Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2015

¿Mäkoq mäkoqllatsuraq këkanki?

¿Mäkoq mäkoqllatsuraq këkanki?

“¡Mäcoq mäcoq quecayë, porqui manam musyayanquitsu imë öra cutimunäpaq caqta!” (MATEU 25:13)

1, 2. (1) ¿Kë ushanan junaqkunachö ima pasakunampaq kaqtataq Jesus willakurqan? (2) ¿Imatataq kë yachatsikïchö yachakushun?

JESUSQA Olïvus jirkachömi Pëdruwan, Juanwan, Andreswan y Santiäguwan tëkäyarqan. Tsëchömi kë mana alli mundupa ushanan witsanchö Diospa Gobiernun mandakur qallaptin, imakuna pasakunampaq kaqta juk shumaq willakïwan entienditsirqan. Nirqanmi, “llapanchö wiyakoq y yachëwan sirweq” pëpa jutinchö kë Patsachö cristiänukunata höranchö Diospita yachatsir këkänampaq kaqta (Mateu 24:45-47, NM).

2 Tsëpitanam Jesusqa, chunka shipashkunapita willarqan (leyi Mateu 25:1-13). Kë willakïpitam kë yachatsikïchö kima tapukïkunawan yachakurishun: 1) ¿Imatataq Jesus yachatsita munarqan kë willakïwan? 2) ¿Imanötaq  ciëlupaq akrashqakuna kë yachatsikïta wiyakuyashqa y imanötaq yanapan? 3) ¿Imanötaq kë willakï kanan witsan llapantsikta yanapamantsik?

¿IMATATAQ JESUS YACHATSITA MUNËKARQAN?

3. (1) ¿Puntataqa imanötaq publicacionnintsikkuna chunka shipashkunapita yachatsikamoq? (2) ¿Imatataq tsënö yachatsikunqanchö rikätsikamoqllatsu?

3 Pasaq yachatsikïchömi rikarqantsik, llapanchö wiyakoq y yachëwan sirweqqa, Biblia willakunqankuna imachö yanapamänapaq kaqta mas yachatsimanqantsikta. Puntataqa, masqa parlaq cada willakï ima kanqanta o imata rikätsikunqantam. Peru kananqa, cada willakï imata yachatsimanqantsikpitam masqa parlan. Tantiyarinapaq, chunka shipashkunapaq willäkïta yarpärishun. Puntataqa publicacionnintsikkuna, masqa willakoq chiwchi, aceiti y botëllakuna imakunata rikätsikunqantam. Tsëkunapita mas parlanqanchömi, mas precisaq yachatsikïkunataqa alläpaqa rikätsikamoqllatsu. Tsëmi kë yachatsikïchöqa masqa parlashun, imata yachatsimanqantsikta.

Shipashkunaqa chiwchinkunata tsaritsishqam listu këkäyänan karqan noviu chämunan hörapaq

4. (1) ¿Pitaq noviuqa y imanötaq musyantsik? (2) ¿Pikunataq kayan shipashkuna y imanötaq musyantsik?

4 Jesus imata yachatsikïta munanqanta musyanapaqqa, puntataqa musyëta munantsik tsë willakïchö pikunapaq parlanqantam. ¿Pitaq noviuqa? Jesusmi. ¿Imanötaq musyantsik? Juk kutichömi, kikin igualatsikurqan juk noviutawan (Lücas 5:34, 35). ¿Y pikunataq shipashkunaqa kayan? Ciëlupaq akrashqakunam. ¿Imanötaq musyantsik? Porqui juk kutichömi, Jesusqa nirqan ciëlupaq akrashqakunaqa, patronnin juk casakïpita kutimunanta chiwchinkunawan shuyarëkaq sirweqkunanö kayanqanta (Lücas 12:32, 35, 36). Tsëmi yarpätsimantsik, kë willakïchö shipashkuna rurayänampaq kaqta. Pëkunaqa chiwchinkunata tsaritsishqam listu këkäyänan karqan noviu chämunan hörapaq. Jina apostol Pabluwan Juanpis, ciëlupaq akrashqakunataqa, igualatsiyarqan doncëlla shipashkunatawanmi (2 Corintius 11:2; Apocalipsis 14:4). Kë llapanmi rikätsimantsik, kë chunka shipashkunapaq willakïwanqa, ciëlupaq akrashqakunata yachatsita munëkanqanta.

5. (1) ¿Imëtaq cumplikan chunka shipashkunapaq willakï? (2) ¿Imanötaq musyantsik?

