Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Abril de 2015

Anciänukuna, ¿ollqu kaqkunata yachëkätsiyankiku?

Anciänukuna, ¿ollqu kaqkunata yachëkätsiyankiku?

“Llapampaqmi churashqa tiempu kan.” (ECLESIASTES 3:1)

1, 2. ¿Imatataq cuentata qokuyashqa congregacionkunata watukaqkuna?

CONGREGACIONKUNATA watukaq wawqim, juk congregacionchö anciänukunawan reunionta ushanampaqna këkan. Wakin kaqkuna mayorllana kayaptimpis, alli trabajaq kayaptinmi kushikun. Peru pasaq watukanqanchömi, wakin wawqikunata yachatsiyänampaq nishqa karqan. Tsëmi kënö tapurin: “Wawqikuna, congregacionchö mas carguyoq kayänampaq, ¿wakin wawqikunata yachatsiyarqunkiku?”. Tsëmi juk kaq anciänuqa, “alläpaqa manam yachatsiyarqötsu” nin. Y wakinkunapis tsënöllam niyan.

2 Anciänu karqa, itsa qampis tsënö contestankiman. Congregacionkunata watukaqkunam cuentata qokuyashqa, anciänukunaqa wakin wawqikunata mana yachëkätsiyanqanta. ¿Imanirtaq yachëkätsiyantsu? Rikärishun.

3. (1) ¿Bibliachö mëqan versïculukunataq rikätsikun wakinkunata yachatsinanqa alläpa precisanqanta? (Päginapa ura kuchunchö willakïtapis rikäri) (2) ¿Imanirtaq kë yachatsikïta y qateqnin kaqta precisaqpaq churanantsik? (3) ¿Imanirtaq wakin anciänukunapaqqa wakinkunata yachatsiyänampaq tiemputa jorqë sasaraq?

 3 Anciänu karqa alleqmi musyanki wakinkunata yachatsinanqa alläpa precisanqanta. * Jina musyankim congregacionkunachöqa carguyoq ollqukuna alläpa pishinqanta (leyi Isaïas 60:22 *). Bibliaqa ninmi anciänukuna wakinkunata yachatsiyänampaq (leyi 2 Timoteu 2:2). Peru itsa tsëta ruranëkipaq tiemputa rakinëkiqa sasaraq kanman. ¿Imanir? Familiëkita cuidanëki y trabajanëki kaptin y congregacionchö rurënikikunata cumplinëki kaptin. Tsënö kaptimpis, wakinkunata yachatsinëkipaq tiempïkita rakinëkipis alläpam precisan. Imanir precisanqanta rikärishun.

KANANMI YACHATSINËKI

4. ¿Imatataq itsa pensayanman wakin anciänukuna?

4 ¿Imanirtaq wakin anciänukunaqa tiemputa jorqayantsu wakinkunata yachatsiyänampaq? Itsa wakin rurëkuna mas precisaq kanqanta pensayan. O itsa wakinkunata mana yachatsiyaptimpis congregacionqa imëpis allilla këkänanta pensayan. Rasunmi, wakin rurëkunataqa rasmi atiendinantsik. Peru wakin wawqikunata kanan mana yachatsirqa, congregaciontam peligruman churëkankiman.

5, 6. (1) ¿Imataq pasakunman cärrupa aceitinta mana cambiayaptinqa? (2) ¿Imataq pasakunqa anciänukuna wakinkunata mana yachatsiyaptinqa?

5 Këman pensarishun. Juk cärru alli funcionanampaqqa, ¿gasolïnaku o aceitin cambiananku mas precisan? Itsa gasolïnan precisanqanta pensanki, tsëta mana winaptikiqa mana funcionanampaq kaqta musyar. Peru tsënö pensëqa manam allitsu. Porqui aceitinta mana cambiaptikiqa imë höra karpis cärruqa malograkärinqam. Y altsatsinëkipaqqa atska tiemputa y mëtsika qellëtam wananki. ¿Kë igualatsikïqa imatataq rikätsimantsik congregacionpaq?

