Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2015

¿Imatataq yachakuntsik qellëpaq willakïpita?

¿Imatataq yachakuntsik qellëpaq willakïpita?

‘Jucnin caq sirweqnintam qorqan pitsqa waranqata, jucnin caqtanam ishque waranqata y juc caqtanam juc waranqallata.’ (MATEU 25:15)

1, 2. ¿Imanirtaq Jesus parlarqan qellëpaq willakïpita?

CIËLUPAQ akrashqakunapita imata shuyaranqanta rikätsita munarmi, Jesusqa qellëpaq willakïta parlarqan. Peru ciëlupaq o Patsapaq kashqapis kë willakïqa llapantsiktam yanapamantsik, tsëmi precisan alleq entiendinantsik.

2 ¿Imapaq parlanqanchötaq Jesus discïpulunkunata qellëpaq willarqan? Rey këman chanqan witsampaq y ushanan junaqkuna imë qallanampaq kaqta parlanqanchömi (Mateu 24:3, NM). Tsëmi musyantsik qellëpaq willakunqampis ushanan junaqkunachö cumplikänampaq kaqta.

3. ¿Imatataq yachakuntsik Mateu librupa 24 y 25 capïtulunchö willakïkunapita?

3 Mateu librupa 24:45 hasta 25:46 textuchö ushanan junaqkunapaq parlarmi, Jesusqa chusku willakïwan pëkunapita imata shuyaranqanta ciëlupaq akrashqakunata rikätsirqan. Punta kaq willakïqa, llapanchö wiyakoq y  yachëwan sirweqpitam karqan. Tsëtaqa Jesus parlarqan, Jehoväta mana jaqipa sirwiyänan y yachëwan rurayänan precisanqanta rikätsinampaqmi. * Ishkë kaq, willakïnam chunka shipashkunapita karqan, tsëwannam rikätsita munarqan, illaqpita pë shamunan hörapaq mäkoq mäkoqlla y listu këkäyänan precisanqanta. * Kima kaqnam qellëpita willakï karqan. Tsëwannam Jesusqa rikätsikurqan, pë mandanqanta cumpliyänampaqqa, alleq sinchikuyänan y alleq trabajayänan precisanqanta. Y chusku kaqnam, üshakunapita y cabrakunapita karqan. Kë willakïwannam rikätsikïkarqan, Patsachö kawëta shuyaraqkunaqa, Jehoväta mana jaqipa sirwiyänan y ciëlupaq akrashqakunata yanapayänan precisanqanta. * Kë yachatsikïchöqa yachakushun qellëpaq willakïpitam.

JUK NUNAM SIRWEQNINKUNATA MËTSIKA QELLËTA JAQIPUN

4, 5. (1) ¿Willakïchö nunaqa pitataq rikätsikun? (2) ¿Ëkataq juk talentu qellëqa karqan? (Päginapa ura kuchunchö willakïta rikäri.)

4 (Leyi Mateu 25:14-30.) Qellëpaq willakïchöqa Jesus parlarqan viäjipa ëwakoq juk nunapaqmi. Juk kutichönam tsë niraqllata parlar, rey kanampaq viajaq nunapaq nirqan (Lücas 19:12). * Mëtsika watakunapam publicacionnintsikkunaqa yachatsikamushqa, kë ishkan willakïchö nunaqa Jesusta rikätsikunqanta y 33 watachö ciëluta ëwakunqanta. Peru Jesusqa manam tsë watachötsu rey tikrarirqan. Sinöqa 1914 watayaqraqmi shuyaränan karqan, “Diosnintsic llapan chiqueqnincaqcunata muneninman churanqanyaq” (Hebrëus 10:12, 13).

5 Manaraq ëwakurmi nunaqa sirweqninkunata puwaq waranqa qellëkunata jaqipun. Tsëqa mëtsika qellëmi karqan. * Tsë qellëwan trabajarnin masta miratsipuyänampaqmi nirqan. Tsë nunapaqqa tsë qellëkunaqa alläpa precisaqmi karqan. Jina tsënöllam Jesuspaqpis, Patsachö këkar ruranqankuna alläpa precisarqan.

“Chacracunacho miquicuna elluyänequipaq poqurishqa cuentam nunacuna quecayan”

6, 7. ¿Imatataq rikätsikun mëtsika qellëqa?

