Llapan kanqanman ëwari

Qateqnin kaqman ëwë

Qallananchö tïtulukunaman ëwë

Jehoväpa testïgunkuna

Quechua (Ancash)

Täpakoq (yachakunapaq)  |  Juniu de 2014

Nänikita limpië poqu cristiänu kanëkipaq

Nänikita limpië poqu cristiänu kanëkipaq

BABILONIAPITA 537 watachö (m.J.sh.) israelïtakuna yarqarayämunqanllachömi, Jehoväqa yarpachakurqan Jerusalenta kutiyänampaq kaq näni imanö këkanqanman. Kënömi nirqan: “Kichayë nunakunapa näninta. Pampatsäyë nänita. Rumikunata nänipita jorqayë” (Is. 62:10). ¿Judïukuna Jehovä mandanqanta wiyakuyarqanku? Itsa juk grüpu puntata ëwayarqan nänichö uchkukunata tsapar y limpiar, tsënöpa qepata ëwaq kaqkuna fäcil-lla pasayänampaq.

Israelïtakuna ëwayanqan nänitaqa igualatsishwan, Diospa kaqchö masta rurëta munanqantsiktawanmi. Jehoväqa munan, llapan sirweqninkuna, rurëta munayanqanta imamampis mana yarpachakushpa cumpliyänantam. Tsëmi Palabranchö kënö nimantsik: “Chakikipa näninta altsapë y llapan nänikikunapis segürum kanqa” (Prov. 4:26). Kë consëjuqa llapantsiktam yanapamantsik.

NÄNIKITA LIMPIË ALLITA AKRARNIN

Pï jövinpaqpis parlarninqa nunakuna kënömi niyan: “Imëkatam rurëta puëdin” o “imëkataraq rurëkunqa”. Porqui jövin karninqa alli saludyoqmi kayan, imëkatam yachayan y imëkatam tarïta munayan. Tsëmi Bibliapis kënö nin: “Jövinkunapa shumaq këninqa kallpanmi” (Prov. 20:29). Juk jövin yachanqanta y kallpanta Diosta sirwinampaq utilisarqa, Diospa kaqchö mastam rurëta puëdinqa y rasumpa kushikïtam tarinqa.

Kë munduchöqa, jövinkuna imëkata rurëta puëdiyanqantam masqa rikäyan. Testïgu jövinkuna alli nötakunata jorqayaptinmi consejaqninkuna, profesorninkuna o estudiaq mayinkuna jatusaq estudiukunaman ëwayänampaq y kë munduchö mas reqishqa kayänampaq niyan. O ima pukllallachöpis alli yachaptinqa, itsachi tsëllachöna mas tiemputa pasanampaq niyanman.  ¿Qampis tsëpa pasarqunkiku? ¿Tsënöpa pasëkaqta pillatapis reqinkiku? ¿Imataq juk cristiänuta yanapanman alli kaqta akranampaq?

Bibliapa yachatsikïninkunaqa alli kaq nänipa purinëkipaqmi yanapashunki. Eclesiastes 12:1 textum kënö nin: ‘Kanan jövin kënikichö yarpë Kamashoqnikita’. ¿Imanötaq Kamakoqnikita ‘yarpankiman’? Rasumpa kaqchöqa, ¿imanötaq llapantsikpis yarpashwan?

Africachö Ericta * pasanqanman pensarishun. Pëtaqa pelöta pukllë alläpam gustëkoq, tsëmi 15 watayoqllaraq këkaptin markanchö juk equïpuchö pukllanampaq contratëta munayarqan. Tsënöpam, Euröpachö ichik tiempullachö mas yacharatsiyanman karqan futbol pukllaqkunachö mas reqishqa kanampaq. Peru, ¿yanapanmantsuraq karqan “yarpë Kamashoqnikita” neq consëjuta wiyakunampaq? Rikärishun Eric imata akranqanta y ruranqampita imata yachakunqantsikta.

Escuëlallachöraq këkarmi, Ericqa Jehoväpa testïgunkunawan Bibliata estudiar qallëkurqan y yachakurirqan nunakunapa llapan problëmantaqa Jehovälla altsanampaq kaqta. Tsëmi cuentata qokurirqan, Diospa munëninta ruranampaqqa tiempunta y kallpanta utilisänan precisanqanta. Y alli pukllaq kanampa rantinmi, bautisakurirqan y Diospa kaqchö poqur qallëkurqan. Tiempuwannam siervu ministerial tikrarirqan, y tsëpitanam Soltërukuna Bibliapita Yachakuyänampaq Escuëlaman invitariyarqan.