6 ¿Imataq mas precisan? ¿Congregacion wananqanta atiendiku o wakinkunata yachatsïku? Wakin anciänukunaqa itsa pensayanman congregacion wananqankunata raslla atiendinan mas precisanqanta, porqui mana rurayaptinqa congregacion sufrinanta musyar. Jina Bibliapis mas precisaq cösaskunata puntaman churayänampaqmi nin (Filipensis 1:10, NM). ¿Peru imaraq pasakunqa anciänukuna alläpa ocupädu karnin wakin wawqikunata mana yachatsiyaptinqa? Imë höra karpis congregacionqa yanapakïninnaqmi quedarinqa.

7. Wakinkunata yachatseq anciänukunata, ¿imanötaq rikashwan?

7 Wakin wawqikunata yachatsitaqa precisaqpaq churë. Congregacion  imëpis allilla kananta munaq anciänukunaqa, wakinkunatam alleq yachatsiyan. Tsëta ruraqkunaqa alli anciänum y congregacionchö alli yanapakoqmi kayan (leyi 1 Pëdru 4:10 *). ¿Imanötaq congregacionqa mas yanapakïta chaskin anciänukuna wakinkunata yachatsiyaptin?

AMA TIEMPUTA PERDITSU

8. (1) ¿Imanirtaq anciänukuna wakin wawqikunata yachatsiyänan? (2) ¿Imatataq rurayänan yanapakïta wanayanqan sitiukunaman ëwashqa anciänukuna? (Rikäri “ Raslla rurë” neq recuadruta.)

8 ¿Imanirtaq anciänukuna wakin wawqikunata yachatsiyänan? Alli yachaq anciänu karpis humildim kayänan, y cuentachömi katsiyänan mas edäyarqa, kanannö rurëta manana puëdiyänampaq kaqta (Miquëas 6:8). Jina yarpäyänanmi ima problëmapapis pasarninqa congregacionta atiendita mana puëdiyänampaq kaqta (Eclesiastes 9:11, 12; Santiägu 4:13, 14). Jinamampis congregacionchö cristiänu mayinkunata kuyarninmi, wakin wawqikunata alleq yachatsiyänan (leyi Salmu 71:17, 18 *).

9. ¿Imëtaq mas wanashun alli yachatsishqa wawqikunata?

9 Congregacion mas sinchi kanampaq wakin wawqikunata yachatseq  anciänukunaqa alläpa kuyëpaqmi kayan. Tsënöpam congregacionqa Diosta mana jaqipa sirwir juknölla sientikun. Tsëmi kë ushanan junaqkunachöqa mas precisëkun. ¡Y jatun sufrimientu witsannäqa masran precisanqa! (Ezequiel 38:10-12; Miquëas 5:5, 6.) Tsëmi kuyashqa anciänukuna, wakin wawqikunata mana yachëkätsirqa, kanan yachatsir qallayë.

10. Wawqikunata yachatsiyänampaq tiempunkuna kanampaq, ¿imatataq anciänukuna rurayanman?

10 Musyayämi congregacionta atiendirnin alläpa ocupädu këkäyanqëkita. ¿Peru manatsuraq wakinkunata yachatsiyänëkipaq tiemputa jorqariyankiman? Tsëpaqqa itsa wakin rurënikikunata wallka tiempullana rurayankiman (Eclesiastes 3:1). Tsëta rurarqa, shamoq tiempuchöpis congregacion alli kanampaqmi yanapakïkäyanki.

SHONQUNMAN CHËTA PROCURË

11. (1) ¿Imatataq rikätsikun wakinkunata yanapayanqampita atska nacionpita anciänukuna willakuyanqan? (2) Proverbius 15:22 textu ninqannö, ¿imanirtaq wakinkuna niyanqanta ruranantsik precisan?

11 Atska nacionchö anciänukunam wawqikunata yanapayanqanchö alli yarqapakuyashqa. Tsëllaraqmi wakinkunata tapuyarqan imanö rurayanqanta. * Llapanmi tsëtanölla willakuyarqan. Këqa rikätsikun mëchö këkarpis wakinkunata yachatsiyänampaqqa Bibliapa consëjunkuna alläpa yanapakunqantam (1 Corintius 4:17). Proverbius 15:22 textum nin, wakinkunata mana tapukushpa imatapis rurashqaqa mana alli yarqunqanta. Tsëmi kë yachatsikïchö y qateqnin kaqchö rikäshun, wakinkunata imanö yanapayanqanta anciänukuna willakuyanqampita. Jina rikäshunmi, këchö yanapakï ninqannö juk anciänu wakinkunata imanö yanapanampaq kaqta.

