Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Agostu de 2014

¿Höranchöku mikïniki chaskikanki?

¿Höranchöku mikïniki chaskikanki?

IMË tiempupitapis mas sasa (aja) tiempukunachömi kawantsik (2 Tim. 3:1-5). Cada junaqmi Jehoväta kuyanqantsik y pë munanqannö kawanqantsik pruëbaman churakëkan. Jesusqa tsënö tiempukunapaq willakurqannam, peru qateqninkunata ushanan junaqkunayaq imëkanöpis yanapanampaq kaqtam änirqan (Mat. 24:3, 13; 28:20). Tsërëkurmi llapanchö wiyakoq y yachëwan sirweqninta churashqa ‘mikïnintsik höranchö qaramänapaq’ (Mat. 24:45, 46NM).

Llapanchö wiyakoq y yachëwan sirweq 1919 watachö nombrakanqampitam, tukï idiöma parlaq ‘wayinchö kaqkuna’ millonyëpayan Jehoväpa markanman yëkuyashqa. Y Jehoväpa yachatsikïnintam mikï (mikuy) cuentata chaskikäyan (Mat. 24:14; Apoc. 22:17). Wakin publicacionkunaqa manam llapan idiömachötsu kan, jina manam llapan nunakunatsu jw.org päginantsikchö publicacionkunata leyita y vidëukuna rikëta puëdiyan. ¿Tsërëkurtsuraq nishwan, Jehoväpa yachatsikïninta llapanta mana chaskirnin sinchi mana këkäyanqanta? Tsëta alleq entiendirinapaq chusku precisaq tapukïkunapita yachakurishun.

 1. ¿Imataq alläpa precisan Jehoväpita yachakunapaq?

Tsunyaq jirkachö rumikunata tantaman tikratsinampaq Satanas niptinmi, Jesusqa kënö nirqan: “Manam tantata micurllatsu nunacuna cawayanqa; sinoqa Dios llapan nenqanta cäsucurninmi cawayanqa” (Mat. 4:3, 4). ¿Mëchötaq Jehovä ninqankunaqa këkan? Bibliachömi (2 Pëd. 1:20, 21). Tsëmi Jehoväpita yachakunapaqqa, Biblia alläpa precisan (2 Tim. 3:16, 17).

Jehoväpa markan alistamuptinmi, Traducción del Nuevo Mundo de las Santas Escrituras Bibliataqa, llapanta kar o pullanllata karpis 120 idiömakunaman tikratsiyämushqa, y cada watam mas mirëkan. Jinamampis, juk version Bibliakunaqa waranqëpa idiömakunachömi kan. Tsë llapanqa rurakëkan Jehovä munanqannömi, porqui “pëqa munan llapan nunacuna salbacuyänantam, y rasonpa caq yachatsiquicunata musyayänantam” (1 Tim. 2:3, 4). “Llapan camashqancunapis riquenincho captinmi” següru këkantsik, ‘asheqnin kaqkunataqa’ Jehovä pushamunampaq kaqta y wanayanqan mikïta qonampaq kaqta (Heb. 4:13; Mat. 5:3, 6NM; Juan 6:44; 10:14).

2. ¿Imanötaq publicacionnintsikkuna yanapakun Diospa kaqchö mikïnintsik atska kapamänapaq?

Markäkïnintsik sinchi kanampaqqa manam Bibliata leyinantsikllatsu, sinöqa, leyinqantsiktam entiendinantsik y yachakunqantsiknömi kawanantsik (Sant. 1:22-25). Tsënömi Etiopïa gobiernupaq trabajaq nunapis entiendirqan. Diospa Palabranta leyikaptinmi, yachatsikoq Felïpi kënö tapurqan: “¿Tse leyenqequita cäyinquicu?” nir. Tsë nunanam kënö contestarqan: “¿Imanoparaq cäyishaq, pipis mana cäyicatsimaptin!” nir (Hëch. 8:26-31). Tsënam, Felïpiqa Diospa Palabranta shumaq entienditsirqan, tsënöpam kë nuna Diosta sirwita munar bautisakurirqan (Hëch. 8:32-38). Tsënöllam noqantsikwampis pasakushqa, publicacionnintsikkunam yanapamarquntsik Bibliapa rasumpa kaq yachatsikïninta alli entiendinapaq. Shonquntsikyaq chaptinmi, yachakunqantsiknö kawëta munantsik (Col. 1:9, 10).

Jehoväpa sirweqninkunaqa mëtsika yachatsikïkunatam chaskintsik (Is. 65:13). Tantiyarinapaq, Täpakoqqa 210 idiömakunapitapis maschömi yarqamun, y tsëchömi shamoq tiempupaq willakïkunata, mana musyanqantsik yachatsikïkunata y Bibliapa musyatsikïninkunamannö kawanapaq yachatsimantsik. Y ¡Despertad! revistanam 100 idiömakunachönö yarqamun, tsëchömi yachakuntsik Jehovä kamanqankunapaq y Biblia yachatsikunqanta kawënintsikchö ruranapaq (Prov. 3:21-23; Rom. 1:20). Llapanchö wiyakoq y yachëwan sirweqqa, 680 idiömakunachömi Bibliapita parlaq publicacionkunata jorqëkämun. ¿Llapan junaqkunaku Bibliata leyikanki? ¿Idiömëkichö cada yarqamoq revistata y mushoq publicacionkunata leyikankiku?

