Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Septiembri de 2014

Llapan tiempunkunawan sirweqkunata valurashun

Llapan tiempunkunawan sirweqkunata valurashun

“Yarpäyä Dios Yayaman marcäcur, allicunallata rurashqequitam.” (1 TES. 1:3)

1. ¿Imanötaq Pablu rikarqan Diospa rurëninkunachö allipa yanapakoqkunata?

DIOSPA rurëninkunachö allipa yanapakoqkunataqa Pablu alläpam valuraq. Tsëmi nirqan: “Yarpäyä Dios Yayaman marcäcur, allicunallata rurashqequitam y piwan mewanpis cuyanaquicayashqequitam. Tsenollam peta agradesicuyä imecata sufrirninpis, Teytantsic Jesucristu cutimunanta pasensiacur shuyaquicayanqequita” (1 Tes. 1:3). Ichikllata o atskata rurayaptimpis, shonqupita patsë rurayanqantaqa Jehoväqa alläpam valuran (Heb. 6:10, NM).

2. ¿Imatataq kë yachatsikïchö yachakushun?

2 Cristiänukunaqa imëkatam rurayashqa Jehoväta llapan tiempunkunawan sirwiyänampaq. Yachakurishun apostulkuna kawayanqan witsankuna rurayanqanta y kanan witsan cristiänukunapis imanö yanapakïkäyanqanta, y imanö yanapanapaq kaqta.

 LLAPAN TIEMPUNKUNAWAN SIRWEQ PUNTA CRISTIÄNUKUNA

3, 4. a) ¿Imanötaq punta cristiänukuna llapan tiempunkunawan Jehoväta sirwiyaq? b) ¿Imanötaq mantenikuyaq llapan tiempunkunawan sirweqkunaqa?

3 Bautisakurirninllam Jesusqa entëru Patsaman chänampaq kaq yachatsikïta yachatsikur qallëkurqan (Lüc. 3:21-23; 4:14, 15, 43). Wanuriptinnam, apostulninkuna sïguiyarqan (Hëch. 5:42; 6:7). Wakin cristiänukunaqa juk markakunachö yachatsikuyänanrëkurmi wayinkunata jaqiyarqan. Felïpim yachatsikurqan Palestïnapa markankunachö (Hëch. 8:5, 40; 21:8). Y Pabluqa karu markakunatam ëwarqan yachatsikoq (Hëch. 13:2-4; 14:26; 2 Cor. 1:19). Wakinnam Silvänunö, Marcusnö y Lücasnö Bibliata qellqayarqan o Bibliata qellqaqkunapa secretariun kayarqan (1 Pëd. 5:12). Y mëtsikaq panintsikkunam kë cristiänukunata yanapayarqan (Hëch. 18:26; Rom. 16:1, 2). Mateupita Apocalipsisyaq librukunaqa pëkuna rurayanqantam parlan y sirweqninkunata Jehovä imanö yanapanqanta y cuidanqantam rikätsikun.

4 Peru ¿imanötaq punta cristiänukuna mantenikuyaq llapan tiempunkunawan Jehoväta sirwiyänampaq? Pabluwan yanaqinkunaqa trabajayaqmi, y manam cristiänu mayinkunallapitaqa shuyaräyaqtsu. Peru tsënö kaptimpis, yanapayaqmi (1 Cor. 9:11-15). Wayinkunamanmi mikoq o quedakuyänampaq invitayaq. Llapankunam imëkanöpapis yanapayaq (leyi Hëchus 16:14, 15 y Filipensis 4:15-18).

KANAN WITSAN LLAPAN TIEMPUNKUNAWAN SIRWEQKUNA

5. ¿Ima nirqantaq juk matrimoniu llapan tiempunkunawan yanapakuyanqampita?