12. ¿Imatataq juk anciänu puntata ruranan y imanir?

12 Juk wawqita yachatsinampaqqa, juk anciänuqa shonqunmanmi chëta procuranan. ¿Imanir? Tantiyarishun, juk murukoqqa manaraq mururninmi, puntataqa chakrataraq alleq alistan, tsëraqmi murukïnin shumaq winamunqa. Jina tsënöllam, juk anciänupis wakinkunata yachatsinampaqqa puntataqa shonqunmanraq chänan. ¿Imanötaq tsëta ruranman? Tsëpaqqa profëta Samuel ruranqantam qatinan.

13-15. (1) ¿Imata ruranampaqtaq Samuelta Jehovä nirqan? (2) ¿Imanötaq Samuelqa Saulpa shonqunman chëta procurarqan? (Rikäri kë yachatsikïpa qallananchö këkaq dibüjuta) (3) ¿Imanirtaq anciänukunaqa Samuel ruranqampita yachakuyanman?

13 Jehovämi Samuelta kënö nirqan: “Warë kënö höram Benjamin markapita juk nunata qam kaqman kachamushaq, y Israelpa mandaqnin kanampaqmi akranëki” (1 Samuel 9:15, 16). Samuelqa entiendirqanmi, Israelpa pushaqnin manana kanampaq kaqta y juktana Jehovä akrashqa kanqanta. Tsëmi Saulta imanö yachatsinampaq kaqman pensar qallëkurqan.

14 Waräninnam Samuelqa Saulta  reqirirqan. Y Jehovämi kënö nirqan: “Këmi tsë nuna”. Tsënam Samuelqa Saulwan parlanampaq pensanqanta rurar qallëkurqan. Mikoqmi invitarirqan y mësachö mas precisaq kaq sitiumanmi jamatsirqan y ëtsatapis mas jatuntam sirwitsirqan. Y tsëpitanam wayinman invitarqan y parlakurmi kushishqa ëwayarqan. Y chärirnam, wayi jananman ëwayarqan y tsëchömi punukuyanqan hörayaq parlakuyarqan. Y waräninnam, Jehovä akranqanta rikätsirnin aceitita peqanman jicharnin rey kanampaq Saulta akrarirqan y maskunatam yachatsirqan. Tsënam Saulqa imanö ruranampaq kaqta yachëkarna ëwakurqan (1 Samuel 9:17-27; 10:1).

15 Samuelqa Saulta akrarqan juk nacionpa mandaqnin kanampaqmi. Samuel Saulta akranqan, wakin wawqikunata anciänu o siervu ministerial kayänampaq yachatsiwan mana igualaptimpis, anciänukunaqa yachakïta puëdiyanmi Saulpa shonqunman Samuel imanö chanqampita. Ishkëllata rikärishun.

ISHKË PRECISAQ RURË

16. (1) ¿Imanötaq Samuel sientikurqan israelïtakuna juk reyta mañakuyaptin? (2) ¿Imatataq Samuel rurarqan Saulta akranampaq Jehovä niptin?

16 Wakinkunata kushishqa yachatsinëkipaq listu kë. Israelïtakuna juk reyta munayanqanta musyarirqa, Samuelqa despreciashqa sientikurmi llakikurqan (1 Samuel 8:4-8). Manam munarqantsu reyninkuna qoyta. Tsëmi kima kutipa Jehovä nirqan israelïtakunata wiyanampaq (1 Samuel 8:7, 9, 22). Tsënö kaptimpis, Samuelqa manam chikirqantsu pëpa rantin yëkoq nunata. ‘Israelpa mandaqnin kanampaq’ Saulta akrë nir Jehovä mandaptinqa kushishqam akrarirqan. Jehoväta kuyarmi shonqupita patsë rurarqan.

Ocupädu këkarpis, tiemputa jorqë wawqikunawan juntu kanëkipaq

17. (1) ¿Imanötaq atska yachaq anciänukuna Samuel ruranqanta qatiyan? (2) ¿Imanötaq kë anciänukuna sientikuyan?

17 Kanan witsampis Samuel ruranqanta qatirmi, atska yachaq anciänukuna wakin wawqikunata kuyakïwan yachatsiyan (1 Pëdru 5:2). Alli karmi,  congregacionchö imëka rurëkunaman churayan. Kë wawqikunataqa alli yanapakoqkunatanömi rikäyan (2 Corintius 1:24; Hebrëus 13:16). Y yachëninkunawan congregacionchö yanapakoqta rikarmi kushikuyan (Hëchus 20:35).