5 ¿Imëtaq cumplikan chunka shipashkunapaq willakï? Ushanan junaqkunachömi. ¿Imanötaq musyantsik? Porqui willakïpa ushananchömi Jesus nirqan noviu ‘chärinqanta’ (Mateu  25:10). 2013 wata 15 de juliu Täpakoq revistam yachatsikurqan Mateu 24, 25 capïtulunchö profecïapita, y puwaq kutipam chämun o shamun nirqan Jesuspaq. Jina rikarqantsikmi, jatun sufrimientupa ushananchö chämurnin, kë mana alli munduta juzganampaq y ushakätsinampaq kaqta. Tsënöpam entiendintsik shipashkunapaq willakïqa, kë ushanan junaqkunachö cumplinqanta, peru Jesusqa jatun sufrimientu witsanmi shamunqa.

6. ¿Imatataq Jesus yachatsita munëkarqan kë willakïwan?

6 ¿Imatataq Jesus discïpulunkunata yachatsita munëkarqan? Musyanapaqqa, puntanchö y qepanchö kaq willakïkunata rikärishun. Mateupa 24 kaq capïtulunchömi Jesus parlarqan, ‘llapanchö wiyakoq y yachëwan sirweqpaq’. Pëkunatam cläru willarqan, Jehoväta imëpis mana jaqiyänampaq. Jina tsënöllam, chunka shipashkunapaq willakïwampis, kë ushanan junaqkunachö ciëlupaq llapan akrashqakunatana, Jesusqa cläru willëta munëkarqan, ciëlu ëwëta mana perdiyänanrëkur mäkoq mäkoqlla këkäyänampaq (Mateu 25:13). ¿Imanötaq kë akrashqakuna kë yachatsikïta wiyakuyashqa? Rikärishun.

¿IMANÖTAQ CIËLUPAQ AKRASHQAKUNA KË YACHATSIKÏTA WIYAKUYASHQA?

7, 8. (1) ¿Imanirtaq previnïda shipashkunaqa listu këkäyarqan? (2) ¿Imanötaq ciëlupaq akrashqakuna alistakuyashqa?

7 Jesusqa nirqan pitsqa kaq shipashkunaqa “dejada” kayanqantam. Tsënöqa nirqan noviu chämuptin mana listu këkäyanqampitam. Jina nirqanmi, pitsqa kaqkunaqa “prebinida” kayanqanta, porqui alistakushqam kayarqan y mäkoq mäkoqllam këkäyarqan. Llapankunam mäkoqlla këkäyänan karqan y chiwchinkunatapis tsarirëkaqllatam katsiyänan karqan. Previnïda shipashkunaqa mastam aceitinkuna apayarqan, peru dejäda kaqkunaqa manam. Y ¿imanötaq ciëlupaq akrashqakunaqa Jesus chämunampaq alistakuyashqa?

8 Ciëlupaq akrashqakunaqa, Jehovä mandanqanta ushananyaq rurayänampaqmi alistakuyashqa. ¿Imanö? Jehoväta sirwiyänanrëkurmi imëkankunata jaqiyashqa; Jehoväta y Jesusta kuyarmi, ushakë raslla mana chämuptimpis, Jehoväta mana jaqiyänampaq churakäyashqa; manam kë munduchö nunakunanötsu mana allita rurayan ni imëkayoq këta ashiyan. Ciëlupaq akrashqakunaqa previnïda shipashkunanömi, chiwchinkunata tsarirëkaqta katsiyan. Pëkunaqa listum këkäyan y tardiyämoqnö  kaptimpis pacienciawanmi noviuta shuyarëkäyan (Filipensis 2:15).

Jesusqa ciëlupaq akrashqakunatam consejëkarqan mäkoq mäkoqlla këkäyänampaq

9. (1) ¿Imatataq kanan witsan ciëlupaq akrashqakunata Jesus consejashqa? (2) ¿Imanötaq ‘noviuqa sharëkämunam’ neq willakïta ciëlupaq akrashqakuna contestayashqa? (Jina päginapa ura kuchunchö willakïtapis rikäri)

9 Jina previnïda shipashkunaqa listu këkäyarqan mäkoq mäkoqlla kashqa karninmi. Tsëpenqa, ¿imanirtaq Jesusqa nirqan noviu tardiyämuptin llapan shipashkuna punukäriyanqanta? Tsëtaqa nirqan, kanan witsan ciëlupaq akrashqakuna, mäkoq mäkoqlla këta munëkarpis, alleq mana cuidakurqa punukärita puëdiyänampaq kaqtam. Tsëmi alleq cuidakuyänampaq decidiyashqa. ¿Imanötaq rurayashqa? Shipashkunapaq willakïchöqa Jesus nirqan, ‘nobiuqa sharëcämunnam’ nir juk willakoq ninqantam. Llapankunam tsë willakïta wiyayarqan, peru previnïda kaqkunallam listuqa këkäyarqan (Mateu 25:5, 6; 26:41). Tsënö kaqllam ciëlupaq akrashqakunapis, ‘noviuqa sharëkamunnam’ neq willakïta ushanan junaqkunachö cäsukuyashqa. ¿Imanö? Clärum rikäyashqa, Jesus chämunampaqna kaqta pruëbakuna rikätsikunqanta y listum këkäyan. * Kananqa kë willakïpa ushananchö ima pasakunqampita parlarishun.

