Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Marzu de 2015

Jehoväta sirweqllawan casakïqa puëdikëkanllam

Jehoväta sirweqllawan casakïqa puëdikëkanllam

“Manam casakunäpaqnö juk Testïgutaqa tarïtsu, y soltëralla quedakïtaqa mantsämi.”

“Mana Testïgu kaq nunakunapis wakinkunaqa, alläpa kuyakoq y shumaq tratakoqmi kayan. Jinamampis Testïgu kanqätaqa manam michäkuyantsu. Y wakin turikunapitapis mas shumaqllanmi kayan.”

Tsënöllam wakin soltëru cristiänukunapis niyan. Peru alleqmi musyayan, ‘Jesucristuman creyicoqllawan’ casakuyänanta Jehovä munanqanta, tsëqa Bautizädu Testïgullawan ninanmi (1 Corintius 7:39). Tsënö këkaptinqa, ¿imanirtaq wakinkuna mana puëdikanqanta pensayan?

¿IMANIRTAQ TSËNÖQA PENSAYAN?

Wakinkunaqa tsënö pensayan, soltëru ollqukunapita soltëra warmikuna mas kayaptinmi. Y tsëqa rasumpam mëtsikaq nacionkunachö. Tantiyarinapaq, Corëachöqa cada 100 Testïgupitam 57 kaq warmi kayan y 43 kaqllam ollquqa kayan. Y Colombiachönam cada 100 Testïgupita, 66 kaq warmi kayan y 34 kaqlla ollqu kayan.

Wakin nacionkunachöqa, novium qellënin o ima qarëtapis noviapa teytakunata qaranan. Y teytakuna mana Testïgu karqa, atska qellëta o chaniyoq qarëkunatam mañakuyan. Peru atskaq wawqikunam chaniyoq qarëkunata rantita puëdiyantsu. Tsëmi, tsënö costumbriyoq nacionkunachö täraq panikunaqa, pensayan juk Testïguwan imëpis casakïta mana puëdiyänampaq kaqta. *

JEHOVÄMAN MARKÄKÏ

Tsënö pensashqa karqa, yarpë, Jehoväqa musyanmi y imanö sientikunqëkipitapis entiendinmi (2 Crönicas 6:29, 30).

Jehoväqa nin sirweqninllawan casakunapaqmi. Porqui mana allikunapitam tsapämënintsikta munan, jina noqantsikpaq ima mas alli kanqantam  musyan. Jehoväqa manam munantsu, mana allita akrarir sufrinantsikta. Profëta Nehemïaspa tiempunchömi mëtsikaq judïukuna casakuyarqan Jehoväta mana sirweq warmikunawan. Tsëmi Nehemïasqa, rey Salomonta pasanqanta yarpätsirqan. Dios kuyarnin Salomonta rey kanampaq Israelman churanqantam nirqan. Peru Jehoväta mana sirweq warmikunawanmi casakurqan y pëkunanam jutsaman ishkitsiyarqan (Nehemïas 13:23-26). Këmi rikätsimantsik, noqantsikpaqpis alli kaqllata Jehovä munanqanta. Tsëmi llapan cristiänukunata mandamarquntsik pëta sirweqkunallawan casakunapaq (Salmu 19:7-10; Isaïas 48:17, 18). Imata ruranapaq o imata mana ruranapaqpis mandamänapaq Jehovä derëchuyoq kanqantam musyantsik. Jina kuyamarnintsik y imëpis alli kanantsikta munar consejamanqantsikpitam agradecikuntsik (Proverbius 1:5).

Jehoväta mana sirweq nunawan casakuptikiqa, Jehoväta sirwikunëkitam jaqiratsishunki. ¿Manachi tsëtaqa munankitsu aw? (2 Corintius 6:14.) Yarpë, Jehoväpa consëjunkunaqa imëpis alli kanapaqmi. Tsëmi mëtsikaq Testïgukunaqa Jehoväta sirweqllawan casakuyashqa, peru wakinkunaqa manam wiyakuyashqatsu.

JEHOVÄTA SIRWEQLLAWAN CASAKÏQA PUËDIKËKANLLAM

Australiapita Maggy jutiyoq panim mana Testïguwan noviu tikrarirqan. * Y pëwan juntu kananrëkurmi reunionkunamampis ëwarqannatsu. Y tsëqa Jehoväwan amïgu kënintam ushakäratsirqan. Indiapita Ratäna jutiyoq paninam estudiaq mayinwan novia tikrarirqan. Noviunqa përëkurmi Bibliapita yachakur qallëkurqan. Tiempuwannam Ratäna paniqa, Jehoväta jaqirir juk religionman yëkurirqan noviunwan casakunanrëkur.

Camerunpita Ndengue jutiyoq paninam, 19 watayoq këkar mana Testïguwan casakurirqan. Pëqa, Testïgu sïguikunanta mana michänampaqmi änirqan. Peru ishkë semäna pasariptinllam, reunionkunaman ëwananta prohibirirqan. Kë paniqa willakun, japallanlla sientikunqanta y alläpa waqanqantam. Y cuentatam qokurirqan kawëninchö mas precisaq kaq rurëta manana puëdinqanta y llapan tiempum culpayoq sientikurqan.

Tsëqa itsa ninki: “Wakin cristiänukunaqa mana Testïguwanmi casakuyashqa y tsë nunakunaqa allim kayan”. Tsëqa rasunmi. Peru mana Testïgu nunawan casakuptikiqa, ¿Jehoväwan alli këniki allillatsuraq kanqa? ¿Imanöraq sientikunki alli kanëkita munarnin Jehovä consejashunqëkita mana wiyakunqëkipita? Jina, ¿imanöraq Jehoväqa sientikunqa? (Proverbius 1:33.)