18, 19. (1) ¿Imanötaq juk anciänu juk wawqipa shonqunman chëta procuranman manaraq yachatsirnin? (2) ¿Imanirtaq tsëta ruranan precisan?

18 Ama yachatseqninllaqa këtsu, sinöqa amïgun kë. Samuelqa, reqirinqan höram peqanman aceitita jichar Saulta rey kanampaq akrarinman karqan. Tsëqa, rey tikrarinman karqan imatapis mana yachëkarninmi. Tsëmi Samuelqa shonqunman chänampaqraq puntataqa yarpachakurqan. Manaraq akrarmi, juntu mikuyarqan, parlakuyarqan, hasta wayinchö quedatsirqan. Y Saul listu këkanqanta rikar-raqmi, rey kanampaq akrarqan.

Juk wawqita manaraq yachatsirnin, amïgun këta procurë(Rikäri 18 y 19 kaq pärrafukunata)

19 Qampis tsënömi ruranëki. Juk wawqita manaraq yachatsirnin amïgun tikrë. Tsënöpam alli sientikunqa. Tsëqa kanqa, imë hörata akranqëkipita y markëkichö costumbripitam. Ocupädu këkarpis, tiemputa jorqë wawqikunawan juntu kanëkipaq. Tsënö rurarmi rikätsinki qampaq pëkuna alläpa precisanqanta (leyi Romänus 12:10). Precisaqpaq churanqëkita y kuyakïwan ruranqëkipitaqa alläpam agradecikuyanqa.

20, 21. (1) ¿Imatataq juk alli anciänuqa ruran? (2) ¿Imatataq qateqnin kaqchö yachakushun?

20 Juk alli anciänuqa manam yachatsinllatsu, sinöqa yachatsinqan wawqikunatam kuyan (igualaratsi Juan 5:20 textutawan). ¿Imanirtaq precisan? Porqui qampaq alläpa precisayanqanta musyarqa, listum këkäyanqa yachakuyänampaq (Proverbius 17:17; Juan 15:15).

21 Wawqipa shonqunman chärirqa, anciänuqa yachatsirmi qallëkunan. ¿Imanötaq yachatsinman? Qateqnin kaq yachatsikïchömi imanö ruranampaq kaqta rikärishun.

^ par. 3 Kë yachatsikï y qateqnin kaqpis anciänukunapaqmi parlanqa. Peru llapantsikmi kë yachatsikïkunataqa precisaqpaq churanantsik. Porqui wawqikunam cuentata qokuyanqa congregacionchö mas yanapakuyänan alläpa precisanqanta. Tsëpaqqa anciänukunam yachatsiyänan. Congregacionqa mas allim kanqa mas ollqukuna imëkatapis rurëta yachayaptin.

^ par. 3 Isaïas 60:22: “Wallka kaqmi waranqa këman chanqa, y ichikllan kaqmi alläpa puëdeq nacionman tikranqa. Kikï Jehovämi tiempunchö raslla rurarishaq”.

^ par. 7 1 Pëdru 4:10 (MTCS): “Tayta Diosga llapayquitapis gracianta goyäshurguyqui jucniqui jucniquipis yanapanacur paypa munayninchö cawayänayquipämi. Tsaynö caycaptinga Tayta Dios alli cayninwan yanapayäshungayquinölla gamcunapis yanapanacuyay”.

^ par. 8 Salmu 71:17, 18: “Teyta Dios, jövin kanqäpita patsëmi yachatsimarqunki, y kanankamayaqmi imëka ruranqëkipita musyatsikïkä. Edäyënïchö y soquyënïchöpis, Diosllä, ama jaqirallämëtsu, makikiwan ruranqëkikunapita kastäkunata willanqäyaq; llapan shamoqpaq kaqkunata kallpëkipita willanqäyaq”.

^ par. 11 Kë anciänukunaqa täräyan Australiachö, Bangladeshchö, Belgicachö, Brasilchö, Corëachö, Estädus Unïduschö, Franciachö, Guayana Francesachö, Japonchö, Mëxicuchö, Namibiachö, Nigeriachö, Reunionchö, Rusiachö y Sudafricachömi.