5 Kanan witsampis mëtsikaq cristiänukunam llapan tiempunkunawan Jehoväta sirwiyan alläpa yanapakuyan (rikäri “ Llapan tiempunkunawan sirweqkuna” recuadruta). ¿Imanötaq sientikuyan tsënö sirwita akrayanqampita? ¿Imanirtaq tapupärinkitsu? Alläpam animarishunkiman. Juk wawqim sirwirqan precursor regularnö, especialnö, misionërunö y kananqa  Betelchömi yanapakïkan. Pëmi nin: “Llapan tiempüwan yanapakunäpaq akranqäqa kawënïchö mas alli kaqmi kashqa. 18 watayoq këkarqa manam universidäman ëwëta, llapan tiempüwan trabajëta o precursor kanäpaq akrëta yacharqätsu. Sasam (ajam) karqan akranä. Peru yachakurqömi llapan tiempuntsikwan sirwinqantsiktaqa Jehovä cuentachö katsinqanta. Rurëta yachanqäkunachöqa alleqmi yanapakurqö. Tsë rurëtaqa manam puëdïmantsu karqan kë munduchö reqishqa këta akrashqa karqa”. Y warminnam kënö nin: “Imachöpis yanapakunqäqa mas poqunäpaqmi yanapamashqa. Mëtsika kutin rikäyä Jehovä pushayämanqanta y cuidayämanqanta. ¡Y tsëtaqa manam rikäyämantsu karqan yanapakoq mana yarqurqa! Jehovätam gracias niyä llapan tiempükunawan yanapakuyanqäpita”. ¿Qampis tsënö nita munankimantsuraq?

“Llapan tiempüwan yanapakunäpaq akranqäqa kawënïchö mas alli kaqmi kashqa”

6. ¿Imapitataq següru këkashwan?

6 Itsa qamqa llapan tiempïkiwan (tiempuykiwan) Jehoväta sirwita puëdinkitsu. Peru puëdinqëkimannö sirwinqëkitaqa Jehovä cuentachömi katsin. Tsëtaqa rikantsik Colösaschö cristiänukunata rurëninkunapita alabarnin jutipa Pablu saludanqanchömi (leyi Filemon 1-3). Cristiänu mayinkuna rurayanqantaqa alläpam valuraq. Jina tsënöllam Jehoväpis valuraq. ¡Y qam ruranqëkitapis valuranmi! Peru ¿imanötaq llapan tiempunkunawan yanapakoqkunata yanaparkushwan?

¿IMANÖTAQ PRECURSORKUNATA YANAPASHWAN?

7, 8. a) ¿Imatataq precursorkuna rurayan? b) ¿Imanötaq precursorkunata yanapashwan?

7 Apostulkunapa tiempunchönöllam, kanan witsan precursorkunapis congregacion sinchi kanampaq yanapakuyan. Mëtsikaqmi 70 hörakuna cada killa yachatsikuyan. ¿Imanötaq pëkunata yanaparishwan?

8 Shari jutiyoq juk precursöram kënö nin: “Cada junaq yachatsikoq yarqurnin itsa sinchinö rikakuyä. Peru animayämänantam wanayä” (Rom. 1:11, 12). Atska watapana precursöra kashqa panim congregacionninchö precursorkunapaq kënö nin: “Alläpam trabajayan, pillapis cärruwan apariptin, mikoq invitariyaptin o imallapaqpis qellëninkuna qarariyaptinqa alläpam kushikuyan. Tsëkunam rikätsin pëkunapaq yarpachakunqantsikta”.

9, 10. ¿Imatataq wakin cristiänukuna rurayashqa congregacionninkunachö precursorkunata yanapayänampaq?

9 Jina yachatsikoq yanaqarnimpis yanapëkantsikmi. Bobbi jutiyoq juk precursöram kënö nin: “Cada sëmana yanaqäyämänantam wanayä”. Jina congregacionnimpita juk precursöranam kënö nin: “Tardikunapa yachatsikuyänäpaqqa manam yanaqita tariyällatsu”. Unë precursöra kashqa y Betelchö yanapakïkaq panim kënö  nin: “Juk cärruyoq nanam kënö nimaq: ‘Yarqunëkipaq yanaqiki mana kaptinqa qayamanki yanaqänaqpaq’. ¡Pëmi precursöra kënïta salvarqan!”. Jina Sharimi kënö nin: “Yachatsikï ushariptinqa, soltëru kaqkunaqa japallankunallam quedariyan. ¿Manatsuraq invitarishwan Diosta adoranqantsik höraman? Juk rurëkunaman invitashqapis allim sientikuyanqa”.

