Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juliu de 2014

“Testïgömi kayanki”

“Testïgömi kayanki”

“Noqapa testïgömi kayanki [...] patsapa mas karun kaq markakunachöpis.” (HËCH. 1:7, 8, NM)

1, 2. a) ¿Pitaq mas principal kaq Jehoväpa testïgun? b) ¿Ima ninantaq Jesus juti? c) ¿Imanötaq tsë juti ninqanmannö Diospa tsurin kawarqan?

REY kanqanta willarmi, Jesusqa mana mantsakïpa Römapa mandaqnin Ponciu Pilätuta kënö nirqan: “Tsepaqmi yuricushqa cä. Rason caqta willacoqmi que patsaman shamushqa cä” (leyi Juan 18:33-37). Tsëpaqmi Pabluqa, “juk testïgunö Ponciu Pilätu lädunchö llapan nunakuna wiyayänampaq parlanqanta” nirqan (1 Tim. 6:13, NM). Awmi, Satanaspa mundunchö, “rasumpacagta parlag cumplïdu testïgu” kanapaqqa, alli valoryoqraqmi kanantsik (Apoc. 3:14, NTCN).

2 Jesusqa judïu karmi, yurikunqampita patsë Jehoväpa testïgunllana karqan (Is. 43:10). Y mas principal kaq testïgunmi tikrarirqan. Y Dios churanqan jutin ima ninan kanqanmannömi llapanta cumplirqan. Juk angelmi Josëta willarqan Diospa poderninwan Marïa qeshyaq këkanqanta y tsëpitam nirqan: “Juk ollqu wamratam qeshpikunqa y jutinnam Jesus nir churanki, pëmi markanta jutsankunapita salvanqa” (Mat. 1:20, 21, NM, nota). Yachaq nunakunam niyan, Jesus jutiqa hebrëu idiömachö Jesüa kanqanta, y tsëqa “Jehovämi salvakoqqa” ninanmi. Tsë juti ninqanmannömi  Jesusqa Israelchö “oqracashqa üsha[cunata]” yanaparqan jutsankunapita arrepentikur Jehoväwan alli këta tariyänampaq (Mat. 10:6; 15:24; Lüc. 19:10). Tsëmi Diospa Gobiernumpita chipyëpa yachatsikurqan. Marcusmi kënö qellqarqan: “Galilea marcacunaman ewar[mi] Diospa alli willaquininta Jesus yachatsicorqan queno nirnin: —Dios mandacoqniquicuna cananpaq tiempu chäramunnam. Tsemi mana alli rureniquicunata jaqirïcur, alli willaquininman creyicuyë” (Mar. 1:14, 15). Jesusqa mana mantsëpam, wanutsiyänampaq yanapakoq religiösukunapa contrampis churakarqan (Mar. 11:17, 18; 15:1-15).

‘DIOSPA ESPANTEPAQ RURENINCUNA’

3. ¿Imataq pasakurqan Jesus wanunqampita kima junaq pasariptin?

3 Peru wanunqampita kima junaqllatam, Jesustaqa mana wanoq espïritutanö Jehovä kawariratsimurqan (1 Pëd. 3:18, NM). Rasumpa kawarimunqanta creiyänampaqnam, Jesusqa nunaman tikrarir, tsë junaqllachö pitsqa kuti qateqninkunata yuripurqan (Mat. 28:8-10; Lüc. 24:13-16, 30-36; Juan 20:11-18).

4. a) ¿Imatataq Jesus rurarqan qorikashqa këkaq apostulninkunata y nunakunata yuripunqanchö? b) ¿Imata rurayänampaqtaq discïpulunkunata mandarqan?

