Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Septiembri de 2014

Chikimaqnintsik wanïqa chipyëpam ushakärinqa

Chikimaqnintsik wanïqa chipyëpam ushakärinqa

“Tsay ultimucag chiquignin contran wañuytapis jancatmi ushacätsinga.” (1 COR. 15:26, NTCN)

1, 2. a) ¿Imanötaq kawë karqan Adanwan Ëva kawar qallayanqan witsan? b) ¿Ima tapukïkunapitataq kë yachatsikïchö yachakushun?

ADANWAN Ëva kamashqa kayanqan witsanqa manam chikeqninkuna karqantsu. Jutsannaqmi kayarqan y juk shumaq huertachömi täräyarqan. Diospa tsurinkuna karmi pëwan alli amïgu kayarqan (Gen. 2:7-9; Lüc. 3:38). Rurayänampaq Dios mandanqanmi rikätsikurqan imëyaqpis kawayänampaq kaqta (leyi Genesis 1:28 *). “Patsa juntanqanyaq mirayë” nir mandanqanta cumpliyänampaqqa, manam imëyaqpis kawayänanraq precisarqantsu. Peru ‘llapan animalkunata’ cuidayänampaqmi sïqa imëyaqpis kawayänan precisarqan. Tsëtam imëyaqpis rurayanman karqan.

2 Peru ¿imanirtaq kananqa alläpa jukläya? ¿Imanirtaq  mëtsika chikimaqnintsikkuna kan y kushishqa kawakunantsikta jaqimantsiktsu? ¿Imanöpataq wanï (wanuy) chämurqan? ¿Imataraq Dios ruranqa ushakätsinampaq? Kë tapukïkunata y maskunatam Bibliaqa contestan. Yachakurishun.

JEHOVÄ CLÄRU WILLAN

3, 4. a) ¿Imatataq Adantawan Ëvata Jehovä cläru willarqan? b) ¿Imanirtaq precisarqan wiyakuyänan?

3 Imëyaq kawakïta puëdirpis, Adanwan Ëvaqa manam mana ushakaq kawëyoqtsu kayarqan. Kawayänampaqqa shütayänan, mikuyänan, upuyänan y punuyänanran karqan. Jinamampis, kawënin qoq Jehoväwan alli kar-ran kawar sïguiyänan karqan (Deut. 8:3). Mandakunqantam wiyakuyänan karqan. Tsëmi Ëvata manaraq kamarnin, Adanta kënö cläru willarqan: “Huertachö llapan plantakuna wayunqantam mikïta puëdinki, pachëki juntanqanyaq. Peru tsë alli kaqta y mana alli kaqta musyatsikoq plantapitaqa, manam mikunëkitsu, tsëta mikurqa, mikunqëki junaqmi wanunki” (Gen. 2:16, 17).

4 Tsë ‘plantaqa’ rikätsikoq, ima alli o mana alli kanqantaqa Jehovälla nita puëdinqantam. Dios rikoq kamashqa kar y concienciayoq karmi, Adanqa musyarqanna ima alli y ima mana alli kanqanta. Peru tsë plantaqa Adantawan Ëvata yarpätseq Jehoväpa pushakïnintaraq imëpis wanayanqantam. Tsë frütata mikurqa Kamaqninta, “manam mandakïnikikunata wanätsu” nikaq cuentam kanman karqan. Diospita rakikäyanqanqa kikinkunapaq y kastankunapaqpis mana allim kanman karqan. Tsëta rurarqa, Jehovä ninqannömi wanuyänan karqan.

WANÏMI CHÄRAMURQAN

5. ¿Imanirtaq Adanwan Ëva Jehoväta wiyakuyarqantsu?

5 Dios mandakunqantaqa Adanqa Ëvata willarqanmi, y Ëvaqa alleqmi musyarqan (Gen. 3:1-3). Tsëmi culebratapis wiyanqantanölla willarirqan. Peru tsë culebrapa qepanchöqa këkarqan puëdeq kë munëman y Diospita rakikashqa kë munëman ishkishqa angelmi (igualaratsi Santiägu 1:14, 15 textuwan). Munëninta logranampaqqa Satanasqa, Diospitam ulikurirqan (llullakurirqan). Ëvatam nirqan tsëta mikurqa mana wanunampaq y hasta Diosnö tikrarinampaq kaqta (Gen. 3:4, 5). Tsëta creirmi Ëvaqa frütata mikurirqan, y tsënöpam rikätsikurqan Diospita rakikashqa këta munanqanta. Qowan Adantapis mikuratsirqanmi  (Gen. 3:6, 17). ¡Satanasqa ulipärirqanmi! (Leyi 1 Timoteu 2:14.) Mana alli kanqanta musyëkarpis, Adanqa warmin ninqanta wiyarmi mikurirqan. Culebra allinö rikakuptimpis, qepanchöqa chiki Satanasmi këkarqan, pëqa ulikï mana alliman chätsikunqantam alleq musyarqan.