PREVINÏDAKUNAQA BENDICISHQAM KAYAN Y DEJÄDAKUNAQA CASTÏGUTAM CHASKIYAN

10. ¿Imatataq tapukushwan dejäda shipashkuna previnïda shipashkunata aceitita mañakuyanqampita?

10 Manaraq noviu chaptinmi, dejäda shipashkunaqa, previnïda kaqkunata aceitita rakipuyänampaq mañakuyan, peru pëkunaqa manam munayantsu (leyi Mateu 25:8, 9). Kë pasakunqanqa itsa rikätsikun, jatun sufrimientu ushanan witsanchö Jesus shamunampaqna këkaptin ima karpis pasakunampaq kaqta. Tsëqa, “¿Jehoväwan alli këkaq akrashqakuna pitapis mana yanapayänampaq kaqtaku rikätsikun?” nir itsa tapukushwan. Tsëta contestanapaqqa yarpänantsikmi, manaraq jatun sufrimientu ushaptin, ciëluta ëwayänampaq akrashqakuna chipyëpa segurakashqana kayanqanta.

11. (1) ¿Imaraq pasakunqa jatun sufrimientu qallanampaqna këkaptin? (2) ¿Ima nitataq munëkäyarqan previnïda shipashkuna, dejäda shipashkunata ëwar aceitita rantiyë nirninqa?

11 Jatun sufrimientu qallanampaqna këkaptinmi, kë Patsallachöraq këkaq ciëlupaq kaqkunapaqa, akrashqa këninkuna chipyëpa segurakärinqa (Apocalipsis 7:1-4). Ciëluta ëwayänampaqqa segürunam kanqa. Peru jatun sufrimientu manaraq qallaptin Jehoväta jaqishqa kaqkunapaqa, akrashqa këninkuna manam segurakanqatsu. Jatun sufrimientu qallariptin mana alli religionkuna ushakaqta rikarqa mantsakäyanqam. Itsa tsë höra cuentata qokuriyanqa Jesus  chämunampaq listu mana këkäyanqanta. Y ¿imaraq pasakunqa tsë höraraq yanapayänanta mañakuyaptin? Chunka shipashkunapaq willakïta yarpärishun. Dejäda kaqkuna aceitita mañakuyaptinmi, previnïda kaqkunaqa munayantsu y ranteq ëwayë niyanmi. Y pullan paqasna kaptinmi ranteq ëwarnimpis tariyantsu. Juk parlakïchöqa, manam ima rurëtapis puëdiyankinatsu nikäyarqanmi.

12. (1) Jatun sufrimientu witsanchö, ¿imaraq pasanqa Jehoväta jaqishqa kaq ciëlupaq akrashqakunata? (2) ¿Imataraq Jesus ruranqa dejäda shipashkunanö kaqkunawan?

12 Jatun sufrimientu witsanqa, Jehoväwan alli këkaq ciëlupaq akrashqakunaqa, manam yanapëta puëdiyanqanatsu Jehoväta jaqishqa kaq ciëlupaq akrashqakunata. ¡Alläpa tardinam kanqa! ¿Imaraq pëkunata pasanqa? Dejäda shipashkunatanömi. Aceiti ranteq ëwayanqanyaqmi, “nobioqa chärerqan, y pitsqan caq prebinida shipashcunallam tse casacuyänan wayiman yecuriyarqan. Nïcurnam, puncuta llawirayämorqan”. Jatun sufrimientupa ushënin witsanchö Jesus chämurqa, Jehoväta mana jaqipa sirweq kaqkunallatam ciëluman ëllunqa (Mateu 24:31; 25:10; Juan 14:1-3; 1 Tesalonicensis 4:17). Peru Jehoväta jaqishqa kaqkunataqa manam ëllunqatsu. Tsëqa itsa dejäda shipashkunanöpis kënö niyanqa: “¡Tëte, Tëte, quicharalläyämë!”. Peru Jesusqa, “¡qamcunataqa manam reqiyaqtsu!” nirmi contestamunqa (Mateu 7:21-23; 25:11, 12).