4 Pitsqa kaq yuripunqanchönam, ëllukashqa (qorikashqa) këkaq apostulninkunata y nunakunata yuripurqan. Tsë kutichömi Jesusqa Bibliapita alli estudiatseq cuenta, “Diospa palabranta pecunata alli cäyitserqan”. Tsënöpam entiendiriyarqan Jesustaqa chikeqninkuna wanutsiyänampaq kaqta y kawarimunampaq kaqta Biblia unëpitana willakunqanta. Tsëchömi, qateqninkunata kënö nirqan: ‘Noqapa jutïchomi Jerusalenpita qallecur jinantin nasioncunapa ewar, nunacunata willapäyänëki jutsa rurayanqancunata jaqiriyaptin perdonashqa cayänanpaq’. “Qamcunam llapanta ricashqa carnin, testigoqa cayanqui”. Awmi, precisaq rurëyoqmi kayarqan (Lüc. 24:44-48, noqakunam yanayätsiyarqö).

5, 6. a) ¿Imanirtaq Jesusqa “noqapa testïgömi kayanki” nirqan? b) ¿Imatataq Jesuspa discïpulunkuna musyatsikuyänan karqan?

5 Tsëpita 40 junaqkuna pasariptin ultimuta yuripunqanchöraqchi, apostulkunaqa entiendiriyarqan Jesus kënö mandanqanta: “Noqapa testïgömi kayanki Jerusalenchö, Judëachö y Samaria markakunachö, y patsapa mas karun kaq markakunachöpis” (Hëch. 1:8, NM). ¿Imanirtaq Jesusqa Jehoväpa testïgunmi kayanki nirqantsu, sinöqa “noqapa testïgömi kayanki” nirqan? Tsëtaqa nirqan, llapan wiyaqninkuna israelïta karnin, Jehoväpa testïgunna kayaptinmi.

Jesuspa qateqninkunaqa, shamoq tiempuchö Jehovä ruranampaq kaqpitam mana jaqita willakïkantsik (Rikäri 5 y 6 kaq pärrafukunata)

6 Jehovä rurëkanqanqa manam Egiptupita y Babiloniapita markanta libranqannöllatsu karqan, kananqa Jesustam utilisëkarqan nunakunata salvanampaq. Wanunqan y kawarimunqanmi, rikätsikun wanïpa (wañuypa) y jutsapa esclävun kayanqampita nunakunata libranqanta. Tsëtanam kananqa apostulkuna musyatsikuyänan karqan. 33 wata Pentecostes fiestachömi, ciëlupaq tsëllaraq akrashqa kaqkuna ‘Diospa espantepaq rurenincunata’ musyatsikuyarqan y mëtsikaqmi chaskikuyarqan. Y salvanampaq Jesusta Jehovä churanqanman markäkur arrepentikuyanqanmannömi, Jesusqa ciëlupita patsë jutin ima ninan kanqanta mas rikätsikurirqan (Hëch. 2:5, 11, 37-41).

 ‘MAYTSICAG RUNACUNATAM SALVAN’

7. ¿Imatataq rikätsikurqan Pentecosteschö pasakunqankuna?

7 Pentecosteschö pasanqankunam rikätsikurqan, nunakunapa jutsankunapita Jesus pagakunqanta Jehovä chaskinqanta (Heb. 9:11, 12, 24). Y kikin Jesusmi nirqan, ‘maytsicag runacunata salvanampaq’ shamunqanta (Mat. 20:28, NTCN). Tsë ‘maytsicagcunaga’ manam arrepentikoq judïukunallatsu kayanqa, sinöqa Dios munanqannömi “llapan nunacuna”, porqui Jesusqa pagakun llapan ‘nunacunapa jutsancunapitam’ (1 Tim. 2:4-6; Juan 1:29).

8. a) ¿Imataq discipulukunata yanaparqan Jesuspita willakuyänampaq? b) ¿Mëyaqtaq chätsiyarqan?

8 Jesuspa discïpulunkunaqa Jehoväpa santu espïritun yanapaptinmi, valorwan pëpita willakur sïguiyarqan (leyi Hëchus 5:30-32). Pentecostes fiestapita 27 watakuna pasariptinmi, ‘Jesuspa rasonpa alli willaquininta’ “mechopis tsechopis” willakushqa kayanqanta niyarqan (Col. 1:5, 23).

9. ¿Imataq pasarqan punta congregacionta?

