Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Octubri de 2014

Jehoväwan trabajanqantsikta valurashun

Jehoväwan trabajanqantsikta valurashun

“Diospa mincancunallam calläyä.” (1 COR. 3:9).

1. a) ¿Imanötaq Jehovä trabäjuta rikan? b) ¿Y imatataq qoshqa angelkunata?

JEHOVÄQA imëpis kushishqam trabajan (Sal. 135:6; Juan 5:17). Tsënö kushishqa kayänanta munarmi angelkunata y nunakunatapis shumaq trabäjunkuna qon. Tantiyarinapaq, imëkata kamarninmi Tsurin Jesus yanapananta jaqirqan (leyi Colosensis 1:15, 16). Bibliaqa nin Patsaman manaraq shamurnin, Jesusqa “obra ruraq maestrunö” ciëluchö kanqantam (Prov. 8:30).

2. ¿Imanötaq musyantsik Jehoväqa precisaq rurëkunaman angelkunata churanqanta?

2 Bibliaqa willakun angelkunata yanapakuyänampaq Jehovä churanqantam. Adanwan Ëva jutsata rurariyaptin Edenpita qarqurirmi, “querubinkunata churarirqan y nina espädam mana pärëpa tumakïkarqan kawatsikoq plantaman näni chaqta cuidanampaq” (Gen. 3:24). Y Apocalipsis 22:6 textunam willakun, “pasacunanpaq caqcunata sirweqnincunata musyatsin[am]paq” juk angelninta Jehovä kachanqanta.

 DIOSQA RURËNINKUNAM NUNAKUNATA QON

3. ¿Imanötaq Teytan ruranqanta Patsachö këkar Jesus qatirqan?

3 Patsachö Jesus këkarmi Teytan encarganqanta kushishqa rurarqan. Y Pëta qatirmi qateqninkunatapis precisaq rurëkunata qorqan. Y kënömi animarqan: “Nogaman rasumpa criyicurga, llapan imayca rurangäcunatam rurayanga. Tsay llapan rurangäcunapitapis mas imaycatam rurayanga, Tayta Diosman noga aywasquir yanapamuptï” (Juan 14:12, NTCN). Y rurënin precisaq kaptinmi kënö nirqan: “Junaq cuentachono carmi, cachamaqnïpa muneninta rurashaq. Paqas chäramuptinnam, pipis ima ruretapis puedenqatsu” (Juan 9:4).

4-6. a) ¿Imanirtaq agradecikuntsik Jehovä mandanqankunata Noë chipyëpa wiyakunqanta? b) ¿Imanötaq yanapamantsik Jehovä mandanqanta Moises chipyëpa wiyakunqan? c) ¿Imapaqtaq yanapakun Jehoväpa imëka rurëninkunachö yanapakunqantsik?

4 Jesus Patsaman manaraq shamuptimpis, Jehoväqa shumaq rurëkunata rurayänampaqmi nunakunata mandarqan. Adanwan Ëva mana rurayashqa kayaptimpis, wakin nunakunaqa rurayarqanmi (Gen. 1:28). Tantiyarishun, Noëtam mandarqan arcata ruranampaq, tsënöpa pë y familian salvakuyänampaq. ¡Mandanqannölla ruranqanrëkurmi noqantsikpis kanan kawëkantsik! (Gen. 6:14-16, 22; 2 Pëd. 2:5.)

5 Y Moisespis mandanqannöllam Jehoväpa carpa wayinta rurarqan y sacerdötikuna kanampaq patsätsirqan (Ex. 39:32; 40:12-16). ¿Imanötaq yanapamantsik Jehovä mandanqannölla ruranqan? Pablu entienditsikunqannömi, carpa wayiwan sacerdötikunaqa, rikätsikoq imëka allikuna shamunampaq kaqta (Heb. 9:1-5, 9; 10:1).

Jehovä mandamanqantsikta rurarqa, ruranqantsikmi Jehoväta alaban

6 Munënin cumplikanqanmannömi, sirweqninkuna rurayänampaq kaq rurëkunaqa cambiarëkan. Peru imëpis Jehovätam alaban y wiyakoq nunakunatam yanapan. Y tsënömi ciëluchö y Patsachö këkar Jesus ruranqampis yanapakurqan (Juan 4:34; 17:4). Jina tsënöllam, kanan witsan ruranqantsikkunapis Jehoväta alaban (Mat. 5:16; leyi 1 Corintius 15:58). ¿Imanötaq Jehoväta alaban?

DIOS QOMANQANTSIK RURËKUNATA VALURASHUN

7, 8. a) Willakaramï Jehoväpa sirweqninkuna kanan witsan ima rurëkunachö yanapakuyanqanta. b) ¿Imanötaq rikashwan Jehovä mandamanqantsikta?