6, 7. ¿Imanötaq Adantawan Ëvata Jehovä juzgarqan?

6 Mana alli munëninkunarëkurmi Adanwan Ëvaqa, Jehoväpa contran churakäriyarqan. Jehoväqa llapantam rikëkarqan (1 Crön. 28:9; leyi Proverbius 15:3 *). Peru Adan, Ëva y Satanas, Pëpaq imata sientiyanqanta rikätsiyänantam jaqirqan. Kamaqnin këkarqa, alläpachi llakikurqan rurayanqampita (igualaratsi Genesis 6:6 textuwan). Peru Juez karmi leyninkunata respetatsirnin castiganan karqan.

7 Diosmi Adanta kënö nishqa karqan: “Mikurqa, mikunqëki junaqmi wanunki”. Tsëwanqa itsa Adanqa pensarqan tsë junaqlla wanunampaq kaqta. Peru Inti (Rupay) manaraq jeqaptinmi, Jehoväqa parlapar qallëkurqan (Gen. 3:8). Juez karmi, puntataqa jutsayoq kaqkuna defendikur parlakuriyänantaraq jaqirqan (Gen. 3:9-13). Tsëpitanam wanuyänampaq condenarirqan (Gen. 3:14-19). Jinan höra wanuratsiptinqa, manam nunakunapaq munanqan cumplikanmantsu karqan (Is. 55:11). Tsëmi jutsa qallëkuptimpis, Adanwan Ëva wamrayoq kayanampaq Jehovä permitirqan, tsënöpa shumaq kawakï chämunampaq. Tsënö kaptimpis, Jehoväpa rikënimpaqqa, jutsata rurayanqan junaqpitam wanushqa cuentana kayarqan. Y Jehoväpaqqa juk junaq waranqa watakunaraq kaptinmi, tsë junaqllachö wanuyarqan (2 Pëd. 3:8).

Jehoväpaqqa tsë junaqllachömi Adanwan Ëva wanuyarqan

8, 9. ¿Imamantaq nunakuna chäyashqa Adan jutsata ruranqanrëkur? (Rikäri kë yachatsikïpa qallananchö këkaq dibüjuta.)

8 Adanwan Ëva jutsata rurarninqa wamrankunatapis mana allimanmi chätsiyarqan. Porqui Romänus 5:12 textum kënö nin: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan”. Y Abelmi puntata wanurirqan (Gen. 4:8). Tsëpitanam Adanpa wakin wamrankuna y willkankunapis wanuyarqan. Tsëmi Pablu nirqan: “Dios mandashqanta Adan mana cäsuconqanrecurmi atscaq nunacuna jutsasapa ticrayashqa” (Rom. 5:19). Tsënöpam llapan nunakuna Adanpita y Ëvapita jutsatawan wanïta chaskiyashqa, y tsëkunapitaqa manam librakïta puëdiyantsu. Wamrankunata jutsata imanö muyayanqanta mana musyarpis, clärum rikantsik imanö sufritsimanqantsikta.

9 Tsënö kaptinmi, jutsapaqwan wanïpaqqa Biblia nin, llapan nunakunata shütanantapis mana permitipa “wankuraq” cuenta këkätsinqanta y llapan nacionkunachö “awashqa”  cuenta këkanqanta (Is. 25:7). Jina ninmi: “Adanpa jutsanrecur[mi] wanuntsic” (1 Cor. 15:22). Tsëmi Pabluqa nirqan: “¿Pillaraq libreconqa condenasionpita jutsasapa etsalläta!” (Rom. 7:24). ¿Pillapis Pabluta librëta puëdinmantsuraq karqan? *

WANÏPA Y JUTSAPA USHËNIN

10. a) ¿Ima textukunataq rikätsikun wanïta Jehovä ushakätsinampaq kaqta? b) ¿Imatataq Jehoväpita y Jesuspita kë textukuna yachatsimantsik?