9 Peru punta kaq congregacionqa manam alleq tsarakurqantsu (Hëch. 20:29, 30; 2 Pëd. 2:2, 3; Jüd. 3, 4). Jesus ninqannömi, Satanasqa Diospa contran yachatsikïkunata utilisarqan alli kaq yachatsikïkunata tsapärinampaq, tsëtaqa rurarqan ‘më tsëchö imëkapis imanö [patsätsishqa] këkanqampa ushënin witsanyaqmi’ (Mat. 13:37-43, NM). Y tsëpitanam Jehoväqa, nunakunapa Mandakoqnin kanampaq Jesusta churanan karqan. Y tsëtaqa rurarqan 1914 watapa octubri killanchömi, tsë watachömi Satanaspa mundunqa ‘ushanan junaqkunaman’ yëkurirqan (2 Tim. 3:1, NM).

10. a) ¿Ima wata y ima killa alläpa precisaq kanampaq kaqtataq ciëlupaq akrashqakuna niyarqan? b) ¿Imataq 1914 watapa octubri killanchö pasakurqan y imataq rikätsikushqa?

10 Daniel librum willakun, juk jatun qeru roqukanqampita ‘qanchis tiemputaraq’ brötimunqanta. Tsë willakïta estudiashqa karmi, kanan witsan ciëlupaq akrashqakunaqa 1914 watapa octubri killan precisaq kanampa kaqta  niyarqan (Dan. 4:16). Tsë tiempupaqmi Jesus parlëkarqan, ‘Diosman mana marcäcoq caru nunacunapa’ tiempun nirnin, tsëtaqa nirqan këkämunqampaq, y ‘më tsëchö imëkapis imanö këkanqampa ushënimpaq’ parlanqanchömi. Y 1914 watapita patsëmi Cristu ‘këkämunqan’ señalqa mas cläru rikakämushqa (Mat. 24:3, 7, 14, NM; Lüc. 21:24). Tsëpita patsëmi, nunakunapa Mandakoqnin kanampaq Jesus corönata chaskinqanqa, ‘Diospa espantepaq rurenincuna’ kashqa.

11, 12. a) ¿Imatataq mushoq Mandakoq rurar qallarqan 1919 watachö? b) ¿1930 watakunachö imataq cläru rikakärirqan? (Rikäri kë yachatsikïpa qallananchö këkaq dibüjuta.)

11 Nunakunapa Mandakoqnin tikrarirqa Jesusqa rasllam, ciëlupaq akrashqakunata, “jatun Babiloniapa” librarirqan (Apoc. 18:2, 4). Y 1919 watachönam, Diosnintsik salvacionta imanö apamunampaq kaqpita y Gobiernumpita entëru Patsapa Cristu willatsikur qallarqan. Tsëtam ciëlupaq akrashqakunaqa alleq provechayarqan y tsënöpam Cristuwan mandakayämunampaq kaqkunata mëtsikaqta juntayarqan.

12 Y 1930 wata witsëpanam cläru rikakärirqan, mana yupëtapis puëdipaq kë Patsachö kawaqpaq kaqkunata më tsë nacionpita Cristu juntar qallanqanta. Y pëkunapis, ciëlupaq akrashqakunapa yanapakïninwanmi, Jesusnöpis mana mantsakushpa, Dioswan Cristu salvakoq kayanqampita willakïkäyan. Jina mana jaqita willakuyanqampita y markäkuyanqampitam, Satanaspa mundun ushakaptin, jatun sufrimientuta kawëkar pasayanqa (Juan 10:16; Apoc. 7:9, 10, 14).

ALLI WILLAKÏTA VALORWAN WILLAKUSHUN

13. a) ¿Imata ruranapaqtaq Jehoväpa testïgunnö listu këkantsik? b) ¿Y imanötaq tsëta lograshun?