10 Soltëra precursöra mayinkunawan sirwiyanqanman yarparmi, 50 watapanöna sirwikaq juk pani kënö nin. “Seguïdum anciänukunaqa precursorkunata watukayämaq. Salornïkunachö y trabajökunachö imanö këkäyanqätam tapuyämaq, jina musyëtam munayaq imakunaman yarpachakuyanqäta. Y wayïkunamanmi shayämoq ima wanayanqätapis rikäyänampaq”. Këqa itsa yarpätsimantsik Ëfesupita juk cristiänu familiayoq këkarnimpis yanapanqampita Pablu alläpa agradecikunqanta (2 Tim. 1:18).

11. ¿Imanötaq precursor especialkunaqa yanapakuyan?

11 Wakin congregacionkunachöqa precursor especialkunam yanapakuyan. Y mëtsikaqmi 130 höra yachatsikuyan y juk rurëkunachöpis congregacionta yanapayanmi. Tsëmi trabajayänampaqqa tiempunkuna tinkuntsu. Y yachatsikïchö ocupädu kayänampaqmi sucursal cada killa gastunkunachö yanapan.

12. ¿Imanötaq anciänukuna y wakin cristiänukuna precursor especialkunata yanapayanman?

12 ¿Imanötaq precursor especialkunata yanapashwan? Betelchö sirweq juk anciänum nirqan: “Alläpam precisan anciänukuna precursor especialkunawan parlayänan, imanö këkäyanqanta musyarnin yanapayänampaq. Gastunkunachö sucursal yanapaptinmi, wakin Testïgukunaqa pensayan alli atiendishqa këkäyanqanta y imatapis mana wanayanqanta. Peru rasun kaqchöqa tukïnöpam yanapëta puëdiyan”. Precursor regularkunanöllam pëkunapis yachatsikoq yanaqäyänanta wanayan. ¿Yanaqëta puëdinkimantsuraq?

¿IMANÖTAQ WATUKAKUR PUREQ ANCIÄNUKUNATA YANAPASHWAN?

13, 14. a) ¿Imanirtaq congregacionkunata watukaq anciänukunaman y warminkunaman yarpachakushwan? b) ¿Imanötaq kë kuyashqa cristiänukunata yanapankiman?

13 Congregacionkunata watukaqkuna y warminkunaqa Diospa kaqchö sinchim kayan y imëkatapis alli aguantayaqnömi rikakuyan. Peru pëkunapis animayänanta y yachatsikoq yanaqäyänantam wanayan. Jinamampis alläpam gustëkuyan cristiänu mayinkunawan kushishqa pasarita. Y höraqa qeshyayanmi o hospitalchöpis internaräyanmi. ¿Imanirtaq watukarintsiktsu? Yarpärishun, ‘cuyë amigun doctor Lucas’ Pablutawan yanaqinkunata cuidanqanta (Col. 4:14; Hëch. 20:5–21:18).

14 Jina congregacionkunata watukaqkuna y warminkunaqa alli amïgukunayoq këtam wanayan. Congregacionkunata watukaq wawqim kënö nirqan: “Amïgukunaqa imë animarayämänampaq kaqta musyaqnömi kayan. Tapuyämaptinmi yarpachakunqäkunapita willarï. Wiyayämaqta rikarllanam shumaq sientikurï”. Pëkunaman  yarpachakunqantsikpitaqa alläpam agradecikuyan.

¿IMANÖTAQ YANAPASHWAN BETELÏTAKUNATA?

15, 16. a) ¿Imakunatataq rurayan Betelchö y Asamblëa Localkunachö yanapakoqkuna? b) ¿Imanötaq tsë cristiänukunata yanapashwan?

15 Betelkunachö o Asamblëa Localkunachö sirweqkunaqa Diospa willakïnin më tsëman chänampaqmi alläpa precisaq rurëkunata rurayan. ¿Imanötaq yanapashwan congregacionnintsikchö o circuïtuntsikchö Betelïtakuna kayaptinqa?

16 Betelman trabajaq chärirqa itsa familiankunata y amïgunkunata llakiyanman. Tsëmi alläpa precisan wakin betelïtakuna y congregacionchö kaqkuna amïgunkuna këta procurayänan (Mar. 10:29, 30). Reunionkunaman y cada sëmana yachatsikoq ëwayänampaqqa tiempunkuna permitinmi. Peru höraqa trabäjunkuna kaptin itsa quedakuyanman. Tsëmi alläpa precisan congregacionchö kaqkuna tsëta cuentachö katsiyänan y pëta y rurayanqanta alläpa valurayanqanta rikätsiyänan (leyi 1 Tesalonicensis 2:9).