10 Jehovämi Pabluta libranan karqan. ‘Wankuraqpaq’ parlarirmi Isaïas kënö qellqarqan: “Rasumpam wanïta chipyëpa ushakäratsinqa, y Llapan Autoridäyoq Señornintsik Jehovämi weqinkunata nawinkunapita pitsarapunqa” (Is. 25:8). Imanömi juk teyta wamrankunata imapis sufritsinqantaqa ushakäratsin y weqinkunata shumaq pitsarin, tsënömi Jehoväpis wanïta chipyëpa ushakäratsinqa. Y tsëchöqa Jesuspis yanapakunqam. 1 Corintius 15:22 textum nin: “Adanpa jutsanrecur[mi] wanuntsic, y Teyta Jesucristurecurnam wiñepa cawanapaq cawarimushun”. Jina tsënöllam Pablupis ‘pillaraq librecamanqa’ nirirnin, kënö nirqan: “¡Grasias Diosta! ¡Pemi Jesucristurecur cananqa librecamashqa!” (Rom. 7:25). Këchömi rikantsik Adanwan Ëva contran churakashqa këkäyaptimpis, Jehoväqa nunakunata kuyëkanqanllata. Jina nunakunata kamëchö yanapakoq Jesuspis kuyëkarqanllam (Prov. 8:30, 31). Peru ¿imanötaq jutsapita y wanïpita librakäyänan karqan?

11. ¿Imatataq Jehovä rurarqan nunakunata salvanampaq?

11 Jutsata ruranqampitam Jehoväqa Adanta wanunampaq condenarirqan. Tsënöpam llapan nunakuna jutsata y wanïta chaskiriyarqan (Rom. 5:12, 16). Bibliam nin: ‘Adanpa jutsanpitam llapan nunacuna condenadu quecayan’ (Rom. 5:18). Peru ¿imanötaq Jehoväqa tsëpita libranman karqan? Jesusmi nirqan: “Diospita Shamushqa Nunapis que patsaman shamushqa [...] yawarninwan nunacunata rescatananpaqmi” (Mat. 20:28). Jutsannaq karmi, Jesusqa jutsantsikpita pagakïta puëdeq. ¿Imanötaq pagakunqan Jehovä munanqanta cumplirqan? (1 Tim. 2:5, 6.)

Jesusmi jutsannaq kawëninwan, Adanpa jutsannaq kawëninta trukarirqan

12. ¿Imanötaq Jesus pagakunqan Jehovä munanqanta cumplirqan?

12 Jutsata manaraq rurar Adan imëyaqpis kawakïta puëdinqannömi, Jesuspis jutsannaq këkarninqa imëyaqpis kawakïta puëdinman karqan. Peru Jehoväpa munëninqa karqan, entëru Patsaman Adanpa jutsannaq kastankuna juntayänanmi. Tsënöpam, Jehoväta y Adanpa kastankunata kuyarnin, Adan oqranqan kawëwan igualaqta jutsannaq kawëninta, Jesus wanïman  entregarqan. Y Jehoväqa juk espïritutanönam kawaritsimurqan (1 Pëd. 3:18). Tsënö wanunqampa chaninqa, ¿Jehovä mañanqannöku karqan? Awmi, porqui Jesusmi Adanta trukarirqan. Tsë jutsannaq kawëninta wanïman entreganqanmi sirwirqan, nunakunata rantinampaq, y Adan oqranqan alli kawakïta nunakunata kutitsinampaq. Tsëtam Pablu entienditsikurqan: “‘Punta caq Adanmi caweninta Diospita chasquerqan’; peru qepa caq Adanqa nunata wiñepam cawatsin” (1 Cor. 15:45).

13. ¿Imatataq ‘qepa caq Adan’ ruranqa wanushqakunapaq?

13 Ichikllachönam “qepa caq Adanqa” o Jesusqa, Adanpa kastankunata imëyaqpis ‘cawaquita’ qonqa. Y wanushqa kaqkunatapis, kë Patsachö täräyänampaqmi kawaritsimunqa (Juan 5:28, 29).

Puntata wanoq Abelmi, Jesus pagakunqampita yanapakïta chaskinqa (Rikäri 13 kaq pärrafuta)

14. ¿Imanöraq nunakuna jutsapita librakäyanqa?

14 ¿Imanöraq nunakunaqa jutsapita librakäyanqa? Tsëpaqqa juk Gobiernutam Jehovä patsätsishqa, tsëchöqa ‘qepa kaq Adanwan’ Patsapita  akrashqa 144.000 nunakunam mandakayämunqa (leyi Apocalipsis 5:9, 10). Kë 144.000 reykunaqa jutsayoq kashqa karmi, jutsayoq kë imanö kanqanta alleq musyayanqa. Y Jesuswan paqtam Patsachö nunakunata waranqa watapa yanapayanqa jutsannaq këman chäyänampaq (Apoc. 20:6).

