Unëqa publicacionnintsikkuna, nunakunapaq o cösaskunapaq Biblia willakuptinqa, imatapis shamoq tiempupaq rikätsikunqantam parlaq. Peru kananqa, ¿imanirtaq alläpaqa tsënö rikätsikamunnatsu?

1951 wata 15 de mayu La Atalaya revistam yachatsikamurqan, nunakunapaq o cösaskunapaq o ima willakïkunapaqpis Biblia parlarqa, imata karpis shamoq tiempupaq rikätsikunqanta. Tantiyarinapaq, unë publicacionnintsikkunaqa nirqan, Jeftë, Job y Rebëcaqa ciëlupaq akrashqakunata rikätsikunqantam. Y Dëborawan Rahabna Patsapaq kaqkunata rikätsikuyanqanta (Apocalipsis 7:9). Peru kananqa manam tsënönatsu yachatsikamun. ¿Imanirtaq mana?

Porqui Bibliaqa yachatsikun, wakin nunakunaqa shamoq tiempupaq imata karpis rikätsikunqantam. Tantiyarinapaq, Gälatas 4:21-31 textuchömi apostol Pablu parlarqan ishkaq warmikuna shamoq tiempuchö pasakunampaq kaqta rikätsikunqanta. Jukqa karqan Abrahanpa sirweqnin Agarmi, y Pabluqa nirqan Israel markata rikätsikunqantam. Y juknin kaqnam karqan Abrahanpa lejïtimu warmin Sära, y pëpaqnam Pablu nirqan, Jehoväpa ciëluchö këkaq markanta rikätsikunqanta. Juk kutichönam Pabluqa nirqan, Melquisedecqa Jesusta rikätsikunqantam (Hebrëus 6:20; 7:1-3). Jina nirqanmi profëta Isaïaswan wamrankunaqa Jesusta y ciëlupaq akrashqakunata rikätsikunqanta (Hebrëus 2:13, 14). ¿Imanirtaq kënö yachatsikï alli kanqanta següru kantsik? Porqui kikin Jehovämi espïritunwan Pabluta yanaparqan tsëkunata qellqanampaq.

Pascuachö üshata wanutsiyanqanqa, juk precisaqtam rikätsikurqan (Nümerus 9:2)

Pascua üshaqa, Jesusta rikätsikunqantam Pabluqa nirqan (1 Corintius 5:7)

Biblia tsënö yachatsikuptimpis manam pensashwantsu, cada nunachö imapis pasakunqan imata karpis rikätsikunqanta. Tantiyarinapaq,  Pablum nirqan Melquisedecqa Jesusta rikätsikunqanta. Juk kutim guërrata ganarir Abrahan kutikaptin, Melquisedecqa tantata y vïnuta apapurqan. ¿Tsë tantawan vïnuqa imata karpis rikätsikunku? Pabluqa manam tsëkunapaq imatapis nirqantsu, tsëmi tsënö willakïkunapa yachatsikïnin imata rikätsikunqanta ashinapaqqa Biblia nimantsiktsu (Genesis 14:1, 18).

Jesus wanurinqampitaran, religiösukunaqa Bibliapa llapan willakïninkunam imata karpis rikätsikun nir mana kaqta yachatsikuyashqa. Juk librum nin, religiösukunaqa Bibliapa tsënö willakïninta pasëpa entiendita procurayanqanta. Ima willakïllapis precisaq cösaskunata rikätsikunqantam niyaq. Tantiyarinapaq, Bibliam willakun Jesus kawariramur discïpulunkunata yuripunqanchö, 153 pescädukunata tsariyanqanta. Y tsëpaq juk libru willakurmi, wakin religiösu nunakunaqa, tsë 153 pescädukuna imata karpis rikätsikunqanta niyanqanta nin.

Juk religiösunam qellqarqan, Jesusqa pitsqa cebäda tantallawan y ishkë pescädullawan pitsqa waranqa nunakunata mikutsinqampita. Y nirqanmi, pitsqa tantaqa Bibliapa pitsqa qallanan kaq librunkunata rikätsikunqanta, y tsë tiempuchö nunakuna cebädata trïgupita mënusta rikäyaptinmi, Antiguo Testamentuqa Nuëvu Testamentupita mana precisaqlla kanqanta nirqan. Jina nirqanmi tsë ishkan pescädukunaqa, juk reyta y juk sacerdötita rikätsikunqanta. Y juk religiösunam qellqarqan, Esaüpa mayor këninta juk mati lentëjasllawan Jacob rantinqampita. Y tsë lentejas pichu puka kashqanta Biblia niptinmi, Jesus yawarninwan llapan nunakuna ciëluta ëwayänampaq pagakunqanta rikätsikunqanta nirqan.

Peru kënö entienditsikïkunaqa manam allitsu, porqui Biblia mana niptinqa, manam musyantsiktsu tsënö kanqanta o mana kanqantapis. Tsëqa, ¿imatataq rurashwan? Juk nuna o willakï imatapis rikätsikunqanta Biblia niptinqa creintsikmi, peru mana niptinqa manam creintsiktsu.

Tsëqa, ¿imanötaq yanapamashwan Bibliapa willakïninkunata leyinqantsik? Romänus 15:4 textuchömi, Pabluqa nirqan Diospa Palabranta leyirnin shumaq yanapakïkunata tariyänampaq kaqta: problëmakunapa pasar alleq tsarakuyänampaq, shoqashqa y shuyäkïyoq kayänampaq. Tsëpita patsëmi llapan cristiänukuna ciëlupaq o Patsapaq karpis Bibliapa willakïninkunachö yanapakïta tariyashqa (Juan 10:16; 2 Timoteu 3:1).

¿Imatataq yachatsimantsik? Bibliapa willakïninkunaqa manam ciëlupaq akrashqakunallapaqtsu, Patsapaq kaqkunallapaqtsu ni juk tiempuchö kawaq cristiänukunallapaqtsu parlan. Bibliapa willakïninkunaqa, unëpita patsëmi llapan cristiänukunata yanapëkashqa. Tantiyarinapaq, Job pasanqanqa, manam Punta kaq Jatun Guërra witsanchö sufreq cristiänukunatatsu rikätsikun. Porqui unëpitam cristiänukunaqa Jobnöpis sufriyashqa y pëpaq Biblia willakunqanmi ciëlupaq o Patsapaq kaqkunatapis yanapashqa. Llapankunam rikäyashqa Jehovä kuyakïwan y llakipäkïwan tratakoq kanqanta (Santiägu 5:11).

Kanampis mëtsikaq panikunam Dëboranöpis Jehoväta mana jaqipa sirwiyan, y mëtsikaq jövinkunam Elihunöpis yachaq anciänukuna kayan. Jina Jeftënö mana mantsapakoq y kushishqa precursorkunam kayan. Y wakinkunanam, Jobnöpis Jehoväpa yanapakïninta pacienciawan shuyaräyan. Unë witsanchö Jehoväta mana jaqipa sirweq nunakunapaq willakïkunata, shoqamänapaq y shuyakïnintsik qomänapaq Bibliaman Jehovä qellqatsinqantaqa, alläpam agradecikuntsik.

Tsënömi publicacionnintsikkunaqa, Biblia willakunqankuna imakunata rikätsikunqankunataqa parlamunnatsu. Tsëpa rantinqa parlamun imakunachö mas yanapamänapaq kaqtam.