Pukllata akrarninqa, itsa reqishqa y qellëyoq kanman karqan. Peru pëqa musyarqanmi Biblia kënö ninqan rasumpa kanqanta: “Rïcupa väleq cösasninkunaqa sinchi markanmi y pensëninllachöqa imëka tsapäkoq perqa cuentam” (Prov. 18:11). Awmi, nunata qellë segürutanö sientitsinqanqa manam rasumpatsu. Porqui imëkanöpis rïcu këta procuraq nunakunaqa ‘llutepa sufrimientucunatam’ pasayan (1 Tim. 6:9, 10).

Kushikïpaqqa, mëtsikaq jövinkuna llapan tiempunkunawan Jehoväta sirwiyanqanrëkur, següru y kushishqa sientikuyanqanmi. Ericmi kënö nin: “Kananqa juk equïpu cuentam, precursorkuna yanaqïkuna kayan. Jehovätam alläpa agradecikö kushikïman y imapis allilla yarqapamänampaq kaq nänichö sïguinapaq yanapamanqampita”.

¿Qamqa imatataq rurëkanki? Kë munduchö imëka munanqëkita tarita procuranqëkinöqa, ¿imanirtaq nänikita firmiyätsinkitsu precursor karnin? (Rikäri “ Universidä mana qoshunqëki kaq” neq recuadruta.)

TSAPÄSHOQNIKITA JORQË

Estädus Unïduschö sucursalta juk parëja watukarmi, betelïtakunata kushishqata rikäyarqan, y tsëmi yarpachakuriyarqan. Tsëpitanam paniqa kënö qellqarqan: “Imëkayoq kawakïtam yachakäriyänaq kayä”. Qowanwan ishkanmi Jehoväta mas sirwiyänampaq kallpachakuyarqan.

Qallananllachöqa cambiukuna rurayänan sasaraqmi karqan. Peru juk junaqnam cada junaqpaq textuta leyiyanqanman yarpachakuyarqan. Juan 8:31 textum karqan y kënömi nin: “Sitsun yachatsicushqäcunata cäsucur siempri cacuyanqui, rasonpa disipulücunam ticrariyanqui”. Tsëmi, “kapamanqantsikllawan kawakunapaq patsätsinqantsikqa, alli kanqa” niyarqan. Jatun wayinkunata rantikurirmi yanapakïta mas wanayanqan congregacionman ëwakuyarqan. Kananqa precursormi kayan y Diospita Yachatsikuyänan Wayikunata rurar y jatun asamblëakunachöpis yanapakuyanmi. Imanö sientikuyanqampitaqa kënömi niyan: “Kapayämanqanllawanmi kushishqa kawakuyä, y Jehoväpa markan ninqannöllam rurëkäyä”.

POQU CRISTIÄNU KËMAN APAKOQ NÄNICHÖ QUEDAKÏ

Salomonmi kënö qellqarqan: “Nawikiqa puntallamanmi imëpis rikaränan, awmi, chipapäkoq nawikiqa mana kuyïtam puntëkillaman imëpis rikaränan” (Prov. 4:25). Juk chofer cärruta manijarqa puntan carretëratam alli rikaran, tsënöllam noqantsikpis permitishwantsu imapis Diospa kaqchö masta ruranata michämänata.

¿Ima mastaq Diospa kaqchö rurëkuna kanman? Tantiyarinallapaq, llapan tiempuwan Diosta sirwi. Jina mas yachatsikoqkunata wanayanqan amänuntsikchö këkaq congregacionman  yanapakoq ëwë, o atska yachatsikoqkuna kaptimpis, wanayanmi mas anciänukunata y siervu ministerialkunata. ¿Yanapakunkimantsuraq? ¿Imanirtaq congregacionkunata watukaq anciänuwan parlarinkitsu? Karu markakunachö yanapakïta munarqa, mëqan congregacionchö yanapakïta wanayanqanta niriyäshunëkipaq mañakunkimanmi. *

Isaïas 62:10 textu willakunqanman yapë yarpärishun. Wakin kaq Israelïtakuna següru markankunata kutiyänampaqqa, nänita kichar y pampatsar itsa wakin kaq judïukunaqa alläpa trabajayarqan. ¿Allipaqtsuraq karqan? Awmi, Jerusalenmanqa allim chäyarqan. Qampis Diospa kaqchö mas rurëta kallpachakïkarqa, ama qelanëtsu. Jehoväpa yanapakïninwanqa masta rurëta puëdinkim. Imapis tsapäshunëkita ama permititsu y yachëniki qoshunëkipaq Diosta mañakï. Y ‘chakikipa näninta altsapänëkipaq’ yanapashunqëkitaqa musyarinkim (Prov. 4:26).

^ par. 8 Rasumpëpa jutinqa jukmi.

^ par. 18 Rikäri Organizados para hacer la voluntad de Jehová nishqan libruta, 111 y 112 kaq päginakunachö.