6 Jesuspaqqa alläpam precisarqan Diospita yachatsikï, tsënöpam mëtsikaqta yanaparqan discïpulun kayänampaq  (leyi Lücas 4:43). Peru musyarqanmi mas yachatsikuyänan precisanqanta, tsëmi discïpulunkunata, “chacracunacho miquicuna elluyänequipaq poqurishqa cuentam nunacuna quecayan” nirqan (Juan 4:35-38). Jesusqa yachatsikïtam igualëkätsirqan cosëchatawan. Alli murukoq nunanömi, cosëchanta ëlluyänanta munarqan, tsëmi ciëluta manaraq ëwakurnin discïpulunkunata yachatsikuyänampaq mandarqan (2 Corintius 4:7). “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq” nirqanmi (Mateu 28:18-20).

7 Sirweqninkunata qellëta jaqipoq nunanömi, Jesuspis ciëlupaq akrashqakunata juk trabäjuta jaqipurqan: yachatsikïta (Mateu 25:14). Tsëmi mëtsika qellëqa rikätsikun, yachatsikïwan discïpulu rurë carguqa alläpa precisanqanta.

8. Sirweqkuna qellëta mana igual chaskikäyaptimpis, ¿imatataq qellëyoq nunaqa shuyararqan?

8 Willakïchö nunaqa qellëta jaqipun juk kaq sirweqnintam pitsqa waranqata, juk kaqtanam ishkë waranqata y juknin kaqtanam juk waranqata (Mateu 25:15). Rikanqantsiknömi igualtsu jaqipun, peru tsëwan llapan puëdiyanqanmannö pëpaq ganayänantam  shuyaran. Jina tsënöllam Jesuspis, ciëlupaq akrashqakuna yachatsikïchö llapan puëdiyanqanmannö trabajayänanta shuyaran (Mateu 22:37; Colosensis 3:23). 33 wata Pentecostes fiestachömi, discïpulukunaqa më tsë nacion nunakunata yachatsir qallayarqan. Hëchus libruqa willakun yachatsikïchö alli trabajayanqantam (Hëchus 6:7; 12:24; 19:20). *

SIRWEQKUNAM CHASKIYANQAN QELLËTA UTILISÄYAN

9. (1) ¿Imatataq rurayarqan ishkan alli kaq sirweqkuna? (2) ¿Imatataq këqa rikätsikun? (3) ¿Imatataq Patsachö kawëta shuyaraqkuna rurayanman?

9 Masta ganaq sirweqkunaqa rikätsikuyan, Jehoväta mana jaqeq kanan witsan ciëlupaq akrashqakunatam. Pëkunaqa allipam yachatsikïkäyashqa y masran 1919 watapitanäqa. Jesus willakunqanchö ishkan sirweqkuna qellëta igual mana chaskiyanqanqa, manam ciëlupaq akrashqakuna ishkë grüpu kanqantatsu rikätsikun. Ishkampis patronnintaqa mas qellëtam kutitsiyarqan, këqa rikätsikun alleq trabajashqa kayanqantam. ¿Peru ciëlupaq akrashqakunallaku yachatsikïchö alleq trabajayänan? Manam. Üshakunapaq y cabrakunapaq willakïmi rikätsimantsik, Patsachö kawëta shuyaraqkunapis, ciëlupaq kaqkunata yachatsikïchö alleq yanapayänan precisanqanta. Rasumpa kaqchöqa, ciëlupaq kaq y Patsapaq kaqkunapis ‘juc canchallam cayan’ y juntum yachatsikïchö y discïpulu rurëchö trabajayan (Juan 10:16).

10. Ushanan junaqkunapaq Jesus parlanqanchöqa, ¿imataq mas precisan?

10 Jesusqa shuyaran, discïpulu rurëchö qateqninkuna alleq trabajayänantam.  Apostolkuna kawayanqan witsanchö cristiänukunapis tsëtam rurayarqan. Peru ¿ushanan junaqkunachö cristiänukunaqa alleqku trabajëkäyan? Awmi. Tsënöpam waranqëpayan nunakuna cada wata bautisakuyan y pëkunapis yachatsikïkäyanllam. Kanannöqa manam ni imëpis yachatsikï kashqatsu. ¡Jesusqa alläpa kushishqachi këkan! Kë llapanmi rikätsikun, ushanan junaqkunapaq Jesus parlanqanchöqa, yachatsikï mas precisanqanta.

