Llapan kanqanman ëwari

Qallananchö tïtulukunaman ëwë

Jehoväpa testïgunkuna

Idiömata akrë Quechua (Ancash)

¿Pensënikita cambiarinkimantsuraq?

¿Pensënikita cambiarinkimantsuraq?

JUK grüpu jövin cristiänukunam pelïcula rikaq ëwayänampaq willanakuyan. Atskaq estudianti mayinkunam rikäyashqana y alläpam gustayashqa. Cïniman chärirnam, musyariyan guërrakunata y qalapächu warmikunata rikätsikayämunampaq kaqta. ¿Imataraq rurayanqa? ¿Rikäyänampaqtsuraq quedakuyanqa?

Llapantsikmi imata karpis ruranantsikpaqqa akrarëkantsiklla. Peru akranqantsikqa, bienmi Dioswan amïguta tikraratsimashwan o chikeqnin tikraratsimashwan. Höraqa itsa imata rurëtapis munashwan, peru alleq pensarirqa, manana rurashwannatsu. Tsëqa, ¿rurëta munanqantsikta mana cumpleq kanqantsiktaku rikätsikun? ¿O allipaqtsuraq kanman?

 ¿Imëtaq pensanqantsikta cambiëqa mana alli kanman?

Jehoväta kuyarmi sirwinapaq änirquntsik y bautisakurquntsik y tsëtam cumplita munantsik. Peru chikimaqnintsik Satanasqa, Diosllapaq kënintsikta ushakätsinampaqmi alkäbulla këkan (Apoc. 12:17). Churakarquntsik Jehoväta sirwinapaq y mandamanqantsikta wiyakunapaqmi; tsëta cambiarqa kawënintsiktam peligruman churëkashwan. ¡Tsëqa llakikïpaqchi kanman!

2.600 watapitapis masnam pasarishqa, Babiloniapa reynin Nabucodonosor, örupita jatun imäginta rurarir, llapankunata adorayänampaq mandanqampita. Mana adoraq kaqkunataqa rawrëkaq hornumanmi jitayänan karqan. Sadrac, Mesac y Abednëgu jövinkunaqa Jehovällata adorarmi, rey mandakunqanta cäsuyarqantsu, tsëmi rawrëkaq hornuman jitarkuyarqan. Jehovä salvashqa kaptimpis, sirwiyanqanrëkur wanuyänampaqqa listum këkäyarqan (Dan. 3:1-27).

Profëta Danielpis manam Jehoväta äninqantaqa cambiarqantsu. Musyarqanmi mañakïkaqta rikarqa, leonkuna llawiränanman jitarkuyänampaq kaqta. Tsënö këkaptimpis, imëpis ruranqannöllam, kima kuti cada junaq Diosman mañakoq. Pëllata sirwiptinmi, Jehoväqa ‘leonkunapita’ salvarirqan (Dan. 6:1-27).

Tsënöllam kanan witsan Jehoväta sirweqkunapis, sirwiyänampaq äniyanqantaqa cambiayantsu. Africa nacionchömi, escuëlapita qarquyänan këkaptimpis, Jehoväpa testïgun jövinkuna bandërata adorëta munayarqantsu. Tsëpita ichik tiempullatam, escuëlachö yachatsiyanqanta rikaq juk precisaq nuna tsë markaman charqan y wakin jövin Testïgukunawan parlarqan. Pëkunanam mana mantsakushpa respëtuwan entienditsiyarqan, bandërata imanir mana adorayanqanta. Tsëpita patsëmi, kananqa escuëlachö Jehovä chikinqan rurëkunata rurayänampaqqa obligayannatsu.