Mëtsikaq cristiänukunam Jehovä consejakunqanta wiyakurnin Testïgullawan casakuyan. Tsëta rurayanqan alli kanqanta y Jehoväta kushitsinqantam següru kayan. Tantiyarinapaq, Japonpita Michïko jutiyoq panim, Jehovä ninqanta wiyakïta munarqan, peru familiankunaqa mana Testïgu nunawan casakunantam munayarqan. Jina rikarqanmi amïgunkunaqa Testïgupura casakoqta. Y pëqa manam majampaqnöqa tareqtsu, tsëmi alläpa llakikoq. Peru ¿imataq yanaparqan alli tsarakunampaq? Kushishqa kanampaqqa, casädu këraq mana precisanqanman yarpëmi. Y kushishqa Diosta sirwinqan mas precisaq kanqanmanmi yarpararqan (1 Timoteu 1:11, NM). Michïkoqa musyanmi, wananqantsikta Jehovä qomänapaq kaqta. Tsëmi nin, casakïta munëkarpis, Testïgu mayinta mana tarirqa, hasta tarinqanyaq soltëralla quedakï mas alli kanqanta. Tiempuwannam Michïkoqa juk alli Testïguwan casakurirqan y kushishqam këkan Jehovä ninqanta wiyakunqampita.

Jina wawqikunapis pacienciawanmi shuyaräyashqa majankunapaqnö kaqta tariyanqanyaq. Tantiyarinapaq, Australiapita Bill jutiyoq wawqim willakun, mana Testïgu shipashkunaman interesäkunqanta. Peru Testïgullawan casakïta munarmi, ni imatapis nirqantsu. Tiempuwannam Billqa, wakin panikunaman interesäkurqan y pëkunaqa manam casupäyarqantsu. Billqa 30 watapam shuyarqan pëpaqnö panita tarinqanyaq.  Imapitapis mana arrepentikunqantam nin. Kushishqam sientikun, porqui ishkan juntum yachatsikoq yarqïta, Bibliata estudiëta y Jehoväta sirwita puëdiyan. Jina warmimpa yanasankunawampis kushishqam pasariyan pëkunapis Jehoväta sirwiyaptin. Tsëmi Billqa nin, Jehovä consejakunqanta wiyakïqa casädu kawakïta sinchiyätsinqanta.

¿IMATATAQ RURËKANKIMAN SHUYARANQËKIYAQ?

Jehoväta wiyakunqëkirëkur manaraq casakuptikiqa, ¿imaraq yanapashunkiman shuyarar sïguinëkipaq? Consejakunqanta wiyakunqëkipita Jehovä alläpa kushikunqanmanmi pensanëki (1 Samuel 15:22; Proverbius 27:11). Jina imanö sientikunqëkichö yanapashunëkipaq seguïdu mañakï (Salmu 62:8). Tentacionkunata y mana alli munëkunata venci, tsënöpam Jehoväwan amïgu këniki cada junaq mas sinchiyanqa. Jehoväpaq alläpa precisaq kanqëkita yarpë. Segürum kanëki wananqëkikunaman Jehovä yarparëkanqanta. Pëqa manam majëki qoshunëkipaq änishunkitsu, peru musyanmi kushishqa kanëkipaq imanö yanapashunëkipaq kaqta (Salmu 145:16; Mateu 6:32).

Itsa Davidnö sientikunkiman. Höraqa alläpa llakishqam pëqa sientikoq, tsëmi raslla yanapëkunampaq Jehoväta mañakurqan (Salmu 143:5-7, 10). Mana yanapashunëkipaq kaqmanqa ama pensëtsu, tsëpa rantinqa, pacienciawan shuyarë mañakïnikita contestamunanta. Bibliata leyi y leyinqëkiman yarpachakï. Tsënöpam musyanki qampita Jehovä imata shuyaranqanta y unë sirweqninkunata imanö yanapanqanta. ¡Tsëmi yanapashunki pëman mas markäkunëkipaq y ninqanta wiyakunëkipaq!

Soltërukunaqa alläpam valoryoqmi cristiänu mayinkunapaq kayan. Familiakuna y jövinkunapis pëkunapitam yanapakïta chaskiyan

¿Ima mastataq rurankiman? Jehoväwan amïgu kënikitam sinchiyätsinëki y alli rikashqa këtam procuranëki. Jina wakinkunawan alli këta, alli trabajaq këta y Jehoväpa alli sirweqnin këtam procurankiman. Këkunam yanapashunki casakurninqa kushishqa kanëkipaq (Genesis 24:16-21; Rut 1:16, 17; 2:6, 7, 11; Proverbius 31:10-27). Ocupädu këta procurë yachatsikurnin y congregacionnikichö yanapakurnin. Tsëmi yanapashunki mana allikunaman mana jeqakurkunëkipaq. Billqa willakun, precursornö yanapakur kaptin soltëru kanqan tiempukunaqa raslla pasarinqantam.

Jehoväta wiyakïqa y pëta sirweqllawan casakïqa puëdikëkanllam. Testïgullawan casakunëkipaq akrarqa, Jehovätam alabantsik y kushishqam kashun. Bibliaqa willakun Jehovä ninqanta kushishqa wiyakoqkunaqa, imëyaqpis kushishqa kayänampaq kaqtam (Salmu 112:1, 3). Tsënö këkaptinqa, ‘Jesucristuman creyicoqllawan’ casakï nir Jehovä mandakunqanta ama imëpis qonqëtsu.

^ par. 7 Kë yachatsikïchöqa masqa parlashun panikunapaqmi. Tsënö kaptimpis, kë consëjuqa ollqu kaqkunatapis yanapanmi.

^ par. 13 Wakinkunapa jutinkunaqa jukmi.