Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juliu de 2014

“Jehoväqa reqinmi pëpa kaqkunata”

“Jehoväqa reqinmi pëpa kaqkunata”

“Yacheyoq nunaqa Diostam cuyan, y Diospis peta reqinmi.” (1 COR. 8:3)

1. Diosta janan shonqulla sirwiman ishkiyanqampita Biblia parlanqanta willakaramï (rikäri kë yachatsikïpa qallananchö këkaq dibüjuta).

SACERDÖTIKUNAPA mandaqnin Aaronmi Jehoväpa carpa wayin yëkunachö inciensuta kayanampaq shëkarqan. Jina Corëwan 250 nunakunapis (runakunapis) inciensunkunawanmi shëkäyarqan (Nüm. 16:16-18). Llapampis Jehoväta rasumpa adoraqnömi rikakuyarqan. Peru orgullösu karmi, sacerdöti këllapaq löcuyar këkäyarqan; Aaronllam manaqa (Nüm. 16:1-11). Tsënö adorayanqanta Dios chaskinqanta pensarpis, mallaqashqa këninkunawanmi Jehoväta ofendikäyarqan. Peru shonquta rikaq karmi, Jehoväqa musyarqan ardëlla imatapis alli tukur rurëkäyanqanta (Jer. 17:10).

2. a) ¿Imatataq Moises willakurqan? b) ¿Imanötaq Moises parlanqan cumplikarqan?

2 Qanyannin junaqmi, Moises kënö willakushqa karqan: “Warë qoyam Jehovä rikätsikunqa pëpa pï kanqanta” (Nüm. 16:5). Ninqannöllam, “Jehoväpita nina shamur” “inciensuta tsararëkaq” 250 nunakunata ushakäratsirqan; clärum rikakurirqan Diospa rasumpa sirweqninkuna pikuna kayanqan (Nüm. 16:35; 26:10). Aaronqa manam wanurqantsu, tsëwanmi Jehovä rikätsikurqan rasumpa sacerdötitanö y  sirweqnintanö chaskinqanta (leyi 1 Corintius 8:3).

3. a) ¿Imataq pasakurqan Pablu kawanqa witsanchö? b) ¿Imatataq unë tiempuchö Jehovä rurashqa karqan Corëtawan qateqninkunata?

3 Apostul Pablu kawanqan witsampis, tsënöllam pasakurqan. Wakin cristiänukunaqa mana alli yachatsikoqmi tikrariyarqan, y congregacionchömi sïguiyarqan. Alli cristiänukunanö rikakuyaptimpis, Dios yachatsikunqampa contran yachatsikuyanqanqa wakinkunapaq mana allim karqan. Atoq üshatukoqnömi, wakinkunapa markäkïninkunata ushakëkätsiyarqan (2 Tim. 2:16-18). Peru cristiänu tukoq këninkunawanqa, manam Jehoväta engañayarqantsu. Tsëtam Pablupis musyarqan Corëtawan wakin nunakunata pasanqanta leyishqa karnin. Tsëpita Timoteuta parlapanqanta y imata yachatsimanqantsikta rikärishun.

“NOQAM JEHOVÄ KÄ, IMËPIS KANQÄNÖLLAM KËKÄ”

4. a) ¿Imapitataq Pabluqa següru këkarqan? b) ¿Imanö nirtaq Pablu Timoteuman qellqarqan?

4 Pabluqa musyarqanmi, janan shonqulla sirweqkunataqa Jehovä alleq reqinqanta. Tsëtam Timoteuta cläru nirqan. Diospa contran tikrashqakuna, wakin creikoqkunata mana alliman ishkikätsiyanqampaq parlarmi, kënö nirqan: “Dios churanqan mana juchoq cimientuqa këkanllam, y sëllunqa kënömi nikan: ‘Jehoväqa reqinmi pëpa kaqkunata’, y: ‘Jehoväpa jutinta parlaq kaqqa mana alli rurëkunata jaqitsun’” (2 Tim. 2:18, 19NM).

5, 6. a) ¿Imanirtaq ‘Dios churanqan mana juchoq cimientu’ ninqan palabrakunaqa alläpa jukläya? b) ¿Imanötaq Timoteuta yanaparqan Pablu ninqan?

5 ¿Imanirtaq ‘Dios churanqan mana juchoq cimientu’ ninqan palabrakunaqa alläpa jukläya? Porqui Bibliachöqa juk kutillam yurin. Peru ‘cimientu’ palabrallaqa atska kutim yurin, y Bibliaqa utilisan atska cösaskunata rikätsikunampaqmi; Jerusalenpaqmi cimientu nin, unë Israelpa capitalnin kaptin. Jina Jesuspaqpis cimientu ninmi, Diospa munënin cumplikänampaq yanapakïnin precisaptin (Sal. 87:1, 2; 1 Cor. 3:11; 1 Pëd. 2:6). Tsëqa, ¿imapaqtaq Pabluqa parlëkarqan ‘Dios churanqan mana juchoq cimientu’ nirqa?