7 ¿Manaku kushikïpaq jutsasapa këkarpis Diospa minkankuna këqa? (1 Cor. 3:9.) Asamblëa Localkuna, Yachatsikuyänan Wayikuna y sucursalkuna rurëchö yanapakoqkunaqa Noëwan Moises rurayanqan rurëkunatanömi rurëkäyan. Itsa kë rurëkunachö o Warwickchö Jehoväpa Testïgunkunapa principal oficïnankuna  rurëchö yanapakïkanki (rikäri kë yachatsikïpa qallananchö këkaq dibüjuta). Tsënö kaptinqa, alleq valurashun porqui Diospaq rurëmi. Peru juk mas precisaq rurëmi llapantsikpa kapamantsik, Diospita yachatsikï, tsëqa pëtam alaban y wiyakoq nunakunatam yanapan (Hëch. 13:47-49). Jehoväpa markanqa kë rurëta alleq cumplinapaqmi yanapamantsik, tsëmi höraqa mushoq rurëkunata chaskintsik.

8 Jehoväpa sirweqninkunaqa pë ninqannömi imëpis rurayashqa (leyi Hebrëus 13:7, 17). Itsa qallananllachöqa musyashwantsu imanir tsënö rurëkanqantsikta. Peru alleqmi musyantsik Jehovä nimanqantsiknö ruranqantsikqa imëpis allipaq kanqanta.

9. ¿Ima ejemplutataq anciänukuna qoyan cristiänu mayinkunata?

9 Anciänukunam cristiänu mayinkunata ejempluta qoyan Diospa munëninta shumaq rurayänampaq (2 Cor. 1:24; 1 Tes. 5:12, 13). Listum këkäyan ima rurëkunachöpis yanapakuyänampaq. Tukïnöpam Diospitapis yachatsikuyan. Telëfonupa, barcukuna chänankunachö y mas nunakuna kayanqan sitiukunachö yachatsikï shumaq mana yarqunampaq kaqta pensarpis, rikäyashqam alläpa alli kanqanta. Këllaman pensarishun. Alemaniachömi chuskoq precursorkuna, juk kaqqa Michael jutiyoq anciänum karqan, unëna mana yachatsikuyanqan rantikuyänan sitiukunachö yachatsikur qallëkuyarqan. Michaelmi nin: “Unënam kënöqa yachatsikuyarqätsu, tsëmi mantsapakuyarqä. Jehoväpa yanapakïninwanmi tsë qoya shumaq yachatsikuriyarqä. ¡Pëman markäkuyanqäpita y Diospita Yachatsikunapaq ninqannö rurayanqäpita alläpam kushikuyä!”. ¿Tsënöku noqantsikpis rurëkantsik? ¿Jehoväpa markan juknöpa yachatsikunapaq nimanqantsikta rurëta munëkantsikku?

10. ¿Ima cambiukunatataq Jehoväpa markan rurashqa qepa watakunachö?

10 Kë qepa watakunachöqa Jehoväpa markanqa cambiukunatam rurashqa;  sucursalkunatam wichqashqa. Tsënö rurakanqan wakin cristiänukunapaq sasa kaptimpis, allipaq kanqanqa clärum rikakushqa (Ecl. 7:8). Tsëchö yanapakoqkunaqa Jehoväpa markanchö shumaq rurëyoqmi kayan.

¿Jehoväpa markan juknöpa yachatsikunapaq nimanqantsikta rurëta munëkankiku?

11-13. Jehoväpa markan cambiukunata ruraptin, ¿imatataq wakin cristiänukuna rurayashqa?

11 Sucursalkuna wichqakaptin cristiänu mayintsikkuna rurayanqampitaqa allipam yachakushwan. Wakinkunaqa atska watakunapam nacionninchö këkaq Betelchö trabajashqa kayarqan. Juk matrimonium trabajarqan Centroamëricachö, wallkaqlla trabajayanqan Betelchö, y invitariyarqan Mëxicu Betelchö trabajayänampaqmi, tsëchöqa mëtsikaqmi trabajayaq. Rogelium nin: “Familiäkunata y amïgökunata ëwallä ninanqa sasam karqan”. Jina Mëxicu Betelta ëwaq Juanpis kënömi nin: “Mushoqnömi sientikurqä, porqui mushoq amïgukunawan, costumbrinkunawan y imanö pensayanqanwanmi yachakänä karqan”.

12 Jina Euröpachö wakin sucursalkuna wichqakaptin Alemania sucursalman ëwaq betelïtakunapaqpis sasam karqan. Suïzachö rajuyoq jirkankunata jaqirinanqa llakinëpaqmi karqan. Y qallananllachöqa Austriapita ëwakoqkunapis shumaq kawakïninkunataqa llakiyarqanmi.

13 Juk nacionta ëwakoqkunaqa yachakäyänanmi karqan mushoq posädata, mushoq yanaqiwan trabajëta, y mushoq trabäjuta. Jina yachakäyänanmi karqan mushoq congregacionta y mushoq territoriuchö yachatsikïta o hasta juk idiömachö yachatsikïtapis. Tsë rurë sasa kaptimpis, mëtsikaq betelïtakunam rurayashqa. ¿Imanirtaq rurayashqa?