Joseph pasanqanta rikärishun. Warminmi cancerwan illaqpita wanurirqan. Josephpa familianqa creencianta respetarqanmi. Peru warmi kaqpa familianqa mana Testïgu karmi, costumbrinkunamannö vëlëta y pampëta munayarqan. Josephmi kënö nin: “Munayanqanta rurakuyänanta mana permitinäta musyarmi, wamräkunata obligayarqan, peru pëkunapis manam munayarqantsu. Jina familiankunaqa, wayichömi costumbrinkunamannö vëlëta munayarqan. Peru noqanam nirqä, rurëta munarqa juk läduchö rurakuyänampaq. Porqui musyayarqanmi, rurayänampaq kaqqa creenciäkunapa contran kanqanta. Tsënam pasëpa mana munaptï, juk läduchö rurakuyarqan.

“Alläpa sasa y llakikïpaqmi karqan. Familiätawan noqata leyninkuna cäsukïchö yanapayämänampaqmi Jehoväta mañakurqä. Mañakïnïtaqa wiyarqanmi y imëkata nikäyämaptimpis alleq tsarakuyänäpaqmi yanapayämarqan”. Joseph wamrankunaqa manam pensayanqanta canbiayarqantsu, tsënöpam Dios mana gustanqantaqa rurayarqantsu.

¿Imëtaq pensanqantsikta cambiashwan?

32 watachö Pascua fiesta pasariptinmi, Sidon markachö Jesus këkaptin, Fenicia markapita warmi kutin kutin nirqan, warmi wamranchö demoniu këkaqta qarqurinampaq. Jesusqa manam contestarqantsu, peru discïpulunkunatam nirqan: “Diosqa cachamashqa oqracashqa üsha cuenta caquicaq israel nunacunallamanmi”. Warmi mas rogakuptinnam, kënö nirqan: “Tseqa canqa imeca wamracuna tantata miquicayaptin qochirir, allqucunata qarecoq cuentam”. Peru warminam alläpa markäkur kënö nirqan: “Rasontam ninqui, tëte. Peru imano captinpis, allqucunaqa siemprim micurilläyan dueñuncunapa mesanpita miqui shicwaqllatapis”. Tsëmi Jesusqa, warmi mañakunqannö wamranta kachakäratsirqan (Mat. 15:21-28).

Tsëta rurarqa Jehovänömi rurëkarqan, pëqa, precisaptinqa pensanqanta cambiarinmi. Tantiyarinapaq, israelïtakuna örupita wishita (becërruta) rurariyaptinmi, Diosqa ushakätsita munarqan. Peru israelïtakunapaq Moises mañakuriptinmi, pensëninta cambiarirqan (Ex. 32:7-14).

 Apostol Pablupis Jehoväpa y Jesuspa ejempluntam qatirqan. Punta kaq viäjinchö pëtawan Bernabëta, Juan Marcus jaqirirnin juk lädupa ëwakushqa kaptinmi, yapëqa Pablu apëta munarqannatsu. Peru tsëpitaqa, Juan Marcus cambiukunata rurashqa kaptin y Diospa kaqchö mas sinchikuptinmi, Pabluqa jukläyapana pensar Timoteuta nirqan: ‘Marcosta pushacamunqui willacur puriptï paypis yanapamänanpag’ (2 Tim. 4:11, NTCS).

¿Y noqantsikqa rurëkantsikku? Kuyakoq Teytantsik Jehovänömi, höraqa pensanqantsikta cambianantsik precisanqa. Tantiyarinapaq, itsa pipaqpis lluta pensëkanqantsikta cambiarishwan. Awmi, Jehoväwan Jesuspis tsëtam rurayarqan. Y noqantsik jutsasapa këkarnäqa, ¿manatsuraq imanöpa pantayanqanta cuentaman churashwan y allipana pëkunapaq pensashwan?