Jesusqa sirweqninkunatam yachatsikuyänampaq precisaq cargunkuna qoshqa (Rikäri 10 kaq pärrafuta)

QELLËYOQ NUNAM SHAMUN

11. ¿Imanötaq musyantsik jatun sufrimientu witsanchö Jesus shamunampaq kaqta?

11 Jesusmi nirqan: “Tsepita unetanam patronnincunaqa cutirir, sirweqnincunata qayecatsir, cuentata mañar qallecorqan” (Mateu 25:19, noqakunam yanayätsiyarqö). ¿Imëtaq patron o Jesus shamun? Jatun sufrimientupa ushanan witsanmi. ¿Imanötaq musyantsik? Mateu librupa 24 y 25 capïtulunchömi Jesus atska kuti parlarqan shamunampaq kaqta. Kënömi nirqan: “Nunapa Tsurintam rikäyanqa ciëlupita pukutëchö alläpa puëdeq këninwan atsikyar-raq shamïkaqta”. Këqa cumplikanqa jatun sufrimientu witsanchö nunakunata juzgaq Jesus shamuptinmi. Jina mäkoq mäkoqlla këkäyänampaqmi cristiänukunata kënö consejarqan: “Manam musyayankitsu imë junaq Señornikikuna shamunanta”. Jina nirqanmi: “Mana pensayanqëki höram nunapa Tsurin shamunqa” (Mateu 24:30, 42, 44, NM). Jina tsënöllam qellëwan igualatsikïchöpis, nunakuna juzgaq y Satanaspa mundun ushakätseq shamunan witsampaq parlëkarqan. *

12, 13. (1) ¿Imanirqantaq patron ishkan sirweqninkunata? (2) ¿Imanirtaq tsënö nirqan? (3) ¿Imëraq ciëlupaq kaqkuna chipyëpa aprobashqa kayanqa? (Rikäri “ Wanuyanqan höram aprobashqa kayan” neq recuadruta.) (4) Ciëlupaq akrashqakunata yachatsikïchö yanapaqkunataqa, ¿imanöraq Jesus bendicinqa?

12 Jesuspa willakïninchöqa, patron chärirmi ishkan sirweqninkunata kënö nin: “¡Qamqa alli sirwimaqnïmi canqui, y llapan nenqaqtam cumplerqonqui! Tsemi wallcallachopis onradu  nuna canqequirecur, mas jatun carguiqui qoshqequi” (Mateu 25:21, 23). Tsënöqa nirqan, juk kaq sirweq pitsqa waranqa masta y juk kaqna ishkë waranqa masta ganayashqa kaptinmi. Jesus shamurnin, ¿imata ruranampaq kaqtataq këqa rikätsikun?

13 Jatun sufrimientu qallanampaqna këkaptinmi, Jehoväqa kë Patsachö këkaq akrashqakunata ciëluta ëwayänampaq chipyëpa segurarinqa o aprobarinqa (Apocalipsis 7:1-3). Tsënam Jesusqa Armagedon manaraq qallaptin, allita rurayanqanrëkur ciëlupa apakunqa. Peru ¿imaraq pasakunqa yachatsikïchö yanapakoq Patsachö kawëta shuyaraq kaqkunawanqa? Jesusmi juzgar decidinqa pëkuna üshanö kayänanta y Diospa Gobiernun mandakuptinmi Shumaq Patsachö kawayänanta permitinqa (Mateu 25:34).

MANA ALLI Y QELA SIRWEQ

14, 15. ¿Imanötaq musyantsik ciëlupaq akrashqakunapita mëtsikaq mana alli y qela mana tikrakuriyänampaq kaqta?

14 Jina Jesusqa parlarqanmi juk sirweq chaskinqan qellëta pampëkunqampaq. Qela karmi trabajatsirqantsu ni bancullamampis apëkurqantsu. Tsëmi patronnin chärirqa mana alli y qela sirweq nirnin, katsinqan qellëta qochirirnin pitsqa waranqata chaskishqa kaqta qorirqan. Nïkurnam tsë qelata “paqascho cananpaq” waqtapa qarquratsirqan. Tsëchömi alläpa waqarnin quedakurqan (Mateu 25:24-30; Lücas 19:22, 23).