“Jehoväpitam tsë invitacion shamurqan tsëmi chaskikurqä”

14, 15. a) ¿Imanötaq wakin cristiänukuna rikätsikuyashqa Jehoväwan trabajëta precisaqpaq churayanqanta? b) ¿Imanötaq pëkuna rurayanqanta qatishwan?

14 Grethelmi nin: “Kë invitaciontaqa chaskikurqä porqui Jehovätam rikätsita munä pëta kuyanqäta, manam pëpita mastsu nacionnïta, wayita o juk carguta kuyä”. Dayskanam nin: “Jehoväpitam tsë invitacion shamurqan tsëmi chaskikurqä”. Jina Andrewan Gabriëlapis kënömi niyan: “Munënïkunata jaqirïkur Jehoväta sirwiyänä höra kanqantam rikäyarqö. Y Jehovä cambiuta ruraptinqa qatinantsikllam nirmi pensayarqä”.

Mas precisaq rurënintsikqa: ¡Jehoväpa minkankuna këmi!

15 Sucursalkuna wichqakaptinqa wakin betelïtakunaqa precursor kayänampaqmi invitädu kayashqa. Tsënömi pasakurqan Dinamarca, Noruega y Suecia Betelkuna Escandinavia Betelman juntakaptin. Tsë invitaciontam chaskiyarqan Florianwan Anja, kënömi niyan: “Tsë invitaciontaqa Jehoväpita shamunqantam rikäyarqö, sasa kanan kaptimpis  kushishqam këkäyarqä. Y shonqupita patsëmi niyä, atska bendicionkunata chaskiyanqäta”. Tsënö cambiukunachö mana karnimpis, pëkuna rurayanqannö Diospa Gobiernunta puntaman churëtaqa puëdintsikmi (Is. 6:8.) Jehoväqa alläpam bendicin pëwan trabajayanqanta mëchö tsëchö këkarpis precisaqpaq churaqkunataqa.

JEHOVÄWAN KUSHI KUSHILLA TRABAJAR SÏGUISHUN

16. a) ¿Imatataq consejamantsik Gälatas 6:4? b) ¿Ima precisaq rurëtaq llapantsikpa kapamantsik?

16 Nunaqa jutsasapa karmi imëkatapis igualatsintsik. Peru Bibliaqa consejamantsik kikintsik rurëta puëdinqantsikta rikänapaqmi (leyi Gälatas 6:4). Wakintsikqa manam congregacionchö carguyoqtsu kantsik. Y manam llapantsiktsu precursor, misionëru o betelïta këta puëdintsik. Peru ama qonqashuntsu, llapantsikpam juk precisaq rurënintsik kapamantsik; Jehoväpita yachatsikï. ¿Manaku tsëqa imëka rurëpitapis mas alli kaq?

17. a) Satanaspa mundun kanqanyaqqa, ¿imakunataq michämashwan Jehoväpaq masta ruranata? b) ¿Imanirtaq tsërëkur qelanäkurishwantsu?

17 Satanaspa mundun kanqanyaqqa, itsa munanqantsikmannö Jehoväta sirwita puëdishuntsu. Peru manam tsërëkurtsu qelanäkurishwan. Familiantsikta manteninantsik kaptin, qeshyapäkur o juk cösaskuna michämashqapis, Diospa jutinpita y Gobiernumpita imë hörapis willakïtaqa puëdintsikmi. ¡Manam ichikllapaqqa churantsiktsu! Puëdinqantsikmannö yanapakunqantsikmi  masqa precisan. Jina Jehoväman mañakushun imëka rurëchö yanapakïkaq cristiänu mayintsikkunata yanapëkunampaq. Yarpäshun, Jehoväpa jutinta alabaq kaqqa pëpaqqa alläpa kuyëpaqmi.

Jehoväpa jutinta alabaq kaqqa pëpaqqa alläpa kuyëpaqmi

18. ¿Imata ruranapaqtaq listu këkänantsik y imanir?

18 Jutsa ruraq kashqapis minkankuna kanqantsiktaqa Jehovä alläpam kushikun. ¿Kë ushanan junaqkunachö Jehoväwan trabajanqantsikta valurantsikku? Tsënö kaptinqa, munënintsikta jaqirir puëdinqantsikmannö yanapakushun. Mushoq Patsa chämuptinqa llapan munanqantsiktam rurashun, y kushishqam imëyaqpis kawakushun (1 Tim. 6:18, 19).

¿Jehoväwan trabajanqantsikta valurantsikku? (Rikäri 16-18 kaq pärrafukunata)

19. ¿Imatataq Jehovä shuyëkätsimantsik?

19 Mushoq Patsamanqa chëkantsiknam, tsëmi alläpa precisan Dios Änikunqan Patsaman yëkuyänanna këkaptin israelïtakunata Moises kënö ninqanta yarpänantsik: “Jehovä Diosnikim llapan wananqëkipitapis masta llapan rurënikikunachö bendicishunki” (Deut. 30:9). Armagedon pasariptinqa, pëpaq trabajaq kaqkunatam Jehoväqa kë Patsata entregarinqa. Tsënam juk mushoq trabäjuta chaskishun; kë Patsata juk shumaq huertaman tikratsita.