¿IMANÖTAQ YANAPASHWAN JUK NACIONPITA SHAMUSHQAKUNATA?

17, 18. ¿Ima rurëkunachötaq llapan tiempunkunawan sirweq cristiänukuna juk nacionchö yanapakuyan?

17 Wakinkunaqa markankunata jaqirirmi juk nacionkunapita yanapakoq shayämushqa. Y tsëchöqa pëkunapaq alläpa sasam juk idiömata y juk costumbrita yachakuyänan, mikïwampis (mikuywampis) yachakäyänanraqmi. ¿Imapaqtaq juk nacionta ëwayashqa?

 18 Wakinkunaqa Misionërum kayan. Y pëkunaqa yachatsikurmi tiemputa pasayan. Y congregacionchö kaqkunapis pëkunapitam yanapakïta chaskiyan. Sucursalmi cuartunkunapaq y gastunkunapaq yanapan. Wakinkunanam Betelchö sirwiyan, jina sucursalkunata, juk Idiömaman Tikratsiyänampaq Oficïnakunata, Asamblëapaq Localkunata o Yachatsikuyänan Wayikuna rurëchömi yanapakuyan. Sucursalmi o congregacionchö kaqkunam posädankuna y mikïninkuna qoyan. Betelïtakunanöllam, reunionkunaman ëwayan y yachatsikoq yarquyan, y congregacionqa alläpam kushikun.

19. ¿Imanötaq cuentachö katsishwan markantsikman llapan tiempunkunawan yanapakoq shamushqakunata?

19 ¿Imanötaq markantsikman shamushqakunata cuentachö katsishwan? Itsa mikunqantsik mikïta yachayanqatsu, tsëmi invitarninqa tapurishwan mikunqantsik mikïta llamita (yawayta) munayanqanta o imata mana mikuyanqanta. Jina idiömantsikta y costumbrintsiktam yachakïkäyan, tsëmi pacienciayoq kanantsik, atska tiemputaran wanayanqa llapan parlapanqantsikta entiendiyänampaq. Y yanaparishwanmi imanö parlana kanqanta. Yachakïta munayanqantam yarpänantsik.

20. ¿Imanötaq llapan tiempunkunawan sirweqkunata y teytankunata yanapashwan?

20 Kë llapan tiempunkunawan sirweqkunaqa, teytankuna edäyäyaptin imanö cuidayänampaq kaqta itsa yarpachakuyanqa. Teytankuna Testïgu karninqa itsa munayanqatsu wamrankuna rurëninkunata jaqiyänanta (3 Juan 4). Peru puëdiyanqantam rurayanqa cuidayänampaq y watukayänampaq. Tsënö kaptimpis, teytankunapa amänunchö täraq wakin cristiänukunam yanapariyanman. Ama qonqashuntsu llapan tiempunkunawan sirweqkunaqa precisaq rurëyoq kayanqanta (Mat. 28:19, 20). ¿Puëdinkimantsuraq edäyashqa o qeshyëkaq teytankunata yanapëta?

21. ¿Imanötaq sientikuyan llapan tiempunkunawan yanapakoqkuna cristiänu mayinkuna yanapariyaptin y animariyaptin?

21 Llapan tiempunkunawan yanapakïtaqa akrayashqa, manam imatapis tarita munartsu, sinöqa Jehoväta y nuna mayinkunata kuyarninmi. Imallachöpis yanaparinqantsikpitaqa alläpam agradecikuyan. Juk nacionchö yanapakïkaq panim kënö nin: “Gracias nir juk ichikllallan tarjëtata qoriyäshuptikillapis, yarparäyäshunqëkita y ruranqëkita valurayanqantam rikätsikun”.

22. ¿Ima ninkitaq llapan tiempuwan Jehoväta sirwipita?

22 Llapan tiempunkunawan sirwita akraqkunaqa, alli kaq kawëtam akrayashqa. Diospa gobiernunchö pëllatana imanö sirwinapaq kaqtam kananllapitana yachakuyan. Tsëqa, llapan tiempunkunawan sirweqkunataqa yanapashun y ‘Diosman marcäcur, allicunallata rurayanqanta’ valuranqantsikta rikätsishun (1 Tes. 1:3).