15, 16. a) ¿Pipita chaskinqantsik wanïpaqtaq Biblia parlan y imëtaq ushakanqa? b) 1 Corintius 15:28 textu ninqannö, ¿imatataq Jesus ruranqa?

15 Waranqa wata ushariptinmi, wiyakoq nunakunaqa wanïpita y jutsapita libri quedariyanqa. Pablum nirqan: “Adanpa jutsanrecur[mi] wanuntsic, y Teyta Jesucristurecurnam wiñepa cawanapaq cawarimushun. Peru cawarimushonqa Diosnintsic dispunishqanmannomi: Teyta Jesucristum puntata cawarimushqa, y tsemi peman creyiquicar wanushqacunatana [pëwan mandakayämunampaq kaqkunatana] [...] cawaritsimonqa. Tseno cawariratsimurnam, Satanasta y llapan pepa mandacoqnincunata castiguman jitarconqa. Tsepitanam imecatapis Dios Yayapa muneninman entreganqa. Teyta Jesucristuran mandaconqa asta llapan chiqueqnincunata sitiunman churanqanyaq. Tsepitanam permitïconqa por ultimu wanïpis manana cananpaq” (1 Cor. 15:22-26). Awmi, Adanpita chaskinqantsik ‘wanïmi’ o llapan nunakunata ‘wankuraq’ wanïmi ushakärinqa (Is. 25:7, 8).

Waranqa wata ushariptinmi, wiyakoq nunakuna wanïpita y jutsapita libri quedariyanqa

16 Tsëpitam Pablu nirqan: “Jesucristu[m] llapanta Diospa muneninman churanqa. Tsepitanam quiquin Jesucristupis tsurin carnin, Diospa mandadunman churacärenqa. Tsenam Diosllana llapanpa mandacoqnin canqa” (1 Cor. 15:28). Jesusqa ruranampaq kaqtam llapanta cumplirinqa. Tsëpitanam autoridäninta y nunakunata jutsannaqtana Jehoväta kutïkatsinqa.

17. ¿Imaraq Satanasta pasanqa?

17 ¿Imaraq tsë chikikoq Satanaswan pasanqa? Tsëtaqa Apocalipsis 20:7-15 (NM) textum willakun. Waranqa wata pasariptinmi Satanasqa tsë kutillana nunakunata ishkitsita tïranqa. Peru tsëpaqqa nunakuna jutsannaqnam kayanqa. Tsëpitanam pë y qateqnin nunakuna ushakätsishqa kayanqa. Tsë ushakëtam Bibliaqa “ishkë kaq wanï” nir qayan (Apoc. 21:8, NM). Tsëkaq wanïqa manam ni imëpis ushakanqatsu, porqui tsëchö wanoqkunaqa manam ni imëpis kawariyämunqanatsu. Jehoväta sirweq kaqkunapaq y kuyaq kaqkunapaqqa tsë ‘ishkë kaq wanïqa’ manam chikeqninnatsu kanqa.

18. ¿Imanötaq Adan ruranampaq kaq cumplikanqa?

18 Llapan nunakunam jutsannaq kayanqa y imëyaqpis kawakuyänampaqmi Jehovä aprobarinqa. ¡Manam ni ima chikeqnin kanqanatsu! Adanta ruranampaq mandayanqanqa pë mana rurëkaptimpis cumplikärinqam. Kë Patsachöqa Adanpa kastankunam junta kayanqa, animalkunata y Patsata cuidarnin. Chikimaqnintsik wanïta Jehovä ushakätsinampaq kaqta musyëqa, ¡alläpa kushikïpaqmi!

^ par. 1 Genesis 1:28: “Jinamampis Diosmi bendicirqan y Diosmi nirqan: ‘Wamrëkikuna katsun y atskaqyäyë y patsa juntanqanyaq mirayë y dominayë, jina lamarchö pescädukunata, volaq animalkunata y patsachö llapan pureq animalkunatapis dominayë’”.

^ par. 6 Proverbius 15:3: “Jehoväpa nawinqa më tsëchömi këkan, alli nunata y mana alli nunatapis rikarëkanmi”.

^ par. 9 Imanöpa awkinyanqantsikta y wanunqantsikta cientïficukuna entienditsikïta procurayanqampaq parlarninmi, Perspicacia para comprender las Escrituras nishqan libru kënö nin: “Kikin Kamakoq nunakunata wanuyänampaq condenanqanta y tsë imanö cumplikanqanta mana musyëpaqnö ruranqantam cuentaman churayantsu” (2 kaq libru 1.200 kaq pägina).