6 Tsëtaqa Pablu parlëkarqan, Nümerus 16:5 textuchö Corëtawan qateqninkunata Moises ninqanman y pasakunqanman yarparninmi. Tsëwanmi Timoteuta yarpëkätsirqan, mana wiyakoqkunataqa Jehovä reqinqanta y munëninkunata rurakuyänanta mana permitinqanta. Munënin cumplikänanta Corë michëta manam puëdinqannöllam, Diospa contran tikrashqakunapis puëdiyänantsu karqan. ‘Dios churanqan mana juchoq cimientu’ ima kanqanta Pablu mana entienditsikushqa kaptimpis, Timoteutaqa yanaparqanmi Jehovä imëpis allillata ruranqanman markäkunampaq (yärakunampaq).

7. ¿Imanirtaq següru këkantsik Jehovä alli kaqta imëpis ruranampaq kaqta?

7 Jehovä mandakunqanqa manam imëpis cambiantsu. Salmu 33:11 textum nin: “Jehoväpa consëjunqa manam ushakanqatsu; shonqumpa pensëninqa imëyaqpis këkanqallam”. Wakin textukunapis parlan, mandakïnin, rasumpa kuyakïnin, alli rurënin y mana jaqikïnin Jehovächö imëpis këkanqantam (Ex. 15:18; Sal. 106:1; 111:3; 117:2). Malaquïas 3:6 textum nin: “Noqam Jehovä kä, imëpis kanqänöllam këkä”. Y Santiägu 1:17 textupis, “Pepa shonqunqa  manam tumacantsu noqantsicpita” ninmi.

JEHOVÄMAN MAS MARKÄKUNAPAQ YANAPAMAQNINTSIK ‘SËLLU’

8, 9. ¿Imatataq yachatsimantsik ‘sëllu’ nir igualatsikïwan Pablu parlanqan?

8 Cimientuchö sellashqa willakï këkanqantam Pabluqa 2 Timoteu 2:19 textuchö parlan. Unë witsanchö wayita rurarninqa, cimientunchömi ruraqnimpa o duëñumpa jutinta qellqariyaq. Tsë igualatsikïtam Pabluqa qellqarnin churarqan. * ‘Dios churanqan mana juchoq cimientuchöqa’ ishkë willakïmi sellashqa këkan. Juk kaqmi, “Jehoväqa reqinmi pëpa kaqkunata” nin, y juk kaqnam, “Jehoväpa jutinta parlaq kaqqa mana alli rurëkunata jaqitsun” nin. Këqa yarpätsimantsik Nümerus 16:5 * (leyi) ninqantam.

9 Jehoväpa kaqkunataqa, ¿imatataq yachatsimantsik ‘sëlluwan’ igualatsikï? Ichikllachöqa, Jehovä imanö kanqantaqa kë ishkan precisaqchömi musyarintsik y këqa manam imëpis cambiantsu: 1) pëllapaq kaqkunataqa Jehovä kuyanmi y 2) mana alli rurëkunataqa Jehovä chikinmi. ¿Peru imatataq rikätsimantsik congregacionchö Dios yachatsikunqampa contran yachatsikïkunapitaqa?

10. ¿Imanötaq cristiänukuna rikäyarqan Diospa contran tikrashqakunapa portakïninta?

10 Diospa contran tikrashqakunapa portakïninkunapitaqa, Timoteu y wakin cristiänukunaqa yarpachakuyarqanmi. Itsachi entiendiyarqantsu congregacionchö imanir sïguiyanqanta. O hasta tapukuyarqanchi, janan shonqulla sirweqkunata y shonqupita patsë sirweqkunata Jehovä rikëkanqanta o mana rikëkanqantapis (Hëch. 20:29, 30).

Diospa contran tikrashqakunanö portakoqkunata rikarpis, Timoteuqa manam qelanäkurirqantsu (Rikäri 10-12 kaq pärrafukunata)

11, 12. ¿Imanirtaq Pablu qellqanqan cartaqa Timoteuta yanaparqan?

11 Pablu qellqanqanqa Timoteutam markäkïninchö yanaparqan, porqui yarpätsirqanmi rasumpa sirweqnin Aaronta Jehovä chaskinqanta, peru alli tukoq Corëtawan qateqninkunata ushakätsinqanta. Juk parlakïchöqa Pablu nikarqan, janan shonqulla sirweqkuna  kayaptimpis, Moisespa tiempunchö reqinqannö, rasumpa sirweqninkunata Jehovä reqinqantam.

12 Jehoväqa manam cambiantsu, y markäkïpaqmi. Mana alli rurëtaqa chikinmi, y mana arrepentikuyaptinqa patsätsinqan tiempuchömi juzgan. “Jehoväpa jutinta” parlaptinmi, Pabluqa Timoteu nirqan ‘mana alli rurëkunata jaqinampaq’, y cristiänu tukoqkunapa costumbrinta mana permitinampaq. *

JEHOVÄQA SHONQUPITA SIRWEQKUNATA BENDICINMI

13. ¿Imapitataq següru këkantsik?