Ciëlupaq akrashqakunaqa kikinkunam decidiyänan mäkoq mäkoqlla këta o manapis

13. (1) ¿Mëtsikaq akrashqakuna Jehoväta jaqiyänampaq kaqtaku Jesus nikarqan? (2) ¿Imanirtaq nishwan ciëlupaq akrashqakunaman Jesus markäkunqanta? (Rikäri kë yachatsikïpa qallananchö këkaq dibüjuta.)

13 ¿Mëtsikaq ciëlupaq akrashqakuna Jehoväta jaqiyänampaq kaqtaku Jesus nikarqan? Manam. Maslla entiendinapaq Mateu librupa 24 kaq capïtulunman yarpärishun. Mana alli sirweqpaq parlarqa, manam llapanchö wiyakoq yachëwan sirweq mana alliman tikrakurinampaqtsu nikarqan, sinöqa consejëkarqanllam. Jina tsënömi chunka shipashkunapaq willakïwampis consejëkanlla. Pitsqa dejäda shipashkunanö o pitsqa previnïda shipashkunanöpis, ciëlupaq akrashqakunaqa kikinkunam decidiyänan mäkoq mäkoqlla këta o manapis. Jina Pablupis tsënöllam consejarqan ciëlupaq akrashqa mayinkunata (leyi Hebrëus 6:4-9; igualaratsi Deuteronomiu 30:19 textuwan). Sinchipam consejarqan, peru alli tsarakuyänampaq kaqman markäkunqantam nirqan. Jina tsënö markäkunqantam rikätsikun, chunka shipashkunapaq willakïwan ciëlupaq  akrashqakunata Jesus consejanqampis. Musyanmi alli tsarakurninqa, bendicishqa kayänampaq kaqta.

¿IMANÖTAQ ‘JUK KAQ ÜSHAKUNATA’ YANAPAN?

14. ¿Imachötaq juk kaq üshakunata yanapan Jesus yachatsikunqan willakï?

14 Jesus willakunqanqa, clärum rikätsikïkan mäkoq mäkoqlla kanantsikpaq. Kë willakï ciëlupaq kaqkunapaq kashqa kaptimpis, ‘juk kaq üshakunatapis’ yanapanmi (Juan 10:16, NM). Porqui Jesusmi nirqan: “Qamcunatanollam waquincunatapis canan willarï ¡imepis mäcoq mäcoqlla quecayänanpaq!” (Marcus 13:37, noqakunam yanayätsiyarqö). Jesusqa munan llapan cristiänukuna mäkoq mäkoqlla y listu këkäyänantam. Llapankunam ciëlupaq akrashqakunanöpis yachatsikïta puntaman churayänan. Peru ama dejäda shipashkunanöqa kashuntsu. Ama shuyaräshuntsu wakinkuna, noqantsikpaqwan sinchikuyänanta, preparakuyänanta y mäkoq mäkoqlla këkäyänanta. Tsëkunataqa kikintsikllam rurëta puëdintsik. Ichikllachönam Jesusqa nunakuna juzgaq shamunqa y cada ünum rurënintsikpita cuentata qoshun. Tsëmi kananllapitana listu këkänapaq previnikushun.

Ama shuyaräshuntsu wakinkuna, noqantsikpaqwan sinchikuyänanta y mäkoq mäkoqlla këkäyänanta

15. ¿Imanirtaq Jesus casakunqan llapan cristiänukunapaq alläpa kushikïpaq?

15 Llapantsikmi kushikuntsik, Jesus casakïpaq parlanqampitaqa. Armagedon pasariptinmi, ciëlupaq akrashqakunaqa Cristupa novian kayanqa (Apocalipsis 19:7-9). Y Patsachö kawaq kaqkunapis bendicishqam kayanqa, porqui tsë casakïmi rikätsin juk alli gobiernuyoq kayänampaq kaqta. Tsëmi ciëlupaq o Patsapaq karpis alleq sinchikushun mäkoq mäkoqlla y listu këkänapaq. Tsënöpam Jehovä änimanqantsik shumaq bendicionkunata chaskishun.

^ par. 9 Kë willakïchöqa, puntataqa jukmi willakun noviu sharëkämunqantana, y tsëpitaqa juk tiempuran pasan noviu chänampaq (Mateu 25:6, 10). ¿Imatataq këpita yachakuntsik? Ciëlupaq akrashqakunaqa, mäkoq mäkoqllam këkäyashqa y entiendiyashqam kë ushanan junaqkunachö Jesusqa Diospa Gobiernumpa Reyninna kanqanta. Peru chämunqanyaqqa mäkoq mäkoqllam këkäyänan.