13 ‘Espantepaq rurëcunata’ Jehovä ruranqampita y ruramunampaq kaqpita Testïgu kanqantsikta imëpis precisaqpaq churëkäshun. Rasunmi, tsë rurananqa manam fäciltsu. Mëtsikaq cristiänukunam nunakuna burlakuyanqan sitiukunachö yachatsikuyan; hasta qatikachashqam kayan. Apostul Pabluwan yanaqinkuna rurayanqannömi kallpata jorqanantsik, pëmi nirqan: “Diosnintsicmi yanapayämashqa mana ichicllapis mantsacurishpa alli willaquininta willayänaqpaq aunqui marquequicunacho chiquicayämaptinpis” (1 Tes. 2:2). ¡Ama mantsakushuntsu! Diosllata sirwinantsikpaq änikunqantsikta alleq cumplita procurashun Satanaspa  mundun ushakanqanyaq (Is. 6:11). Yarpäshun, manam kikintsikpa kallpantsikllawanqa puëdishuntsu, tsëmi, punta cristiänukunanöpis, Jehovä santu espïritunwan yanapamänapaq mañakunantsik (leyi 2 Corintius 4:1, 7; Lüc. 11:13).

14, 15. a) ¿Imanötaq nunakuna rikäyaq punta cristiänukunata? b) ¿Ima nirqantaq apostul Pëdru cristiänukunapaq? c) ¿Imanötaq sientikushwan nunakuna mana alli tratamashqa?

14 Kanan witsanqa mëtsikaqmi “Diostam sirwi y cristiänum kä” niyan, “peru rurenincunawanmi musyatsicuyan Dioswan mana rasonpa cayashqanta”, ‘chiquim cayan. “Allita rurashaq” nirpis, manam rurayantsu’ (Tïtu 1:16). Punta cristiänukunataqa chikiyarqanmi. Tsëmi Pëdru nirqan: “Jesucristuman creyicuyanqequirecur pipis ashayäshuptiqui cushicuyë. Porqui Diosnintsicpa puedeq Espiritunmi qamcunachoqa quecanqa” (1 Pëd. 4:14).

15 Tsëwanqa, ¿Jehoväpa testïgunkunatapis nikämantsiktsuraq? Awmi, porqui Jesuspa Gobiernumpitam yachatsikuntsik. Jehoväpa jutimpita chikishqa kanqantsikqa, ‘Jesucristuman creyicunqantsikpita’ chikishqa kënöllam. Tsëmi chikeqninkunata Jesus nirqan: “Cachamagnï Taytäpa shutinchö shamuptïmi nogata chasquiyämanquitsu” (Juan 5:43, NTCN). Tsënö këkaptinqa, yachatsikïkashqa mana alli tratamashqa ama llakikushuntsu, porqui tsëqa rikätsikun Diosnintsik chaskimanqantsikta y espïritun noqantsikchö ‘quecanqantam’.

16, 17. a) ¿Imataq entëru patsachö pasakïkan? b) ¿Imata rurartaq sïguikashwan?

16 Jina entëru Patsachömi Jehoväpa markanman mëtsikaq yëkïkäyan. Hasta imëpis yachatsikuyanqan markakunachöpis yachakïta munaqkunataqa tarïkantsikllam. Yachakïta munaqkunaman kutita y Bibliapita yachatsita procurashun Jehoväpa sirweqnin tikrayänampaq. Itsachi 60 watapana Jehoväpita yachatsikoq Sudafricapita Sarie cristiänanö sientikuntsik. Pëmi nin: “Alläpam agradecikö Jesucristu noqantsikrëkur wanunqampita, Patsachö y ciëluchöpis mandakoq Jehoväwan amïgu këta tarinqäta, y jutimpita yachatsikunqätapis”. Qowan Martinuswanmi Jehoväpa sirweqnin kayänampaq mëtsikaqta yanapayashqa; kiman wamrankunatapis. Jina Sarieqa kënömi nin: “Manam ni ima rurëpis Jehoväpita yachatsikïnöqa alläpa kushitsikuntsu, santu espïritunwanmi yanapamantsik kë salvakoq yachatsikïta willakïkänapaq”.

17 Bautisäduna kar o bautisäkunapaq estudiëkarpis, Jehoväpa testïgunkunawan juntu këkanqantsikpitaqa alläpam agradecikuntsik. Tsënö këkaptinqa, imëpis yachatsikïkäshun y Satanaspa mëlanëpaq mundumpita rakikashqa këta procurashun. Tsëta rurarmi Teytantsik Jehoväta imëpis alabëkäshun y jutinta kushishqa apëkäshun.