Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Agostu de 2014

 UNË IMANÖ KANQANTSIK

‘Dräma Eurëkam’ mëtsikaqta yanapashqa

‘Dräma Eurëkam’ mëtsikaqta yanapashqa

1800 witsankunam öru ashiqa Californiachö alläpa mirëkurqan. Taririrninqa “¡Eurëka!” nirmi alläpa kushikuyaq, tsë ninanqa “¡Tarïkurqö!” ninanmi. Peru Charles Taze Russell y Bibliata estudiaqkunaqa örupitapis mas alli kaqtam tariyarqan; Bibliapa rasumpa kaq yachatsikïninkunata. Y musyatsikïtam munëkuyarqan.

1914 watapaqqa, jatusaq markakunachömi 8 hörakuna duraq “Fötu-Dräma de la Creacion” nishqanta mëtsikaq rikäyarqan. Shumaq y colorchö kuyoq fötukunam rikakoq, jina vozkuna y müsicakunam wiyakaq. Tsëwanmi yachakuyarqan Dios kamar qallanqan imanö kanqanta y hasta Waranqa Watapa Cristupa Gobiernun ushanqanyaq imanö kanampaq kaqta. Tsëtaqa Bibliata Estudiaqkunam jorqayämurqan (Apoc. 20:4). *

Peru ichisaq markakunachöqa manam rikëta puëdiyarqantsu. Tsëmi rasumpa kaqta yachakïta munaq nunakunapaq, 1914 wata agostu killapaq Bibliata Estudiaqkuna “Dräma Eurëka” nishqanta jorqarayämurqan. Tsëqa “Fötu-Dräma” niraqllam karqan, peru manam pelïculan kaqtsu y fäcil-llam puritsina kaq. Kima cläsi y atska idiömakunachömi kaq. “Dräma Eurëka X” nishqanqa, grabashqa vozkunayoq y müsicayoqmi kaq. “Eurëka Y” nishqannam, grabashqa vozkunayoq y shumaq color fötukunayoq kaq. Y “Eurëka Familiar” nishqannam, willakïkunayoq y cancionkunayoq kaq. Tsëpaq mäquinakunataqa barätullachömi tariyaq.

Juk proyectormi rikätsikoq colorchö fötukunata

‘Dräma Eurëkawanqa’ karu markakunayaqmi Diospa gobiernumpita willakïta chätsiyaq. Vozyoqlla kaptinmi “Dräma Eurëka X” nishqantaqa, paqaspapis junaqpapis rikätsikïta puëdiyaq. “Dräma Eurëka Y” nishqanta rikätsikoq mäquinaqa, carbüruwan funcionaq lamparakunatam wanaq y manam electricidätaqa. Finlandes idiömachö Watch Tower revistam nirqan: “Kë ‘Dräma Eurëkataqa’ më tsëchömi rikätsikïta puëdiyaq”. ¡Rasun kaqtam nirqan!

Bibliata Estudiaqkunaqa, jatusaq localkunata arendayänampa rantinmi, colegiuchö, tren chänan sitiukunachö y wayikunapa jatusaq sälankunachö yulaq säbanakunata perqaman laqëkur  ‘Dräma Eurëkata’ rikätsikuyaq. Anthony Hambuchmi kënö qellqarqan: “Campu nunakunaqa, kullukunaman jamëkurmi kushishqa rikäkuyaq”. “Eurëka” grüpu wawqikunaqa cösasninkunata puritsiyaq carrëtakunachömi, tsëtaqa cawallukunam sutaq.

Rikäkoq ëwaqkunaqa höraqa atskaq o ichikllapis kayaqmi. Tantiyarinapaq, Estädus Unïduspa juk markanchöqa 150 nunakunam täräyaq, peru “Dräma Eurëka” rikäkoqqa 400 nunakunam juk escuëlaman ëwayarqan. Wakin markakunachöqa hasta 8 kilömetrutam rikäkoq ëwayarqan. Sueciachönam Charlotte Ahlbergpa taksha wayinchö llapan vecïnunkuna kushishqa rikäkuyarqan. Australiachönam 1.500 nunakuna unë mïna kanqan sitiuman rikäkoq ëwayarqan. Y Watch Tower revistanam willakurqan universidächö “profesorkunawan estudiantikuna rikäyanqampita y wiyayanqampita alläpa kushikuyanqanta”. ‘Dräma Eurëkaqa’ alläpa reqishqam tikrakurirqan cïnekuna kanqan sitiukunachö.

RIKÄKOQKUNATA MAS YANAPAYAN

‘Dräma Eurëkaqa’ alläpam yanapakurqan congregacionkunachö Bibliapita mas yachatsikuyänampaq. Porqui discursaqkunatam mandayaq Bibliapita yachatsita qallayänampaq. ‘Dräma Eurëkata’ ëkaq rikäyanqantaqa manam alleqllaqa musyantsiktsu, peru 1915 watapaqqa, 86 grüpukunapitam chunka chuskulla imanö këkäyanqanta willakayämurqan. Tsë wata informim nirqan, ëkaq wiyayanqan mana musyë kanqanta. Peru nirqanmi juk millonpitapis mas nunakuna rikäyashqa kayanqanta, y 30 mil nunakuna publicacionkunata mañakuyanqanta.

‘Dräma Eurëkataqa’ itsachi alläpaqa yarpäyantsu, peru Australiapita Argentïnayaq, Sudafricapita Indiayaq, Carïbichö o islas britänicas nishqanchömi mëtsika millon nunakuna rikäyarqan. Tsënömi mëtsikaq nunakuna rasumpa kaq yachatsikïta tariyashqa, örupitapis mas alli kaqta. Y “¡Eurëka!” nishpam niyarqan.

^ par. 4 Rikäri 2014 wata 15 de febrëru Täpakoq revistapa 30-32 kaq päginankunachö, “‘Fötu-Dräma’ yarqamunqampita 100 watanam pasarishqa” ninqan willakïta.