15 Tsëwanqa, ¿cada kima ciëlupaq akrashqakunapita juk mana alli kanampaq kaqtaku Jesusqa nikarqan?  Manam. Tantiyarinapaq, llapanchö wiyakoq y yachëwan sirweqpaq willakunqanchö, juk mana alli sirweq wakinkunata chikinqanta nirqa, manam ciëlupaq akrashqakuna mana alli tikrakuriyänampaq kaqtatsu nikarqan. Sinöqa, mana alliman tikrakuripita cuidakuyänampaqmi consejëkarqan. Jesusqa jina tsënöllam nirqan chunka shipashkunapaq willakïchöpis. Pitsqa kaq shipashkuna dejäda kayanqanta nirqa, manam ciëlupaq akrashqakunapita pullan kaq dejäda kayänampaq kaqtatsu nikarqan. Sinöqa mäkoq mäkoqlla y listu këkäyänampaqmi consejëkarqan. * Tsënöllam qellëpaq willakïchöpis consejakïkarqan. Jesusqa manam kë ushanan junaqkunachö ciëlupaq akrashqakunapita mana alli tikrakuriyänampaq kaqtatsu nikarqan, sinöqa mana alli sirweqman mana tikrakuriyänampaqmi consejëkarqan (Mateu 25:16).

Jesusqa, llapan puëdiyanqanmannö yachatsikoqkunatam qarëninkuna qonqa

16. (1) ¿Imatataq qellëpaq willakïpita yachakuntsik? (2) Kananqa, ¿imanötaq kë willakïta entienditsikunkiman? (Rikäri, “ ¿Imatataq yachatsikun qellëpaq willakï?” neq recuadruta.)

16 ¿Imatataq qellëpaq willakïpita yachakuntsik? Ishkë cösastam. Puntataqa, Jesusmi ciëlupaq akrashqakunata juk precisaq trabäjuta jaqipurqan; yachatsikïta y discïpulu rurëta. Ishkë kaqchönam, Jesusqa shuyaran yachatsikïchö llapantsik alli trabajanata. Llapan puëdinqantsikmannö yachatsikushqa y llapan mandamanqantsikta rurashqaqa, qarënintsikmi Jesusqa qomäshun (Mateu 25:21, 23, 34).

^ par. 3 Llapanchö wiyakoq y yachëwan sirweq pï kanqanta musyanëkipaqqa rikäri, 2013 wata 15 de juliu Täpakoq revistapa 21 y 22 kaq päginankunachö 8-10 kaq pärrafunkunata.

^ par. 3 Shipashkuna pikuna kanqanta musyanëkipaqqa rikäri kë revistachö “¿Mäkoq mäkoqllatsuraq këkanki?” neq yachatsikïta.

^ par. 3 Üshakunapaq y cabrakunapaq maslla entiendinëkipaqqa rikäri, kë revistachö “Cristupa wawqinkunata yanapashun” neq yachatsikïta, jina 1995 wata 15 de octubri La Atalaya revistapa 23-28 päginankunatapis.

^ par. 5 Tsë qellëpaqqa, wakin Bibliakunaqa talentukuna ninmi. Jesuspa tiempunchöqa, 20 watachö trabajar-ran juk talentutaqa ganayaq.

^ par. 8 Apostolkuna wanuriyaptinmi, atskaq nunakuna congregacionchö mana alli yachatsikïta yachatsikur qallëkuyarqan. Atska pachak watakunapam rasumpa kaqta yachatsikoqkuna ichiklla kayarqan. Peru Jesusqa, ushanan junaqkunachö rasumpa yachatsikoqkuna mëtsika kayänampaq kaqtam willakurqan (Mateu 13:24-30; 13:36-43, NM). 2013 wata 15 de juliu Täpakoq revistapa 9-12 kaq päginankunam këpita maslla yachatsikun.

^ par. 11 Rikäri 2013 wata 15 juliu Täpakoq revistachö 7 y 8 päginakunapa 14-18 pärrafunkunata.

^ par. 15 Kë revistachö rikäri “¿Mäkoq mäkoqllatsuraq këkanki?” neq yachatsikïpa 13 kaq pärrafunta.