Jehoväpa markanqa manam publicacionkunallatatsu jorqamun, sinöqa reunionkunachö y asamblëakunachö yachakunapaqmi bosquëjukunatapis alistatsimun. ¿Kushishqaku asamblëakunachö wiyakunki yachakunapaq discursukunata, actuacionkunata, demostracionkunata y entrevistakunata? ¡Jehoväqa tsëchömi atska yachatsikïkunata qomantsik! (Is. 25:6.)

 3. Idiömëkichö llapan publicacionkuna mana kaptinqa, ¿Diospa kaqchö mikï pishikäpushunkitsuraq?

Manam. Jehoväpa wakin sirweqninkunapaqa, mikï cuenta Diospa yachatsikïninkunaqa masmi höraqa kayäpun. Apostulkunaman pensarishun. Pëkunaqa wakin cristiänukunapitapis mas yachatsikïkunatam chaskiyarqan (Mar. 4:10; 9:35-37). Peru manam tsërëkurtsu wakinkunaqa Jehoväpa kaqchö mallaq kayarqan; llapan wanayanqanmi kayäpurqan (Efes. 4:20-24; 1 Pëd. 1:8).

Jina Jesus Patsachö këkar llapan ninqan y ruranqankunapis manam Jesuspita willakoq chuskun librukunachöqa llapantsu yurin. Tsëmi apostul Juan kënö nirqan: “Mas atscaran can Jesus rurashqancuna. Tsecunata llapanta jucllellapayan escribiyaptenqa, que patsa manam tincunmantsu tse librucunata churayänanpaqpis” (Juan 21:25). Jesuspa qateqninkuna pëpita masta musyashqa kayaptimpis, Jehoväqa imëkatam rurashqa Jesuspita llapanta yachakur pëta qatinapaq (1 Pëd. 2:21).

Jina pensarishun apostulkuna congregacionkunaman cartakunata apatsiyanqanman. Bibliachöqa manam Pablu qellqanqan juk cartan yurintsu (Col. 4:16). Tsëqa, ¿nishwantsuraq Diospa kaqchö mikïnintsik wallka kanqanta? Manam. Jehoväqa musyanmi sinchi kanapaq imata wananqantsikta y tsë llapantam qomarquntsik (Mat. 6:8).

Jehoväqa musyanmi sinchi kanapaq imata wananqantsikta, y tsë llapantam qomarquntsik

Kanan tiempupis, itsa wakin cristiänukunapaqqa publicacionninkuna mas kayäpun. ¿Idiömëkichöqa wallkallaku publicacionkuna yarqamun? Tsënö kaptinqa, ama yarpachakïtsu, Jehoväqa imëpis cuidashunkim. Kapushunqëki publicacionkunata estudië y idiömëkichö kanqan reunionkunaman ëwëta procurë. Tsënö ruraptikiqa, Pëpa kaqchö sinchi kanëkipaqmi Jehovä yanapashunki (Sal. 1:2; Heb. 10:24, 25).

4. ¿Diospa kaqchö dëbiltsuraq tikrakurinki jw.org päginantsikchö churayämunqan publicacionkunaman yëkïta mana puëdirnin?

Internet päginantsikchöqa revistakunawan y wakin publicacionkunawanmi Bibliapita mas yachakïta puëdintsik. Jina kanmi publicacionkuna jövinkunapaq, casädukuna y wamrayoq teytakuna familiachö yachakuyänampaqpis. Jinamampis, tsëchöqa yurimun shumaq willakïkunam, Galaadchö graduacionnö o cada wata reunionta rurayanqannö. Jina tsëchöqa willakamun imëka desgraciakuna pasakunqampita y cristiänu mayintsikkuna Diospa kaqchö rurayanqankunata autoridäkuna michäyanqankunapitam (1 Pëd. 5:8, 9). Jina kë päginantsikqa alläpam yanapakun autoridäkuna michäkuyanqan markakunaman alli willakï chänampaqpis.

Internetnintsik kaptin o mana kaptimpis, Jehoväpa kaqchöqa llapantsikmi alli këta puëdintsik. Llapanchö wiyakoq y yachëwan sirweqqa alläpam trabajamushqa wayinchö kaqkuna, imprimishqa publicacionkunata katsir Jehoväpa kaqchö alli kayänampaq. Tsëmi jw.org päginaman yëkunëkirëkurllaqa computadörata o jukkunata rantinëkiraqtsu precisan. Itsachi wakinkunaqa päginantsikpita wakin yachatsikïkunata imprimiyanqa mana Internetyoq kaqkunapaq, peru congregacionkunaqa manam tsëta rurayänampaq obligädutsu sientikuyanman.

Jesusqa Diospa kaqchö llapan wananqantsikta qomänapaq änikunqanta cumplikanmi. ¡Tsëtaqa alläpam agradecintsik! Kë alläpa sasa (aja) witsankunapa ushënin chämunqanmannömi, següru këkantsik Diospa kaqchö mikïnintsikta Jehovä imëpis qoykämänapaq kaqta.