. Jina markäkïpaq kë y llapan mandashunqëkita yachatsishunqëkinölla cumpli. ¿Imanirtaq tsënö ruranëki precisan? Porqui tsënöpam anciänukuna cuentata qokuyanqa, congregacionchö carguta chaskinëkita Jehovä munanqanta (Salmu 101:6; leyi 2 Timoteu 2:2).

ANCIÄNUKUNATA RESPETË

15, 16. (1) ¿Imanötaq Elisëu rikätsikurqan yachatseqninta respetanqanta? (Rikäri kë yachatsikïpa qallananchö këkaq dibüjuta.) (2) ¿Imanirtaq wakin profëtakuna Elisëuman markäkuyarqan?

15 Jina Elisëupaq willakïqa rikätsikun, anciänukunata respetëqa alläpa precisanqantam, porqui pëkunaqa alleqmi musyayan imatapis imanö ruranëkipaq kaqta imanir  nikäyäshunqëkita. Jericöchö profëtakunata watukarirmi Elïaswan Elisëuqa ëwayarqan Jordan mayupa. Tsënam “Elïasqa aqshunanta piturir yakuta maqëkurqan, yakunam rakikärirqan”, tsënam ishkankuna tsaki patsapana tsimpariyarqan. Y parlakurmi ëwayarqan, Elisëuqa Elïas ninqanta llapantam wiyarqan y yachakurqan Päginapa ura kuchunchö willakïtapis rikäri. Y manam pensarqantsu llapantana yachanqantaqa. Elïasta Jehovä apakunqanchömi Elisëuqa kutirqan Jordan mayupa. Y Elïaspa aqshunanwan yakuta maqarirmi, Jehoväman yanapanampaq mañakurirqan. Y yakuqa yapëmi rakikärirqan (2 Rëyes 2:8-14).

16 ¿Tantiyarqunkiku Elisëupa punta milagrunqa Elïas ultimuta ruranqannölla kanqanta? Elisëuqa manam pensarqantsu pëchö poder kaptinna, munëninmannöna ruranampaq kaqta. Pëqa Elïas ruranqannöllam rurar sïguirqan. Tsënöpam rikätsikurqan yachatseqninta respetëkanqanta. Y tsëmi wakin profëtakunapis pëman markäkuyarqan (2 Rëyes 2:15). Elisëuqa 60 watapam profëta karqan, y Elïas ruranqampitapis mas milagrukunata ruranampaqmi Jehovä poderta qorqan. ¿Imatataq këpita jövinkuna yachakunkiman?

17. (1) ¿Imanötaq Elisëu ruranqanta jövinkuna qatiyanman? (2) ¿Tiempuwanqa imakunatataq Jövinkuna rurëta puëdiyanman?

17 Congregacionchö mas cargukunata chaskirqa, ama imëkatapis cambiar ushëtsu. Cambiankimanqa congregacion rasumpa wanaptin o Jehoväpa markan niptinraqmi. Manam kikiki munarllaqa imatapis cambianëkitsu. Yarpë, Elisëupis Elïas ruranqannöllam rurar sïguirqan. Tsënöpam rikätsikurqan yachatseqninta respetanqanta. Jina tsëmi yanaparqan wakin profëtakunapis pëman markäkuyänampaq. Jina tsënöllam, Bibliawan anciänukuna yachatsiyäshunqëkinö rurarqa pëkunata respetëkanki. Jina llapan wawqikuna y panikunam qamman markäkuyanqa (leyi 1 Corintius 4:17). Y mas yachakurnam, congregacionta yanapaq cambiukunata rurëta puëdinki, Jehoväpa markan ninqannö rurar sïguinampaq. Y tiempuwanqa Elisëutanömi Jehovä yanapashunki. Itsa yachatsiyäshoqnikikunapitapis mastaraq ruranki (Juan 14:12, NM).

18. ¿Imanirtaq congregacionchö wawqikunata yachatsinanqa alläpa precisan?

18 Kë ishkan yachatsikïchö yanapakïkuna, wawqikunata yachatsiyänëkipaq anciänukunata yanapëkuyäshi. Jina mañakuyämi wawqikuna congregacionchö mas yanapakïta munayänampaq yanapëkunantapis. Tsënöpam entëru Patsachö congregacionkuna mas sinchi kanqa y shamoq tiempuchö pasakunampaq kaqkunatapis mäkoq mäkoqlla shuyaräshun.

^ par. 5 Salmu 71:5, 17: “Ciëluchö y Patsachö Autoridäyoq Señor Jehovälla, qammi shuyäkïnï kanki, jövin kanqäpita markäkunqä. [...] Teyta Dios, jövin kanqäpita patsëmi yachatsimarqunki, y kanankamayaqmi imëka ruranqëkipita musyatsikïkä”.

^ par. 5 Juk jövin rurëninkunata precisaqpaq churaptin, humildi kaptin y congregacionchö alli yanapakuptinqa anciänukunam rikäyänan 20 watata manaraq cumpliptimpis siervu ministerial këta puëdinqanta (1 Timoteu 3:8-10, 12; rikäri 1989 wata 1 de juliu La Atalaya revistapa 29 kaq päginanta)

^ par. 11 Wawqiwan parlaptikiqa yanapashunkiman, 2012 wata 15 de abril Täpakoq revistapa 14-16 kaq päginakunachö 8-13 pärrafukunam, jina “Dios Yayapa kuyakïninchö imëpis kawakuyë” librupa 16 kaq capïtulupa 1-3 kaq pärrafukunam.