13 Pablu qellqanqanqa yanapamantsikmi. Porqui kushikïpaqmi pëllata rasumpa kuyanqantsikta Jehovä cuentachö katsinqanta musyëqa. Manam kushishqallatsu rikarämantsik, sinöqa pëpa kaqkunataqa precisaqpaqmi churamantsik. Tsëmi Bibliaqa nin: “Jehoväpa nawinkunaqa entëru patsapam rikarëkan pëllata llapan shonqunkunawan kuyaqkunata kallpanwan yanapanampaq” (2 Crön. 16:9). Tsëmi “alli shonquntsicwan” Jehoväpaq ruranqantsikkunaqa envänutsu kanqa, bendicishqam kashun (1 Tim. 1:5; 1 Cor. 15:58).

14. ¿Imanö adoraciontataq Jehovä chaskintsu?

14 Jina kushikïpaqmi, adoraq tukoqkunata Jehovä mana chaskinqanta musyëpis. Jehoväqa “entëru patsapam rikarëkan”, tsënöpam pikuna shonqupita patsë mana adoraqkunata rikan. Proverbius 3:32 textum nin, ‘mana allita ruraqtaqa’ o pakëllapa jutsata rurëkar adoraq tukoqkunata Jehovä chikinqanta. “Manam jutsata rurätsu” nir juk tiempupa engañakuyaptimpis, llapanta puëdeq y alli ruraq Jehoväqa clärum kënö nin: “Jutsankunata pakaqqa manam alli kawëta tarinqatsu” (Prov. 28:13; leyi 1 Timoteu 5:24 y Hebrëus 4:13).

15. ¿Imatataq pensanantsiktsu, y imanir?

15 Cäsi llapan cristiänukunam shonqupita Jehoväta sirwiyan. Casual-llam imatapis chaskita munarninlla, Moisespa y punta cristiänukunapa tiempunchönö, Jehoväta adoraq tukuyanman (2 Tim. 3:1, 5). Peru tsënö kaptimpis, manam allitsu kanman cristiänu mayintsikkunapaq “janan shonqullam Jehoväta sirwiyan” nir pensanqantsikqa (leyi Romänus 14:10-12 y 1 Corintius 13:7). Rasumpa kaqchöqa, tsënö desconfianqantsikqa Diosnintsikwan amïgu kënintsiktam mana alliman chäratsinman.

16. a) ¿Imatataq rurashwan Diosta janan shonqulla sirwïkanqantsikta mäkur raslla altsanapaq? b) ¿Imatataq yachatsimantsik “ Pruebacugnö shumag tantiyacuyay” nishqan recuadru?

16 Cada cristiänum rikäkunan “allita o mana allita” rurëkanqanta (Gäl. 6:4). Jutsasapa karnin, itsa tantiyashwantsu Diosta janan shonqulla adorar qallëkanqantsikta (Heb. 3:12, 13). Tsëmi, imanir sirwinqantsikta alleq rikäkunantsik. Kënömi tapukushwan: “¿Jehovätaqa adorä kuyarninku? ¿Ciëluchöpis y Patsachöpis autoridäyoq kaptinku? ¿O Mushoq Patsachö alli kawakïta munarllaku?” (Apoc. 4:11). Kë tapukïkunaman yarpachakunqantsikmi yanapamäshun janan shonqulla sirwïkanqantsikta mäkur raslla altsanapaq.

ALLI SHONQUWAN SIRWIQA KUSHIKÏTAM APAMUN

17, 18. ¿Imanirtaq alli shonquntsikwan Jehoväta adorashwan?

17 Alli shonquwan Diosta adorarninqa kushishqam kashun. Porqui Salmu 32:2 textum nin: “Kushishqam nuna  kanqa pëchö ima mana allitapis Jehovä mana tariptin, y espïritunchö engäñu mana kaptin”. Awmi, ardëlla adoraq tukuyanqampita shonqunkunata limpiaqkunaqa, kanan y shamoq tiempuchöpis kushishqam kayanqa.

18 Tiempunchömi Jehoväqa rikätsikunqa pakëllapa jutsa ruraqkuna pikuna kayanqanta. Clärum rikakurinqa ‘mana alli ruraqpita, alli ruraq nuna jukläya kanqan, y Diosta mana sirweqpita Diosta sirweq jukläya kanqan’ (Mal. 3:18). Tsëyaqqa, alli ruraqkunata Diosnintsik rikarëkanqanta, y mañakïninta wiyanqanta musyanqantsikmi animamantsik (1 Pëd. 3:12).

^ par. 8 Apocalipsis 21:14 textupis ‘chunca ishque sementu rumicunachö’ apostulkunapa jutinkuna qellqarëkanqantam nin.

^ par. 8 Nümerus 16:5: “Tsënam Corëta y pëwan llapan këkaq nunakunata parlapar kënö nirqan: ‘Warë qoyam Jehovä rikätsikunqa pëpa pï kanqanta y pï santu y pï pëman witinampaq kaqta, y pitapis pë akranqan kaqmi pëman witinqa[‘]”.

^ par. 12 Qateqnin kaq yachatsikïchönam rikäshun, mana alli rurëkunata Jehovänö chikinapaq.