Itsa höraqa, Jehoväpa kaqchö rurëta munanqantsikkunachöpis cambiarishwan. Bibliapita yachakïkaqkunaqa, wakinqa bautisakuyänan fëchata, juk fëchapaqna cambiariyanman. Wakin publicadorkunanam tiempunkuna këkaptimpis, precursornö yanapakïta mantsayan. Y cristiänu ollqukunanam, sinchikuyanllatsu congregacionchö carguyoq këpaq (1 Tim. 3:1). Itsa qamtapis tsënö pasëkäshunki. Tsëqa yarpë, Jehoväqa invitëkäshunkim markanchö ima rurëllachöpis yanapakunëkipaq. Tsëqa, ¿imanirtaq jukläyana pensarnin sinchikunkitsu Jehoväta sirwinëkipaq y nunakunata yanapanëkipaq?

Höraqa, pensëkanqantsikta cambianqantsikqa allipaqmi kanqa

Africa nacionpa sucursalninchö yanapakïkaq Ëlla jutiyoqmi kënö willakun: “Betelman chärirninllaqa manam musyarqätsu ëka tiempu quedakunapaq kaqta. Jehovätam llapan shonqüwan sirwita munarqä, peru familiätapis alläpa kuyarmi llakeq kä... Peru yanaqïmi shumaq parlapämar yanapamarqan, tsëmi quedakunapaq decidirirqä. Chunka watanam Betelchö këkä, kananqa munä mas tiempu  quedakïta, y cristiänu mayïkunata mas sirwitam”.

¿Imëtaq pensëkanqantsikta cambiëqa alli kanman?

¿Yarpankiku wawqin Abelpaq Cain alläpa piñakurkunqanta? Jehoväqa musyarqanmi tsë piñakïnin mana alliman chätsinampaq kaqta, tsëmi cambianampaq nirqan, tsënöpa rikëninchö alli kanampaq. Kënömi consejarqan: “Punkullachönam jutsa munapäshurniki këkan”. Cainqa pensëninta cambiëta puëdikarpis manam rurarqantsu consëjuta mana wiyakurnin. Tsëpita pasakunqanqa alläpa llakikïpaqmi karqan; wawqintam wanuratsirqan (Gen. 4:2-8).

¿Imaraq pasanman karqan Cain pensëninta cambiaptinqa?

Rey Uzïas ruranqanqa, jina alläpam yachatsimantsik. Puntallataqa Jehoväpa amïgunmi karqan y allikunatam rurarqan, peru tsëpitaqa orgullösum tikrakurirqan. Bibliaqa willakun, sacerdötikunalla templuchö inciensuta kayayanqanman yëkïkur, pë ruranqantam. Tsëta mana ruranampaq nikäyaptimpis, rurëta munanqanta mälasmi rurarirqan. “Piñakurninmi” niyanqanta cäsukurqantsu. Tsëmi Jehoväqa, leprawan castiguëkurqan (2 Crön. 26:3-5, 16-20).

Këkunam rikätsimantsik, höraqa imatapis decidinqantsikchö cambianantsik precisanqanta. Joachimta pasanqanman yarpärishun, pëqa 1955 watachömi bautisakurqan, peru 1978 watachönam congregacionpita qarquriyarqan. 20 wata mas pasariptinmi, rasumpa arrepentikurnin, Jehoväpa testïgun yapë tikrarirqan. Tsëllaraqmi juk anciänu tapurirqan, imanir Testïgu këman kutinampaq alläpa demorashqanta. Joachimnam nirqan: “Alläpa resentïdum y orgullösum këkarqä. Llakikömi tsënö kënïta raslla mana cambianqäpita. Qarqushqa kanqä tiempuchöqa, musyarqämi Jehoväpa testïgunkunaqa rasumpa kaqta yachatsikuyanqanta”. Joachimqa cuentata qokurirmi, arrepentikurqan y imanö këninta cambiarqan.

Itsachi noqantsikpis pensëkanqantsikta cambiarishwan y imata ruranqantsiktapis juknöpana rurashwan. Peru imata cambiarpis, Jehoväta kushitsinampaq kaqllata rurashun (Sal. 34:8).